Wednesday, February 28, 2007

امة اقرأ لا تقرأ 00

اللي خلاني اكتب البوست ده هو الموقف اللي
حصل لصاحبتي اللي شغاله في شركة كمبيوتر
و من المفروض ان زمايلها في الشغل ناس
مستواها الفكري كويس 00 و هي من عادتها
تاخد معاها كتاب عشان في فترات الفراغ تقرا
و من يومين قاعده بتقرا 00 و سألها
زميلها 00 يا فلانه انتي بتقري ايه؟؟
ردت 00 بقرا كتاب الأسلام ماهو
للدكتور مصطفي محمود 00 و كانت الصدمه
و الفجيعه لما سألوها و كان عددهم 5 او 6
مصطفي محمود مين؟؟؟؟؟؟؟؟؟؟؟؟؟؟؟؟؟؟؟؟؟؟؟
ردت صاحبتي 00 نعم انتوا بجد مش عارفين مين
مصطفي محمود و لا بتهزروا و ده من باب الدعابه
و اللطافه؟؟ و رد عليها واحد منهم 00
يعني بيبيع ايه مصطفي محمود ده؟
و طبعا هي عند الحد ده كانت و صلت بيها الصدمه
انها مش عايزه تواصل هذا الحوار العقيم
و ردت و قالت 00 الرد الوحيد اللي اقدر ارد بيه
ان ماينفعش حد يقول هي مين الشمس 00
و اما جت تحكيلي كانت قد ايه صدمتها الفظيعه ان
الناس مش عارفه مين مصطفي محمود 00
طب ده حتي مصطفي محمود من العلامات ده انا
مقلتلهمش حد مش معروف كنت هعزرهم 00
الحقيقه يا جماعه انا شايفه ان صاحبتي معاها حق
و انا شايفه ان الجهل و قلة الثقافه ليها اسباب كتير
منها 00
ان اسلوب التعليم التلقيني اللي في مدارسنا و جامعتنا
من الأسباب الرئيسيه علي ان الألف زي كوز الدره
عند اغلب المتعلمين 00
الأهل بيهتموا ان اولادهم يجيبوا مجاميع فظيعه و تكسر الدنيا
اكتر ما يهتموا انهم يثقفوا نفسهم و ليهم حق لحد كبير
و ده لأقتناعهم الشديد بأنها بلد شهادات صحيح
ارتفاع سعر الكتب بشكل خرافي علي سبيل المثال انا رحت اشتري
الروايه الجديده بتاعت علاء الأسواني شيكاجو لقيتها ب30 جنيه
مش كتير دلوقتي عندهم القدره الماديه انهم يدفعوا المبلغ ده
في كتاب هيقولك اجيب بيه عشا احسن 00 و الحقيقه
الواحد يقول اللي ليه و اللي عليه دي احد مزايا مكتبة الأسره
ان الكتب فيها بسعر رمزي بس برضو مش كل الكتب تلاقيها00
اجي بقي للشباب الأمور اللي ماشي علي الموضه و بيشرب
سجاير و بيحشش لو انه بفلوس السجاير و الحشيش دي
اشتري كتاب كل شهر هيبقي احسن من انه يبقي بلاطه
و معندوش فكره عن البطيخ 00
ارجع و اقول في النهايه ان ابراهيم عيسي كان عند حق
و جت منه في الجون لما قال في برنامجه 00 من اول السطر
ان امة اقرأ لاااااااااااااااا تقرأ
سلام

26 comments:

الفيلسوف said...

احلامك بقت كبيرة قوى يا كوكو ..انتى وصلتى للقراءة ؟؟صعبة قوى فى زمن ثقافة العنب؟شوفى لك حاجة اسهل؟

دعاء عادل said...

ده العادى بتاع البشر اليومين دول
مش كده وبس لاء تلاقيهم مش سيبينك فى حالك
يعنى لو حد جه يقرا وهو راكب اى مواصله مثلا هتلاقى الناس بتبص له بأستغراب او تتريق عليه كمان
عارفه لو كل الناس بتقرا بجد كانت الحياه بقت حاجه تانيه
يارب ده يحصل فى يوم من الايام

An Egyptian in UK said...

و الله موضوع مهم يا كوكو....اللى بتطرحيه...انا اوافقك فى الاسباب اللى طرحتيها....و زياده عليهم اعتقد الاعلام...اثر كتير على فكر شبابنا...زى ما تقولى كده اصبح جيل اللمبى...ثقافتهم بقت ...مطوتك فى جيبك و قلمك و كراستك فى شنطتك و الفهلوه و الكلام على طريقة اللاوعى و المحشش او السكران بقى نوع من خفة الدم
عموما تحياتى لكى و على الموضوعات الشيقة اللى بتطرحيها

Diyaa' said...

قراءة إيه بس صلي علي النبي ..عليه أفضل صلاة وتسليم ..الناس ممكن تقرا صفحة الرياضة والحوادث وللشباب التعبانة الجرايد الصفرا اللي كلها بكيني ..وأخبار النجم فلان ..لكن يقروا لحد بيفكرهم بيدنهم ولا بيقترح عليهم حاجة مفيدة يعملوها ..لأ كده إنتي غلطتي إنتي وصاحبتك اللي كانت بتقرا لمصطفي محمود الله يرحمه ..
مش موشي ديان قالها قبل إبراهيم عيسي ؟!
قال العرب ( أمة اقرأ ) لا يقرأون ..ولو قرأوا لا يفهمون ..ولو فهموا لا يتحركون .

كان عندي ليه كتاب وأعز صديقاتي اللي بتقول أنا أختك من ورا قلبها دي ثبتتهم مني وعشان مش طايقها سبتهملها :(
عموماً ..الفلس والفقر والتربية المنعدمة مش بتدي فرصة لرفاهية القراية وشوفي لعيب الكورة بيقبض كام في بلدنا المفلسة دي ..( إذا استبعدنا عصابة ال40 ألف حرامي وعائلاتهم )
ألا صحيح ..مقلتوش هو مصطفي محمود كان بيبيع إيه ؟!

The Alien said...

متستغربيش لما تعرفي إن فيه ناس متعرفش مصطفي محمود ... طب دا أنا أعرف شباب جامعة ميعرفوش جيفارا ولا غاندي

المشكلة كبيرة
ومن أسبابها الفقر
طب دا أنا بعول هم تمن الكتاب وأقعد أحسب فيها شهر عشان أجيبه

وحاجة كمان
في ناس بتقرا بس في الدين
وده جميل بس مش كل حاجة
فيه كتب تانية ممكن تفيد

تحياتي

nour said...

مين مصطفى محمود ده؟؟؟؟؟؟
:)))))))))))
طبعا بضحك و بضحك على شر البليه يعنى
يا نهار اسود امال لو كانت قالتلهم باولو كويليو و لا صنع الله ابراهيم كان قالوا ايه
بصراحة الموضوع ده بيحصل كتير و بيحصل معايا كتير السؤال ده
نورا انتى بتقرى ايه؟؟؟
شعر امل دنقل
-مين امل دنقل دى؟؟؟؟
دى؟؟؟
طبعا انا بتشل ان المصريين ميعرفوش حتى ان امل دنقل ده رااجل الله يرحمه بقى
خلاص يا بنتى كفايه حزن
المهم البلوج بتاعك حميييل اوى و متصمم حلو اوىىىى
تحياتى

safa7_karmooz said...

مش ده الراجل اللى عملوله ميدان وجامع ...اللى قدام سلينترو؟؟؟

اصل دى الاجابة اللى بقت متوقعه...طب انتى جيتى فى القرايه

طب تعملى ايه لو قاعده وناس جمبك متخرجين من القاهرة والامريكية

وتلاقى ابسط قواعد اللغة العربية مكتوبة غلط...

يعنى شفت قبل كده واحد من 4 سنين فى الجامعه كاتب : جموهريةمسر العربية

ولا اللى بيكتب تصدق بالهمزة

خلينا ساكتين يا كوكو ...ومش نقلب المواجع .:(

shimooo said...

و الله يا كوكو الموضوع مالوش اى علاقه بالاسباب اللى النتى قولتى عليهامن وجهه نظرى ان السبب هو البيت اللى الام بالذات هيا اللى بتعلمهم مين دا وبيعمل ايه اما اذا كانت الام بتفتح اغانى و مسلسلات و بالتالى الاطفال تبقى ثقافتهم الممثله دى اسمها كذا و فلانه متجوزه فلان متهيالى هو دا السبب مش اكتر لان مصطفى محمود مش محتاج حد يعلم منهجه فى المدارس لانه اعمق من كده بكتير يا رب الناس تراعى ربنا فى ولادها و لما تفتح التلفزيون تفتح حاجه مفيده علشان ربنا يجازيهم خير

shimooo said...

الغريب بقى انى لما رديت و قلت ان من اصغر انجازاته مؤسسه مصطفى محمود قام رد على احدهم و قالى ان دا واحد معاه فلوس بنى جامع و مؤسسه عادى يعنى شوفتو الموضوع وصل لفينو,,,,,,,,,,,,,,,,,,, حسبى الله و نعم الوكيل فيهم علشان هما حسسونى انى فى مجتمع عجيب فعلا و مرسى يا كوكو ان قراءك حسسونى ان الدنيا لسه فيها حد يعرف مين هوا مصطفى محمودو شكراااااااااااااااااااا

esraa said...

أها والله هو فعلا لما ابراهيم عيسي قال كده, حسيتها أوي لأنها للأسف حقيقه.

لكن انهم مايكنوش عارفين مين هو مصطفي محمود, دي صعبه شويه, يعني عمرهم ماتخبطو فيه قبل كده خالص.

واحـــد مـــــن الـنـــاس said...

القراءة دلوقتي بقت زي الغول والعنقاء والفراخ البلدي

الناس بتبص للي بيقرا ده كأنه كائن غريب جاي من شمال المريخ

انما اللي بيحششو ولا بيشدو كولة بقا ده الطبيعي

أميرة البلطجية said...

هههههههه
هو موقف يفرس صراحة
متأكده انها مكنتش بتكلم الاوفس بوى؟

Anonymous said...

The Alien said...
متستغربيش لما تعرفي إن فيه ناس متعرفش مصطفي محمود ... طب دا أنا أعرف شباب جامعة ميعرفوش جيفارا ولا غاندي

المشكلة كبيرة
ومن أسبابها الفقر
طب دا أنا بعول هم تمن الكتاب وأقعد أحسب فيها شهر عشان أجيبه

وحاجة كمان
في ناس بتقرا بس في الدين
وده جميل بس مش كل حاجة
فيه كتب تانية ممكن تفيد

تحياتي
لا حوله و لا قوه الا بالله لما يكون مخلوق زي ده الي يعرفه غندي و جيفارا
يبقي عايزه ايه؟؟؟
ابكي يا كوكو ابكي علي شباب امه محمد صلي الله عليه و سلم
ابكي علي شباب استحي ان اقول وصفه .

Blank-Socrate said...

احنا شعب العنب و القوطه و الحوادث و الرياضه .........معلهش انا ملاحظ ان المثقفين بردوا نايمين شويه أو فى المجال الادبى اكتر بكتير من السياسى و الاجتماعى و الانسانى ...مش عارف ليه يلا باى

shams said...

جيت عالوجيعة يا كوكو .. فعلاً حاجة تحزن .. ده انا مرة بعت لاصحابي عالإيميل مقالة من جرنان الدستور كانت عجباني وحاسة انها لازم تتنشر وعارفة كمان ان صحابي دول مبيقروش .. تخيلوا كان ردهم ايه ؟ سألوني : هو انت بتقري جرايد من امتى ؟ يعني حتى مش كتاب او قصة .. وفعلاً الناس بتبص للي بيقرأ كأنه حاجة غريبة والموضوع ده انا مجرباه عارفة بيفتكروني ايه ؟ بذاكر عشان عندي امتحان .. الله المستعان .. بمناسبة رواية شيكاجو بقى .. قريتيها ولا لسه ؟ عموماً انا قريتها ولو حبيت نتكلم فيها بعد ما تخلصيها اتس اوكي وذ مي .. سلام يا كوكو

mesh2dra said...

السلام عليكم

فعلا كوكو..احنا دلوقتى بقينا في عصر العنب..العنب

للأسف مفيش ثقافة ..وعدد اللي بيقروا بقي في الحضيض

وفعلا زى ما دعاء عادل بتقول اللي بيقرا مش سايبينهم ي حالهم
وتسمعى تعليقات سخيفة من ناس أسخف"مااشي يا ست المثقفة"

رغم انى في الكلية اللي المفروض بتطلع أجيال صاعدة واعدة تقدر تعبر عن الشعب اللي المفروض أمانة في رقبتنا..بس تلاقي الفشل نفسه طالع من الكلية دى للأسف

islam yousef said...

آه صحيح مين مصطفى محمود ده؟
مش أنا اللى باقول كده
انتى فعلا كلامك صح
على فكره مش الشباب بس اللى عندهم قصور بالثقافه
المثقفين نفسهم و انا باعتبر نفسى منهم
بدأالكتاب يحتل مساحه صغيره فى حياتهم
مقابل غزو الفضاء ..أأقصد الإنترنت
أنا ما عدتش بأأعقد على الكتاب زى ما باقعد على الكمبيوتر
و ان كان الكمبيوتر وسيله من وسائل الثقافه
بس برضه هارجه و أقول الكتاب حبيبى
و هادفع التلاتين جنيه

koukawy said...

فيلسوف 00 اهو الواحد بيفضفض و بيحلم و بس يمكن
***************************
دعاء عادل 00 كله الا قراية المواصلات
ناس رخمه اوي
*******************************
egyptian in uk..
نورتني يا دكتور و ربنا يخليك انت اللي كومنتك شيق
****************************
ضياء 00 بشكرك علي المعلومه مكنتش اعرفها 00 و علي العموم مصطفي محمود قفلولوا المحل اللي كان بيبيع فيه
******************************
the alien ..
انا معاك ان مش ضروري الواحد يقرا في الدين بس و لازم يقرا في كل المجالات ؛ بس حبّه اعلق ان جيفارا و غاندي مش هم الأهم في ناس اهم من كده ؛ لأن فكرهم مختلف عن فكرنا شويه
*****************************
نور 00 مين امل دنقل دي؟؟؟؟؟؟؟؟
looooooooooooooooooooooooooool
*******************************
سفاح كرموز 00 اهو دول البظبط فكروني بفيلم غزل البنات 00 و قال له يا ابله
*******************************
شيمووو 00 اكيد طبعا البيت ليه عامل اساسي ليكي حق 00 و بالنسبه لقرائي كلهم كيميلين زيّ بالظبط عشان كده عارفين
***********************************
اسراء 00 شي عجيب فعلا
****************************
واحد من الناس 00 مع ان الكتب ارخص من الحشيش بيتهايألي اصلي مشترتوش قبل كده
***********************************
بلطجيه 00 لأ دول المفروض الموظفين في شركة الكمبيوتر اللي هما بيتعملوا مع تكنولوجيا و دي الفرسه الكبرييييييي
*********************************
الغير معروف الاسم 00 كان نفسي اعرف اسمك 00 معاك حق انا شايفه ان في ناس اهم من دول كتير بس برضو ما يمنعش اننا نكون عارفين دول مين عشان نبقي عندنا معلومات في كله بس دول لوحدهم مش كفايه
*********************************
بلانك سقراط 00 بيقولوا ان الأذواق بقت كده
**********************************
شمس 00 انا لسه مقرتهاش في ايدي كتاب الواخات بتاع صنع الله ابراهيم لما اخلصه هقراها و اقولك 00 و انا انشالله هعمل كاتيجوري للكتب اللي قارتها
**********************************
meshadra ..
اهو دول بالظبط اللي انا كاتبه عنهم انهم ضحايا التعليم
***********************************
اسلام يوسف 00 انا مبعرفش اقعد اقرا كتاب علي النت او الكمبيوتر الكتاب و هو في ايدي بتجول بيه اسهل و الطف و برافو عليك اشتري كتب و خليهم حبايبك

sharkawoo said...

طبيعي جداً لما يكون الحال الذي نحي فيه من الكبت والقهر ...

أن لا ينظر الإنسان إلا لقمة العيش الذي يحيي بها ....

يالها من حياة بائيسة الذي يعيش في الناس لا هم لهم إلا ما يملأ بطنهم ...

رحم الله قوماً كان يقرأون أكثر مما يأكلون :)

Sharm said...

سبحان الله .. انا كمان دونت النهاردة عن الموضوع ده

حسن محمود said...

أزيك ياكوكو ياكميل
شوفى ياستى انا مش متفاجىء ولا مفجوع. اللى احنا فيه ده شىء طبيعى ومتوقع بس مختلف معاكى انه ناتج من التعليم واساليب التعليم.
يابنتى الثقافه حاجه والتعليم حاجه تانيه
هو طبعا المفروض التعليم يشحع على الثقافه بس مش ده اللى بيحصل
بس برضه حتى لو التعليم سىء الثقافه شىء اخر غير التعليم
فى وزارة للثقافه غير وزارة التعليم
ماهو عباس محمود العقاد كان معاه الابتدائية بس انما كان مثقف.
المشكلة الاساسيه ياستى الثقافه.
وبجد الاسعار مش هى العائق الاساسى, طيب مافى سور الازبكية بيبع حاجات رخيصه بس مين اللى يقرى؟
وفى مكتبة الاسرة زى مانتى قلتى من الحاجات القليلة الكويسه اللى الحكومة عملتها – الواحد لازم يقول اللى ليه واللى عليه برضه- كتبها رخيصه
بالنسبة لمصطفى محمود أول لما عرفته كان عن طريق البرنامج التلفزيونى بتاعه العلم والايمان وكان حقيقى برنامج رائع بكل معنى الكلمه. وده اللى شجعنى انى أقرى ليه وعرفت انه كان ملحد وبعد كده ربنا هداه الى الطريق المستقيم. بس هو فعلا بقاله فتره مختفى.
طيب ياستى انا مش عايز الناس تقرى كتب
خليها بس تقرى القران الكريم الأول. أظن ده بقى موجود عند الكل انما مين اللى بيقراه؟
وعلشان تشوفى الاعجاز فى القران شوفى الاية دى:
"وَقَالَ الرَّسُولُ يَا رَبِّ إِنَّ قَوْمِي اتَّخَذُوا هَذَا الْقُرْآنَ مَهْجُورًا"
صدق الله العظيم
حاجه تزعل فعلا
انما سؤال ليكى بقى
اشمعنى عايزه تقرى روايات علاء الاسوانى؟ ايه اللى بيشد الناس للراجل ده؟
مع انه مش عاجبنى خالص
ياريت أعرف وجهة نظرك
ومعلش اذا ممكن تتابعى المدونه بتاعت شرم علشان فعلا هو برضه اتكلم على الموضوع ده
وشكرا ليكى ياكمييييل

koukawy said...

حسن محمود 00 رأيك صحيح و شايفاه مكمل لكلامي ؛ اما بالنسبه للأسواني انا اصلي مقرتش عمارة يعقوبيان فنفسي اعرف اذا كانت الضجه اللي معمولاله علي حاجه و لا علي مفيش و كمان عشان انا بحب اقرا حاجات مختلفه

koukawy said...

حسن محمود 00 رجاء خاص عند ذكر الاستشهاد باّيات من الذكر الحكيم ياريت تكتب رقم الاّيه و اسم السوره 00
ياريت تكتبلي ده في كومنت تاني
عشان انا مش عارفه مكانها بالتحديد
و جه للأفاده العامه

حسن محمود said...

معلش ياستى
أنا اسف
لا مش رجاء
هو المفروض الواحد لما يستشهد من القران الكريم يقول اسم السورة ورقم الاية
"وَقَالَ الرَّسُولُ يَا رَبِّ إِنَّ قَوْمِي اتَّخَذُوا هَذَا الْقُرْآنَ مَهْجُورًا"
سورة الفرقان - الجزء 19 - الآية 30
وسلام

The Alien said...

مش مهم تكوني متفقة مع غاندي وجيفارا
المهم تعرفي إن الناس دي عاشت بمبادئ وماتوا عشانها

تحياتي

koukawy said...

حسن محمود 00 ربنا يخليك و مش محتاجه اسف خالص
***********************************
the alien..
علي فكره هو ده قصدي بالظبط و هو الالمام بكل شئ انما انت تتبع ايه او تصدق ايه تفرق من حد لحد