Thursday, May 31, 2007

كوكو و البيبان

الحلقه اللي فاتت00
كوكو كان طاير و سمع وراه حد بيندهله
الحلقه دي 00
سمع كوكو حد بيقوله 00 يا كوكو يا كميييييل
صوت حنين اوي و بيهمس لف كوكو عشان يشوف اتسمر مكانه
و من الخضه محركش كناحاته فراح واقع لتحت اللي لحقه في الهوا سلوك الكلوفونات
اللي معديه في نص السما راح كوكو واقع عليها و لافف كام لفه لغاية معرف يمسك
نفسه 00
و اول ما كوكو مسك نفسه بص حواليه عشان يتأكد ان اللي شافه مش حقيقه
و لما ما لقاش حاجه حواليه قال 00 ياه يا كوكو يا مش كيل يا عيبيط انت
و ده معقول برضه 00 سمع نفس الصوت بيرد عليه 00 اه معقول يا كوكو
بيبص كوكو علي عامود سيلك التليفون وراه و كان هيقع تاني راح الصوت ده مسكه
من كناحه و قاله 00 يا كوكو انا مش كيرو بجد انا روحه الطيبه اللي ماتت مظلومه
انا جيت عشان اقولك ان كيرو مات و هو بيحبك اوي و طول عمره كان و حيد
و كان نفسه يكون عنده صاحب زيك و هو حبك من اول مره شافك فيها ؛
هو صحيح مشفكش الا مرتين بس كان بيحبك اوي ؛ انا جايه اسلم عليك
و انا مسموحلي اني اعمل حاجه واحده علي الأرض قبل ما ارجع عند اللي خالقني
في مكاني تاني ؛ و انا عارفه انك عايز تروح للحكيم كيروكيم 00
كل ده كان كوكو قاعد متنح مش مصدق اللي بيحصل و عمال يقول في دماغه
ده و لا افلام اسماعيل ياسين 00 و بعدين رد كوكو 00 قولي لكيرو انه واحشني
جدا و نفسي انه يرجع تاني بس انا عارف انه مينفعش ؛ و لو وصلتيني للحكيم
تبقي عملتي فيا خير مش هنساهولك يا روح كيرو الكميله طول العمر 00
ردت روح كيرو 00 طب ياللا يا كوكو غمض عينيك و سيب كناحاتك خالص
و انا هوصلك هناك هتصحي من النوم تلاقي نفسك هناك بس مش هتلاقيني
عشان هيكون وقتي علي الأرض خلص خلاص 00
و فعلا نفذ كوكو كل اللي طلبته منه الروح بتاعت كيرو 00
و طارت الروح و علي ضهرها كوكو الكميل و فضلت تعلي تعلي لحد مختفت
في وسط السحاب ؛ و السحاب يشيلهم و يحطهم و فجأه اختفوا عن العين
**************************************************
صحي كوكو فجأه و قام قعد و بص حواليه و مكنش مستوعب هو بيحلم و لا
اللي حصل حقيقه ؛ بس اللي أكدله انه حقيقه ؛ المكان الغريب اللي لقا نفسه فيه مكان
مليان شجر حاضن بعضه لدرجة ان السما مش باينه من كتر الشجر ؛
و الأرض كلها عروق الشجر اللي لفه فوق بعضها فمش مخليه الأرض مستويه
و قام كوكو وقف علي رجله و ركز كده و افتكر انه قبل ما ينام كان رايح
للحكيم كيروكيم ؛ ووقف كوكو محتار مش عارف يمشي في انهي اتجاه ؛
بس بص لقا ناحيه من بين الشجر طالع منها دخان و فيه في أخره سرسوب
من النور يدل علي ان في حاجه في العمق ؛ فقرر كوكو انه يخطو اول خطواته الكميله
في المكان ده في اتجاه النور و ده اللي نصحه بيه حدسه اللي ما يخيبش ابدا ؛
و فعلا مشي كوكو وسط الدخان و كل ما يدخل الدخان يزيد يزيد يزيييييييييد 00
و اخيرا ابتدي الدخان يخف بعد ما كوكو بقي هيتخنق قبل ما يوصل ؛
و ابتدا يبان من ورا الشجر ملامح المكان اللي هي عباره عن جبل كبير
و فتح بقه و من زور بوء الجبل طالع نور جامد اوي و كل ما كوكو يقرب يسمع صوت
همهمات مش فاهم منها حاجه خالص باغه غريبه عن اللغه الكوكوهيه اللي هو اتعلمها من صغره
ووصل كوكو عند بوء الجبل و مبقاش عارف يعمل ايه فقرر انه ينادي بصوت عالي 00
ياللي هنا 00 يصقف بكناحاته 00 ياللي في الجبل من كوه يا حكيم كيروكيم 00
و فضل كوكو ينادي و لا حياة لمن تنادي ؛ و فجأه نزل علي كتف كوكو طائر مش من الفصيله الكوكوهيه
و لونه اسود اوي راح كوكو اتخض و طلع يجري من الطريق اللي هو دخله
و بعدين وقف و لف لقا قداه وطواط عينيه معمصه و علامة المخده مرسومه علي وشه خطوط خطوط
و بيقوله بلهجه سوداني 00 ايه يا امونا انتا اّمل دوشه ليه يوخروب بيت سنينك ؛
تئرف يا كوكو انت اني انا طول اومري مش بصهي الا باليل انما صوتيك المزئج دي
هو اللي صهاني ؛ انا اوثمان الوطواط اللي بيهرس بوء الجبل دي انت اوز مين ؟؟
رد كوكو 00 اهلا يا عم عثمان يا وطواط انا اسف اني قلقتك من نومك الكميل بس
انا بدور علي الحكيم كيروكيم متعرفش اقدر الاقيه فين؟؟
رد الوطواط 00 هو ساكن اندي هنا في الجبل من سنين كتير و مش بشوفوه يخرج
الا شويه يطلأ الغابه اللي وراك ده يلم شويه هاجات من اللي بيستأملها في شوغلوه
و يرجأ تاني و ده بيهحصل كل اسبوء مره بس هو جوه دلوقتي ؛
مودام انت سامء الأوصوات دي يبقي هو جوه اتفضل اودخول بس مءلش
بقي الاوسونسير خربان 00
و فجأه اختفي البواب الوطواط من غير حتي ما يلحق كوكو يقوله شكرا 00
و دخل كوكو وهو بيقدم رجل و يأخر رجل 00
مدخل بوء الجبل من برا واسع ؛ و لما دخل كوكو لقاه من جوه ضييييق
و حر اوي بسبب النور و الدخان اللي خارجين منه ؛ و فضل كوكو ماشي شويه لحد ما لقا قدامه باب ازاز
و عليه زرار احمر و الباب الازاز مش مبين اي حاجه من ورا ؛ و رفع كوكو كناحه براحه و داس
علي الزرار الأحمر و فجأه نزل من السقف جهاز فيه سماعات و صوت انثي بترد 00
ايوه نتشرف بحضرتك انا كوكوريا سكيرتيرة الحكيم كيروكيم مين معايا ؟؟؟؟
رد كوكو 00 انا كوكو الكميل و كنت طالب خدمه من الحكيم كيروكيم الكميل ممكن ؟؟
ردت كوكوريا 00 و يا تري في ميعاد سابق و لا طلبب مقابله مستعجله؟؟
رد كوكو 00 لأ مستعجله من فضلك خليكي كميله بقي انا مستعجل
ردت كوكوريا 00 طب حضرتك ثواني معايا
و طلع الجهاز تاني لفوق مكانه و فضل كوكو واقف مستني الرد 00
و بعد شويه اتفتح الباب الازاز براحه و لقا كوكو نفسه في قاعه كبيره مدوره
اوي لونها احمر و فيها 3 بيبان دايرن ميدور ؛
و سمع كوكو صوت كوكوريا بتكلمه تاني في الجهاز 00
الحكيم كيروكيم بيقولك يا كوكو يا كميل ان هو موجود ورا واحد من الأبواب دي
عليك انك تختار الباب اللي تحبه ؛ و من عندكش فرص للخساره
و لو منجحتش هتخرج من هنا زي مجيت و مش هتقابل الحكيم
و ده لأان الحكيم بيحب يقيس يقيس ذكاء اللي بيجوا ياخده منه النصيحه
و يشوف اذا كانوا هيستفيدوا بالنصيحه و لا هيكون قالها في الهوا و قلتاها احسن
ياللا يا كوكو قدامك نص ساعه تفكر و انت واحساسك ؛ و سكتت كوكوريا
و سابت كوكو مع الحيره و مع 3 ابواب واحد من الدهب وواحد من الفضه وواحد من الصفيح
و قعد كوكو يفكر و طبعا في النهايه لما معرفش يلاقي الحل ؛
اضطر يلجأ لصحابي في العشه و يسألهم يا تري يختار كوكو انهي باب ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
كاكان
السؤال اللي فات 00
مبروك للي جاوب بأن كوكو شاف روح كيرو 00
خمسه فضفضه
مبروك يا فضفوضه ياللا عقبال كل مره



Sunday, May 27, 2007

تهاني و اغاني

سوء حظي خلاني افتح القناه المصريه الفضائيه ؛
و كان بقالي كتير الحقيقه متفرجتش علي الأولي و التانيه و التالته
و القنوات العتيقه دي ؛ بس مكنش متخيله ان القناه الفضائيه المصريه تعرض نوعيه
البرامج العجيبه دي و تبقي فضحيتنا علني في كل البلاد ؛ و يرجعوا يقولوا بتشوهوا
سمعة مصر ؛ و هو الربامج دي مش بتشوهه سمعة مصر 00
برنامج اسمه تهاني و اغاني ؛ نبتدي بالمذيعه اللي خروف العيد بالنسبه لها
باليرينا ؛ و تقل الفيل اخف من دمها ؛ نيجي بقي للبرنامج اللي فكرتة
من ايام ما قالوا ياللا بينا نعمل برنامج كان تقريبا سنه 1600 مثلا
برنامج ناس بتتصل تهدي و يجيبوا اغاني الناس بتطلبها 00
اكيد عارفين البرامج العقيمه اللي تشل دي ؛ المهم
نيجي بقي للي بيتصلو ؛ واحده متصله من ايطاليا و اللي يفقع بتقول للمذيعه
انتي زي القمر ؛ قمر ايه ياسيتي ده لو القمر كده كان الليل هيبقي كحل ؛
و الغريبه ان الست متابعه للبرنامج و حافظه اسم المذيعه و المعد و المخرج
و غالبا اسم بواب البلاتوه ؛ ماعلينا طلبت الست الأغنيه و قالت لتيتا و جوزي
و احمد و لكل اهل الأنفوشي و كان ناقص تقوم تنقط ؛ قفلت الست دي اتصلت واحده
تانيه موتتني من الضحك ؛ لأن علي طول جه في دماغي البوست اللي كانت كاتباه البلطجيه
بعنوان مكتوب يا حبيبي تاخدني
الست اتصلت و هاتك يا مدح في المذيعه و في البرنامج كل ده ماشي لحد ماقالت 00
و الله انا بحبكوا اوي عشان كده كتبتلكوا قصيده صغيره كده بتقول
هفضل استناك و انا مكاني هنا 00 مع ملاحظة المد في الألف عشان نحافظ علي اداء الست
و لو طال بينا البعاد مليون سنا هفضل برضو استناك زي ما انا
*****
هو ده الحقيقه اللي قدرت افتكره من القصيده العظيمه لأن الحقيقه الضحك خلاني مركزش اوي
هو السؤال بقي 00 هل فعلا في ناس هايفه و فاضيه و عندها فراغ لدرجة انها تتصل من بره مصر
و تدفع مكالمه بالشئ الفلاني عشان تقول اهداءات ؛ و لا التانيه بتاعت القصيده دي تلاقي
الطبيخ ولع علي بوتاجاز و هي قاعده ترص قصيده مكنش ليها اي دعوه بالبرنامج
علي ارغم انها قالت انها كاتباها مخصوص 00
و لا تفتكروا ان الناس دي متأجره زي مشوفنا في برنامج حسين علي الهوا
زي مديحه حاتشم كده 00
اصل لو في ناس كده يبقي هبل رسميييييييييييييييييييييييي
سلاااااااااااااام

Wednesday, May 23, 2007

كوكو في طريقه الحكيم

الحلقه اللي فاتت 00
كوكو قعد في بيت كيرو حزين عليه
الحلقه دي 00
كوكو قاعد في صالون شقة كيرو الله يرحمه و عمال يسترجع في دماغه
اخر لحظات قضاها مع كيرو قبل ما يموت ؛ و يفتكر كوكو و يجي عندحتة ضرب
الرصاص و يروح مخبي وشه بكناحه الكميل و جسمعه يقشعر و ريشه يقف ؛
و بعدين قام كوكو اتمشي في شقه كيرو يتفرج عليها و كمان عشان يبعد عن دماغه الأفكار دي؛
و قال في نفسه 00
الله شقته كميله اوي يا تري الشقه دي مين هيخدها بعديه و يا تري هيفضل محافظ
عليها نضيفه و كميله كده 00 و دخل كوكو اوضة كيرو اللي كان حاطط فيها ستاير ملونه
و مهفهفه ؛ و سريره الصغنن اللي كان فرشه بملايه لونها روز و في اطرافها في دلاديل
كل الألوان ؛ و كومودينو جنب السرير في اربع ادراج و فوقيه منبه و كتب اللي كان بيقراها
كيرو قبل ما ينام ؛ مسك كوكو الكتب يقرا اساميهم 00 كيف تصبح كوكو علي حق؛ الخطوات الكوكوهيه
في الحياه ؛ اعرف نفسك ككوكو ؛ الشعر الكوكاهي القديم 00 قال كوكو في نفسه ياه ده كيرو
كان مثقف اوي و بيقرا كتير ماشاالله ؛ و بص كوكو حواليه بعد ما رجع الكتب مكانها شاف كمان
دولاب كميل اوي لونه موف و ضرفه لونها روز ؛ و في هدوم كيرو
و جزمه ؛ دخل كوكو و قعد علي السرير و بص علي الحيطه للصوره الكميله اوي
اللي متعلقه فوق السرير و متصور فيها كيرو و هو لابس لبس التخرج الأسود و شايل في ايده
شهادة التخرج و قام كوكو قرب علي الصوره عشان يقرا هو كيرو متخرج من كوكولية ايه
و بص كوكو اوي علي الشهاده لقا كيرو متخلرج من كليه كوكوداب قسم علم النفس الكوكوهي ؛
و رجع كوكو يتفرج علي بقية الاوضه و لفت نظره اوي صوره علي الحيطه التانيه اللي في وش
السري و متصور كيرو فيها مع راجل عجوز ففضول كوكو خلاه يقرب من الصوره اوي و شال
البرواز من علي الحيطه و دقق اوي في ملامح الراجل العجوز و بعدين قلب البرواز و طلع الصوره
عشان يقرا لو كيرو كاتب سنة كام الصوره و مع مين ؛ و كان حظ كوكو حلو لأنه لقا مكتوب 00
لذكري زيارة العجوز الحكيم كيروكيم 00 و علقت الجمله مع كوكو الكميل و قراها تاني
و علي طول رجع في دماغه سيرة الحكيم بتاع المدينه اللي ممكن يساعده يوصل لأم مكاوك ؛
و راح كوكو علي طول معلق البرواز مكانه لكن فاضي 00
خرج كوكو من البيت و مش عارف يبدأ رحلة البحث علي الحكيم كيروكيم منين ؛
و في نفس الوقت كوكو بقي خايف و متعقد يا حرام من المشي في مدينة شلاليت من كتر القتل و العنف
اللي في الشوارع ؛ بس كله يهون عشانك يا ام مكاوك ؛ و قرر كوكو و شاف ان مفيش حل غير انه
مينزلش الأرض الا للسؤال عن الطريق و يضغط بقي علي نفسه و يفضل طاير لحد ما يوصل للحكيم
و فعلا طار كوكو من البيت و بدأ الرحله علي كناح السرعه ؛ و برغم ان كوكو طاير ده ممنعش
انه يشوف المدابح و الأهوال اللي علي ارض المدينه الملعونه شلاليت ؛ و يا ريته شاف
و بس ده فجأه و هو طاير لقا حاجه عملاقه جايه من ورا دخان كثيف اوي و بتعمل صوت
يطرش الودان الكميله ؛ و معرفش كوكو يعمل ايه او يستخبي فين و حاول ينزل بسرعه انه ينزل
علي شجره اول ما جيه يقف عليه لقا الشجره راحت واقعه و طبعا متحرمش كوكو من الكحه و الخنقه
من دخان الطياره الحربيه اللي كانت عماله ترمي قنابل غاز مثيل للدموع علي الشجر عشان تطفش
الكوكوهات الكميلين اللي ساكنين في الشجر ؛ و اضطر كوكو يدوس علي نفسه و يكمل طيران
و هو عينيه مدمعه و بيكح و مش شايف حاجه و بقي حتي الشجر مش امان انه يقف عليه 00
و فضل كوكو طاير فطره طويله اوي لحد ما لقا شارع هادي و ده شئ غريب في المدينه دي طبعا
بس اخد كوكو القرار انه ينزل يسأل اول واحد معدي علي عنوان الحكيكم كيروكيم 00
و فعلا نزل كوكو الأرض و فضل واقف مكانه خايف يتحرك و مستني حد يعدي و فضل واقف
شويه يتلفت يمين و شمال و مستغرب جدا هو السكان راحوا فين سواء الأشرار او الطيبين ده لو اتبقي منهم
حد 00 و بعد شويه سمع كوكو خطوات وراه اتلفت لقا كوكو من الطيبين جاي
فراح قايل كوكو 00 يا سلام الحمدلله اني لقيتك ممكن لو سمحت تقولي فين الاقي الحكيم كيروكيم
بس سمع كوكو صوت زي تكتكة ساعه فسكت و لقا الكوكو ده مش بيرد عليه
و لما ركز لقا الكوكو ده كناحاته مكتوفه ورا ضهره و علي طول حاول كوكو يفك كناحات
المربوط بس عرف ايه اللي بيتكتك اتاري الأشرار ملبسين الكوكو ده قنبله و فاضل
30 ثانيه و تنفجر و حاول كوكو يفك القنبله من المربوط بسرعه بس مكنش عارف و العداد عمال ينزل بقي
25 ثانيه 00 تكتكتكتكتكتك 00 و كوكو بيقاوح و مفيش فايده ويحاول يقرقد بمنقاره
العداد بقي 10 ثواني 00 و لسه كوكو بيحاول و يعافر بكل قوته 00 5 ثواني ؛4؛3؛2؛1؛
بووووووووووووووووووووووووووووووووووووووووممممممممممممممممممممممممممم
و طار كوكو الكميل في الهوا من قوة الدفع و معلافش ينقذ الكوكو المربوط اللي اتفرتك
مليون حته ؛ و لقا كوكو نفسه مزنوق بين فرعين شجره و نايم علي بطنه
و راسه تحت و بقي كله اسود و عليه هباب ؛ و فضل كوكو مذهول شويه قبل ما ابتدي يتحرك
تاني بس كنات ذهولته المره دي اقل بكتير لأنه ياما شاف و اتعود من يوم ما رجله نزلة
علي المدينه الحمرا 00 و سلك كوكو نفسه من الشجره ؛ و رجع يطير تاني
و دماغه بتودي و بتجيب يا تري ازاي يوصل للحكيم 00 و فجأه و كوكو طاير سمع صوت بيناديه00
يا كوكو يا كميييييل 00 صوت حنين اوي و لف كوكو يبص مين بينادي ؛ و معلافش يبلع ريقه000
كاكان
السؤال 00
ياتري كوكو شاف ايه ؟؟؟؟؟؟؟؟؟؟؟؟؟؟

Tuesday, May 22, 2007

requiem for a dream


فيلم من انتاج سنة 2000؛ للمخرج الأمريكاني
Darren Aronofesky
و من رأي انه مخرج هايل و عنده قدره علي ظبط ايقاع
المشاهد و الصوره ؛ ده غير عبقرية المونتاج؛

انا شايفه ان المونتاج لعب دور كبير اوي في ان الفيلم يبقي حلو ؛
و ده طبعا احد الحاجات اللي بنفقدها في السينما المصريه النيو لوك سينما علي حد تعبيري ؛
اللي كمان حلو اوي في الفيلم الموسيقي التصويريه اللي استعمل فيها المؤلف الموسيقي
Clint Mansell
تيمه موسيقيه او جمله موسيقيه و لعب علي توزيعها حسب ما الموقف يستدعي ؛
بس اللي اضمنه للي هيتفرج هتعلق في ودنه الجمله الموسيقيه علي طول ؛
نسيت بقي من الأول اقولكوا ان الفيلم بيناقش قضيه مهمه اوي و هي المخدرات بأنواعها ؛
و اللي بيجي تحتها غير بقي الحشيش و الهروين و الكوك او الكوكايين كمان بتعتبر
حبوب التخسيس و المهدئات من المخدرات و ده اللي بيعرضه الفيلم من خلال قصص منفصله متصله
لأكتر من حد و تأثره بالمخدرات ؛ و كمان الهوس الأعلاني او الاعلامي و تأثيره بالسلب علي البني ادم؛
كمان احب اقول ان الممثلين ابدعوا و خصوصا علي رأسهم الممثله القديره اللي قايمه بدور الأم
Ellen Burstin

و هي من مواليد سنة 1932 و هي امريكانيه الجنسيه ؛ و نالت جايزة الأوسكار سنة 2001
في دورها في الفيلم ده ؛ و كمان في نفس السنه نالت جوايز احسن ممثله في
golden globe
kansas city film
phoenix film
و في العموم نال الفيلم 19 جايزه من مهرجانات مختلفه؛ و اترشح للفوز 30 مره
و اخيرا الفيلم من نوعيه افلام الدراما النفسيه اللي يدوسلك علي الأوتار
الداخليه للشرايين القلبيه و المعنويه و الدماغيه و كل الشرايين اللي انتوا عايزناها
اتمنلكوا فرجه ممتعه و مؤثره
سلاااام


cinema voting

مش عارفه ليه الاستفتاء اللي كان قبل ده ملقاش اقبال و اعجاب
الزوار الكميلين العزيزين هو كان عن السينما ؛
اي نوع افلام تحبها اكتر ؟
و كانت النتيجه من 27 صوت 00
comedy 00 6 votes 00 22%
romance movies 00 5 votes 00 19%
others 00 4 votes 00 15%
sience fiction movies 00 2 votes 00 7%
horror movies 00 1 vote 00 4%
adventures movies 00 0 votes 00 0%
الحقيقه انا مش عارفه ايه سبب ان التصويت كان ضعيف
بالنسبه للاستفتائات اللي فاتت ؛ يا ريت اللي مصوتش يقول
ليه مكنش عجبه او ليه مصوتش ؟؟؟؟
او لو حد صوت في الاختيار رقم تلاته يقولي كان في نوعية افلام ايه
مختلفه عن اللي كانت في الاختيارات 00
و يا للا بقي شدوا حيلكوا في التصويت الجديد
سلام

Friday, May 18, 2007

الله يرحمه

قبل ما اكتب الحلقه احب اتأسف علي تأخير النشر من امبارح بليل للنهاره الصبح
و ده صدقوني لظروف خارجه عني و عن كناح الكوكو الكميل 00
**********************************************
الحلقه اللي فاتت 00
كوكو كان في مزنق و مش عارف يتصرف
الحلقه دي 00
فضل كوكو بكناحاته الكميله اللي متكتفه ورا ضهره رايح جاي في الأوضه
بخطوات حائره مش عارف يتصرف ازاي و حتي كان نفسه يهش في دماغه
و مش عارف بسبب ان كناحاته مربوطه يا عيني علي العذاب اللي انت
فيه يا كوكو 00 و ابتدي مخه يودي و يجيب انه عشان اتأخر مش هيلحق ينقذ طانط
ام مكاوك و هيسلقوها و يحمروها و احتمال كمان مايلحقش منها و لا العضم حتي
و هيكون الكلاب كلوه 00 و فجأه كوكو سمع صوت زي ما يكون طوبه
و خبطت في الشباك بتاع زنزانته و بص علي الشباك ملقاش حاجه ؛
فقال في نفسه انا اكيد بيتهيألي ؛ بس سمع صوت تاني زي ما يكون بيقولوا
لأ مش بيتهيألك ؛ و بيبص ورا لقا كيرو ملزوق في الأزاز بتاع الشباك و بيحاول يزقه يفتحه
و بعدين يطير و يرجع بسرعه يخبط في الشباك جامد بكتفه عشان يكسر الازاز
و فضل كده كذا مره لحد ما تعب يا عيني فبص لكوكو الكميل و شاورله متخافش انا هتصرف
و طار كيرو و بعد و فات وقت كتير و كوكو الكميل مستني ان كيرو يرجع و لكن مرجعش
طبعا دماغ كوكو الكميل استغلت الفرصه انها تودي و تجيب و قعدت طبعا تقول لكوكو
ده شكله حلقلك و مشي ؛ لأ مش يمكن العصابه شفوه و حبسوه برضو زي في اوضه تانيه ؛
لأ ده يمكن 0000 و سمع كوكو صوت كناحات كتير بتطير في الهوا و ما كانش فاهم
و فجأه لقا اتنين كوكو كروان بس كبار بيخبطوا في الشبك جامد راح الشباك مفتوح
و راحوا قايلين لكوكو الكميل 00 سلاموا عليكوا زيك يا كوكو يا كميل ؛ و رد كوكو عليهم
في دخلت كيرو اللي طار و نزل بسرعه في حضن كوكو و حضنه و راح فكله التكتيفه و قاله 00
علي فكره لما انت قلت يا كيرووووووو و انت بيتقبض عليك انا وصلت بس معرفتش طبعا اعمل
حاجه فمشيت وراك اراقب السكه لحد ما سبوك و خرجوا و قلت هو ده الوقت المناسب اني
اخلصك قبل ما يرجعوا 00 رد كوكو 00 لأ يا كيرو انا هستني و و هضحك عليهم
و اقولهم اني مش هديهم القلم لحد ما يودوني لأم مكاوك 00 رد كيرو 00
ايه يا كوكو ده انت عايز تساعد ناس اشرار مش كويسين انت كده بتعما اتفاق
معاهم و ده مش كويس 00 ما انا مش عارف افكر و لا اعمل حاجه يا كيرو
ما هو افرض انا ما عملتش كده هلحق اوصل عند ام مكاوك ؟
رد كيرو 00 متقلقش انا هوديك عند حكيم الجزيره الصفرا اللي بعد دي
هو الشخص الوحيد اللي هيوصلنا هناك و انا مش هسيبك كناحي علي كناحاك
ايه رأيك ؟؟؟ سكت كوكو شويه و قال 00 انا اهم حاجه عندي انقذ ام مكاوك حتي لو انا هموت؛
رد كيرو يا سلام عليك يا كوكو يا كميل انت قلبك طيب و حلو اوي ؛
طب يا للا بينا ؛ اه صحيح انا نسيت اعرفك بصحابي دول اكتر ناس اقويه
ساكنين في الشجره اللي جنبي و تقدر تعتمد عليهم بيحبوا يسعدوا الناس اوي 00
و شال الأقويه الشنطه لكوكو و طاروا من الشباك و طار كوكو و كيرو وراهم 00
و في الوقت اللي كوكو بيخرج ديله الكميل من الشباك كان واحد من العصابه بيفتح
الشراعه اللي في الباب يبص عليه و شاف الشباك مفتوح و هما بيخرجوا 00
و فجأه سمع كوكو و كيرو و الأقويه صوت سرينه انذار زي بتاعة الحريقه عالي اوي
فعرفوا انهم اتكشفوا و ان العصابه هتجري وراهم دلوقتي ؛ فبص كيرو لكوكو و قاله 00
بص يا كوكو انت اول واحد تهرب و تحاول تنفد بجلدك و هتلاقي شجره علي بعد
2 كوكو متر فوقيها بيت لونه احمر في اصفر و قدامه مشايه خضرا و مقطوع حته من طرفها
ارفع المشايه هتلاقي تحتها نسخه من مفتاح شباك الشقه روح و استناني و انا هحصلك
رد كوكو عليه 00 لأ انا مش هسيبك لحسن يعملوا فيك حاجه مش احنا قلنا كناحي علي كناحك
رد كيرو 00 بس انت عندك ام مكاوك انا معنديش حد ؛ و اصر كوكو انه ميمشيش و يسيب كيرو
و هنا بدأت المطارده الأقويه شايلين شنطة كوكو و بيطيروا بسرعه اوي بيحاولاو يوصلوا للسور الخارجي
و ووراهم اتنين من الأشرار العمالقه بيضربوا رصاص ؛ و كوكو و كيرو عمالين يستخبوا في زخانيق
بين الحيطان و جم في حته اتزنقوا و معرفوش يخرجوا لأنهم شايفين الحرس واقفين قدامهم ؛ و فضلوا يفكروا يعملوا ايه و هما خايفين يخدوا نفسهم لحسن يسمعوهم ؛ و كان احسن حل انهم يستنوا شويه الجو يهدي
و بعدين يخرجوا 00 و شويه و قرر كوكو ان يطلع دماغه الكميله براحه عشان يبص و اول ما كوكو طلع دماغه لقا كوكو ضخم في وشه را ح مزعق 00 اهم يا ريس يا كبير لقتهم 00
و مكنش قدامهم غير انهم يطلعوا و يطيروا بأقص سرعه كيرو ووراه كوكوالكميل اللي مكنش واثق
ان ريشه الي لسه ضعيف هيقدر علي المجهود ده 00 و طار كيرو ووراه كوكو و العصابه وراهم
و كانوا بيرفرفوا جامد اوي ؛ و قربوا العصابه من ضهر كوكو و كيرو اللي كان بينهم و بين السور
حته صغننه اوي و لقا كوكو خرم في السور راح مصوصو بزعيق جام لكيرو بص الفتحه دي
ياللا بسرعه ؛ و خرج كوكو من الفتحه بسرعه و ووقف برم السرو يشاور لكيرو ؛ لكن جه كيرو
يعدي اتزنق لأنه كان اتخن من كوكو الكميل الرشيق ؛ و حاول كوكو شيد كيرو من كناحه يطلعه
بس كيرو قال 00 قال لكوكو سيبني و اجري الحفق ام مكاوك بسرعه و متنساش الحكيم
رد كوكو و هو مذعور 00 لأا مش هسيبك لازم انقذك زي ما انقذتني
و في وسط الكلام ما بين كيرو كوكو 00 لمح كوكو من بعيد واحد من العصابه رفع مسدس
و بينشن علي كيرو اللي مزنوق 00 و راح كوكو مصرخ كام اوي 00 لأأأأأأأأأأأأأأأأأأأأأأأأأأأأأأأأأأأأأأأ
لكن طاخ رشقت الرصاصه في ضهر كيرو اللي مات و كوكو ماسك كناحه 00
و قعد كوكو يحاول يسحب كيروو من الفتحه اللي في السور و اخيرا نجح انه هو يخرجه
و يشيله و يطير بيه بعيد شويه و هو بيعيط و الدموع مخلياه مش شايف قدامه
و نزل كوكو علي الأرض و قعد مش عارف يعمل ايه و حس بالذنب انه قصر مع كيرو معرفش ينقذه
و كان زعلان اوي و جواه بيوجعه 00 و فكر كوكو انه لازم يدفن كيرو بعد
ما يقراله قراّن و كان احسن مكان انه يدفنه في جنينة بيته 00
و كمل كوكو الطريق لحد ما لقا العنوان اللي كان كيرو الله يرحمه وصفهوله
و راح كوكو تحت الشجره و قعد يحفر و دفن كوكو و قعد جنب القبر بتاعه يعيط
كامد اوي و يقرا قراّن 00 و لما الدنيا ضلمت شويه طلع كوكو الشقه و
جاب المفتاح من تحت المشايه 00 و فتح الشباك و دخل لقا شنطته جوه
الظاهر جبهاله الأ قويه و سبوها و مشيوا 00
و دخل كوكو قعد مش عارف يعمل ايه ؟؟؟؟؟؟؟؟؟؟؟
كاكان

Wednesday, May 16, 2007

شيوخ الميكروباص

اذا كنت من رواد او الزوار الدايمين لوسائل المواصلات
و خاصة الميكروباصات هتكون اكيد عرفت ان زي ما فيه مطربين
بنطلق عليهم مطربين الميكروباص ؛ هتلاقوا في كمان شرايط دين
للميكروباص كمان؛ بجد نوعية الشرايط دي مش بسمعها غير في الميكروباصات
و هي شرايط تتسم بالارهاب و الترهيب و التخويف ؛ و بتتسم باسلوب
ركيك في الشرح ؛ و تلاقي الشيخ منهم بيصرخ و لا لما تكون النار مسكت في جلابيته
لدرجة ان صوت الصريخ بتاعه بيغطي علي الكلام اللي بيقوله ؛ يعني مثلا مش هروح بعيد
لسه امبارح في ميكروباص راكبه و السواق اللي بيشرب سجاير و بيشتم طول السكه بأفظع الألفاظ
فاتح شريط لواحد من الشيوخ دول و معليه ؛ و الشيخ عمال يقول يا الله يااللهههههههههههههههههه
و فضل مادد بصوته الجعور في كلمة يا الله تحسه انه داخل سبق علي طول النفس مع واحد تاني ؛
يا جماعه شئ يخليك بدل ما تسمع للشريط و تستفيد من الكلام اللي المفروض مفيش احس منه
يخليك تبقي عايز تقول للسواق لو سمحت اقفل الشريط ده و حطلنا شريط لكاظم الساهر
اهو علي الأقل صوته حلو
و مش بيصرخ ؛ انا بقول الكلام ده كله عشان من رأي ان نوعية
الشرايط دي بتخلي جزء من الناس يهرب ؛ و جزء يفهم الدين غلط ؛ يعني
من المفروض ان يبقي في تفتيش علي الشرايط دي و يبقي عليها رقابه قبل تداولها ؛
لأن بجد احيانا شيوخ منهم بيستعملوا الفاظ سوقيه و لا تليق و يقولوا عشان نوصل لعامة الشعب
و الأمي مثلا ؛ بس ده مش مظبوط انت كده بتقلل من رقي الدين و مرتبته العاليه ؛
و دعائي الأخير يارب الميكروباصات تبطل تشغيل النوع ده من الشرايط اللي بدل مايفيد
بيزعج و يضر
سلام


Monday, May 14, 2007

the grudge 2


فيلم من انتاج 2006 و هو لحد دلوقتي
جزئين ؛ هو فيلم رعب زيه زي كتير من افلام الرعب
اللي بتعتمد علي شد الأعصاب مش المشاهد اللي بتمطر دم ؛
بس مش قصة الفيلم اللي شدتني لأن من رأي انها قصه مكرره في افلام كتير قبل كده زي
the ring 1 : 2002
the ring 2 : 2005
dark water : 2005

بس اللي شدني في الفيلم و حسيت انه جديد و هو اللي خلي الفيلم
فيه شدة اعصاب نوعا ما هو المؤثرات الصوتيه اللي انا شخصيا
مكنتش سمعتها في فيلم قبل كده بالاتقان ده و اللي توصلك الاحساس
بالقشعريره حتي لو انت مش باصص علي الصوره ؛
بس الفيلم في مجمله مش فيلم وحش و برضو مش فيلم جديد بس

انا ادي جيزه للمؤثرات الصوتيه
احب اقول كمان ان الفيلم ليه جزء انتج سنة 2003 و كان بعنوان
ju-on: the grudge


و جزء انتج سنة 2004 و يعتبر الجزء الأول بعنوان
the grudge


و الفيلم كان ليه اجزاء قديمه ليها نفس العنوان كانت انتاج سنة
1915 ؛ 1917 ؛
و الجزء التالت الحديث محطوط علي ليستة الانتاج القادم بتاريخ 2008
بس اخر حاجه احب اقولها ان اللي عايز يتفرج علي الفيلم يبقي ما يعليش
الصوت اوي لأنه مررررررررررررررررررررعب
سلام


Thursday, May 10, 2007

كوكو في ورطه

الحلقه اللي فاتت 00
الكوليس بتاع مدينة شلاليت قبض علي كوكو و اتهمه
الحلقه دي 00
كوكو الكميل قاعد علي الرصيف و رافع كناحاته الصغننه الكميله لفوق
و نور عربيات الكوليس ضارب في عينيه و هو مذهول و مش فاهم
حاجه من اللي بتحصل حواليه و كوكوهات الكوليس حواليه من كل حته بيجروا
و شدوا كناحانه ورا ضهره و لبسوه الكلكشات و راحوا رافعينه من الأرض
و هو عمال يقول 00 طب من فضلك يا استاذ كوليس انا عملت ايه ؟؟
و هما يقولوله 00 اسكت يا متهم ملكش الحق تتكلم الا في القسم
و جرجروه علي العربيه و حط ظابط منهم ايده علي راسه و دخلوه
جوه العربيه و راحوا رازعين الباب 00 و كوكو قاعد في العربيه من ورا
و قدامه الشبك الحديد و هو عمال يبص حواليه و يتفقد المكان
و في نفس الوقت قلقان لحسن مايلحقش ام مكاوك و لا حاجه 00
و جريت عربيات الكوليس ورا بعض و هي فاتحه السارينه بصوت عالي
ويوا ويوا ويوا ويوا 00 و فضلت العربيات تلف من شارع لشارع و من حاره لحاره
و كل شارع تخشه يشوف كوكو جريمه افظع من اللي شافها قبل ما يتقبض عليه00
شاف كوكو شايل شوال علي ضهره و مسدس في ايده و خارج يجري من البنك
الشلاليتي بعد ما سرقه ؛ و شاف نسور موقفه كوكوهات و مرفعنهم في الشارع و بيخدوا كل
اللي في جيوبهم و منفضين ريشهم عن اخر سحتوت 00 و كوكو مستغرب الكوليس سايب
كل الناس دي و رايح يقبض علي الكميل اللي فيهم 00
فاق كوكو من سرحانه في الشوارع علي العربيه و هي بتقف قدام مبني طويل
في شارع ضلمه يدوبك شايف المبني بالعافيه ؛ و راح فاتح واحد من الكوليس الباب
و ملبس كوكو كيس اسود علي راسه و راح شده من كناحه و كوكو عمال يصوصو
و يقول انا مش شايف انا مش شايف ؛ راح مطلع الكوكو الكوليسي ده عصايه
مجعلصه من جيبه و راح خابط كوكو الكميل علي دماغه طب كوكو في لحظتها مغمي عليه
بعد ما الدنيا اسودت قدامه 0000
*******************************************************
فتح كوكو عينيه بالراحه بالعافيه و هو حاسس ان دماغه قد هرم خوفو 00
و ابتدي يحس انه نايم علي ضهره علي بلاط ساقع ؛ و حاول كوكو يقوم
لكن حس انه دايخ و محتاج يتحرك بالراحه اكتر لحد ما قعد 00 بص كوكو حواليه
لقا اوضه مش نضيفه و كلها كراتين و براميل و فيها شبابيك سلك قد فتحة الابره
قرب السقف و في كلام و شخبطه علي حتت كتير في الأوضه و السقف متعلق فيه لمبه
مدلدله من سلك و زرار فتحها و قفلها مدلدل معي السلك و اللمبه كمان واضح انها عايزه
تتغير لأنها كل شويه نورها يترعش 00
و فجأه فتح واحد شباك صغير جرار في الباب و بص علي كوكو
و راح قافل الشباك ده و مشي و بعد 3 دقايق سمع كوكو صوت المفتاح بيلف في الباب
و فضل كوكو مركز عينيه اوي علي الباب و مستني يشوف مين اللي هيدخل
و اتفتح الباب براحه و بص كوكو شاف قدامه رجلين بني كبيره
و طلع كوكو براسه براحه و عدي علي ركب ووراها فخدين كلهم ريش اسود و بعديم بطن
مكرشه و صدر عريض كله عضلات ووصل لوش شكله معب فيه منقير طرفه مكسور
شكله كده في خناقه و عين مفقوعه و اول ما فتح الكائن العملاق ده بقه
شاف كوكو سنان حمره من اثر الدم بتاع الكوكوهات ابريئه اللي بيكالها
و اول ما تكلم سمع صوت محشرج من المخدرات و الحاجات الأصفره اللي بيشربها
تنح كوكو الكميل في وش الكائن العملاق ده و هو بيضحك و بيقول 00
هع هع هع ؛ و عملينا فيها حويط يا عين امك و كوكو الكميل و كوكو الجامد
و انت طلعت كوكو الأهبل العبيط ابو رياله ؛ و دخلت عليك التمثيليه زي الشراب ابو خرم في الصباع
و شكلك بقي لامؤاخذه في اللفظ زي الشورت المبلول ؛ صوت ضحك من الحاشيه اللي حواليه ؛
احب اعرفك بنفسي يا سي كوكو يا اهبل انا ابو الأنسار المخربش اكبر مذور حبوبورو في
العالم و تاجر في كل شئ ممنوع و المسموح مبحبوش و كمان البوليس محبوش
عشان كده كل ما واحد يعملنا فيها حمش و يفكر بس انه يقدم في كليه الشرطه
بنقطع خبره و نتاويه هو و اهله فمتفكرش انك هتلاقي هنا بوليس يلحقك
و راح مايل المخربش فجأه علي قدام و راح مبرق و مصرخ في وش كوكو
لدرجة ان جت علي وش كوكو تفافه و قال 00
فين القلم ياللا ؟؟؟؟؟؟؟؟
كوكو و هو بيمسح وشه من التفافه و ناسي من الخضه 00 قلم ايه يا استاذ ابو سمسار ؟؟؟
اسمي ابو الأنسار ياللا انت هتسوق الهبل و لا ايه انت هتقول فين القلم
و للا اخليك تقول ؟؟؟؟؟؟
يا استاذ و الله انا مش فاكر قلم ايه ايه اللي حضرتك بتتكلم عليه ؟؟؟؟؟
القلم اللي ادهولك الحنش و هو بيموت و متحاولش تنكر عشان رجلتي اللي كانوا
بيطردوا الحنش قبل ما يموت شافوه و هو بيديك القلم
و افتكر كوكو بس ماردش 00
ما هو اصل انت لو مقلتش مش هنديك الشيك اللي لقيناه وسط حاجتك
لأ لأ يا استاذ ده شيك عشان انقذ بيه امي من الخطاف لأ من فضلك انا معرفش القلم
فين ممكن يكون وقع مني
الخطاف؟؟؟؟؟؟ الله الله ده احنا طلعنا نسايب اهو الخطاف ده كان من رجلتي و طلع خاين
و مصنش العشره و الطفح اللي كفحتهوله و اول ما جناحه طول و العافيه ضربت فيه
عض الجناح اللي اتمدله 00 بقولك ايه يا كوكو ياللي مفهمينك انك كميل
انا مستعد لو لقيتلي القلم و كلمة شرف و دي اول مره هتنازل و يكون عندي شرف
و انا متضرر ؛ كلمة شرف لو تديني القلم ده هوصلك عند الخطاف و اهو ابقي ضربت
كوكوهين بمطوه انت لقيت امك و انا لقيت زمارة رقبة الواد الدون اللي اسمه خطاف
ايه رأيك ؟؟؟؟؟؟؟
سكت كوكو الكميل شويه و قال 00 طب ممكن افكر شويه
خلاص انا هسيبك مع دماغك تفكر و تمخمخ بس عقلق في راسك تعرف خلاصك
سلام يا حلو معاك ساعه عقبال ما اشرب كاس و ارجعلك ؛ ياللا يارجاله ؛
بس بقولك ايه متفكرش تقل عقلك كده و لا كده و علي العموم كوكوبايلك
في الحفظ و الصون 00
و خرج المخربش و قفل الباب و فضل كوكو باصص علي الباب و بيسمع المفتاح
و هو بيلف تاني بالعكس و الباب بيتقفل عليه و هو بيفكر يتصرف ازاي ؟؟؟؟؟؟؟؟
ايه الورطه دي
كاكان
****************************************************************
سؤال الحلقه اللي فاتت 00
كل الناس المره اللي فاتت حلوا السؤال علي ان كوكو هيكون متهم بسرقة القلم الدهب
بس اللي كسبه هما البلطجيه و سمسم ؛ عشان قالوا ان دي هتكون العصابه مش كوليس
حقيقيين 00 مبروك يا كميلين
**************************************************************
سؤال المره دي 00
يا تري كوكو هيوافق علي طلب المخربش و لا لأ ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

Wednesday, May 9, 2007

متزعلش يا شادي

سبحان الله
انا بدور على بوست عندك يكون بتاريخ 20 -4
فلقيت اني كنت مقرتش البوست ده
الكتاب ده لازم اقراه ان شاء الله عشان انا بثق في رأيك من يوم ما اشتريت
تاكسي
عموما انا كنت بدور على بوست بالتاريخ ده ليه بقى
؟؟
عشان ده تاريخ اخر كومنت جالي من كوكو
وبعدها كل لما ادخل مدونة القي تعليقات كوكو
وكوكو مش بيجي يزورني
انا بكل تأكيد مش زعلان
انا بس خايف يكون كوكو زعلان مني في حاجة او يكون كوكو ضايقه رأي ليا في بوست عندي او كومنت عند اي حد
يعلم ربنا ان مدونتك اهم مدونة بدخلها
وبتعلم منها
انا مثلا
من يوم البوست اللي اتكلم فيه كوكو عن رمي الورق في الأرض
وأنا مرمتش ورقة على الأرض
فلو كوكو زعلان مني ارجو انه يقولي
عشان لو كنت عملت او بعمل حاجة غلط اصلحها
انا بجد عمال ادور على سبب مقنع ان كوكو مش يزورني غير انه يكون زعلان مش لاقي
؟؟؟
انا حستريح لو كوكو جه قالي انا زعلان عشان كذا وكذا
لان لو قالي انه مش زعلان مش حعرف اقتنع
ولو كوكو مش بيعلق عندي عشان بوستاتي مش عجبته فأعتقد انه كان لازم يقول في الكومنتات
ولا ايه؟؟
جايز اكون مكبر الموضوع
بس كل لما ادخل مدونة والاقي تعليق كوكو اتجنن
يعني معقول يعدي عشرين يوم كوكو ما يفكرش يدخل مدونتي
؟؟؟
******************************
الكومنت ده جالي من واحد من اهل العشه و هو الحقيقه من اول الناس اللي
دخلوا عندي العشه و نوروها و هو شادي فايد 00
انا بكتب البوست ده عشان اقول لشادي انه غلطان و ظالمني لأن انا مش زعلانه منه
و انا لما بكون زعلانه بقول و مش بحب امثل علي حد بحب اكون علي طبيعتي
و كمان السبب التاني اللي خلاني اكتب البوست ده كمان اني اقول لشادي
انا اسفه لأن انا مقصره في حق بلوجته حقيقي بس صدقني الموضوع سقط سهوا
مش قصد ده حتي البلطجيه اللي انا بدخل عندها كل يوم ساعات بقعد فتره مدخلش
علي العموم معلش يا شادي و حقك علي 00
و حقكوا كلكوا عليا لو كنت قصرت مع حد تاني 00
خلاص بقي يا شادي اضحك و متبوزش
say cheeeeeeeeeeeeeeeeeeese
سلام

Tuesday, May 8, 2007

فاقد الشئ

بتمشي كعادتي لتفقد عشش الزملاء الأفاضل ؛ عجبني اوي بوست كاتبه
الزميل هيثم ابو عقرب بعنوان فوائد ان تتزوج مدخنه ؛
فأنا من وحي البوست ده و من وحي بوست قديم ليا بعنوان اذا كان رب البيت
هكتب البوست ده 00
************************************
فاقد الشئ لايعطيه

ازاي واحد بيعمل حاجه يحكم علي حد تاني بأنه ما يعملهاش ؛
و خاصة لو ان الشخص الأولاني ده كان حدوه قصدي قدوه ؛
شئ متناقد بيتهيألي ؛ يعني مثلا و انا بقرا الموضوع بتاع ابو عقرب
جالي الهاتف ده ازاي واحد بيدخن بيجيلوا عين يقول لمراته او لخطيبته متدخنيش ؛
ما هو الحرام عليك و عليها سواء و الضرر عليك و عليها برضو سواء ؛
او ام مثلا بتدخن و تقول لبنتها او ابنها متدخنش ؛ الله طب ما هو انت صوره
بيتبعها ازاي ميدخنش و ازاي هو يقتنع انها غلط او خطر او حرام اين كانت التسميه
و انتي و باباه بتدخنوا ماهي حاجه تمخول المخ ؛
طبق بقي الموضوع ده بقي علي حاجات كتير شبه كده ؛ و منها المثل اللي انا ضربته
في البوستايه القديمه اللي كتبا اسمها فوق ؛ طب معني كده ان المثل اللي بيقول
ان فاقد الشئ لا يعطيه ده صحيح ؟؟ يطلع واحد يقولك لأ في ناس رأيها ان المثل ده مش صحيح
و مبررهم ان فاقد الشئ بيحس بأن عنده نقص تجاه هذا الشئ فبيحاول بعد كده انه يتحشاه
يعني مثلا لو ان حد اتربي علي ان اهله بيضربوه هو لما يخلف مش هيضرب ولاده ؛
او لو اتربي في بيئه مفككه هيحاول انه يخلي الأسره بتاعته مترابطه ؛
او لو ان اهله مش كانوا بيدولوا فرصه يتناقش و يعبر عن رأيه هو هيعمل العكس مع ولاده ؛
انا شخصيا من رأي ان مفيش قاعده و ان الموضوع نسبي لأن ممكن الواحد الموضوع يقلب معاه عقده
و يطبقه بشكل مبالغ فيه فيبقي فاقد الشئ بالجامد اوي 00
فمؤقتا انا هغير شويه في صياغة المثل لحد اشعار اخر و هخليه 00
فاقد الشئ ممكن يعطيه بس لو معطهوش يا ريت تعذروه
سلام
بعد قراية الكومنتات اضافه بسيطه 00
كتب لي الزميل ياسر حسين الكومنت ده
و يا ريت اللي مهتم يقرا البوستايا اللي عنده لأن الموضوع عنده مشيق
جداااااااااااااا 00
و ده كان نص الكومنت باللينك بتاع البوتايه
******************************************

أنا معاكي مليون المية في كل الكلام اللي قلتيه
وخصوصاً إني بأعتبر نفسي عدو التدخين رقم واحد
ولو تتذكري كان ليا تدوينة عن الموضوع ده وعن ارتباط بعض المبدعين بالكيف وأنتي شرفتيني بتعليقك الجميل عليه وللتذكرة مش أكتر ده اللنك بتاع الموضوع لعله يكون فيه إضافة أو إفادة لقراءك الأعزاء
http://cartoonya.blogspot.com/2007/03/blog-post.html

Sunday, May 6, 2007

من الخميس للخميس

لظروف انشغاليه و ضيق وقت قررنا انا و كوكو الكميل
بطلي المغوار ان الحلقه الجديده هتتنشر كل خميس بليل
بس البوستات التانيه عادي ممكن في وسط الاسبوع ؛ و ده لأن كوكو
بيحتاج تركيز و مخمخه عشان يلعب المغامره ؛
و معلش استحملوا فراق الحلقه من الخميس للخميس
و ده لظروف خارجه عن ايرادتي ؛
و ميرسيييييييييييييييي
كاكان

300


حظي التعيس اللي مش كميل خالص مالص و كمان بالص
خلاني اتفرج علي هذا الفيلم العجيب اللي انا شخصيا بدأت امل
بعد ربع ساعه من بدايته و ده غريب لأن دخلة الفيلم تنم عن
فيلم حلو اوي او مش هيبقي بالسؤ ده 00
300 فيلم انتاج 2006 ؛ و الظاهر ان المختصين
كان رأيهم من رأي و ده خلي الفيلم ميخدش اي جوايز و مترشحش
غير لجايزه عبيطه في مهرجان اعبط ؛ بس عشان الواحد يقول اللي
ليه و اللي عليه لازم اقول ان الفيلم كله متصور في بلاتوهات داخلي
رغم ان الفيلم تسعين في الميه منه بتحصل في لوكشنات خارجي
و ده براعة استخدام الجرافيكس و الخدع البصريه في الفيلم ؛
و دي كانت الحسنه الوحيده في الفيلم بس الحسنه اللي متخليكش تستحمل اكتر من ربع الفيلم
برضو ؛ نيجي بقي للنقطه الأساسيه اللي مشوهه الفيلم ده لو اعتبرنا ان الهجوم علي العرب
و تصويرهم في صورة وحوش ضاريه و مخلوقات مقززه نقطه مش هنتكلم فيها لأنها مكرره
في افلام كتير و خلاص مش هنعد نعيد و نزيد ؛ النقطه بقي اللي اقصدها و اللي خلتني
احس ان الفيلم مسخ مشوه من رأي ؛ و ده لأن و انت بتتفرج علي الفيلم
اول ما هتسمع الموسيقي التصويريه علي طول لازم تفتكر الفيلم العبقري
the gladiator
اول ما تشوف حركة المجاميع المحاربين في المشارهد القتاليه و الجروب لازم علي طول تفتكر
brave heart
و لاما تتفرج شويه هتحس ان روح الفيلم فيها كتير اوي من فيلم اصلا مكنش حلو و معجبنيش
troy
اما بقي عن الشخصيات المشوهه و المخلوقات الممسوخه اللي السينما الأمريكيه بتبرع في اختراعهم
و ابتكارهم لازم علي طول تفتكرساسلة افلام
the lord of the ring
تخيلوا انتوا بقي بعد كل السلبيات دي هيكون الفيلم شكله ايهههههه؟؟؟؟؟؟؟؟؟
و في النهايه ده رأي
سلام
********************************************************************
اضافه صغيره بعد الكومنتس 00
ياسر حسين البلوجاوي العزيز علي العشه صاحب مدونة كارتونيا
قالي انه كتب بوست عن الفيلم فحبيت انكوا تقروا رأيه برضو
و البوستايه اسمها 300
بس خلاص
ميرسي

Friday, May 4, 2007

كوكو في شلاليت

الحلقه اللي فاتت 00
كوكو وقف مزعور و مخضوض من حاجه فظيعه شافها
الحلقه دي 00
كوكو بعد ما عدا من اليافطه بتاعت مدينة شلاليت فجأه
سمع صوت جامد و بيبص لقا كوكوهين فى عربيه حمرا واحد بيسوق العربيه والتانى طالع نصه من الشباك وماسك مسدس وبيضرب نار على عربيه نبيتى بتجرى وراهم و كوكو من التلاته اللي جوه ماسك في ايده
مدفع رشاش و و خارج من سقف العربيه و بيضرب النار علي العربيه اللي قدامه و بيضرب في كل الاتجاهات
و كوكو الكميل واقف مذعور و ريشه وقف من الخضه و صوت ضرب النار بيزيد حواليه و العربيات تقرب اكتر
و الرصاص بيطير زي الدبان من كل حته ؛ و اتمني كوكو ان الأرض تتشق و تبلعه ؛ و لما قربت العربيات
شاف الكوكوهات اللي بتضرب رصاص بوضوح ؛ كوكوهات كبيره و لونها اسود و شكلها يخوووف ؛
و عدت العربيات قدام كوكو بسرعه خلت ريشه يطير من الهوا الجامد ؛ و بيبص كوكو الكميل لقا كوكو
عجوز اوي هيعدي الشارع راح مصرخ كوكو و هو بيجري عشان يحاول يمنعه انه يعدي
لكن ملحقش كوكو الكميل و خبطت العربيات الكوكو الأسود العجوز و طار ووقع هو و عصيته
الخشب علي الأرض ؛ و لما كوكو شاف كده جري ناحية الكوكو العجوز و جررجره
علي الرصيف الأحمر و قاله 00 يا جدو انت لسه عايش يا جدو ؛ فتح الكوكو الصقر الأسود العجوز
عينيه براحه و بالعافيه 00 انا يا ابني اسمي صقار الحنش و انا استاهل عشان انا كنت طول عمري شرير
انا عايز اديك حاجه رغم اني معرفكش بس مد جناحاك في جيب الجلابيه اللي فوق ده و خد القلم
الذهب اللي في جيبي ده هديه القلم ده فيه كل ثروتي انا مش هقولك علي المفاجأه اللي فيه
خليه معاك و انت انت انت هاء 00 و مات صقار العجوز علي رجل كوكو اللي راح معيط
و معرفش يعمل ايه ؛ و سند كوكو راس صقار الحنش علي الأرض و قام عشان يدور
علي حد يشيله معاه عشان يدفنه ؛ و فجأه كوكو سمع صوت صريخ و صوصوة كوكو صغنن
بيستغيث و بص وراه لقا كوكو صقر بني كبير خاطف كوكو صغنن و معلقه من جناحاته
بحبل و شايله علي كتفه ووراهم من بعيد صوت كوكوهايه ماما بتصرخ 00 الحقوني
خطفوا الكوكو ابنييييييييييييييي الحقونيييييييييييييييييييي 00 و دبت في كوكو الرجوله
و الشهامه اللي من طبعه دايما ؛ و جري ورا الصقر الحرامي ده و قعد يصوصو
و يزعقله 00 انت يا حرامي سيب الكوكو المسكين الصغنن ده ده مش بتاعك انت ده بتاع مامته
اللي هناك دي 00 راح الصقر الحرامي البني واقف فجأه و مدور يبص تحت
رجليه ايه الصوت ده و جاي منين و لما شاف كوكو راح ضاحك ضحكه شريره هع هع هع
و بيّن انيابه
السوده في اصفر مطرح السجاير و راح رافع رجله و شايط كوكو زي
الكوره الشراب في الهوا و طار كوكو و هو بيصرااااااااااااااااااااااااااااااخ
و طخ راح واقع علي الأرض تحت شجره كبيره ورقها احمر من كتر الدم اللي عليها
مطرح الكوكوهات الصغننه اللي ماتت عليها ؛ و فتح كوكو عينيه لقا نفسه نايم علي ضهره
في الأرض و لسه كوكو هيقوم حس ان الشجره اللي هو نايم تحتها بتميل و افتكر
ان ده من اثر الشلوت اللي مش كميل اللي لسه واكله بالهنا و الشفا ؛ بس لأ
دعك كوكو عينيه و هش الكوكوهات اللي بتلف في دايره حوالين دماغه و بتصوصو ؛
و فتح عينيه تاني لقا الشجره بتقرب اكتر و حس انها خالاااص هتقع فوقيه و بسرعه لف كوكو
زي السوسيسايه علي الأرض بعيد عن الشجره و راحت الشجره درش بوم طخ
واقعه مبطوحه علي الأرض و سمع كوكو بعد ما الشجره وقعت اصوات ضحك شريره
هاهاها هيهيههيهيهؤهؤهي 00 و مكنش كوكو فاهم ايه اللي حصل و جه كوكو يقوم
يشوف معرفش بيشد نفسه لقا دراع الشنطه مزنوق تحت فرع شجره ؛ و قعد كوكو يحاول يفلفص
انما معرفش ؛ و قرر كوكو انه يطلع نفسه من الشنطه و بعدين يبقي يسحبها ؛
و قعد كوكو يعافر و يزق برجليه و فين و فين لما عرف يخرج و لما قام وقف
شاف ورا الشجره كوكوهات نسور سود و كناحاتهم حمرا بيفتشوا علي حاجه وسط الفروع 00
و مكانش فاهم و بعدين سمعهم بيقولوا 00 الظاهر ان خلاص يا رجاله مفيش كوكوهات صغيره
تاني علي الشجره دي ياللا بينا ؛ ووقف ريق كوكو في زوره و معرفش يبلعه و راح فجأه
نازل علي الأرض لحسن يشوفوه و يصطدوه زي اصحابه ؛ و اما سمعهم كوكو مشيوا
راح مادد كناحه تحت فرع الشجره و مخلص دراع شنطته و شالها علي ضهره
و خد قرار انه يخرج بره المدينه المرعبه اللي كلها جرايم دي و يدخل من طريق
تاني ؛ و بص كوكو في الساعه لقاها اتكسرت و كان عايز يعرف هو ضاع منه وقت
قد ايه ؛ و بص قدام شاف روستوران اسمه اكلك يتعمل قدامك ؛ فقرر كوكو انه يدخل يسأل
اي حد جوه الساعه كام ؛ و مشي كوكو و لما بقي قدام باب المحل لسه هيفتح و يخش اتسمر قدامه
؛ فتح كوكو نقاره من الخضه و الذعر لما شاف الشيف في المطعم ماسك كوكوهات
صغننه و حاططها قدامه علي الأورمه و ماسك صاطور كبير مش كميل و زوي دبح الكوكوهات
المسكينه اللي كانت تحت جناحه اللي مش كميل اللي عايز قطعه؛ و اتخض كوكو و رجع بضهره
من الخوف و مخدش باله من عامود الضلمه اللي وراه و راح متكعبل ووافق
علي الأرض و قعد كوكو يبص حواليه و هو علي الأرض علي المخرج من مدينة
الرعب دي وهو بيبص سمع صوت بيقول اه ه ه ه ه ه ه ه و الصوت كان بعيد و بيقرب
و قدر كوكو يحدد اتجاه الصوت و بيبص فوق ناحية الصوت لقا كوكو
محدوف في الهوا و كناحاته مربوطه ورا ضهره و راح نازل قدام كوكو
و رشق بمنقاره في الأرض و رجليه لفوق مجبش منطق ؛ و لسه كوكو هيلمسه يشوفه صاحي و لا لأ
سمع صوت سارينه 00 ويوا ويوا ويوا ؛ و عرف انها الشرطه الكوكوهيه في البلد دي جايه تشوف
ايه اللي بيحصل هنا ؛ و قام كوكو عشن يحكي كل اللي حصل ؛ وقفت قدامه 3 عربيات حمرا بتاعة الكوليس
و نزل من كل عربيه ظابط و ماسك مسدس و مصوبه ناحية كوكو 00 و ظابط منهم بيقول 00
سلم نفسك جناحاتك في الهوا اي حركه هضرب في الريش ؛ و اتخض كوكو ووقف و رفع كناحاته
في السما ؛ و كمل الظابط 00 هاتوا المتهم في العربيه ؛ و انقض 2 ظباط علي كوكو
الكميل يا عيني و مسكوه و كلبشوه و حطوه في عربية الكوليس و كوكو عمال ينادي و يقول 00
يا كيروووووووووووووووووووووو الحقني يا كيروووووووووووووووووو
كاكان
سؤال الحلقه 00
يا تري كوكو متهم بأيه ؟؟؟؟؟؟؟؟؟؟؟؟؟؟
سؤال الحلقه اللي فاتت 00
هعتبر كل اللي حل السؤال بأن كوكو شاف نسر يبقي كسباااااااااااااان
مبروك ؛ و للأ مانه عاشور هو اول واحد جاوب بالاجابه دي






Wednesday, May 2, 2007

لسانك حصانك

لسانك حصانك 00 ان صنته صانك 00 و ان هنته هانك
في مشاهدتي للحكم اللي صدر النهارده علي المستشار مرتضي منصور
اللي اتعرض في برنامج 90 دقيقه و الساعه ال10 ؛ علي طول
جه في دماغي المثل ده ؛ الله اعلم طبعا هل فعلا هو اهان المحكمه
و اللا هما كانوا اوفر و اتلككولوا محدش عارف ؛ بس انا و اعتقد مش انا لوحدي
عندي خلفيه كفايه عن مرتضي منصور انه لسانه فالت و علي طول بيزعق
و يتخانق و يشتم و يقلع الجزمه و و و و ؛ فمستبعدش انه عمل كده برضه
في المحكمه و شتم الهيئه القضائيه و رئيس مجلس الدوله السيد نوفل ؛
بس شهادة السيد نوفل بتقول انه لما قدم المذكره ضد مرتضي كتب فيها
انه سب و اهانه للهيئه القضائيه و دار المحكمه اللي من المفروض انه مكان مقدس و له احترامه ؛
في النهايه الله اعلم و ياما في السجن مظاليم و ربنا يفك سجنه و يكون ده
درس ليه و للسانه اللي مواديه في داهيه
و علي رأي المثل 00
لسانك حصانك 00 ان صنته صانك 00 وان هنته تطس 3 سنين سجن
سلام