Tuesday, February 13, 2007

النظافه من الايمان00

النهارده راكبه ميكروباص في احد شوارع القاهره المزحومه اوي
و طبعا بسبب الزحمه كان الميكروباص بيتحرك براحه00
و جه في حته ووقف الميكروباص شويه اكتر 00
انا من اول السكه ماسكه في ايدي الكتاب و بقرا
كالعاده عشان محسش بالسكه00و لما الميكروباص
وقف00 لوهله طلعت عيني من الكتاب و بصيت بره الشباك
و شفت مشهد اثر فيا اوي00شوفت راجل عجوز اوي
و التجاعيد مرسومه علي وشه لأ تحسها منحوته
ووشه مكتوب عليه قسوة الأيام و المعاناه
راجل عجوز من اللي بيلبسوا الأوفراول
الأخضر00راجل عجوز من كناسين الشوارع
اللي ضهرهم انحني من الكنس بلا مقابل
بس اهو بدل ما يقعد في البيت و اهو برضه بيلقط
رزقه00المهم و انا بصه علي الراجل العجوز
و سرحانه مع حركته و ضهره المقطوم علي المقشه
و بيكنس الأرض 00و انا حسه انه بينفخ في قربه مخرومه
لأن المقشه عجوزه زيه بظبط المقشه من شكلها المتهالك القديم
تحس انها بتوسخ ما بتنضفش00فجأه حصل
فصل لحلمي و سرحاني مع الراجل العجوز00عدت بنت
من بتوع مدارس البنات00اكيد عارفين شكلهم00
عدت جنبه و راحت رميه كيس الشيبسي اللي كان
فاضي في ايديها رغم ان صندوق الزباله كان
بعيد عنها مفيش يجي 10 متر و رغم كده
رمت الورقه في الأرض و نزل الراجل العجوز
ووطي و شال الكيس00كنت انا في اللحظه دي
لو مش راكبه كنت مشيت وراها و فهمتها ان اللي
عملته ده شئ مش لطيف00يعني انا مش فاهمه
الناس ليه مفهوم المحافظه علي النضافه ده
شئ مش اساسي في حياتهم00يعني تلاقي
واحد متأمع كده و بيبرق و راكب عربيه جامده
اوي00و يروح فاتح شباك العربيه
و رامي منديل كان مستعمله00
طب يعني هيخس عليك ايه انك تسيب
المنديل في العربيه و لما ترّوح ترميه
في صندوق الزباله00
انا شخصيا شوفت ان ده الحل الأمثل
و المؤقت لموضوع الشوارع المزبله
لو ان كل حد ماشي مرماش الورقه
اللي في ايده في الارض و حطها في شنطته
او في جيبه لحد ما يرّوح او يلاقي
صندوق اعتقد ان الزباله علي الأقل
هتقل شويه00
و بعدين احنا شعب بنطلق علي
نفسنا اننا شعب يعرف ربنا
و شعب متمسك بدينه طب
ما الدين يا اخونا بيقول00
النظافه من الايمان
سلام

11 comments:

Sarah ElTobgy said...

Eman eih... ool ekhlaa2 el awel .. e7teraam.. shwayyet DAMM 7atta !!! E7a sha3b ya3shaq el 3afana - lamo akhza f dikkelma :)

I liked you blog awi.. shadenni gidan besara7a ..

I think i will drop by every now and then..

Diyaa' said...

besm ellah ma sha2 allah 3ndk energy raheba 5msa w 5mesa...enty momkn t3mly books asln
3rfa..5olaset elbalad w elawda3 elly feha eh ?
enaha balad msh mtrbya
bgd y3ny lw elnas btrrba sa7 mkansh elhabal da kollo 7asal w mkantesh israel rkbt 3la 2sr elryasa w dldlt rgleha
keep posting enty hayla awy ya elly msh 3arf esmk
r3'm eny msh 6ay2 nfsy bs bgd elblog shdny w 7ases en ur age msh kber kman fmbso6 awy beky elsra7a
yla slam

koukawy said...

ساره00علي رأيك احنا شعب معندوش ثقافة و مفهوم النضافه00
هستناكي تعدي علي اعشه كتير و كوكو اتبسط بزيارتك
******************************
ضياء000ميرسي اوي كوكو اتبسط اوي ن الكومنت بتاعك متعرفش قد ايه
كوكو هيستني زيارتك للعشه كتير

Haitham Abu Akrab said...

ماله الشعب يا اختي المشكله في
الجماعه اللي بيعملو بي بي ف الشارع

ههههههههههه

SomeOne said...

امممممممممممممم

انا بصراحة سعات بشيلها معايا وسعات
اقول مكله بيرمي وارمي

بس بحاول على قدر الامكان اني ابطل العادة السخيفة دي

المسئلة فعلا مسئلة ثقافة

Anonymous said...

هااااااااااى
الى كل الدوله الكوكاويه
كل سنه وانتم طيبين
وماتنسوش حفله الفالنتاين عندى النهارده
بس ياريت ماحدش يدخل وايده فاضيه

adhm said...

http://www.egyptsons.com/misr/showthread.php?t=30360
اهم قصائد صلاح جاهين
تحية على الذوق الرائع

koukawy said...

شادي فايد00طب من فضلك انضم لجروب كوكو الكميل لكافحة الزباله و مترميش الورق تاني00ميرسي علي زيارة العشه
*******************
وينكي00الدوله الكوكوهيه بترد السلام و عينت كوكو الكميل كسفير رسمي لحضور حفلتك
*******************************
ميرسي يا ادهم جدااااااااااااا
بس انا مفهمتش بالظبط انت تقصد علي ايه الذوق الجميل؟

أميرة البلطجية said...

اوافق بشدة واشاركك الرأي

heba said...

ممكن يبقى في حل تاني بالإضافة لإن كل واحد يشيل منديله معاه .. ان يبقى في صناديق زبالة في الشوارع مش طول ما احنا ماشيين نلاقي لامؤاخذة زبايل في كل مكان

koukawy said...

فعلا يا شمس انتي عندك حق و ده بيخليني ارجع البيت الشنطه مليانه ورق و زباله00
بس يعني عشان محدش يقول انتوا كل حاجه ترموها علي الحكومه