Sunday, April 29, 2007

كوكو اختار اول طريق

الحلقه اللي فاتت 00
كوكو وقف محتار قدام الأسهم الملونه
الحلقه دي 00
صحاب كوكو نصحوه بأختيارات متساويه بين اللون الأحمر و الأخضر
كل لون منهم خد اختيارين ؛ فقرر كوكو انه يعلب لعبة كوكو زبادي
و يختار اللي يطلع انه يبدأ بيه ؛ ووقف كوكو و بص للأسهم و قعد
يشاور بين السهم الأحمر و السهم الأخضر و يقول 00
حادي بادي كوكو زبادي شالوا و حط كناحه علي دي
و طلع السهم الأحمر ؛ بس وقف كوكو و حب يتأكد تاني ؛
حادي بادي كوكو زبادي شالوا و حط كنحه علي دي
و المره دي طلع الأخضر ؛ و اتلعبك كوكو في نفسه و مبقاش عارف يعمل ايه؟
و جرب تاني طلع الأحمر و تاني طلع الأخضر و كل مره يعيد
يطلع لون تاني ؛ و في الوقت اللي وكوكو واقف يلعب كوكو زبادي و هو مربوك ؛
ظهر كوكو صغنن من فوق في السما بيغني و هو طاير و لمح كوكو الكميل اللي واقف
عمال هاري نفسه ؛ و طار الكوكو الصغنن ده ناحية الأرض ؛ وراح ورا كتف كوكو
وراح مخبط علي كتفه و قال 00 مثاء الخير يا ثديقي انا كروان المنطقه و تقدر تقولي
يا كيرو ؛ و ده الاثم اللي بيناديني بيه اثدقائي ؛ ايه بقي يا ثحبي اولا اثمك الكريم ايه ؟
ثانيا واقف محتار و عمال تضرب اخماث في اثداث ليه ؟
رد كوكو 00 اهلا بيك يا كيرو انا اسمي كوكو الكميل ؛ وواقف محتار عشان في عصابه
0000000000و حصل و حصل 00000000 و بعدين 00000
بس يا سيدي هي دي الحكايه ؛ رد كيرو 00 طب و يا تري قبل متمشي في الطريق
فكيت شفرة الخريطه ؟ رد كوكو 00 يعني ايه شفرة الخريطه اصل انا اول مره اتعامل مع عصابه
فمش فاهم ؛ طب اديني الخريطه 00 رد كيرو 00 شوف يا كوكو يا كميل انت
كل خريطه بيبقي ليها شفره جواها تفكها عشان تعرف مكان العمليه اللي المفروض تعملها ؛
و نام كيرو علي بطنه و فرش الخريطه علي الأرض و قال لكوكو 00 ناولني اربع زلطات من عندك هناك
و راح كوكو جاب الزلطات ؛ حط بقي كل زلطه علي طرف من طروف الورقه ؛ و دلوقتي نبدأ الحثابات
لو جبنا الثهم ده كده ووثلناه للطريق ده اممممممممممممممممم ايوه و بعدين 10 في 6 ب 3 نجمات حمر
في المركبه الفضائيه العموديه مع خط الثتواء000 و قعد كيرو يوشوش نفسه كده و كوكو قاعد جنبه بيتفرج عليه
و هو مطلع القلم الرصاص و عمال يتقلب علي بطنه و علي ضهره 00 و فجأه نط كيرو و قال لكوكو 00
اهو كده اتحلت دلوقتي اقدر اقولك ان الاتجهات التلاته بيوثلوا لنفث المكان بث في
طريق بري و طريق جوي و طريق بحري ؛ انت تخش من اي طريق يعجبك و من جوه تثأل
و تخرم بقي ؛ لرد كوكو وهو مبسوط 00 ياه ربنا يخليك يا كيرو يا كميل الحق بقي
يدوبك الساعه اربعه اهه سلام بقي ؛ رد كيرو 00 لأ الثاعه خمثه مش اربعه
رد كوكو 00 لأ الساعه اهه اربعه ؛ رد كيرو 00 انت شكلك مظبطش الثاعه علي
التوقيف الثيفي ؛ خبط كوكو راسه بكناحه و قال 00 اه ده انا نسيت يبقي انا كده الوقت
قل ساعه و انا المفروض اكون هناك مع دقة الساعه ال12 نص الليل ؛رد كيرو 00
متقلقش هتلحق انشالله و لو احتجت اي حاجه انده و قول يا كيروووووو هتلاقيني قدامك
في ثواني ماشي ؛ رد كوكو و هو بيمد كناحه الكميل عشان يشكر كيرو و قاله 00
ميرسي اوي يا كيرو بس سؤال اخير تفتكر ابدأ باللون الأحمر و لا الأخضر ؟
رد كيرو و قاله 00 انا بشجع النادي الكوكاهلي فبحب اللون الأحمر فأبدأ بيه ؛
رد كوكو ماشي خلاص عشان خاطرك اختار الأحمر يا كيرو كاكان بقي ادعيلي ؛ رد كيرو
و هو بيشاور لكوكو بجناحه و بيودعه 00 كاكان و خلي بالك من نفثك و متنثاش لو
احتجتني اندهه يا كيرووووووووووووووو 00 و طار كيرو و بعد و هو بيبص علي كوكو
و هو داخل في الطريق اللي بيشاور عليه السهم الأحمر 00 و فضل كوكو ماشي شويه لحد ملقي قدامه
يافطه كبيره حمرا و مكتوب عليها 00
welcome to شلاليت city
و بص كوكو لليافطه بأستغراب اوي من اسم المدينه العجيب ؛ و مشي كوكو شويه
و فجأه شاف حاجه فظيعه جدا ووقف كوكو في وسط الطريق مش عارف يعمل ايه 00
كاكان
بعد ما ساعدتوا كوكو في اختيار الطريق الحلقه اللي فاتت
ياللا دلوقتي جاوبه علي السؤال 00
يا تري ايه الشئ الفظيع اللي شافه كوكو الكميل ؟؟؟؟؟؟؟؟؟؟؟؟؟؟؟؟؟؟؟؟؟؟؟؟
ربنا معاكوا


Friday, April 27, 2007

كوكو زعلان

علي فكره كوكو واقف من الحلقه اللي فاتت قدام الأسهم و مش عارف يختار انهي لون
و اتخانق معايا و زعقلي و قالي صحابك اللي في العشه دول اللي انتي فرحنالي بيهم
و لا عرفوا يساعدوني ؛ لأنه لما سألني قولتله واحد قال احمر وواحد قال اخضر ؛
فطبعا راح مصوصو في وشي جامد و قالي ؛ طب انا يعني اختار انهي بقي
ما هو مافيش لون جه اكتر من التنيين ؛ فبصراحه انا قولتله استني يا كوكو
يوم كمان و لو محدش اداك عقاد نافع ؛ اتكل علي الله انت و احساسك بقي ؛
فمن فضلكوا بقي متكسفونيش قدام كوكو لحسن زرابينه اللي مش كميله تطلع و يزعل
هكتبلوكوا الاختيارات تاني و ساعدوني 00
سهم اصفر يمين و سهم اخضر شمال و سهم احمر علي طول
يختار انهي طريق؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
كاكان

تاج كمااااااااان

شموسه يا جماعه دبستني في تاج من اللي هو ؛
و انا قلتها كلمه في التاج اللي فات ان كوكو لما يسعد يجيلوا
5 تاجات في الشهر ؛ يا للا اهي شموسه حبيبتنا و مننا و علينا
و مرداش اكسفها ؛ يا للا كالعاده عارفين من نفسوكوا كوكو بيعمل ايه قبل التاج 0000
ايوه برافو عليكوا ؛ بيشمر كناحاته الكميله و يصلي علي النبي 000
**************************************************
انت شبه مين من القادة ؟
كوكو الكميل طبعا بما انه كميل فلازم يكون عظيم كمان فطبعا مش هيكون اقل من 00
الاسكندر الأكبر

انت شبه مين من friends ?

انا مش متابعه اوي المسلسل فمش عارفه اسمهم
بس اكيد هبقي شبه الكميل فيهم

ايه أكتر فيلم كلاسيكي بيعبر عنك ؟
فيلم فكاهي جدا the party



بالنسبه لتمرير التاج اللي يحب يجاوب عشان اكتشفت ان في ناس مش بتحب
تستقبل تاجات ؛ فعشان كوكو ميكسفش نفسه و تبقي مش كميله اللي يحب
يتفضل

سلام

Thursday, April 26, 2007

افففف تغيير الساعه اففففففف

شئ يحير و يبرجل و يشتت و يلخبط و مبحبوش خاااااالص
و هو تغيييير الساعه 00
افففف شئ ممل ؛ علي حد معلوماتي ان تغيير الساعه ده حصل
في عهد عبد الناصر و ده للتوفير في استهلاك الكهربه و تبقي فترة
النور بتاع ربنا اطول في الصيف او بمعني اصح يبقي الليل اقصر ؛
طب يا تري ايه سبب اننا لحد دلوقتي بنغير الساعه بين الصيف و الشتا؟
بحس ان الدنيا بتتكركب ؛ و مواعيد الصلاه بتتغير و الواحد يبقي مظبط نفسه
علي اوقات معينه تلاقيها اتغيرت ؛ طب احنا دلوقتي خلاص الحمدلله مش في حالة حرب ؛
و لا حالة فقر لدرجة ترشيد استهلاك الكهربه للدرجه دي ؛ طب مانبطل تغيير الساعه بقي
و نثبت علي رأي يا صيفي يا شتوي ؛ يا ابيض يا اسود ؛ و انا كنت ناويه احتجاجا علي الموضوع
ده اني اخلي ساعة العشه علي التوقيت الشتوي و ده لأني بحب الشتا اكتر كمان ؛ بس للأسف
لظروف خارجه عن ارادتي الساعه اتغيرت توموتيكي توموتيكي 00
بس انا هفضل اتسأل ايه يا تري سبب تغيير الساعه ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
سلام

Tuesday, April 24, 2007

كوكو حيران

الحلقه اللي فاتت 00
كوكو وقف قدام باب الشقه و جاتله فكره
الحلقه دي 00
كوكو فكر انه لازم يسيب دليل للناس او للبوليس او لأي
حد انه طلع رحله عشان ينقذ ام مكاوك ؛ و لقا كوكو ان احسن طريقه
انه كل شويه يمشيهم يسيب دليل و هما يتبعوه ؛ و فعلا دخل كوكو تاني الشقه و كلم نفسه
بصوت عالي عشان الكاميرات و اجهزة التصنت تسمعه و قال 00
كده يا كوكو يا مش كميل تنسي كيس القمح اللي هتنقر فيه في السكه
و انت رايح لما تجوع 00 و خد كوكو كيس القمح و خرج من الباب تاني
و قرر انه يبدأ من هنا رمي القمح ؛ و رما كوكو شوية قمح قدام باب
الشقه و بعدين حدف كوكو الشنطه من فوق الشجره ؛ و لأول مره من كتير يرفع كوكو
كناحاته الكميله و يحاول يطير و حس كوكو بشعور غريب و هو طاير و نازل للأرض جنب الشنطه
حس ان كناحاته ضعيفه و انه محتاج يمرنها كتير اوي عشان يقدر يرجع يطير تاني ؛
ووصل كوكو جنب الشنطه و شالها علي ضهره بعد ما طلع منها الخريطه عشان يشوف السكه
و لقا اول سهم من عند بيته في اتجاه الشمال ؛ و شد كوكو الرحال في اتجاه الخريطه
و مش ناسي انه طول السكه يرمي القمح علي الأرض عشان يعلم خط سيره ؛
وفضل كوكو في طريقه شويه يطير و كناحاته توجعه و شويه يمشي و رجليه تعيط منه من التعب
و شويه يقعد في نص السكه يريح و ياكل ؛ و بعد مشي طويل لقا كوكو في الصحرا ؛
و خاف اوي من المكان اللي مفيهوش شجره و لا زرع و لا حاجه خالص ؛
و كان عطشان جدا و غرقان في العرق و بيعصر ريشه المبلول من الحر ؛
و كان كوكو بينمنم في الميه عشان ماتخلصش بسرعه ؛
و كل ما كوكو يحس انه تعبان و مش قادر يجيله صوت جواه يقوله
عشان ام مكاوك ؛ فيتشجع كوكو و يجيله قوه و طاقه ؛ و فضل كوكو ماشي
لغاية ما جه عند مكان في مفترق طرق طريق و مقسوم تلاته ؛
و كل طريق عليه سم لون سهم اصفر يمين و سهم اخضر شمال و سهم احمر علي طول
ووقف كوكو وفتح الخريطه و مفهمش منها هو المفروض يدخل انهي طريق
و فضل واقف يفكر لحد ما غلب كوكوهه و قرر انه يجرب بالحظ و هو و نصيبه
و لو لقا نفسه تايه يبقي يرجع و يجرب طريق تاني لحد ما يلاقي البوابه المرسومه علي الخريطه
اللي المفروض ان ام مكاوك هناك ؛ى ووقف كوكو حيران ينقي انهي سهم فيهم الأول
و لما زهق خالص قالي اسألكوا و هو هيدخل الطريق اللي يجي عليه اختيارات اكتر
ياللا قولوا لكوكو و هو واقف في الطريق مستني هتقولوله ايه 00
كاكان

Monday, April 23, 2007

اي جريده تتابع

نتيجة التصويت المره دي النسبه فيها مش متباعده اوي عن بعضها
بمعني ان نسبة قراء المعارضه عددهم مش اكتر كتير من القراء التنيين
و كانت النتيجه كالتالي من 73 صوت 00
اي جريده تتابع؟

Total votes 73

الدستور 23
32%
المصري اليوم 17
23%
الأخبار 5
7%
الأهرام 19
26%
الحوادث 2
3%
مش بتقرا جرايد 7
10%


بس جالي لفت نظر من احد البلوجويه و قالي ان انا محطتش خانة اخري
في الاختيارات و ان هو بيقرا جرايد مختلفه عن دي ؛ و انا بقوله انا اسفه
طبعا و ان انا مخدتش بالي ؛ و دلوقتي فاتحه باب النقاش لأسباب قراية
الجرنان اللي انت اخترته ؛ او لو مخترتش انت بتقرا ايه مختلف عن دول؟؟؟؟؟؟
و يا للا حضروا نفسكوا للأستفتاء الجديد
سلام

Sunday, April 22, 2007

كوكو خرج ليبدأ الرحله

الحلقه اللي فاتت 00
السؤال كان كوكو سمع ايه بيرن؟؟؟؟؟
الحلقه دي 00
اتسمر كوكو الكميل مكانه اما سمع الصوت ده بيرن و اول حاجه جت في دماغه
ان دي اجهزة التصنت اللي بيزرعها المجرمين في البيوت للتصنت علي الضحيه
و بعدين قال في نفسه 00 يا نهارك يا كوكو اللي مش كميل لحسن تكون قنبله
او الغام تحت ركلي واول ما ادوس تتفجر و كوكو يبقي اشلاء و ريشه يطير
في كل حته 00 و فضل كوكو واقف كده و بعدين الصوت سكت ؛ راح كوكو مخرج نفس
جامد من الراحه ان الصوت سكت من غير خساير ؛ و لسه كوكو هيتحرك
راح التليفون رن 00
- الو كوكو الكميل اوي يصوصو
- احنا مش بنتصل بيك مش بترد ليه؟ -
- انا مسمعتش التليفون يا استاذ خطاف ام مكاوك
-احنا اتصلنا بيك دلقوتي علي الكوكوبايل بتاعك مسمعتش و لا ودانك مسدوده نسلكهالك
فجأه قعد كوكو يصوصو ضحك للركب لدرجة ان عينيه الكميله دمعت 00
- انت بتصوصو ليه كده يا كوكو يا مايص انت ؟
- لأ ابدا 00 يصوصو ضحك 00 اصل انا كنت فاكر ان اللي بيرن ده كنبله مثلا
- ما انت اصلك جاهل و مشتريتش كوكوبايل بقالك كتير و متعرفش انك دلوقتي
تقدر تجيب رنات مختفه من نمر تليفونات زي 00 يقلد صوت المزيعه 00
اتصل فورا برقه 090012345 و نزل النغمات اللي تعجبك 00 عرفت انك جاهل يا
كوكو و انك مش متابع قناة ميلودي افلام
- من فضلك يا استاذ خطاف متغلطش انا مشتريتش كوكوبايل عشان انا فضلت اني اسعد حد
احسن من المظاهر و بعدين 00
- خلاص يا عم الكوكو انت هتتصاحب علي و لا هتفضل ترغي كده لحد ما نموت الرهينه
لأ من فضلك دي امي لو سمحت كل اللي انت عايزه انا هعمله
- اسمع يا كوكو انت تجيبلنا 1000 طن حبوب من عندكوا مقابل انك تاخد ام مكاوك
- ياه ه ه ه ده كتير اوي و بعدين ده احنا كده تحصل عندنا مجاعه
- خلاص خلوا الحبوب عندوكوا و بلاش تاخد ام مكاوك بس يا تري هتقدر تاكل حبوب
كل ما تفتكر انك انت السبب في موت ام مكاوك
- طب طب طب اسمعني ده تقيل اوي انا هشيله ازاي ؟
- خلاص اكتبلي بيهم شيك و هتفضل عندنا هنا انت و ام مكاوك و الشيك
عشان نتأكد ان الغيطان اللي نسحب منها فيهالا حبوب مش محصوده
- ماشي ماشي انا موافق
- انت دلوقتي تبدأ رحلتك ؛ يا لا نظبط الساعه علي الصفر
- بس انا معنديش ساعه
- يوه ه ه ه ده انت شكلك هتخنقنا ؛ هتلاقي عنك ساعه في شنطة العده اللي كانت في المطبخ
البسها و تعالي نظبطها سوا ؛ و بسرعه لحسن كده الفاتوره هتيجي عندنا كتير اوي
جري كوكو بسرعه و فتح الشنطه و قعد يقلب فيها بسرعه بسرعه ؛
و اخيرا لقا جيب صغير فيه ساعه راح مطلعها و لا بسها 00
- انا جيت يا استاذ خطاف و لبست الساعه
- طب اظبطها معايا
- مش بعرف
- يوه قرفتني انت عايزلك حد كبير في كل حاجه
و راح مادد الخطاف جناحه الضخم من سماعة التليفون و شادد الساعه من كنح كوكو
و راح بعد شويه مرجعهاله تاني 00
- ارتحت اهو انا ظبطهالك ؛ اتفضل يا سيدي و فتح ودانك عشان هنتصل بيك علي الكوكوبايل كتير
تيت تيت تيت
- هو انت كل مره تقفل السكه في وشي ايه ده
و قفل كوكو السماعه و جري اطمن ان الحاجات في الشنطه ؛ و جري فتح الدرج
اللي فيه دفتر الشيكوكات بتاع انكل كاكا و كتب شيك و مضي بأسمه
و خرج كوكو تاني و شال الشنطه علي ضهره و قرا الفتحه و دعا ربنا انه يوفقوا
و اتصرف بمنتهي الحرص عشان الكاميرات اللي في البيت ؛ و فتح كوكو باب
الشقه و حس بريشه جديده طالعه و عرف انها ريشة المغامره ؛
و خرج كوكو ووقف قدام باب الشقه00 و جاتله فكره عبقريه 00
كاكان
سؤال الحلقه اللي فاتت 00
محدش جاوب علي السؤال للأسف
سؤال الحلقه دي 00
يا تري ايه هي الفكره العبقريه ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
شدوا حيلكوااااااااااا



Wednesday, April 18, 2007

الاسلام ما هو 00

الدين ليس حرفه و لا يصلح ان يكون حرفه 00
و لا توجد في الاسلام وظيفه اسمها رجل دين
و مجموعة الشعائر و المناسك التي يؤديها المسلم يمكن
ان تؤدي في روتينيه مكرره فاتره خاليه من الشعور فلا تكون من الدين في شئ
و ليس عندنا زي اسمه زي اسلامي ؛ و الجلباب و السروال و الشمروخ
و اللحيه اعراف و عادات يشترك فيها المسلم و البوذي و المجوسي
و الدرزي 00 و مطربو الديسكو و الهيبي لحاهم اطول 00
و ان يكون اسمك محمدا او عليا او عثمان ؛ لا يكفي لتكون مسلما
و ديانتك علي البطاقه هي الأخري مجرد كلمه ؛ و السبحه و التمتمه و الحمحمه؛
و سمة الدراويش و تهليلة المشايخ احيانا ياشرها الممثلون باجاده اكثر
من اصحابها ؛ و الرايات و اللافتات و المجامر و المباخر و الجماعات الدينيه
احيانا يختفي ورائها التاّمر و المكر السياسي و الفتن و الثورات التي لا تمت
للدين بصله ؛ ما الدين اذن ؟؟؟؟؟؟
الدين حاله قلبيه ؛ شعور ؛ احساس باطني بالغيب و ادراك مبهم ؛
لكن مع ابهامه شديد الوضوح بأن هناك قوه خفيه حكيمه مهيمنه عليا تدبر كل شئ
***********************
دي كانت مقدمة كتاب الاسلام ماهو للدكتور مصطفي محمود ؛ اللي بصراحه
و انا بقراه شدني وراه و سحبني في حاله من الروحانيه و التركيز الشديد لدرجة
اني خلصت الكتاب في يومين و نص ؛ و اتمنيت ان كل المسلمين يفكروا
بالطريقه دي و يخلصوا في عبادتهم و روحانياتهم قبل مظاهرهم بالطريقه دي
بيتكلم الدكتور مصطفي محمود ربنا يديله الصحه في كل باب من الكتاب علي
ركن او فرض من الفروض بس زاوية تناوله الشرح او التأملات اللي كاتبها
زاويه مختلفه كتير عن اللي متعودين نسمعه ؛ و انا بقرا كنت حاسه انه بيتكلم
مش كاتب و تحس ان كلامه همس بيدخل جواك و تحسه و تقتنع بيه
بمنتهي السلاسه و السهوله و الانسيابيه ؛ مش هقدر اقول اكتر من اللي مكنوب في المقدمه
هو شارح نفسه بنفسه
انا في نيتي اكتب البوست ده من فتره بس اللي خلاني اسرع و اكتبه دلوقتي
البوست اللي قارتها عند سمو الأميره البلطجيه بعنوان اسمي محمد بوست مش بتاعي
و وزيرها الهمام مجهول بعنوان حتي يعود محمد
اللي كتبوا بوست عن بوستايه تانيه اللي هي الأصليه بعنوان انا اسمي محمد للمدون الزميل
صاحب مدونة خربانه يا جدعان
و كانت البوستات دي بتناقش موضوع انا شايفه انه محسوم في الكتاب ده ؛
في النهايه انا تعبت اوي ان اعرف اجيب غلاف الكتاب لو حد لقاه يقولي ؛
بس جبتلكوا حاجه اجسن من الغلاف جبتلكوا مقتطفات من الكتاب من علي منتدي
سبحان الله و انا بدور علي الغلاف لقيته اللي مهتم يقري اللينك اهو هنا
و نهاية بشكر ربنا علي هذا العالم الجليل اللي رزقنا بيه و ربنا يشفيه من مرضه و وحدته
و يديله طولة العمر
الكتاب موجود في مكتبات دار المعارف
سعره 10 جنيه
سلام

Tuesday, April 17, 2007

و رجعت علي التاج

الكوكو الكميل لاما يسعد يجيلوا اكتر من تاج في الشهر
جالي تاج تاني من سمو الأميره البلطجيه ؛ و طبعا كان
لازم ارد بسرعه لحسن تعمل تعديل وزاري و لا حاجه و تشيلني من الوزاره
و اتسول و ملاقيش اكل عيش بقي و حسنه قليله و حاجات كده
المهم يالا كوكو هيشمر كناحاته كالعاده قبل كل تاج و يبدأ 00
*********************************
احب شخص لقلبك في الدنيا ؟
الكيميلين
انسان مستعد تضحي بحياتك 00 ركز في كلمة حياتك دي 00 عشانه ؟
اللي هو كمان مستعد يضحي بحياته عشان كوكو الكميل
انسان كرهته لدرجة الجنون و تمنيت لو تمسك سكينة وتنقض عليه
وتغرزها فى قلبه تقتله وتقف تبص لجثته وتشفي غليل قلبك؟
ياه هو كوكو وقته الكميل فاضي للهيافات دي ؛ سموك ده ياخد
من وقت الوزاره اني اقعد اركز اني اكره حد ؛ اللي مش بحبه مش بكرهه بس
و بعدين كوكو متسامح او بيحاول يوصل للدرجه دي
اسم اجمل كتاب كتبه بشر و تحتفظ بيه حتي الان؟
ياه سؤال صعب لأن كتب كتير بحبها اوي ؛ و لو علي الاحتفاظ
كوكو دودة كتب فظيع بينقر في الكتب جامد و مش بيري كتب حتي لو وحشه
الحقونيييييييييييييي هغرق تحت الكتب النجده ه ه ه
اسم كتاب-كتبه بشر برضة- انت متعلق بيه وبتقرأه كل فترة؟
الطريق الي زمش 00 محمود السعدني
الروايات و المسرحيت
اهم جهاز منزلى انت متعلق بيه او بتستخدمه كتير؟
الكمبيوتر ؛ و التليفيزيون بستعمله راديو و انا قاعده علي الكمبيوتر
شىء تحس بالراحة النفسية عندما تنظر اليه؟
اي حاجه تشد انتباهي و تخليني اسرح معاها
مكان تحس فيه بالحنين الى شىء لا تدرى ماهو و ذكريات جارفة الى لاشىء؟
هههههههههههههههه البانيو
مكان تحس بالراحة عندما تدخله؟
جامع مصطفي محمود ؛ الأوبرا
اجمل مدينة زرتها داخل مصر؟
مدينة الكوكوهات
أجمل مكان طبيعي رأيته داخل مصر؟
البيوت القديمه في احياء مصر الفاطميه
شخصية كارتونية بتحبها؟
daffy duck
نوع هاتفك المحمول؟
و يا تري الاعلان اللي هعمله ده بفلوس و لا لأ؟
سرعة بروسيسور جهازك؟
هسأل حد كبير و اقولك
حجم ذاكرة –هارد- جهازك؟
كوكو بايت 80
المساحة التى تشغلها المواد الاسلامية على جهازك؟
الربع
نفس المساحة السالف ذكرها فى قلبك-الاجابة لنفسك عشان الرياء يا اخواننا-؟
من غير زعل سؤال لا يهم الا الله لأن هو اللي هيحاسبني
و كمان انا معرفش يارب تكون كده
أهم هدف انت واضعه لحياتك دلوئتى؟
التقرب اكتر للصح
مواصفات فتاة –أو فتى للبنات- الأحلام بالنسبة لك؟
يكون كوكو كميل برضو
شعورك لما بتسمع كلمة مصر؟
بحاول احس بالسعاده
شعورك لما بتسمع كلام عن اليهود؟
الاستغراب ان حد ربنا يديله قوه و ذكاء و يستعملها في الشر بدل الخير
شعورك لما بتشوف ظابط شرطة؟
تفرق هو ينتمي الي مين منهم
شعورك لما بتشوف الكناس العجوز فى الطريق؟
بحمد ربنا الذي شافانا و عافانا مما ابتلي به غيرنا
لون البطانية اللى بتتغطى بيها فى الشتاء؟
بكره البطانيه جدااااااااااااااااااااااااا
لون الجورب-الشراب- المفضل لديك؟
سؤال غريب معرفش حسب لون الهدوم
احساسك اذا داست قدمك فى الطريق على مخلفات اخراج حيوان- *** ولا مؤاخذة-؟
يعععععععععععععععععععععععع ؛ و لسه همسح الجزمه في حرف الرصيف
افكارك تجاه شاب ماشى فى الطريق يلبس جلابية بيضاء قصيرة
وعمامة وله لحية وبجيبه السواك وبيده المصحف؟
ما بتفرقش معايا المظاهر اوي
احساس يراودك فى اشارة مرور مغلقة بسبب مسئول كبير؟
لأ بلاش اشيل ذنوب
التاج ده أمرره للاتية أسماؤهم00
اللي بقوله اعمل ساين ان المره الجايه عشان اعرف ادخل عندك ghost
و ياللا بالشفا يا كميلين منكوا للتاج بقي
سلاااااااااااااااام

هاتك يا شتيمه

موضوع شاغل دماغي الصغنونه بقالي فتره و عايزه اكتب فيه
بس كان في مواضيع تانيه بتبقي اكتر الحاحا في دماغي
لقيته كاتب بوستايه بعنوان سليط اللسان 00 دون لجام
و الموضوع فعلا اللي كاتب عنه ساكاماكا موضوع استفزني اوي ؛
و ده لانتشاره بشكل مرضي ؛ بقي العادي دلوقتي ان الهزار
يبقي بسب الأم 00 غور يا ابن ال تييييييت ؛ يلعن تيتتتتتتتتت؛
عادي يعني دي بقت صيغة الحوار بين ولاد الناس و بين ولاد الناس التانيه
مع ان زمان و انا صغيره كنت اعرف ان الشتيمه دي جريمه و لو كانت مامتي تسمعني
اقول يا حمار كانت تبقي مصيبه ؛ و مع مرور السنين تحولت ابشع الألفاظ هزار
و يبقي واد روش اللي كلامه كله شتيمه و ألفاظ او تلميحات مش لطيفه ؛
و طبعا منتشر الموضوع ده في الميكروباصات بالذات ؛ عادي يعني ان ابقي ركبه
و شله من الشباب الملزق الصايع الروش في تسميه اخري ؛ قاعدين
يشتموا و قدام البنات عادي يعني مفيش مشاكل ؛ مفيش زي زمان اما كنت اسمع خلي بالك من
الفاظك في بنات او مش عايز اشتمك عشان في ستات ؛ خلاص المبادئ دي اختفت ؛
و يا سلام لو اتسحب من لساني مثلا و قولت عيب اعمل احترام ان في بنات
يبقي وقعتي مش اللي هي و اسمع من المنقي خيار ؛ بس انا اللي خلاني اتصدم اكتر
هو تطور الموضوع لأن البنات نفسهم بقوا يشتموا عادي علي الملأ بدون اي حياء
او خجل و هو ده الشئ العجيب ما هو لما الرجاله شايفين الستات نفسهم الفاظهم مش كميله خالص
اكيد هما مش هيتحسنوا و يبطلوا ؛ يعني عادي تلاقي واحده من الستات قاعده جنب
سواق الميكروباص اين كانت علاقتها بيه و نازله يا شتيمه زي متكون فاتحه بلاعه مش
بقها ؛ و لا تلاقي شله من شباب الثانوي او المعاهد او حتي الجامعه واقفين علي الناصيه
و داخلين لبعض ماتش شتايم ؛ و اللي زاد و غطا استعمال الايدين في التهريج ؛
يعني انا الموقف ده حصل قدامي و ربنا شاهد ؛ ماشيه في الشارع في مكان جنبه
معهد من المعاهد و بينتين و ولدين ماشيين و هي عماله تضربه بالقفه و هو يلوي دراعها
و يشدها من الطرحه و هاتك يا ضحك و كركعه 0
بيتهيألي وصلت وجهة نظري و كفايه رغي بقي عشان ودانكوا حرام
سلام

Monday, April 16, 2007

كوكو يقرأ الخريطه

مقدمه 00
اخيرا رجعت عشتي اللي وحشتني اوي و عرفت قد ايه
بحبها لما بعدت عنها 00 و رجعت لصحاب العشه
و اهلها اللي عرفت قد ايه بيحبوني اوي و بيحبوا العشه
الحمدلله الكمبيوتر خف بس بعد خسائر فادحه و اضطر الدكتور
يغيرلوا قلبه و طبعا كل اللي كان في قلبه راح و متبقاش
غير حبه للعشه و اهلها00
**************************************************
الحلقه اللي فاتت 00
كوكو كان هيفتح الورقه اللي لقاها جوه الكوكو الحلاوه و التليفون رن
الحلقه دي 00
جري كوكو الكميل علي التليفون و رفع السماعه 00
الو ايوه مين انا كوكو الكميل -
ما احنا عارفين -
انا علي فكره فتحت الحاجه و لقيت ال000 -
ما احنا برضو عارفين انت فاكرنا نايمين علي ودنا احنا شايفين -
كل تحركاتك و زرعنلك كاميرت في بيتك و في بيت ام مكاوك
عشان لو حاولت تتلاعب و تبلغ البوليس و لا حاجه
انا كل اللي عايز اعرفه دلوقتي يا استاذ خطاف فين طانط ام مكاوك؟ -
انت تنفذ اللي هقولهولك ده بالحرف الواحد 00 تفتح الورقه اللي عندك -
دي خريطه للمكان اللي فيه ام مكاوك و مهمتك بقي يا كوكو يااللي عملنا فيها
بطل انك تتبع الأسهم اللي مرسومه عندك علي الخريطه بدقه لأن اي غلط هتعملوا
ممكن يعرض حياتك انت و ام مكاوك بتعتك دي للخطر 00 اول حاجه تعملها بعد دراسة
الخريطه كويس انك تفتح دولاب المطبخ اللي علي اليمين هتلاقي شنطه ؛ افتحها
و اتبع الارشادات و احنا هنعرف نوصلك 00 و بحذرك تاني لو البوليس عرف
هتبقي النهايه انت فاهم 00
و قفل الخطاف السكه في وش كوكو الكميل اللي حط السماعه و جري علي طول يقتح الخريطه
و فرد كوكو الخريطه علي الطرابيزه قدامه و قعد يبص و قال لنفسه 00
ياللا يا كميل طلع افكارك النبيهه و ابدأ العمل و اكيد انشالله ربنا هيوفقك و تلاقي ام مكاوك
و قعد كوكو يدرس الخريطه كميل اوي و بعدين راح علي دولاب المكبخ و فتح الكولاب
و طلع الشنطه اللي الخطاف قاله عليها و لقاها تقيله اويييي قعد يجرجر فيها و لما خرجت
جه يفتحها لقاها مقفوله بقفل مش كميل خالص و بعدين بيبص علي الشنطه لقا فيها
مفتاح صغنن راح ماسكه و فتح بيه القفل و لقا كوكو كوه الشنطه خريطه تانيه
مكتوب عليها الخريطه رقم 2 ؛ و لقا نضاره اللي بتكبر ؛ لقا دايره حديد كبيره
فيها مفاتيح كتير زي بتاعة الحراميه اللي كوكو كان بيشوفهم في الأفلام00
طلع كوكو كل الحاجات دي من الشنطه وشالهم حطهم علي الطرابيزه جنب الخريطه
رقم 1 ؛ و دخل الأوضه بتاعته جاب شنطه بتتشال علي الضهر و راح فاتحها و حط فيها
كل الحاجات دي و منسيش كوكو انه يجيب المصحف الصغنن بتاعه من تحت المخده
و حطه في جيب الشنطه 00 و فجأه كوكو سمع حاجه بترن في البيت صوت جرس غريب
عليه و اتخض كوكو 00
كاكان
حل سؤال الحلقه اللي فاتت 00
و كسبت شمس لأنها قالت ان كوكو هيلاقي خريطه توصله لمكان ام مكاوك
مبروك يا شموسه
سؤال الحلقه دي 00
يا تري ايه اللي كوكو سمعه بيرن؟؟؟؟؟؟؟؟؟؟؟؟؟؟؟؟؟؟؟؟؟؟

Friday, April 13, 2007

اخبار جديده عن كوكو مش كميله برضو

يا جماعه الكمبيوتر طلع عنده المرض الوحش
ربنا ما يوري حد و هو لحد دلوقتي في المستشفي بيحاولوا يعلجوه
علي العموم المفروض انه يرجع البيت بكره ربنا يسهل
انا قولت اعرفكوا اخر الأخبار و اطمنكوا علي كوكو الكميل
اللي عندوا اكتأب بسبب الكمبيوتر اللي مش كميل ده
ادعولي ارجع بكره 00000
سلااااااااااام

Tuesday, April 10, 2007

كوكو و الملبن 00

مقدمه صغيره قبل الحلقه 00
مش قادره خلاص عندي كبت صوصوه هيخنقني و الكمبيوتر لسه عيان
و هموت و اصوصو فنزلت اصوصو من النت كافيه ؛ فطبعا اعذروني
لو الحلقه طلعت فيها اي عيوب لأن كل العوامل الخارجيه مختلفه
و طقوس الصوصوه مختفيه بس كان لازم اصوصو بدل ما يجرالي
حاجه مش كميله 00
************************************************
الحلقه اللي فاتت 00
كوكو رجع من عند انكل ابو مكاوك و قرر انه يدور علي ام مكاوك
الحلقه دي00
00 فجأه نط كوكو الكميل من مكانه علي صوت بيرن جوه ودنه الكميله
لو عايز تشوف ام مكاوك تاني دور عليها في الحاجات اللي عندك
لو عايز تشوف ام مكاوك تاني دور عليها في الحاجات اللي عندك
لو عايز تشوف ام مكاوك تاني دور عليها في الحاجات اللي عندك
زعق كوكو في الصوت اللي مش كميل اللي طالع من ودنه 00
خلاص عرفت اسكت بقي هدور 00
و جري كوكو الكميل علي علبة الحلويات و فتحها و كانت الحلويات متغطيه
بورق سولوفان اصفر كميل شال كوكو الورق و بص للعلبه و هو محتار
يبتدي بأنهي حته الأول المهم ابتدي كوكو يشيل حته حته من الحلويات
بس حس انه كده مش هيخلص في يومه و هيكونوا موتوا ام مكاوك
هز كوكو الكميل دماغه عشان يبعد الأفكار اللي مش كميله دي عنه
و شاف ان الحل الوحيد انه ياكل الحلويات عشان يبقي فتح كل وحده
و اتأكد ان مفيهاش حاجه و نط كوكو جوه العلبه و ابتدا يفتح
الكوليه الأول و ياكل و بعد ما خلص الكوليات كلهم بدأ في السكسكيه
و برضو مفيش حاجه جواهم و مبقاش قدامه بعد ماخلص
الا الملبن بس هو مش بيحبه بس ضميره الكوكاوي من جواه
قاله 00 يا كوكو يا ابني انت بتعمل خير و لازم تيجي علي نفسك
حتي لو هتعمل حاجه مش كميله 00و فعلا سمع كوكو لصوت ضميره
و قرر انه ياكل الملبن و سد كوكو خروم منقاره بكناحه و راح حاطط
منقاره في اول حتة ملبن ؛ و راحت لزقه علي منقاره و فضل
كوكو يشد منقاره جامد جامد عشان يعرف يتخلص من المابن لكن مش عارف
ووقع كوكو علي ضهره و حاول انه يساعد برجليه و يزق الملبن من منقاره
و اخيرا سلك الملبن من منقاره و راح لزق في رجليه و فضل كوكو
يا عيني علي ضهره يصوصو و يعافر مع الملبن و كان خايف جدا انه
يقطع له ريشه بعد ما خلاص ابتدي يطلع كله و يرجع زي الأول
و بعد معركه حامية الوطيس بين كوكو و الملبن و بعد ما لف
علي رجله و كتفه و قعد كوكو يلعب في السيرك و يجيب منقاره عند
رجليه عشان يفك نفسه قدر كوكو انه يتخلص من الملبن ؛
و شاف انه كان قرار مش كميل خالص انه ياكل الملبن
و راح ضارب كناحه علي راسه عشان يعاقب ضميره اللي
ساعده مش كويس ؛ بس كان لازم كوكو يفتح بقيت الملبنات
الباقيه و فكر كوكو و كان لسه ضميره الكوكاوي هيقترح عليه
يعمل ايه راح كوكو شاخط فيه 00 اسكت انت انا هتصرف
و دخل كوكو المطبخ و جاب سكينه و راح علي العلبه
و قعد يقطع الملبن حتت و يدور و بعد ما قطع كله مش لقا
حاجه برضو و طلع كوكو تاني جوه العلبه و قعد يدور جواها
علي جيب سحري انما مش لقا ؛ و نزل كوكو و هو يائس
و مش كميل و قال 00 الظاهر الحرامي اللي مش كميل ده
كان بيضحك علي و 000 فجأه طلع لكوكو لمبه علي دماغه
و ضحك و افتكر الكوكو الحلاوه اللي كان مع العلبه
و جري كوكو بسرعه ووقف قدام الكوكو الحلاوه
اللي علي الطرابيزه و بصله و قال 00 ياه ده اكبر منك يا كوكو
انت هتدور ازاي ؛ و فكر كوكو شويه و لقا طريقه
طلق كوكو علي الطرابيزه ووقف ورا الكوكو الحلاوه و قال في سره 00
سامحيني يا طانت ام مكاوك الله يرحمه 00 و راح زاقق كوكو برجله
الكوكو الحلاوه من علي الطرابيزه وقعه علي الأرض و اتكسر
حتت كتييير و راح ناطط كوكو فوقيه و قعد ينقر بمنقاره الكميل بين
الكوكو الحلاوه المكسر و اخيرا لقا كوكو ورقه كبيره ملفوفه برباط
و فرح كوكو نط لفوق من السعاده بأنه انتصر في اول خطوه
و حس كوكو بريشه جديده طاعاله و عرف انها ريشة الاصرار؛
و مسك كوكو الورقه في منقاره و راح علي الطرابيزه و حطها
و لسه بيفك الرباط 00 رن جرس التليفون 0000000
كاكان
******************************************************************
الفائز بسؤال الحلقه اللي فاتت 00
هقول عليه الحلقه الجايه عشان اسيب فرصه كمان للي مجاوبش
و السؤال هو 00 الورقه دي عباره عن ايه ؟؟
هو السؤال ده نص سؤال المره اللي فاتت بس انا هقول اللي كسب في النصين المره الجايه
و ادعولي المره الجايه اكتب الحلقه من الكمبيوتر بتاعي

Sunday, April 8, 2007

اخر اخبار كوكو الكميل اللي مش كميله

وحشتوني اوي و كوكو زعلان و مش كميل عشان مدخلش العشه و شاف صحابه
معلش يمكن ارجع كمان يومين كده ؛ اصل الكومبيوتر عيان الظاهر الحصبه الألماني
عنده هوديه المستشفي و ارجع تاني ؛ قولت اطمنكوا عشان عارفه انكوا هتقلقوا
************************************************
الحاجه التانيه 00 جالي كومنت سخيف و قليل الأدب و خارج عن الأخلاق بطريقه
فظيعه علي اخر حلقه لكوكو و انا مسحته ؛ و قررت ان اغير اسلوب
الكومنتس و منشرهمش قبل ما اقراهم ؛ لأن انا اتصدمت من اللي كان مكتوب
و اتضايقت اوي ي ؛ و ماكانش ليه اسم 00
************************************
هتوحشوني انشالله مش هتأخر اكتر من يومين انا بكتب من نت كافيه
و انا مش بحب ادخل نت كافيه خالص ؛ و دلوقتي قاعد جنبي واحد من
اللي هما بيتكلموا في المايك مع واحد من البلد و بيكلم ولد العم
مع ان النت كافيه نضيف جدا ؛ بس هو عاملي صداع فظيع
و حاسه اني هقوم اضربه هههههههههههههه
المهم ادعوا للعيان يخف بقي
سلااااااااااااااااااااااااااااااااااااااااااااااااااااااااااااام

Friday, April 6, 2007

كوكو و هدية يوم الكوكوهات اليتيمين 00

الحلقه اللي فاتت 00
كوكو قعد يستني انكل ابو مكاوك يجيب الألبوم
الحلقه دي 00
رجع انكل ابو مكاوك شايل البوم في ايده و حطه قدام كوكو اللي متابع
حركة انكل ابو مكاوك اللي بعد ما حط الألبوم علي الطرابيزه راح
بضهره العجوز المحني و فتح درج المكتبه و طلع النضاره بتاعته
من الجراب و حطها علي وشه و لف و قال 00 اهو الألبوم
ده يا كوكو فيه الصور اللي انت اتصورتها مع ام مكاوك و معايا
في الأجازات و المناسبات 00 و كان قعد انكل ابو مكاوك علي الكرسي
جنب كوكو و سحب الألبوم و فتحه و قرب كوكو بمنقاره و عينيه الكميلين
عشان يشوف كويس 00 و قال انكل ابو مكاوك 00
الصوره دي كنا في الأهرامات في يوم عيد ميلادك ؛ و هنا كنا في عيد
طفولة الكوكوهات في حفلة مدرستك ؛ و هنا كنت انت عامل مسرحيه في مسابقة
النادي لمسرحيات الكوكوهات 00 و فضل كوكو يتفرج علي الصور بشوق
جامد ؛ و كمل ابو مكاوك كلامه و قال 00 دي حتي اخدت علي خاطرها
و زعلت اوي لما انت قفلت علي نفسك يوم عيد مامة الكوكوهات و ماجتش
زرتها ؛ طب انت عارف يا كوكو انها كانت محضرالك مفاجأه تديهالك يوم الجمعه
بمناسبة عيد الكوكوهات اليتيمين كانت شاريالك الكوكوبايل اللي انت كنت عايزه
و كانت هتخدك و تخرجوا و تقدوا اليوم بره ؛ بعد كل اللي حكتهولك ده يا كوكو عرفت قد ايه
ام مكاوك كانت بتعاملك علي انك ابنها و بتحبك زي مكاوك و اكتر 00
***************************************************
كوكو الكميل في شقته بيلف حوالين نفسه و بيفكر كامد ايه الحل
و ابتدي يسترجع في دماغه مشاهد كتير لأم مكاوك لما كانت تيجي و مامته بتنضف و تقعد هي
تأكله في منقاره ؛ و لما كان يبقي عيان و تقعد جنبه تشربه الشوربه لحد مامته ماترجع من الشغل ؛
و ندم كوكو و زعل من نفسه و قال انه مش كميل عشان هو معيدش عليها في عيد مامة الكوكوهات
و طلع الكوكوبايل اللي هي اشترتهوله و ابو مكاوكطلعه و ايداهوله و قعد يبص علي الموبايل
و يقول 00 يا حبيبتي يا ماماتي ام مكاوك انا اسف بس كوكو الكميل هيعمل كل اللي في وسعه
انه ينقذك و دي هتكون هديتي ليكي في عيد الكوكوهات اليتيمين اني ابذل كل كوتي
في انكاذك من الشريرين 00 و فضل كوكو يلف حوالين نفسه مستني ان الشريرين
يتصلوا بيه و فات وقت طويل و محدش كلمه 00 و فجأه نط كوكو الكيل من مكانه
علي صوت بيرن جوه ودنه الكميله 00

لو عايز تشوف ام مكاوك تاني دور عليها في الحاجات اللي عندك

لو عايز تشوف ام مكاوك تاني دور عليها في الحاجات اللي عندك

لو عايز تشوف ام مكاوك تاني دور عليها في الحاجات اللي عندك
كاكان

سؤال الحلقه 00

ياللا شمروا كمامكم و جاوبوا 00
يا تري كوكو هيلاقي ايه جوه الحاجات و في انهي حته؟؟؟؟؟؟؟؟؟


Wednesday, April 4, 2007

leon .. the professional


البوست ده بناء علي طلب واحد من اهل العشه يعقوب
طلب مني رأي في الفيلم ده و انا طبعا مصدقت لأن انا من المحبين للفيلم ده
و ده لأسباب كتير اوي هكتبها كمان شويه بس الأول احب اقولكوا شوية حاجات
عن الفيلم 00
الفيلم من انتاج سنة 1994 و بطوله الممثل الجامد اللي اسمه
الأسباني الأصل و المولود في المغرب و ده اللي اداله نوعا ما jean reno
رتوش من الطابع الشرقي و اللطيف في الممثل ده انه بارع جدا في الأدوار
الكوميدي زي الدور اللي قدمه في فيلم
؛ و في نفس الوقت ادواره البوليسيه اللي بيديها طابع pink panther
متميز و بالمناسبه في ممثل شاب عدنا في مصر هنا بحس انه بيقلدوا حتي في تسريحه شعره ؛
و مش هقول مين و الحدق يفهم
و قامت بالبطوله قدامه ممثله من مواليد فلسطين سنة 1981 من اب اسرائيلي
و ام امريكيه و تم تربيتها في واشنطن و هي الحقيقه ممثله كويسه اوي
انا شوفتلها فيلم واحد تاني بس مش فاكره اسمه natalie portman
بس هي ممثله كويسه اوي و ليها اكسنت انجليزي لدرجة ان انا كنت فكراها انجليزيه
نيجي بقي اخيرا للمخرج الجامد اللي عمل الفيلم و استخدم بعض الرمزيه
للربط بين الحاجات و ضدها و هو المخرج الفرنساوي
نجح المخرج في انه يخليك تتعاطف مع البطل رغم انه قاتل اجير luc besson
انما عمله علاقه جامده اوي بزرعه مش بيتنقل من غيرها و كل يوم الصبح يسقيها
و يشمسها و علي طول حططها في قصرية زرع و ده علامه علي عدم الأمان اللي هو عايش فيه
و عدم الاستقرار و في نهاية الفيلم زرعت البطله الزرعايه في الأرض و ده لأن
خلاص بقي في استقرار لأنه هو ادفن و هي قررت تكمل تعليمها ؛
و من الحاجات اللي عجبتني برضو ان المخرج خلي الشخصيه بتاعة ليون دي تشرب
لبن و مايشربش خمور بالمره و ده عجبني لأن انا كان عندي قناعه
شخصيه ان مفيش اي علاقه بين الشرير و الخمور لأن ممكن واحد طيب يشرب خمور
يعني نجح المخرج انه يوصلك فكرة ان الشخص ده مش بيقتل عشان هو شرير او دموي
لأ هو واخدها مهنه بيكسب منها ؛ و التفصيله في الشخصيه كمان اللي عجبتني اوي
انه عمره ماكان بينام في سرير علي طول بينام علي الكرسي و المسدس علي رجله
و المره اللي نام فيها في السرير لما دخلت البنت حياته بدأ يحس بالأمان ؛
و من اكتر المشاهد اللي عجبتني اوييييي مشهد موت البطل و غير ان المخرج
استعمل فيه زاوية كاميرا و اسلوب اخراج متميز كمان المزج في الموسيقي
في المشهد كان هايل و مدي روح للمشهد حلوه اوي 00
في النهايه من رأي ان الفيلم اكتر منه بوليسي هو فيه مشاعر انسانيه جميله
و عزف ثنائي جميل ما بين اتنين ممثلين جامدين و بيحركهم كمان مخرج جامد 00
الغريب ان الممثلين ماخدوش جوايز عن ادوارهم و الجايزه اللي خدها الفيلم
كانت في مهرجان

و كانت جايزة احسن فيلم اجنبي او غريب 00 Czech Lion
في الأخر بعد ما رغيت كتير و خايفه تكونوا نمتوا اقول ان الفيلم
جميل و اهم ما فيه الانسانيات و التنويع علي الأكشن معاها
سلام




Tuesday, April 3, 2007

شهامة مدرس

النهارده في برنامج الساعه العاشره سمعت و شوفت الخبر ده 00
مدرس بمدرسة بني مزار خرج في رحله مع طالبات المدرسه
لزيارة الفيوم ؛ و في وقت ما وصلوا بيلعبوا بالكوره
قرب الشلالات و اتزحلقت بنت اسمها يارا ووقعت في الشلال
جري وراها المدرس محمد كمال سيد بمنتهي الشهامه و رمي نفسه
و انقذها و غرق هو الله يرحمه 00
و كانت مني الشاذلي مستضيفه وزير التربيه و التعليم و بيناقشوا مشاكل
تخص قطاع المدرسين و الكادر الوظيفي الجديد و لما عرضت الموضوع
و سألت معالي الوزير يا تري ايه اللي قدمتوه للمدرس ده ؟
و كان رده 00 الحقيقه احنا صرفنا لأهله 5000 جنيه 00
الحقيقه يشكر ده كده عداه العيب و قزح 00 تخيلوا 5000 جنيه
يعملوا ايه في الزمن ده هي طبعا حياته ما تتعوضش و لا بالملايين
انما هو كان مسؤل عن الأسره يعني في مورد انقطع بقي هما شايفين
انهم كده عملوا اللي عليهم ؟ ده المدرسه نفسها عملت اكتر من وجهة نظري
اولا هو تم دفنه في المدرسه و عملوا قاعه درس عندهم بأسم الشهيد محمد كمال سيد
و عملوا صدقه جاريه بأسمه 00 يعني المفروض لما نشوف نماذج من الشهامه
ازي كده لازم نكرمها و نعلم عليها و نقول و نديهم حقهم عشان الناس تتشجع
و نرجع تاني بلد الشهامه و الجدعنه زي ما المفروض 00
في الأخر 00
اقدم عزائي لأسرة الشهيد محمد كمال سيد و ادعيلهم بالصبر
و السلوان و ادعيله بالرحمه و الثبات عند السؤال
اللهم امين
سلام

Monday, April 2, 2007

كوكو و ابو مكاوك

الحلقه اللي فاتت 00
كوكو جاله حلويات المولد
الحلقه دي 00
كوكو حس بريشتين كميلين بيطلعوا فجأه بعد
ما قفل مع كاكوكاكو الكلوفون و هي ريشة 00 التسامح
و ريشة 00 التضحيه
و فرح كوكو اوي ان ريشه كتر ؛ ور اح كوكو يفتح علبة الحلويات
و فجأه رن جرس الكلوفون ؛ جري كوكو الكميل علي الكلوفون و رفع السماعه
و قال 00
- الو ايوه مين؟
- انت كوكو الكميل ؟
- ايوه انا حضرتك مين ؟
- عجبتك حلويات المولد و الكوكو الحلاوه اللي جابتهولك ام مكاوك؟
- الله ايه ده انت عرفت ازاي ان طانط ام مكاوك كابتلي الحاكات دي؟
- ما هو اللي جاتلك دي ماكانتش ام مكاوك الحقيقيه انما واحده احنا
بعتنهالك و لو عايز تشوف ام مكاوك الحقيقه تاني هتلاقيها عندنا
ابقي تعالي انقذها
- طب انتوا فين اكيلكوا ازاي انتوا ليه عملتوا كده حرام عليكوا
- اسكت يا كوكو و اسمعني لو عايز تشوف ام مكاوك تاني دور عليها في الحاجات اللي عندك
و انا هتصل بيك تاني ؛ بس اسمع لو قعدت تصوصو و تحكي للناس و تكلم الكوليس
هنتف ريش ام مكاوك ريشه ريشه و بعدين نغرقها في ميه مغليه نسلقها
و نعمل نصها شاورمة كوكوهات و النص التاني بانيه 00 انت فاهم
- طب استني بس اسمعني استني 00 تيت تيت تيت تيت
ده قفل السكه يا نهاري ايه ده يا كوكو يا كميل دي حتي طانط ام مكاوك طيبه
طب ما يمكن يا كوكو حد عامل فيك كدبة ابريل ؛ يبقي لازم اروح اشوفها في شقتها بنفسي
*********************************************
طك طك طك 00 يا طانط ام مكاوك انتي هنا ؟ يا طانط 00
و خرج انكل ابو مكاوك و شكله قلقان و حزين و ريشه الأبيض العجوز
منكوش و ووشه شكله مش مغسول 00
انت جيت يا كوكو يا كميل الحقني طانطك ام مكاوك من ساعة ما خرجت الصبح عشان تشتريلك
حلويات المولد مارجعتش و انا اتصلت بكل الناس اللي نعرفهم و هي ماراحتلهمش
عارف لو رايه و سكينه كانوا لسه عايشين كنت قلقت ليكونوا هما زي ما بيجيبوا في المسلسل
الضهر و لا تفتكر يا كوكو يكون سفاح المعادي و لا سفاح كرموز و لا سفاح الفراخ الكوكوهات
انا دماغي هتفرقع و قلقان عليها اوي انا خايف لحسن تروح مني زي مكاوك الله يرحمه
يوه ه ه ه ؛ انا اسف يا كوكو نسيت اقولك ادخل 00
و دخل كوكو و قعد مع انكل ابو مكاوك اللي سابه و قام يعمله حاجه يشربها
و بص كوكو علي البراويز اللي محطوطه في الصاله و فيها صور بيتفرج علي
صور طانط ام مكاوك و في صوره لفتت نظره و قرب اوي و سمع ابو مكاوك وراه
بيقوله 00 ايوه ده انت اللي في الصوره ده بعد ما اتوفي مكاوك و سافرنا
نصيف في الريشه السخنه و اصرت ام مكاوك انك تيجي معانا ؛ شوفت نفسك
بالمايوه ؛ ده ليك صور كتير اوي يا كوكو عندنا استني اما اجيبهالك
دي ام مكاوك اصلها كانت مسمياك مكاوك التاني 00
و راح ابو مكاوك يجيب الألبوم و قعد كوكو و مسك في ايديه الماج و خد شفطه من
الشاي الأخضر في انتظار الألبوم بلهفه و شوق و انبهار 00
كاكان
******************************************************
للأسف محدش كسب في الحلقه اللي فاتت لأن اغلب الأجابات كانت بتتوقع ان
كوكوهايه هي اللي تتصل 00
علي العموم عندكوا اجازه الحلقه دي مفيش سؤال 00
ممكن تسألوني انتوا لو عايزيييييييييين
ههههههههههههههههه



Sunday, April 1, 2007

كوكو 3 تااااج

يا جماعه تاجين في الراس توجع و تخيلوا لو في اسبوع واحد
بس لولا ان شيكو العزيزه هي اللي بعتاه كنت 0000
و لا حاجه كوكو كميل و كان هيجاوبه برضو 00
المهم ان التاج المره دي في اختلاف لأنه بالعنجليزي
و طبعا كوكو و كماله و لغاته المتعدده بيرد علي التاج لو كان حتي
باللاوندي ياللا اشمر ريش كناحاتي و اسمي و ابدأ00
1-last beverage? green tea
2- last phone call ? kakoukakou
3-last instant message ? the father of a koukou friend died
**********************************************************
4- last cd played ? انا و كوكو غنينا سوا 00 لعبنا علي الكمح و طيرنا في الهوا
5-last time u cried ? everyday
*****************************************************
hv u evers
1-date some one twice? koukou is not bad he do not date
2- been cheated on ? koukou always forgets bad things
3-lost some one special? yes
4- been depressed ? yes
6- been drunk & throw up ? noooo koukou el kemil is kemil
how can he drink this bad and 7aram thing
7- favorite colors ? see my nest colors
*********************************************************
this month hv u
1-made anew friend ? no
2-fallen out of love ? yes , but i lost koukouhaya
3-laughed untill u cried? nop only cried
4-met some one who changed ur life? yes & u`ll see next episode
5-found out who ur true friends were? nop <> trust anybody so he`s never sure if it`s a true friend or not
6- is there some thing u want to tell some one? koukou love the comments and the nest family
7- how many kids do u want to hv? koukou wants to have 80 little koukou`s kemilin
8-do u wanna change ur name? do u think there`s a name more beautiful than koukou el kemil???!!!
11-wt did u do 4 ur last birth day? صوصوة لنفسي
12-wt time u wake up to day?كوكو نشيط بيصحي الصبح بدري يصوصو في الشمس
21-most visited web page ?عشتي و عشش صحاب الكوكو الكميل
الحقيقه التاج طوييييييييييييييييييييييييييييييييييييل اوي فانا مش حليت كل الأسئله
بس بالنسبه امرره لمين 00 سفاح كرموز و البلطجيه و المراكبي و شادي فايد
و مش هعملوهم لنكات هتلقوهم في صحاب الكوكو
انا هروح انام بقي
سلام