Saturday, February 10, 2007

الظلم وحش00

مش عارفه ابتدي منين و لا اقول ايه00
الموضوع و كل ما فيه ان الراجل المصري الغلبان
مش عارف يلقيها منين و لا منين00
هما اكتر من واحد حصل معاهم نفس الموضوع00
في طنطا و الأسكندريه00اشخاص لقوا
اثار مدفونه تحت بيوتهم او في المحيط اللي حوالين بيتهم
فلأن الناس دي تتسم بالأمانه خدوا اللي لقوه
و راحوا يسلموه للجهه المختصه و مستنيين
طبعا انهم يخدوا مكفأه مجزيه00و ذهلوا طبعا
لما لقوا المكفأه 30 جنيه و خدوا منهم 50
قرش دمغات00و لما جم الناس يعرضوا مشكلتهم
طبعا طلع اللي يقول ان احنا مبنصرفش مكفأه اقل من 1000جنيه
طب انا راضيه ذمتكم 00هل الألف جنيه دي مبلغ
مجزي يخلي الواحد منهم بعد كده لو لقه اثر يروح
يسلمه و لا ياخدوا هو يبيعه بطريقته و ياخد الفلوس اللي تبقي مجزيه
تخيلوا بقي ان الف جنيه تعتبر و لا حاجه00طب يا تري ال30
جنيه دي نسميها ايه؟؟؟؟
انا لقيتلها تسميه هايله00و هو الافتراء علي خلق الله
و التشجيع علي السلوك و التصرف الغير مشروع
ما هو المثل بيقول00
كتر الضغط 00يولد النفجار
الظلم وحش اويييييي
سلام

6 comments:

واحـــد مـــــن الـنـــاس said...

يا عم كوكو انتا جاي على دي ؟؟
طب قولي بذمتك
الموظف اللي بيقبض 40 جنيه في الشهر هيعيش ازاي ؟؟
اقولك
والله العظيم ابن خالتي مدرس ومتجوز ومخلف
ومرتبه 200 جنيه ومراته 200 جنيه
!!!!!
قولي بالله عليك يعيشو ازاي
الحكومة بتقولهم اسرقو
انهبو
وسيبونا ننهب
صح ولا لأ؟؟؟

koukawy said...

واحد من الناس معاك حق00
و شرفتني في العشه المتواضعه
و ربنا يستر 00هما زمان كانوا بيقولوا بكره احلي من النهرده بس انا حاسا انه هيبقي انيل مش عارفه ليه

kozo127 said...

همه طبعا بيصرفوا الف جنيه .. ومليون جنيه .. انتي هتكدبي المسئول الكبير .. وتصدقي المواطن الغلبان الزباله ده .ز دا يبقى عيب .. دا اصلا لو الناس الكبيره دي لقيت المواطن جنيه هياخدوه ويشترو بيه حرنكش .... ولسه

LAMIA MAHMOUD said...

بابا مرة حكالي ان واحد لقى شنطة مليانة فلوس راح يسلمها للقسم كان حيتمسك فيها ويتحبس .. البلد دي جميلة واحنا عايشين في امن وامان .. والشعب سعيد .. مش محتاجين مكافأت فبلاش طمع

مش بيقولوا ان المدرس بيقبض على الاقل 900 جنية وعلى يدي اخويا واختي ال2 مدرسين ومرتب الواحد فيهم لا يتعدى ال180 جنية وده بالنسبة للي بقاله زمن شغال

عادي جدا

أميرة البلطجية said...

لأ بصي يا كوكو
هو سلمها للبوليس ليه؟
عشان الامانة
وعشان اي حاجة تانية كان حيعملها كانت حتبقي مال حرام في بطنه وبطن ولاده
كونه محدش كافأه فالمفروض ان جزاؤه عند ربنا
ده لو كانت نيته لربنا يعني

Unknown said...

الاميره بتقول انه عشان الامانه سلمها

بس اول مره حيسلمها عشان الامانه .. تاني مره قبل ما يسلمها حيبص لشكل بيته.. ونوع الاكل اللي بياكله كل يوم .. وبعد كده حخطف نظره علي الروس الكبيره ويشوف .. هما عايشين زيه ؟ يعني بيعانو زيه ؟بيجوعو زيه ؟ بيقبضو زيه ؟

ولما يكعبر كل ده علي بعضه .. ويكومه في عقله الباطن عشان يستوي و يتحمر... يطلع بصينيه طحينه محصلتش و يقتدي بأهل القدوه في بلده المصون .... ويغطي ضميره بورقه جرنال تمهيدا لدفنه