Thursday, February 15, 2007

C.T.A

فاكرين زمان اول ما الأوتوبيس المكييف اللي بيسموه
ابتدي يشتغل كان شكله ايه؟ C.T.A
و كانت ميزاته قد ايه و ده كان السبب ان الناس كانت بتدفع
ال2 جنيه تمن التذكره و هي راضيه00
هفكركوا ببعض مميزاته لأنكوا اكيد نسيتوها00
كان السواق بيلبس يونيفورم نضيف و جزمه
كان الأوتوبيس مواعيده لحد ما مظبوطه
كانت الساعه اللي في الأوتوبيس علي طول صح و بالثانيه
كان بيعلق يافطه مكتوب عليها كامل العدد
كان في اكتر من مفتش بيطلع يشوف التذاكر
كان الفرش بتاع الكراسي بيتغسل و نضيف علي طول
و اكيد في حاجات تانيه كتير بس انا مش فاكره00
المحزن ان الأوتوبيس المكييف ده دلوقتي
تحول لأوتوبيس نقل عام00
التكييف اغلب الوقت بايظ
السواق بقي يلبس اي لبس مش نضيف
و يافطة كامل العدد اختفت و بقي الناس تقف
و تبقي مشحونه زي ميكروباصات الجمعيه
و الساعه اللي متلقه بقت مكسوره
و ممكن تفضل واقف بالساعه الا ربع و الأوتوبيس ما يجيش
و فرش الكراسي مش نضيف و متقطع00
ليه لما بيكون عندنا حاجه كويسه مش بتفضل كويسه
الكلام ده بينطبق علي كل حاجه حتي المنتج00
يعني تلاقي بسكوت كذا اول ما يطلع يبقي جميل
و شويه شويه يختلف و بعدين يبقي الضد00
انا ما بحملش هيئة النقل المسؤليه الكامله
انما بحملهم اللي الناس ملهاش ذنب فيه00
انما في مسؤليه علي الركاب المخربين اللي
مش بيحافظوا علي الجماليات اللي حوالينا00
يا جماعه احنا ما بنصدق ان حاجه كويسه تتعمل
لخدمتنا00يبقي المفروض بقي نمسك فيها بايدينا
و سننا00و لا نخربها؟؟؟؟؟؟؟؟؟؟؟؟؟؟
سلام

11 comments:

Diyaa' said...

عشان مصر بلد مش متربية
تعرفي بقي الميزة اللي فيه إيه دلوقتي
من وجهة نظر بعض الشباب يعني
انه مكان رخيص وجميل للمتعة الحرام
هي دي مصر يا عبلة

يا مراكبي said...

فيه حاجة موجودة في أغلب الدول التانية وماشوفتهاش في مصر إسمها الصيانة

حتى أنا في شغلي لا يمكن أشتري أي حاجة أو أتعاقد على أي حاجة من غير ما أعمل عقد صيانة سنوي

عقد الصيانة بيخللي كل حاجة تفضل جديدة على طول

ومش الغرض منها إن الحاجة لما تبوظ تتصلح .. فيه حاجة إسمها صيانة وقائية

المهم إنك تروح أي حته تلاقي كل حاجة وكأنها لسة معموله إمبارح

أميرة البلطجية said...

تفتكرى يا كوكو لو فكرنا نعمل بلوجاية نتكلم فيها ع الايجابيات في مصر..حنلاقي؟
طب بجد والله..تيجي كل واحد في الناس اللي بيقروا دلوقتي يضورله على حاجة حلوة في مصر والمصريين ويعمل بوست عليها؟
اصل انا كل افكر في السلبيات وبعدين اكتشف انها تقع تحت بند من اتنين (ايأما عيوب اصيلة في الملاييين وثقافة منيلة بستين نيلة- يأما عيوب اصيلة في السستم وادارة منيلة بستين نيله) وفي الحالتين بلاقيني عاجزة ان المشاركة الايجابية
فحدفن راسي في الرمل وحدور على حاجة حلو في بلدي اكتب عليها
حلوة يا بلدي

koukawy said...

يا ضياء انت عارف ان ده صحيح00
مره كنت ركبه قدام و لقيت واحد جاي من وره بيقول للسواق حاجه في ودنه و انا مش سامعه بس فهمت بعد كده الأوتوبيس فاضي و دول قاعدين ورا علي الكنبه لوحدهم00
و كانت خناقه بينه و بين السواق
**********************
يا مراكبي00كلامك صح بجد الحاجات بتهلك من غير صيانه فعلا
*********************
يا اميره00هقلب الموضوع و احاول الاقي ايجابيات بس المشكله ان نص الكوبايه اللي ماليان في نقطتين ميه بس
lol

SomeOne said...

اوعي تكتبي اللي الناس عايزينك تكتبيه

لازم نكتب عن سالبياتنا

يمكن مرة يقرا البوست ده واحد من اطراف المشكلة

ويبقى عنده دم

لازم نصلح من نفسنا

استمري

سلام

bastokka طهقانة said...

نفسي فعلا يكون في مبدا الصيانة في مصر
حتفضل كل حاجة جميلة
بس الائد في مصر مبدا
الغربال الجديد له شدة
طهقانة

raspoutine said...

اولا
انا متشكر على زيارتك ليا
ثانيا
الموضوع اللى انتى بتتكلمى فيه دلوقتى موضوع مهم ومعظم قطاعات البلد الخدميه محتاجه للصيانه والاحلال والتجديد
احنا بنعمل مشاريع زى الفل
بس بننسى نحط فى الميزانيه بتاعت اى مشروع الصيانه بننسى كلمه صيانه
وهى دى حال مصر كلها وربنا يسترها
ويجعله عامر

koukawy said...

راسبوتين00انا اللي اتشرفت بزارتك للعشه
باستوكه00اهلا بيكي و بأول زياره للعشه
و انتوا كده يا جماعه تقريبا اغلبكوا اتفق علي موضوع الصيانه
و ده عايزلوا بوستايه لوحده

أشرف حمدي said...

هي دي مصر
صعب قوي تعرفي المشكلة فين . الناس ولا الحكومة ولا القطاع الخاص ؟
يمكن كل دول مع بعض
احنا محتاجين اعادة خلق دولة من أول وجديد
بناسها وحكومتها وأفكارها
تحياتي

kozo127 said...

الحدوته مش حدوتة صيانه
الحدوته حدوتة طمع
توفير فلوس الصيانه + ركوب عدد اكبر من البني ادمين اللي متعودين اصلا على الركوب + اهمال الناس وتكبير دماغهم وعدم اعتراضهم على الهبل ده هو اللي خللانا نوصل لده
مش الاتوبيس بس
وشركات الميني باص الجديده اللي زودت 10 قروش على التذكره يعني مين في 30 راكب معاه 10 قروش فضه
هتلاقي 3 او اربعه .. فنطر ندفع جنيه وربع وتاخد الباقي 10 قروش او خمس قروش والباقي من غير ما يعتذر بياخده لان المفروض تفهم انه ما عهوش فكه .ز والنبي دي مش قلة ادب .. ومترو الانفاق محطة العتبه .. تدخل المحطه تحس انك داخل احقر دورة مياه عموميه .. وغير و وغيرو وغير و..
ربنا يستر وطيرات مصر للطيران تحصلهم .. وتبقى مصيبه

koukawy said...

اشرف حمدي00نورت العشه و كلامك صحيح
********************
تعرف ان انا يا كوزو كتبه عن موضوع الباقي في المواصلات ده لوحده