Monday, December 29, 2008

اهني و لا اعزي

يعجز لساني علي اني اعبر علي التناقض في الأحاسيس اللي جوايا
من المفترض ان اليومين دول اهني الأخوه المسيحيين براسهم الميلاديه
و اهني المسلمين براسهم الهجريه
بس للأسف لقيت نفسي مش قادره غير اني اعزي قلوب الفلسطينيين
اللي فقدوا اعز الناس ليهم بدون اي ذنب غير انهم مواطنين في تلك البقعه من الأرض
البقاء لله و الدوام
و ربنا يحسن ختام الجميع و يصبر الأهالي و يرحم الشهداء
سلااااااااااااااااااااااااااااااام

Wednesday, December 24, 2008

يوم التدوينه البيضاء

و لا كلمه

Monday, December 22, 2008

خدوا الحكمه من افاواه............ الجعانين

و انا راكبه احد المواصلات العامه شغلت جهاز الردار كالعاده لالتقاط
اللي يعجبني من شخصيات محيطه بيا او حورات مسليه او مواضيع مسمعتش عنها قبل كده
و المره دي الموضوع اللي لقطه الرادار كان علي مزاجي جدا لأن انا ابديت رأي فيه قبل كده
في العديد من المحافل و المواقف
******************************************
راجل عجوز غلبان و باين علي وشه المعاناه و الارهاق و السن و ابتسامه خفيفه
تحس انه مصبر بيها نفسه، و قاعد جنبه راجل تاني و يدور بينهم الحوار التالي
الراجل العجوز: ما هو لو كل واحد فكر في غيره مش هيبقي ده الحال
الراجل التاني: مظبوط (و الكلمه دي اللي فضل متمسك بيها طول الحوار) اه مظبوط
الراجل العجوز: يعني انت راجل مقتدر كل سنه بتعمل عمره و حجيت بدل المره تلاته
و ربنا يزيدك موسعها عليك -ماشالله- طب يعني لو تفكر في غيرك
و تزكي من اللي اعطهولك ربنا و بدل ما تعمل عمره كل سنه اعملها سنه و السنه
اللي بعديها طلع حد يعمل عمره او شارك في جواز شاب او شابه او ساعد حد نفسه يحج
ما هو لو كل واحد طلع من اللي مكنزه محدش هيبقي فقير و ده كلام ربنا سبحانه و تعالي
************************
طبعا ده اختصار الحوار اللي كان حاصل .... بس علي طول افتكرت حماتي لما بتقول
لو كل واحد دفع زكاته عمر ما هيبقي فيه مسلم فقير- و ده استنادا للقصه الشهيره بتاعة -
عمرو ابن الخطاب و بيت المال
حقيقي يا جماعه الموضوع مهم اوي و في النهايه محدش بيخادهم معاه
و اهو راجل في الأوتوبيس بسيط حاسس بالمعاناه
و حاسس ان الناس بتفكر في نفسها و بس و اللي معاه مبقاش يدّي
اللي ممعاهوش، و لا المليان بقي يكب علي الفاضي و لا حاجه من الكلام الجميل ده
طب ليه ؟؟؟؟؟؟؟؟؟؟؟؟
و علي رأي المثل
خدوا الحكمه من افواه......... الجعانين

Tuesday, December 16, 2008

الموضوع بقي ريحته وحشه اوي

تكمله لسلسلة التفاهات و الحماقات اللي عندنا في شركتنا المبجله
اكتب هذا البوست اللي يتسم بتميزه عن بقيت اخواته بأنه مش بس يتقري
لأ ده كمان له ريحه ...... و ريحه وحشههههههههههههههههه اوي
**********************
بدأ الموضوع من حوالي سنه، لما طلع قرار بفصل القوات عن حمامات الشركه
بمعني ان فصلوا المصريين في حمام و الأجانب في حمام تاني
ليه يا تري؟؟؟؟؟؟؟ عشان احنا مصريين معفنيين ولاد (تييييييييييييييييييت) ليهم
حق احنا شعب واطي و نتن نيجي ايه احنا جنب الأجانب و العقده اللي هتموت الناس
و طبعا كنت من اول الأصوات اللي اعترضت و فتحت حسها مطالبه بالتراجع
في الكلام اللي يحرق الدم ده، و تحدثت في جميع المحافل بمنتهي الجرأه و لا همني
و اتلم الموضوع و اتقفل و كأن مفيش حاجه اتقالت و بقيت من باب العند ادخل في حمام الأجانب
لمجرد اني متبعش اوامر واحد فاضي مش لاقي حاجه يعملها غير انه يتكلم في الحمام و الناس
تلبي نداء الطبيعه فين ..... و فضلت اتسائل جوه نفسي هل ياتري الأجانب بيلبوا نداء الطبيعه
بطريقه مختلفه و لا حاجه؟؟؟؟؟؟؟ و لا نوعية الفضالات مثلا بالسكر و القرفه؟؟؟؟؟؟
ما هو شئ غريب يعني ما هو فضلات المصري زي فضلات الأجنبي مينفعش يكون فيها عقدة فضلات الخواجه ديه كمان
المهم .... فاتت الشهور و من فتره طلع قرار عن الحمام برضو ... الله ايه يا كوكوهو انتوا شغالين في شركة
مراحيض عامه و لا ايه؟؟؟؟؟؟؟؟؟؟؟؟؟؟؟؟؟؟؟؟؟؟؟؟
و القرار الجديد هو فصل الشركه الي نصفين ، نص يخش الحمام الكبير و النص التاني يدخل الحمام التاني الصغير
و ده محاوله من المفتش كرومبو بتاع شركتناانه يكتشف
مين ابن ستين (تيييييييت) بيوسخ الحمام و يبل الأرض و يخلي الأجانب تشتكي
و بعد مباحثات اكتشفوا ان الوضوء هو اللي بيغرق الأرض مياه!!!!!!!!! يا سلام
و طبعا انا و القليلين من زملائي اللي بيتوضوا مسكتناش و ده لأن الحجه فارغه
و شرحنا و قولنا محدش بيتوضه بره البيت بيحمي نفسه و محدش هيقلع شرابه في الشغل و يحط رجله
في الحوض عشان الوضوء، في اختراع اسمه المسح علي الشراب
لأ و الموضوع كبر و علقوا ورق يرجي تنشيف الحمام بعد الوضوء و ايه بقت حفله
بس كان ما علي ان النهارده رفعت سماعة التليفون علي الأستاذ مديرالشئؤن الاداريه
و اديتله اللي فيه النصيب و سألته سؤال ..... ياتري لو ان الحمام مبلول من الوضوء
تحت الحوض ، طب يا تري تحت التواليت نفسه فيه ميه ليه علي الأرض تفتكر فيه حد بيتوضه بالشطافه؟؟؟؟؟؟؟؟؟؟؟؟؟؟؟؟
و ترجيته انه يقفل علي الموضوع كده لأن الموضوع بقي .... ريحته وحشه اوييييييييي
الي لقاء اّخر مع تفاهه و خنقه من شركتنا العزيزه
سلاااااااااااااااااااااااااااااام

Monday, December 15, 2008

دعوه للتأمل

امبارح كنت معديه علي كوبري 6 اكتوبر حوالي الساعه 11:30 بليل و شفت منظر تقشعر
له الأبدان ، منظر يدعو للتأمل و التفكير و التركيز
و انا طالعه علي الكوبري الزحمه المعهوده بس زياده شويه بالنسبه للوقت ده من اليوم
فحسيت ان فيه شئ مش مظبوط، عربيه عطلانه ، او حادثه مثلا
بس متخيلتش ان الحادثه بالشكل الفظيع اللي انا عمري ما شفته بالعين المجرده
سائق موتوسيكل من الواضح ان عربيه خبطته منبطح علي وجهه علي الأسفلت
ده اللي شفته من بعيد ، و الناس حواليه اللي بيتكلم في الموبايل يطلب اسعاف
و اللي مذهول من المنظر ، في اقترابي من الراجل و ببص من شباك العربيه
اكتشفت ان الراجل قابل وجه الكريم، و حواليه بركه من الدماء لسه بتسيل فده معناه ان الحادثه طازه
انا ما كان علي الا اني صرخت - الراجل مات- و فضلت في ذهول و شرود لحد ما وصلت البيت
و بدأت استوعب اللي شفته و لقيت ان الموضوع يستحق للتأمل فعلا
و كل واحد هيتأمل فيه بوجهة نظره
انا اللي فكرت فيه- بعد الدعاء بالرحمه للمتوفي و الدعاء بالصبر و السلوان لأهله- ان
الدنيا حقيقي متستهلش الواحد يضايق و يشيل و يكره لأنه ممكن ينزل من البيت ميرجعش
ينام ما يقمش ياخد نفس او يبلع ريقه يتخنق .... ياه الدنيا خطفه مش قصيره
المهم فيه ناس هتشوف ان انا قلبت عليكوا المواجع
بس انا في حديثي عن الموت بحس ان عادي لما بتكلم لأن انا بمنتهي البساطه مستنيه دوري
ربنا يحسن ختامنا كلنا و يرحم الأموات و الأحياء جميعا
يا ريت كل واحد يقولي ايه هيبقي شعوره لما يشوف المنظر اللي انا شفته
سلاااااااام

Wednesday, November 26, 2008

فنتازيا الجنون ......... مجانين مجانين

صوره لأبطال العرض (علي قد موبايلي بقي)اي خدمه


ادعوكم يا اصحابي الكيملين و بقلب جامد لمشاهدة العرض المسرحي
(فانتازيا الجنون)

حقيقي يا جماعه عرض يستحق المشاهده-هو مش اسمه جنون ده جنون بجد-الشباب باذلين جهد هايل
كلهم خريجين معهد الفنون المسرحيه،و ده الجميل انك تتفرج علي فن جيد
من ممثلين محترفين مش معروفين و لسه لم تمرضهم اضواء الشهره
فبيفّنوا علي حق، اتفرجت علي العرض مرتين و في المرتين اتبسط جدا
فكل اللي بيحب مشاهدة المسرح و مشاهدة فن نضيف بجد يروح يتفرج
منها تشجيعا للشباب بتذكره تقريبا ببلاش و كمان فرصه الواحد ينضف عينيه
بالفرجه علي فن بصحيح
و ده لينك لمقالة الناقده امال بكير في عمودها الاسبوعي شاهدت لك جريدة الأهرم

التفاصيل
اسم العرض: فانتازيا الجنون
مكان العرض: مسرح السلام (شارع القصر العيني) قاعة الشباب
زمان العرض: الساعه 9
مدة العرض: ساعه و ربع
سعر التذكره: 5 جنيه و عشره جنيه
يوم الراحه : الثلاثاء



ياللا روحوا شجعوهم و اتبسطوا .... و اللي عايز يضحك هيلاقي و اللي عايز يزعل برضو موجود


سلاااااااااااااااااااااااااااااااام

الأزمه الاقتصاديه و العلبه اللي في النمليه

هتسقلوني ايه علاقة الأزمه الاقتصاديه بالعلبه اللي في النمليه؟؟؟؟؟؟؟؟؟
علي طول هرد عليكوا و اقول.... هي نفس العلاقه بالأزمه الاقتصاديه و مرتبي الغلبان الصدمان العدمان
ازاي يا كوكو يا كميل.. يا ريت تفسر اكتر شويه
عيني حاضر افسر و افسر و افسر كمان -
ماهو انا لما اتربط من زمارة رقابتي و يتخنق علي و يضيق الخناق لما افرفر انا و كل زمايلي
في الشغل عشان الشهر اللي فات كان يوم 13 في الشهر و احنا لسه ما قبضناش
و بعديها بكام يوم ينزل قرار متين من رئيس مجلس الاداره و صاحب الشركه ابو كرش كبير يقول
ان الأزمه الاقتصاديه تحتم علينا اننا نستعمل الورق و ش وضهر، و حبر البرنتر منشربوش
و دبابيس الدباسه منبلبعهاش بدل الملبس....... و كلام من ده كتييييييييير
يبقي اكيد هي دي العلاقه الطرديه اللي انا قلت عليها في الأول
****************
يعني انا مال امي انا بالأزمه الاقتصاديه؟؟؟؟؟؟؟؟؟
يعني هما الكام سحتوت.... الحمدلله اللهم لا اعتراض.... اللي انا بقبضهم هما اللي سببوا
الأزمه الاقتصاديه، و للا هما اللي هيحلوا مشكلة الشركه الماديه لو انا ماقبضتش في ميعادي؟؟؟؟؟؟؟
سؤال يطرح نفسه لكل واحد صاحب رأس مال، او شركه ، او رجل اعمال مسؤل يبقض افراد و
...... هذه الأفراد بتربي افواه و ارانب
هل لو سعدتك في نفس الموقف هتبقي مبسوط و رايح الشغل بنفس ؟؟؟؟
و لا هتبقي قرفان و بتحسبن عشان وراك مسؤليات؟؟؟؟؟؟
و لا لما يجي الكهربائي و الزبال و بتاع الغاز تقولهم معلش اصل فيه ازمه اقتصاديه عالميه؟؟؟؟؟؟؟؟؟
و لا لما ابنك يعوز درس و لا كراسه و لا بلوفر في البرد هتقولوا ولعلك فحمتين و بالاش تكتر في الفحم عشان فيه ازمه اقتصاديه؟؟؟؟؟؟؟؟؟؟؟
و الله مش عارفه اقول ايه؟؟؟؟؟؟؟؟؟؟؟
*************************
يا صاحب شركتنا المبجله اتقي ربنا و قبضنا في ميعادنا لو سمحت
يا اما الحاله الماديه هتبقي في النمليه
************************
ادعوكم لقراءة هذا البوست من عند ياسر حسين لأنه جايب سيرة النمليه برضو
سلااااااام

Monday, November 24, 2008

اللي اختشوا ماتوا

مش ممكن يا جماعه علي السفاله اللي البنات و الستات بقوا فيها

امبارح قاعده قدام التليفزيون بتفرج علي احد القنوات الفضائيه

و فجأه لقيت قدامي اعلان اذهلني.... اعلان عن احد الأدويه المقويه (الحبايه الحمراء) مش

دي المشكله عادي ما كذا اعلان اتعمل علي نوعية الأدويه دي

بس الموضوع عمال ينحضر و يتفتح و يتوغل و يتسرب و ينتشر

يعني اعلان الدوا اللي اسمه( سنافي) اللي اتعمل من فتره بتاع الأخت ام قميص نوم كان كارثه

اما بقي اعلان امبارح ده 3 كارثات...و الاعلان بأختصار بدون ذكر الألفاظ

عباره عن 2 ستات قاعدين بيتكلموا و يشتكوا لبعض عن اسرارهم الزوجيه

فواحده بتنصح التانيه ان تخلي جوزها يستعمل هذه الحبايه .... و مش عايزه افسر اكتر من كده يا حضرة البجباشي

لو اتفرجتوا هتعرفوا ان اعلانات (فياجرا) اللي الناس كانت بتقول عليها سافله

ارحم كتييييييييير.... علي الأقل كانت رموز مش الفاظ و علي البحري

حقيقي يا جماعه ........... اللي اختشوا ماتوااااااااااااااااااااااااااااا


سلاممممممممممممممممممممممممم

Wednesday, November 19, 2008

ابن الوز عوام


ابن الوز عوام


طول عمري مش بصدق في المثل ده.... بس الحقيقه اول امبارح قطعت الشك باليقين

يعني لو انا كنت شكه في المثل قيراط بقوا 24 قيراط و ده بسبب الأستاذ

الفنان/ هيثم احمد زكي .... اول امبارح كانت قناة الايه ار تي سينما بتعرض فيلم

البلياتشو ... للأسف ...الحقيقه لم اكن اتوقع ان الفيلم بهذا السؤ، كل ما في الفيلم سئ

و اشكر الفنان العبقري هيثم زكي علي البراعه في الاحتفاظ بنفس طبقة صوته و تعبير وجهه

طول الفيلم ... و علي طول الخط في كل المواقف و المشاهد ... و هو ما يطلق عليه المتخصصين

انه ممثل - مونوتون- لا يتشكل و لا يتلون ، ده غير ان الفيلم لو رسمنا له رسم بياني

هنلاقي الخط بادي من الصفر خلصان عند الميه و هو علي نفس المستوي لا ارتفاع و لا انخفاض

بس انا مع كل اللي فات ده رغم كده انا استفدت استفاده هايله و هي ....

ان ابن احمد زكي .... مش بالضروره خالص يكون عوام



سلاااااااااااااااااااااااااام و ارحمونا بقي


Sunday, November 9, 2008

اوباما....ايه يا تري؟؟؟

سؤال راودني و يراودني و اكيد رواد كتير من الناس قبلي
و السؤال هو.... هل يا تري وجود اوباما هيفرق؟؟؟؟
هيكون فيه تحسن؟؟؟؟
و لا الحاله هتسوء؟؟؟؟؟
و لا هي هي ما هي نفس السياسه و نفس الخضوع و نفس الأطماع؟؟؟؟؟؟؟
الله اعلم
سلااااااااااااااام

Wednesday, October 22, 2008

يا رب يتلموا بقي

علي الله بقي بعد الأستاذ اللي اطس 3 سنين سجن -بعد ما مد ايده علي واحده في الشارع- بقيّت الرجاله اللي علي هذه
الشاكله يتلموا بقي و يبطلوا تحرش و شغل هيافه و قلة ادب، و يفهموا ان الدنيا دواره و ربنا ما بيسيبش
و يتقوا الله في امهاتهم و مراتتهم و اخواتهم و يتقوا الله في بنات الناس
و ما يبقوش اذي ماشي في الأرض، و احب اشكر البنت الراجل الجادعه اللي اتسببت في ان المريض ده يتسجن و نخلص من اذيته
و طبعا عدالة المحكمه اللي ادت للموضوع اهميه و جابت للمتضررات حقهم
اتلموا ياللي اسمكوا في البطاقه بس رجاله.....لأن اللي بيحصل ده مش عمايل رجاله
سلأاااااااااااااااااااااااااااااااااااااااااام

Wednesday, October 15, 2008

Ma vie d`esclave

حياتي في العبوديه
كتاب قرأته بالفرنسيه منقول عن اللغه الانجليزيه، قصه حقيقيه، قصة مأساه عاشتها بطلة الكتاب
من عمر سبع سنين Mende Nazer
الي عمر العشرين، فتاه صغيره من السودان من قبيلة تلال النوبه، تعرضت لأحد الهجومات
العنيفه من قبل بعض العرب المستوطنين في السودان و تم خطفها و اغتصابها
و بيعها كعبده -عن طريق تاجر عبيد متمرس في مثل هذه التجاره- لأحد الأسر العربيه
في الخرطوم، و تعيش لسنوات و سنوات كعبده مهانه
الي ان يشاء الله ان تسافر كعبده لبيوت احد العرب في انجلترا و تنجح في الفرار
بمساعدة بعض السودانين المقيمين في انجلترا، و تصبح مأستها قضية رأي عام و خصوصا
بعد رفض انجلترا منحها تصريح الاقامه، الي ان تتعرف علي كاتبة هذا الكتاب و هي صحفيه انجليزيه
Damien Lewis
تساعدها علي كتابة قصة حياتها و مأستها ، و كان للكتاب الأثر الكبير و الرئيسي في
حصولها علي تصريح الاقامه الدائمه في انجلترا
كتاب شيق جدا و مؤثر و خصوصا مع تخيلك ان لسه في ناس عندها عبيد
ربنا يرحم الجميع
سلااااااااااااام

Wednesday, September 17, 2008

دولت Never Dies

مسلسل اذاعي لطيف جدا....شدني من اول مره سمعته
انا اصلا مش من محبين اوي المسلسلات الاذاعيه ..بس كانت صدفه
و بقيت كل يوم اسمعه...مسلسل يعرض في نجوم أف ام الساعه 5 الا تلت
و اللطيف ان اللي قام بالأدوار هم بعض المذيعين في القناه
حقيقي دمهم خفيف...و الأغنيه بتاعة المقدمه لطيفه جدا
طانت دولت فتح الباب..و را كل باب
قلت اقولكوا عشان لو حد عيز يسمع
رمضااااااااااااان كريم

Wednesday, September 3, 2008

عيب طول السنه

شئ يدعو للسعاده يا جماعه ....و هذا الشء هو اللي انا بستني في رمضان من السنه للسنه
******
فاكرين الموضوع اللي كنت كتبته بعنوان ... شئ غريب
من اول يوم رمضان اختفوا الناس تماما من علي القهوه و شارع بيبرق و لا الصيني
و لا حد يعاكس و لا ريحة دخان تقتل علي الصبح
بس هو السؤال و التعليق اللي جه علي دماغي..... المفروض ان العيب و الحرام مبدأ
و قضيه ثابته مش نسبيه .... و اللي عيب و حرام في رمضان هو عيب و حرام في ذو القعده
و محرم و شعبان ...............وطول السنه
رمضان كرييييييييييييييييييييييييم

Friday, August 29, 2008

مش كده يا عم الشيخ

امبارح في احدي رحلاتي الميكروباصيه، سمعت عجب العجاب
شريط لأحد الشيوخ و يدعي سعد كذا ، او اسعد كذا... معرفتش اسمع اسمه كويس
المهم الشريط بعنوان.... الفاظ مخالفه للعقيده
الله جميل موضوع شيق و جميل ....قلت اسمع ...مع اني مبحبش الشرايط الديني
بتاعة الميروباصات .... و بدأ الشريط بالطريقه المعتاده اللي اكيد كلكوا عرفينها
عجيب جدا في نوع من افلام الرعب و الاثاره بس معلش المهم المضمون Intro
و بدأ المضمون ...لو اقولكوا ان بين كل مثل و مثل بيضربه عم الشيخ المبجل
في علي الأقل شتيمه.... يا اهبل .... يا عبيط.... ياغبي .....يا...يا... و وابل
من التوبيخ و الشتيمه اللي لا تليق ابدا انها تكون في درس دين
الا ان جاء مثل عن الناس اللي لما ولادهم بيخلعوا سنه بيخلوهم يقفوا و يرموها
في وش الشمس و يقولوا .... و كما قال الشيخ بالظبط....انتوا بتعلموا ولادكم الوثنيه
يا شمس يا شموسه خدي سنه الجاموسه.... جاموسة ايه يا جاموسه!!!!!!!!!!! و طبعا
كانت الصاعقه اني اسمع كميه الشتيمه دي في درس دين
كان نفسي اشوف عم الشيخ و اقولوا ، هل سيادتك متصور انك كده افدت الدين في شئ؟؟؟؟
الدين مش كده يا عم الشيخ ....و ادعوا الي سبيل ربك بالحكمة و الموعظه الحسنه
********************
و اخيرا .....رمضان كريييييييييييييم
اعاده الله علي كل الكميلين و علي كوكو الكميل و كل المسلمين و اللي ناويين يبقوا مسلمين انشالله
بالخير و اليمن و البركات
رجاءا متنسونيش في دعواتكوا في التراويح
رمضاااااااااااااااااان كريييييييييييييييييييييم

Tuesday, August 26, 2008

عقبالكوا كلكوا


يا دبلة الخطوبه ..... عقبالكوا كلكوا

اخت كوكو الكميل هتبني طوبه في عش حبهم

**********

و النهارده خطوبه اخت كوكو الكميل يا جدعان

كوكو عايز كله يبقي تمام

************

و لوي لوي لوي لوي لوي لوي

(.زغروته يعني)

******************************************

معرفش ان كان البوست ده يهم حد ...بس انا جوايا احاسيس مش هعرف اطلعها غير بالكتابه

اختي دي هي الضغننه..... اصغنن مني ب 8 سنيييييييييييييييين....يعني كتير

و احساسي النهارده و هي بتحط رجلها علي اول طريق تكوين اسره كميله

هو احساس ام بتجوز بنتها و بتفرحلها....انا فاشله جدا في التعبير عن مشاعري و احساسي

دي ..... فعشان كده كتبت الأحاسيس دي عشان علي الأقل متتخنقش جوايا و تسببلي

التهابات و احتقان في الزور و لا حاجه

في النهايه.....ادعوا للعروسين الحلوين الصغنين بالسعاده و التفاهم

و الموده و الرحمه....و انشالله ربنا يتتم لهم في النهايه بالزفاف السعيد
اسيبكوا بقي عشان ابدأ التجهيزات عشان بليل ابقي كوكو الكميل علي سنجة 20

ههههههههههههههههههه


سلااااااااااااااااااااااااااااااااام

Sunday, August 24, 2008

حتي موائد الرحمن

حتي موائد الرحمن ما سلمتش يا عيني........يا عيني علي الغلابه اللي بيستانوا من رمضان
لرمضان اللي بعده عشان ياكلوا
***********************************
قريت في احد صحف اليوم ان صدر قرار بالغاء موائد الرحمن و استدبدالها
بأكياس الخير اللي تتوزع..... اللي طبعا لن تسلم من النهب و السرقه و كل واحد
يضربلوا كيسين للعيله و عيلة العيله......يعني بقت مائده رحمن تيك اواي
من ساعتها و انا في حالة اندهاش .... يا تري ليه؟؟؟؟ و ازاي ؟؟؟؟و فين؟؟؟؟و كيف؟؟؟
و مليون سؤال ...ايه ضرر موائد الرحمن علي الشوارع عشان تتلغي!!! و بعدين
دي سمه من سمات رمضان في مصر زي المسحراتي و الفانوس
انا الحقيقه مش فاهمه....لو حد فاهم يفهمني
رمضن كريييييييييييييييييييييييم

Tuesday, August 19, 2008

البسي انتي الأول

الفنانه المذيعه الشابه /ريهام سعيد .... لا مؤاخذه في اللفظ، قرفتنا كتير في برنامجها الشهير
صبايا...بمواعظ و نصائح للصبايا و الفتايات و الشابات اللي بيلبسوا لبس مكشوف
و عريان و بيبين مفاتن الجسم، و ياما صوتها يا عين امها اتنبح تهاتي
ان البنات لازم يراعوا لبسهم و خاصة في رمضان.....الحقيقه انا كنت مصدقاها
و خصوصا انها كانت بتطلع في البرنامج لابسه مقفول و شال علي اللبس و حاجات من اللي هي
بس للأسف استغربت جدا و ذهلت...بكتافها و صدرها اللي منورين علي افيش
المسرحيه الواقعه....مرسي عاوز كرسي....طب يعني قبل ما تنصحي حد
خبي كتافك و البسي الأول قبل ما تنصحي الناس، و لا هو حلال لكتافك
و حرام علي الكتاف الاخري....مش كانت سكتت من الأول بدل ما تجيب لنفسها الكلام
سلااااااااااااااااااااااااااااااام

Wednesday, August 13, 2008

باعوا المجمع يا رجاله

اشاعه ماليه البلد بقالها فتره و هي ان
الوليد بن طلال اشتري المجمع يا رجاله...و هيبنوا مكانه فندق
احب اعرف من اللي عنده معلومات هل ده صحيح ...و لا مجرد اشاعه؟؟؟؟؟؟؟؟؟؟
و لو الكلام ده صحيح الناس هتخلص مصالحها فيييييييييييييييييييييييييييييييييين؟؟؟؟؟؟؟؟؟؟
كل اللي عنده كلام يقوله
سلاااااااااااااااااام

Wednesday, August 6, 2008

عقدة الخواجه

شيئ بيحز في نفسيتي يضايقني و يخليني احس بالاضطهاد و الظلم، لما اكون
عايشه في بلدي مصر و لا لما اكون عايشه في الأرجنتين-لأ انا لو عايشه
في الأرجنتين مش هيحصل كده- لأ بجد ليه القوانين و اللوائح و الأوامر اللي بتطلع
عندنا في الشركه -و اكيد الكلام ده مش عندنا بس- مش بتتطبق علي الأجانب
زمايلنا زينا زيهم، شئ رخم اوي لما انا مسموحلي بنص ساعه راحه و دقيقه
زياده لأ، و الأجانب لو مخرجوش في وقتهم و لا حد بيتكلم، ليه انا مش مسموحلي
انزل في وسط اليوم من الشركه اشتري حاجه من الأجزخانه مثلا و انا مصدعه و لا تعبانه، و
هما مسموحلهم ينزلوا يشتروا اكلهم بنفسهم و يروحوا ماكدونالدز و سينابون علي كيف كيفهم
و انا لازم استني الأوفيس بوي لحد ما يجي ياخد الطلبات و انا و حظي لو عرف يشتري اللي انا طلباه منه
، يا اما بقي استأذن من رئيس مجلس الاداره
و شغلانه بقي، ليه الأجانب يقبضوا اضعاف اضعاف اللي انا بقبضه و غيري من الزملاء المصريين
و غيره و غيره من التفرقه في المعامله، في حين ان ممكن الموظف المصري يكوناحسن بكتير من الأجنبي
في النهايه انا تفسيري الوحيد للموضوع ده هو .....عقدة الشعر الأصفر و العينين الملونه
و هي ..............عقدة الخواجه
سلاااااااااااااااااااااااااااااام

Monday, July 14, 2008

تامر و لا شفيقه

الظاهر ان الحاجات اللي تحرق الدم كتير يا جماعه و الواحد بيحاول يتمالك اعصابه
بس بيبقي صعب شويه و خصوصا لما اشوف منظر زي اللي شفته امبارح
كنت امبارح بتابع نشرة اخبار روتانا سينما الفنيه...اهو الواحد يعرف ايه الجديد
و تقريبا الحلقه كلها كانت علي نجم الشباب الملزق ...تامر حسني
و كان الحوار بيدور حوالين ايراد فيلمه الجديد....و بعدين قال المزيع انهم هيعرضوا
فاصل عباره عن بعض المشاهد للأخ تامر و هو بيحضر العرض الخاص لفيلمه
في بعض السينمات و ده لعرض رد فعل الجمهور....و كانت الصدمه لرد فعل الجمهور
و خاصة البنات و خاصة محجبات بلدنا ماشالله....و الله يا جماعه بدون مبالغه ولا افتراء
و ربنا يحاسبني....مناظر تثير الغيظ و الاشمئزاز و العصبيه...لو يجوز اني اقول
البنات كانوا في وسط الشباب زي بالظبط الهامبورجر وسط الخس و الجبنه و الدراسينج
في ساندويتش بيج ماك في ماكدونالدز.....بجد متفعصين في بعض تفعيصه
و اللي تمسك ايده و اللي تشده من هدومه و اللي تشد في طرحتها ....و اللي
تصوط و تنده ...يا تااااااااااااااااااامر.....و اللي تلطم علي وشها
و طبعا البادي جاردز شغالين الله ينور ضرب و زق بدون تفرقه بين انثي و ذكر
و هما يعني كانوا هيفرقوا ليه اذا كان البنات نفسهم ما احترموش نفسهم
و لا كرامتهم و لا انوثتهم و لا حجابهم و لا حاجه خالص و راحوا اتفعصوا
في وسط الشباب ...و يرجعوا بعد كده يعيطوا لما حد يتحرش بيهم و لا
يلمسهم.....انا زمان لما كنت بشوف المناظر دي في حفلات مايكل جاكسون
كنت بتريق....احنا بقيناش بعيد عن حفلات جاكسون كتير
انا معنديش مانع اني اعجب بأغنيه، بصوت مطرب، بشكل ممثل، بفيلم...بأي حاجه
انما مش للدرجه المهينه دي ...حسيت ان المرحله اللي جايه البنات هتقلعوا الجزمه
و يغسلوله رجليه بالويسكي زي شفيقه القبطيه
و بعد كده منعرفش هو ده تامر و لا شفيقه!!!!!!!!!!!!!!!!!!!!!!!!!!!!!!!

سلاااااااااااااااااااااااااااااااااااام

اضافه صغيره ..لينك علي حلقه من حلقات الفنان الكاريكاتيري ياسر صاحب مدونة كرتونيه
حلقه هادفه و رساله تخص نفس موضوع البوستايه عندي....اللينك هنا

Sunday, July 13, 2008

شئ غرييييييب

كل يوم بنزل الصبح للشغل ما بين الساعه 8 و 8 و ربع
طبعا مش محتاجه اقول انه وقت بدري اوي ....و رغم كده في مروري في السكه
علي قهوه -من المنتشرين في كل
ركن و زقاق و شارع في مصر في المناطق الراقيه و المناطق الشعبيه-
الاقي نص كراسي القهوه مليانه.....شئ غريب ...الساعه 8 الصبح يا عالم
مش عارفه الحقيقه افسر ده بأيه....دي صوره من صور البطاله و العطاله و لا اهو نفسين
شيشه يسلكوا النخاشيش قبل الشغل و القرف ...مش عارفه بس منظر بيدهشني و
يرعبني ...مش عارفه ليه بس كل يوم و انا معديه ببقي متضايقه و خايفه
تفتكروا ليه حق اتضايق ولا لأ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

سلااااااااااااااااااااااااااااااااااااام

Wednesday, June 25, 2008

كباريه


من كام ساعه حضرت فيلم كباريه في حفلة الساعه 3 بعد الضهر
و الحقيقه اني مندمتش اني نزلت في الحر ابدا، لأن بصراحه الفيلم من رأي
فيلم حلو اوي و مؤثر، و قصه من صميم المجتمع، دراما حيه، و من رأي هكذا تكون المحاكاه
لأن الفن محاكاه للواقع، بس هما هنا فهموا المحاكاه صح، لأن رغم ان الفيلم في كباريه
انما مفيش مشهد يخدش الحياء، و طبعا الممثلين و علي رأسهم خالد الصاوي، فتحي عبد الوهاب
و ماجد الكدواني و دنيا سمير غانم ابدعوا في ادوارهم و طبعا احمد بدير
هو العيب الفني الوحيد اللي يؤخذ علي الفيلم هو مشهد الانفجار ، الخدعه كانت رديئه شويتين
بس غير كده حتي علاء مرسي اللي انا مش بحبه كان عامل دور كويس اوي
و نجح السيناريست انه يبين التناقد الرهيب في شخصيه فؤاد اللي لعبها صلاح عبد الله
صاحب الكباريه، التناقد اللي احنا بنشوفه فعلا في الحياه، هو صاحب كباريه بس بيروح يعمل عمره كل سنه
و مابيشربش خمور و لا سجاير و لا بيعرف ستات غير مراته، و ده من رأي بيحصل فعلا علي مستويات
كتيره اوي في المجتمع، و لم ينحاز السيناريست لفكره ان الجماعات الاسلاميه او اللي
بيعملوا عمليات انتحاريه بأسم الاسلام لم ينحاز لفكرة انهم وحشين في المطلق او كويسين
لأ نجح انه يبين فيهم العنصر اللي دماغه متربسه علي القتل و العنصر التاني
الللي شايف ان المناقشه ممكن تجيب حل، المهم ان في المجمل الفيلم حلو
مبروك للسبكيه و لكل فنان عمل و لو مشهد واحد في الفيلم

سلاااااااااااااااااااااااااااااااااااااااام

Tuesday, June 17, 2008

حكومه روبوتيه

من فتره اضطرتني ظروفي اني اروح الشهر العقاري اللي في منطقة الدقي و بالتحديد في ميدان المساحه
لعمل توكيل عام لأحد المحامين.....و ده كان من شهر مثلا ....مش بعيد اوي
و بعدين رجعت ظروفي اضطرتني اني اروح نفس المكان تاني النهارده لعمل توكيل اّخر
و كانت المفاجأه السعيده اني لقيت مكاتب عاليه جديده و اجهزه كمبيوتر
فقلت لكوكو بيني و بينه....يا حلاوه يا ولاد بقينا نستعمل الحاسب الاّلي في الحكومه يا وله
و الحق يتقال ان الموضوع و فر وقت فعلا و جهد من الانتقال من مكتب لمكتب ...و من امضاء
لتوقيع لختم لخزنه....بقت كل البيانات تنتقل اتوماتيك عبر الكمبيوتر للموظف التاني
و ده فعلا سهل كتير.....اما بقي الشئ الوحيد اللي لم يتغير هو برود و سخافة و سقاعة
موظفين الحكومه اللي علي قلوبهم مراوح، وفي ايديهم اكواب الشاي و في الايد التانيه البقسماط
و اللي بتحكي عن حلم شافته امبارح، و اللي بتحكي عن قميص النوم اللي جابته، و اللا اللي عامله رجيم
حاجه تشل و تجيب الضغط....احنا المفروض مصالحنا تتحرك من 9...انا واصله 8 و نص عشان الزحمه
و الدور ....و دول بدأوا شغل الساعه 9 و ربع مثلا ..........ليه؟؟؟؟عشان اللسان اللي عايز قاطعه
المهم اتمني المره اللي جايه لما اروح .....الاقي مكان الموظفين ...روبوت...يمكن ربنا يسهل
و اهي بقي بدل ما تبقي الحكومه الاكترونيه...تبقي...ألحكومه الروبوتيه

سلاااااااااااااااااااااااااام

Monday, June 16, 2008

المناقشه مش كده يا جماعه

امبارح بالليل علي قناة الحياه ، كان فيه حوار حاد و مناقشه ساخنه بين الداعيه
الاسلاميه/ سعاد الصباح و الكاتب / جمال البنا
الحقيقه الحوار مع الراجل ده من رأي شئ شيق جدا و مهم لأنه بيشطح بدماغه شطحات عجيبه جدا
بس اللي حصل ان التليفونات بدأت ترخ علي البرنامج بكثره مش معقوله، بس مش دي المشكله
المشكله ان كل واحد يتصل يشتم و يتريق و بس
و عشان كده انا بكتب....ازاي تقدر انك تعبر عن اعتراضك و انت ما شاركتش بكلام
ايجابي يتفهم ....هتستفيد ايه لما تتصل تشتم و تقفل ....بالعكس من رأي اني اتصل
و اعمل زي المتصله الوحيده اللي عملت كده....و قالت/ يا جماعه احنا لازم نسيب فرصه للراجل
انه يتكلم عشان نعترض و نناقشه و نواجهه بأفكاره الشاذه، انما انتوا مش سايبينله فرصه
يبقي بتعترضوا علي ايه.....و ده بقي كلام عين العقل الناس بيسخنوا و تاخدهم الحميه الدينيه
و الجلاله و يتصلوا من غير ما يفيدوا الاسلام بأي حاجه....كان ممكن كتير من اللي اتصلوا
يكلموه بالحجه و بالذوق و بكلام في جنابه في نفس الوقت من غير منقل ادبنا
و علي الأقل عشان ميجيش حد تافه و لا بيتلكك و يقولك بص المسلمين بيعضوا في بعض
و مبيعرفوش يتنقشوا و عدوانيين

ملحوظه: انا مش متفقه في الرأي مع جمال البنا و لا حاجه ....لحسن اتفهم غلط


سلااااااااااااااااااام

Sunday, June 8, 2008

Rendation

فيلم من انتاج 2007
فيلم سياسي قصه الي حد كبير واقعيه و متعلقه بالأحداث العالميه الحاليه
فيلم ايقاعه سريع....نص الفيلم ناطق بلهجات عربيه مختلفه و ده لأن الفيلم
بتدور احداثه في بلد عربيه في شمال افريقيا دون التحديد هي بلد ايه بالظبط
و القصه باختصار بتدور حول اعتقال مهندس مصري امريكي للاشتباه في انه
علي علاقه برئيس جماعه انتحاريه كانت مسؤله عن تفجير تم في شمال افريقيا
فيلم جيد جدا فنيا من كل النواحي....بس طبعا فيه بعض الانحياز لطيبة اليهود و الأمريكان
مش مهم احنا اتعودنا
***************************
رغم انه لا يعتبر بطل الفيلم او الممثل الرئيسي انما بالنسبه لي انا شايفه ان هو محور
الأحداث و هو البطل الرئيسي و الحقيقه هو يستحقها بجداره و هو الممثل المصري الألماني

Omar Metwally


هو ممثل مصري الأب و الماني الأم....عاش في امريكا و انضم لاستوديو الممثل
في لاس فيجاس ....و من اعماله السابقه فيلم ميونخ
ممثل ملامحه عربيه جدا......... ممثل متمكن من ادواته

قام بدور مهندس امريكي مصري تزوج من امريكيه يعتقل لتهمة انه علي علاقه بأحد رءوس
الجماعات الانتحاريه......يعتقل و يمارسوا معاه كل انواع التعذيب لحد ما يعترف
لمجرد انه يخلص من العذاب اللي بيمارسوه عليه




Yigal Naor


ممثل اسرائيلي الجنسيه ..........و الحقيقه اني طلع عيني لف و مشاوير علي النت عشان اكتشف
هو جنسيته ايه و في النهايه وصلت الحمدلله.....اصل هو بصراحه ممثل يستاهل
يتكتب عنه ....قام بدوره في الفيلم كمدير للمعتقل و المحقق اللي حقق مع المهندس المصري
كويس اوي.....و الجميل انه بيتكلم عربي لبلب
و الجدير بالذكر ان الممثل ده ليه فيلم انتاج 2008 عن قصة حياة الرئيس الراحل صدام حسين
و كان معمول مشكله ان ازاي ممثل اسرائيلي يقوم بدور صدام حسين مع ان انا مش شايفه مشكله
و الفيلم ده فيه كمان الفنان المصري عمرو واكده و الفيلم بعنوان
between 2 rivers

Jake Gyllenhaal

هو المفروض ان الممثل ده اللي قام بدور المحقق هو بطل الفيلم الأصلي
انما هو من رأي انه اضعف ممثل في الفيلم
و مش عايزه افسر اكتر من كده...هو ممثل امريكي معروف برضه و بلاش نجرح مشاعره

و طبعا بالنسبه للممثلتين في الفيلم مش كحتاجه اني اكتب عنهم لأنهم اتنين ممثلات
من الممثلات الأمريكيات الممزين جدا

Reese Witherspoon


و قامت بدور زوجة امهندس الأمريكي انور الابراهيمي المهندس الأمريكي المصري

Meryl Streep

الغنيه عن التعريف و قامت في الفيلم بأربع مشاهد فقط في دور وزيرة الأمن الأمريكي


في النهايه الفيلم من رأي فيلم جيد جدا ......و يستحق المشاهده


سلام

Thursday, May 29, 2008

عامل و اّمر

ماشيه في الشارع في امان الله كعادتي دائما....بفكر في مشاكلي و همومي و بقلب دماغي يمين و شمال
لحد ما فقت علي اتنين اخوانا .....من الفلاحين بياعين خضار...و اخترق ودني حوارهم الشيق
اللي انتهي بأن واحد فيهم قال للتاني و هو متعصب اوي
(ماهو احنا شعب كده كل واحد جي من بلده عايز يبقي ريس و بيه) مع تأملي في كلام الراجل
لقيت ان فعلا معاه حق و تلاقيه هو نفسه بيعمل كده، فعلا كل واحد عايز يبقي هو الكل في الكل
بس بالعقل كده لو كل الناس ريس مين اللي هيتنازل و يبقي عامل مش اّمر؟؟؟؟؟؟؟؟؟؟؟؟؟؟؟؟؟؟؟؟؟؟
سلااااااااااااااااااااااااااااااااام

Friday, May 9, 2008

رجاء الدعاء

توفي الي رحمة الله تعالي زوج اخت زوجي /محمد عباس
عن عمر 39 سنه بعد معاناه لفتره مع الألم و المرض....بدون شكوي و بابتسامه راضيه لا يشوبها اي اعتراض
او تذمر علي امر و بلاء الله سبحانه و تعالي
انا بكتب دلوقتي و هما بيصلوا عليه الجمعه و طالبه منكم الدعاء ليه بالرحمه
*******************************
اللهم اسكنه فسيح جناتك و ثبته عند السؤال يا رب العالمين
و لا تحرمنا اجره و لا تفتنا بعد
اللهم امين

Friday, April 25, 2008

حدوتة رضا

يوم السبت 19/04 و انا قاعده في فترة راحتي في الشغل و بفر في اجرنال قريت المقاله اللي جايه دي
و من كتر ما عجبتني قررت اني اصورها و اكتبهلكوا عشان تقروها انتوا كمان

****************
حدوتة رضا.................بقلم: عبد العظيم درويش

شاربه و نظارته الطبيه فقط هما كل ما علق في ذهنها من ملامحه من خلال تلك الصوره التي تحتفظ بها امها بين
طيات ملابسها و تستخرجها بين و قت و اّخر كلما استفسرت منها عن شكله.
من اسمها...رضا...اكتسبت الطفله التي خرج ابوها ذات صباح و لم يعد،
و هي لم تتجاوز الرابعه من عمرها- قناعه بظروفها بالرغم من انها لم تكن تدرك معني هذه(القناعه) اذ توقفت
طوال حياتها عن مطالبة امها بملابس العيد الجديده مثل صاحباتها في المدرسه او في الشارع
بين جموع ركاب الميكروباص، اعتادت(رضا) ان تلتقط انفاسها بصعوبه حيث تختلط رائحة العرق ببقايا المسك الذي يعلق بملابس شباب تركوا لحاهم تغطي نصف وجوههم و تتدلي علي صدورهم ، بسبب التكدس و هي في طريقها الي مدرستها الاعداديه بعد ان اضطرت امها الي الغاء اشتراكها في باص المدرسه و بيع السياره الميه 28

التي كان يمتلكها والدها المهندس لتواجه بها ارتفاع الأسعار.

طوال سنوات الدراسه الثانيه في المدرسه الحكوميه التي الحقتها بها امها بعد ان اخرجتها
من مدرستها الخاصه لظروف المعيشه اعتادت رضا علي تعبيرات امها التي اصبحت مثل الشعارات ترددها عندما
يطالبها احد سواء بأجرة الشقه او حساب اي تاجر (اجيب منين ربنا يسهل يومين تلاته كده و ربنا يدبرها)لم
تعد الضلمه تخيفها بعد تكرار انقطاع الكهرباء عن الشقه التي تعيش فيها مع امها في احدي المناطق الزراعيه
التي كانت تحيط بالقاهره و زحفت اليها مباني العشوائيه بسبب عدم قدرة امها في سداد فاتورة الكهرباء.
دائما كانت تكتفي بساندويتش علقت به بقايا جبن ابيض و لم تعد ساندويتشات الهامبورجر
بين يدي زميلاتها في المدرسه تلفت انظارها ....الشئ الوحيد الذي كانت رضا تنتظر قدومه هو عيد
الفطر، لتجمع عيديات الأعمام و الأخوال لتشتري جزمه بدلا من تلك التي ترتديها و لا تمت للجزم
سوي بالاسم فقط. بين و قت و اّخر و عندما تشعر بحاجتها الي رؤيته اعتادت رضا ان تخرج صورة
والدها من بين طيات ملابس امها لتمعن النظر في ملامحه.
في دراستها الجامعيه اكتشفت تلك الأسباب التي وقفت وراء تدهور حالتها الاقتصاديه، و عرفت
رضا انها تنتمي الي اسره من الطبقه التي كانت توصف بالمتوسطه و التي نجحت سياسات
حكومتنا المتعاقبه و المتناقضه في انهائها علي الرغم من انها كانت تمثل صمام امن و امان للمجتمع.
مثلها مثل كل البنات، كانت رضا تحلم بالعريس بعد ان اضطرت الي التنازل عن حلمها بعد تخرجها
في الجامعه، الي ان جاء فتي الأحلام، و اثناء حفل الزفاف فوجئت رضا بعجوز تتدلي التي اختلط
بياض شعرها ببقايا اسود، و قبل ان تصرخ من المفاجأه بعد ان لمحت نظارته الطبيه التي غطت
احد ذراعيها لفافه ضخمه من السيلوتيب و شاربه الذي تعرفه جيدا رغم الشيب الذي زحف
اليه، فوجئت بوالدها يصيح:"مبروك يا حبيبتي.....اخيرا قدرت اجيب خمس ارغفه من الفرن"

و توته توته....خلصت حدوتة رضا

*************************

هاهاهاهاهاهاها.....مش متخيلين انا اتفاجئت ازاي بالنهايه لأن الكاتب فعلا نجح في انه يسحبني

بعيد الي مكان غير متوقع........

تحياتي يا استاذ/ عبد اعظيم

سلااااااااااااام





Monday, April 21, 2008

ممثل بكوبون

النهارده وا نا مروحه عديت علي الدقي، بالتحديد من قدام وزارة الزراعه و شوفت اعلان كبير
من كتر ما استفزني قلت يا واد يا كوكو كميل انت انا مش هرتاح و لا هيجيلي نوم الا اما اقولكوا عليه
الاعلان عباره عن .....افيش كبير للفنان ثقيل الظل، سخيف الملامح و تنح الجوارح...مصطفي و لامؤاخذه شعبان
و الاعلان عن الشيبسي اللي اسمه....لايون...كل ده مش مهم اللي استفزني هو اللي مكتوب

اللي يلاقي كوبون النجمه الذهبيه في كيس لايون هيكون سعيد الحظ
و يا خد دور في الفيلم اللي جاي

ياخد دور في الفيلم اللي جاي ي ي ي ي......ايه ه ه ه ه ه ه ه ه ه ه ه هه
هي بقت كده.....و يا تري بقي النقيب هيوافق بعد التصريحات الرهيبه اللي قالها
و يا تري الأخ سعيد الحظ ده بعد كده يشاوروا عليه ويقولوا الممثل ابو كوبون اهه
و بعد كده ممعهوش كوبون مايمضيش العقد......شئ يفور الدم .....اي حد بيعمل اي حاجه
و الناس اللي درست و طلع روحها و عينيها عشان تبقي ناس دارسه و فاهمه دول
يولعوا يا اما هما كمان بقي يسيبوا الدراسه و يجروا يشتروا كراتين شيبسي عشان يلاقوا كوبون

شئ عجيب اوي يا اخونا....العمره بكوبون....الحج بكوبون ....و التمثيل بكوبون....فاضل ايه تاني يبقي بكوبون


ربنا يستر

سلاااااااااااااااام

Friday, April 11, 2008

هتخنق يا مستر/ع

الظاهر يا جماعه ان مديري المبجل هياخد من عشتي رقات و رقات
ليه يا كوكو يا كميل عمل ايه تاني مستر ع ؟؟؟؟؟؟
انا هقولكوا و انتوا قولوا ليه حق و لا لأ اطق اموت من قهر الانسان لأخيه الانسان
*************************
و صلت الشركه من نص ساعه كده في ميعادي معززه مكرمه و علي وشي كل علامات البهجه
و الفرح بشوارع يوم الجمعه و جمالها و هدؤها و فراغها
طلعت سلالم العماره بعد سلاموا عليكوا و عليكوا م السلام للسيكيوريتي
و كانت الصدمه بمجرد ما دخلت برجلي اليمين من عتبة باب الشركه
فجأه جالي حاله من الاختناق من شدة الريحه اللي انا شماها
و بعد شويه ادركت ان البيه صاحب الشركه الله ي.......يكرمه طلب شركة الرش
ايه ؟؟؟؟؟؟؟؟؟؟؟؟؟؟؟؟؟ رش .....ايوه رش يا صحابي الكميلين
و تخيلوا بقي اما كوكو كميل زيي يقعد في وسط الريحه المعفنه دي يجرالوا ايه
انا بقالي دلوقتي في الشغل ساعه الا ربع مثلا جالي اختناق صداع و دوخه
ربنا ما يوريكوا......حاجه مقرفه اوي .....يعني هو مكنش عارف يديي الشركه كلها اجازه لمدة يوم
تكون ريحة الزفت ده راحت شويه......لأ و ليه و هو تفرق معاه ايه ما انشالله نموت و لا نروح في ستين داهيه
نيجي و نشتغل و نقعد في الريحه الزفت دي و نصاب بالتهاب رئوي و لا سل
شئ غريب يا جماعه جدا انا مستفزه اوي من الحركه دي
و لا انتوا ايه رأيكوا؟؟؟؟؟؟؟؟؟؟؟؟؟؟؟؟؟؟؟

Sunday, April 6, 2008

قال يا با علمني الهيافه

قال يابا علمني الهيافه......قال تعالي في الهايفه و اتصدر
رئيسي في العمل راجل يجيب شلل رباعي الحقيقه....او متفهموش هو الفراغ هيموته و لا ايه
كل شويه يطلعلنا بقرار جامد من اللي هما بطريقه هوجاء و انفعاليه بحته...و بعد التحريات اللي عملتها عنه
من الزملاء الأفاضل اللي اقدم مني في المكان ، عرفت انه علي الحال ده من زمان
حقيقي يا جماعه بيستفزني ...يعني مثلا اي شركه بتكلف الساعي او الأوفيس بوي بأنه يكون مسؤل
عن فتح الشركه قبل حضور الموظفين....انما الأخ عندنا لأ لازم يكون المفتاح مع حد من الموظفين
و طبعا الأخ الموظف ده لازم يجي بدري شويه او قبل ساعات العمل الرسميه عشان يفتح باب الشركه
اللي حصل بقي ان يوم نزل الأخ صاحب الشركه من شقته...اصل هو ساكن في العماره اللي فيها الشركه
المهم نزل لقا باب الشركه مقفول و ميعرفش ان الناس يا عيني ملطوعه في الشارع من بدري مستنيه
اللي معاه المفتاح....فما كان منه الا انه اصدر قرار بمعاقبتنا...علي قلة ادبنا...و اصدر قرار بأن ساعات العمل تبتدي الساعه 8و نص بدل 9 و ده عشان الموظفين تتربي...طب يعني ما كنت تخصم للي اتأخر اللي معاه المفتاح
لأن مفيش كده في الدنيا طب الواحد ينزل من البيت الساعه كام بقي
المهم خدوا عندكوا من المواقف الجميله دي كتييييييييييييييييير.....بس اخرها بقا و اللي جاب اخري بصراحه
و خلاني اكتب البوستايه دي .....هو ان احنا في امان الله من كام يوم قاعدين في مكاتبنا دخل علينا احد السعاه
و قال....مستر ع ...و ده للستر عليه مش اكتر مزكرتش اسمه...طلع قرار بمنع علب المناديل علي المكاتب
طبعا انا الكلمه خرمت ودني....و بعد شويه استوعبت و فقت ...علي تعليقات خفيه و من تحت لتحت علي القرار
الهام اللي المبجل ابو كرش كبير طلع بيه فجأه....يعني انت هتفرق معاك ايه ان علبة المناديل علي المكتب
و لا في الدرج لا حول و لا قوة الا بالله ....خلاص يعني اصل الشركه مفيهاش غلطه كله ماشي زي الساعه
و جت علي علبة المناديل...طب يا اخي متشوف لمبة الحمام اللي قعدت محروقه اسبوع و متغيرتش
و لا الشطافه بردو اللي بايظه ...و لا و لا و لا....اقول فيك ايه و انت فيك كل العبر....بجد يا جماعه
فكرني بالبلديه اللي بتدهن الرصيف علي عدم نضافته....و شارع جامعة الدول اللي كل اسبوعين
بيغيروا الورد اللي فيه .....زي ما يكون احنا خلاص البلد ميه ميه و مش ناقصها الا التفاهات دي
و طبعا بعد قرار علبة المناديل.....مكانش علي لساني الا اني اقول
قال يا با علمني الهيافه........قال تعالي عند كوكو الكميل في الشركه و اتعلم
سلام م م م م م

Saturday, March 29, 2008

هيا بنا نضرب


سؤال وحيد برئ شريف لطيف ظريف
تفتكروا هتيجي بفايده ؟؟؟؟؟؟؟؟؟؟؟؟؟
ربنا معاكوا يا شباب

Saturday, March 22, 2008

Jumper


فيلم من انتاج2008 يعرض حاليا في سينما جالاكسي مكان ما انا اتفرجت عليه امبارح في حفله الساعه 7

مقدرش انكر اني استمعت الي حد كبير بالفيلم رغم عدم ميلي لأفلام الخيال العلمي، بس احتمال اللي خلاني مبقاش متضايقه ان الفشار كان حلو ده اولا و ثانيا ان الفيلم بيميل اكتر لأفلام الأكشن اكتر منه فيلم
خيال علمي

يتناول الفيلم فكره غريبه شويه، و هي الانتقال عبر المكان في بربشه عين، و دي قدره خاصه يمتلكها بعض الأشخاص القليلين جدا و طول الفيلم يطاردهم مجموعه تسمي بالبلادينيين ...بقيادة الممثل الأمريكي
و اللي اخترع الات مخصوصه لاصطياد Samuel Jackson
النطاطين بالكهرباء و هما بينتقلوا من مكان لمكان و ده من خلال
الذبذبات اللي بيعملوها خلال انتقالهم من مكان لمكان

باختصار زي ما بيقولوا كده هو فيلم و لا قصه و لا مناظر
بس في نفس الوقت رغم انه فيلم لا يقاس فيه تمثيل و لا اخراج
و لا سيناريو...فهو فيلم خدع بصريه بالدرجه الأولي
و طبعا ارتباط الخدع بالمونتاج يبقي المونتاج بتاع الفيلم كمان مظبوط جدا....نيجي بقي لتفصيص الممثلين

Hayden Christensen
ممثل كندي...احد ابطال سلسله افلام الخيال العلمي الشهيره اللي انا شخصيا مشوفتش منه و لا جزء
هو ممثل وسيم جدامن مواليد سنة 1981 من رأي ان هو ممثل جيد الي حد كبير Star Wars
بس نوعية الأفلام دي مبتظهر امكانيات الممثلين بس نجح المخرج في اختياره لأداء الدور

samuel Jackson

ممثل امريكي غني عن التعريف له رصيد من الأعمال اللي برع فيها
اكتر ما عجبني فيه في الفيلم ده هو الشكل الخارجي للشخصيه او اللوك







Jamie Bell

ممثل انجليزي .. اول مره اشوفه ...و هو الممثل الوحيد في الفيلم
اللي حظه كويس لأنه كان عنده المساحه اللي يبين بيها قدراته و امكانياته التمثيليه...هو ممثل هايل متمكن من نفسه و له حضور عالي جدا رغم عدم وسامته و رغم انه انجليزي فلا تتسم ملامحه بالبرود خالص














Rachel Bilson

ممثله امريكيه...اصابتني طول الفيلم بحاله من عدم الراحه معرفش ليه ..هل لأن وشها مش مريح
و لا لأنها فكرتني بالممثله ثقيلة الظل اللي بقيت تفتح الحنفيه تنزل منها الممثله اللي ملطوعه في كل اعمال التلفيزيون و كل المجلات و الجرايد و الأفلام و البرامج ..منه و لا مؤاخذه فضالي...معرفش بس الحقيقه كانت كل متظهر في لقطه
اقفل نفسيا جدا و كمان الحقيقه معرفش ازاي المخرج مخدش باله من ان الممثله اللي كانت بتعمل دورها في مراحلها العمريه الأولي لا تشبهها بالمره ...المهم برضو عشان الواحد ميظلمهاش مقدرتش احكم هي كويسه و لا ترحمنا و تقعد في البيت و يا ريت تاخد اختها منه معاها
**************
و اخيرا ...فات علي الموؤلف و السيناريست حاجات كتير جدا مش مبرره
و كذا موقف لم يكتمل و بقي مبتور ...و اختفت شخصية صديق البطل فجأه و بدون مبرر
و برضو معرفناش ايه سببب مطاردة البلاديين للنطاطين هل لأنهم حاقدين عليهم ؟؟؟
ام لأنهم طيبين ؟؟؟و لا فعلا للسبب اللي اتقال علي لسان
ٍاكتر من مره...و هو ان قدره التواجد في كل مكان هي قدرة الاله وحده Samuel jackson

و يظل المعني في بطن الشاعر...و تظل فلوس التذاكر في جيب صاحب السينما

سلام

Wednesday, March 19, 2008

بوستايه 2ْفي1


البوستايه دي يا جماعه زي برت بلاس بالظبط 2في 1
او عيدين في واحد
اولا ....مولد النبوي الشريف ..اعاده الله علي كل واحد مننا و كل الأمه الاسلاميه بالخير و اليمن و البركات
ثانيا...عيد الماماهات...و ده عندي كلمتين اقولهم لكل ماما في عيدها

كل سنه و كل ام ربت و تعبت و شالت الهم بخير
كل سنه و كل ام استحملت و مشتكتش و مقصرتش و مبخلتش بجهدها و روحها بألف خير
كل سنه و كل ام و اي ام مثاليه و مضحيه بألف سلامه
كل سنه و كل ام متكرمه و متشاله فوق الراس
كل سنه و كل ام بتشيل ولادها علي كتافها و تتنطط بيهم في الحر و البرد و مهما كانت الظروف
كل سنه و كل ام من خوفها علي ولادها تنط من الدور التالت بولادها في حضنها عشان تنقذهم من الحريق
(و ده زي ما اكن مكتوب عن الحادثه في الجرنان من كام اسبوع كده)ام بطله

كل سنه و انتي طيبه يا كل ام بجد...يا كل ام تضحي بالنفس الأخير ...يا كل ام مبتفكريش في نفسك
يا كل ام يجيلك هديه في عيد الأم تشيليها عشان جهاز بنتك و مش مهم نفسك....كل سنه و كل ماماهات
العالم طيبين و بخير و بسلامه و بسعاده و بصحه

و اخيرا...عزائي لكل شخص مكنتش امه واحده من الناس الي فوق دول
لأن اي ام غير كده متبقاش ام...ميبقاش في جنه تحت قدميها
عزائي لكل شخص ...كانت امه مش امه ...و كان ليه ام بديله

و عزائي الأخير لكل واحد نصيبه و قدره و مشيئة ربنا مخليتوش يعيش في حضن ام بجد
لأن اكيد حضن الأم ليه طعم تاني...اللي مجربوش اكيد خسر كتير
حتي لو جابوا له مكانه مليون حضن

كل سنه و انتوا طيبين....يا جماعه لازم اللي عنده ام بحق و حقيقي لازم يوطي يصلي ركعتين شكر لله
بجد مش بهزار ....لأن اللي عنده ام بحق و حقيقي ده عنده كنز و نعمه..و اللي ميشكرش علي النعمه
ربنا بيحرمه منها

سلام

Sunday, March 9, 2008

Vantage Point


رغم عدم تحمسي لمّا قالولي ياللا نروح سيتي ستارز نشوف الفيلم،الا اني انبهرت
من اول لقطه في الفيلم......حقيقي تهنئه خاصه جدا لكل واحد مر بس من قدام
او من ورا الكاميرا، فيلم جيد جدا من ناحية الصوت و الصوره و الفكره
بأختصار الفيلم عباره عن حدث معين و هو زيارة الرئيس الأمريكي
لسلامانكا في اسبانيا لحضور احد مؤتمرات ...اللي لا بتقدم و لأبتأخر....و بيتم اغتيال
الرئيس بمجرد طلوعه علي المنصه....طب و ايه الجديد يا كوكو يا كميل ما مليون فيلم
شبه كده.....لأ ملكوش حق الجديد بقي هو ان في موقع الحدث اللي بيتم فيه تلات اربع الفيلم
فيه 8 اشخاص اغلبهم لا يمت للأخرين بصله،لكن كل واحد موجود لسبب مختلف
الجديد هو ان المخرج بقمة العبقريه يوريلك نفس الحدث من وجهة نظر كل شخص من دول
و ازاي تعامل مع الموقف و من خلال ده بيربط خيوط الموضوع الي ان يكشف لك عن
مرتكبي العمليه و مفجري المكان .....يا جماعه عمري في حياتي ما شفت فيلم فيه
مطاردات عربيات بالحلاوه و التقنيه دي .....و مونتاج الفيلم و تتابع الللقطات
لعب دور كبير جدا في عمل جو من التلاحق ...و في نفس الوقت نجح فريق التصوير
في التحكم في حركة الكاميرات بمهاره و حساسيه محصلتش.....ده غير ان المخرج
استخدم اسلوب جيد جدا في الرجوع بالخلف بالمشاهد ...يعني يمشي بيك المشهد لغاية جزء مثير جدا
و فجأه يرجع الشريط بالعكس و يرجع يبتدي تاني من الأول بس بداية الأحداث عند شخص تاني
كل ده و لسه متكلمتش بقي عن الممثلين اللي فعلا مفيش واحد فيهم حتي اللي عمل مشهدين صامتين
متخرجش من الفيلم و انت فاكره و متأثر بيه و بدوره
DEnnis Quaid

و هو ممثل امريكي شهير جدا ....قام بدور الحرس الشخصي للرئيس الأمريكي و اكثر واحد
من الحرس بيثق فيه الرئيس


Forest Whitaker

ممثل يتسم بالبرائه و الوجه الطفولي تقع في غرامه من اول نظره و من اول كادر
يسحبك وراه بابتسامته الصافيه و وشه المعبر و احساسه اللي بيوصلك بمنتهي السلاسه
و قام بدور احد الحاضرين للافتتاح المؤتمر و عنده ولع بالتصوير و
كان احد الشهود العيان و المصورين للأحداث الخفّيه اللي محدش شافها
الا من خلال عدسة كاميرته و نجح الممثل في
انه يأثر فيّ بشكل ميتوصفش ...فاز الممثل الرائع بجائزة الأوسكار احسن ممثل
سنه 2007 و ده عن دوره في فيلم
The Last King of Scotland


Matthew Fox


ممثل عادي.....صحيح وسيم و زي القمر بس مش مميز و فيه منه كتير
بس ده ما يمنعش انه قام بدوره علي اكمل وجهه
و هو احد حرس الرئيس و في نفس الوقت .....و لا بلاش اقول يمكن حد يحب يتفرج
فبلاش احرقه.......احب اضيف ان الممثل هو احد ابطال المسلسل الأجنبي
Lost


Sa3id Taghmaoui

ممثل فرنسي من اهل من المغرب العربي....من النازحين لفرنسا
تاريخه و انتاجه الفني في هوليود مش كبير و لكن من رأي
ان الفيلم ده هيكون مبثابة قفزه و نقله كبيره ليه
ممثل رائع من الوشوش العربيه اللي تحسسك بالرجوله الخشنه
و مش هقولكوا برضه دوره ايه عشان محرقش الفيلم
بالمناسبه شارك الممثل المغربي الفرنسي ..سعيد طاغماوي
في فيلم سنة 2004 مع النجم عمر الشريف و هو فيلم
كنت كتبته عنه بوستايه قبل كده ...هتلاقوها هنا Hidalgo

Eduardo Noreiga

ممثل اسباني اكثر من رائع...ليه طابع مختلف في التمثيل بحكم انه نجم سينما في بلدهم و ده خلاه
مخلوط بالطابع الغجري اللاتيني في تمثيله...و قام بدور رجل بوليس من رجال البوليس في
سلامانكا اسبانيا


Edgar ramirez

ممثل فنزويلي حاد الملامح، ممثل اول مره اشوفه علي الشاشه لكنه ممثل متمكن من ادواته
رغم ان السي في بتاعه مش ثري انما هو ممثل موهوب جدا و ذا ملامح عربيه الي حد كبير
قام بدور احد الشباب المنظمين للحركه الجهاديه..الجدير بالذكر ان الممثل ده بيتكلم 5 لغات
اسباني، ايطالي،فرنساوي، الماني و انجليزي.....يا بخته


Ayelet Zurer


ممثله من مواليد تل ابيب اسرائيل، ذات ملامح وجه رجالي حاده و لا يمكن وصفها بالجمال
بأي حال من الأحوال، لكنها ممثله رائعة الحضور و التميز علي الشاشه
و فيها حراره و ايقاع داخلي يخليك مترفعش عينك من عليها و انت بتتفرج
و اللي اداها التميز ده انها ليها طابع في التمثيل مختلف تماما عن ممثلات هوليوود
و الغريب جدا انها قامت بدور احد الشباب الي المفروض مسلمين للقيام باغتيال الرئيس الأمريكي

*******************************
احب اضيف في النهايه ان الفيلم حقق في اسبوعين عرض بس 40 مليون دولار امريكي
و ده حسب بيان ميزانية السينما الأمريكيه
شعور لطيف حقيقي لما تشوف ممثلين من جنسيات مختلفه بيعزفوا سيمفونيه فنيه عالية الجوده
كل واحد فيهم بطريقته و اسلوبه و تتكنيكه الفني و في نفس الوقت متناغمين
الي اقصي حد و مفيش اي نوع من انواع التنافر

في النهايه، نجح الفيلم الي حد كبير انه يحقق معادله صعبه مش بتحصلو انه زي ما صور امريكا
و الرئيس الأمريكي ملايكه و خلاك تتعاطف معاهم، في نفس الوقت وقف في صف الجماعه
الانتحاريه و صورهم في صوره طيبه
و هو ده معني عنوان الفيلم ...رؤية الأحداث من زاويه واضحه

سلام