Monday, December 31, 2007

عيد ميلاد اول




باه ه ه ه ه ه ه
فجأه اكتشفت النهارده ان فات علي ميلاد العشه سنه بالظبط
زي النهارده السنه اللي فاتت عرفت يعني ايه بلوج
و عرفت يعني ايه عشه و صحاب للعشه
و زي النهارده السنه اللي فاتت كان كوكو معايا و بيملي العشه صوصوه و لعب و تنطيت
فاتت سنه بسرعه اوي .... ما هي دايما كده الايام السعيده تعدي بسرعه
كل سنه و انتي طيبه يا عشتي الكميله
كل سنه و انت طيب يا كوكو يا كميل
و ميرسي علي المفاجأه الكميله اللي انت عملتها
كنت حاسه انك هترجعلي تاني يوم عيد ميلاد عشتك
و متزعلش مني يا كوكو لو كنت قصرت معاك و لا خنقتك مني
فعشان كده سبتني و هربت
او عي تهرب تاني يا كوكو و تسبني لايصه في العشه لوحدي مش عارفه اكتب ايه
اوعي تهرب تاني يا كوكو ... لأنك مش هتلاقي قلب احن مني و لا قلم اصدق مني يكتب عنك
كل سنه و انتي طيبه يا عشتي ....و عقبال مليون سنه
و كل سنه و كل صحاب العشه الكميله بخير و صحه و سعاده و كماله
و يا رب 2008 تبقي احلي من كل السنين اللي عدت


Saturday, December 1, 2007

كفايه فوضي بقي


ردا على عدد الدستور بتاع النهارده السبت 1/12، كتب جوزي العزيز المقاله دي
و بعتها علي البريد الاكتروني الخاص بالجريده
بعد ما قرأ النقد اللي مكتوب عن فيلم المخرج الكبير (يوسف شاهين) الأخير
المقاله اللي في الدستور كانت بقلم: ياسمين مجدي
و بعنوان: يوسف شاهين عبقري السينما العربيه
منشور في الصفحه السابعه
***********************************************************************
كفايه فوضي بقي
بقلم: نور




عدد الدستور بتاع النهارده الصفحه السابعه خبر( يوسف شاهين عبقرى السينما العربيه) واضح ان الاخت ياسمين مجدى مشافتش الفيلم اصلا لانى اعتقد لو هيه شافته كان هيبقى رأيها مختلف خالص، لان الفيلم مفيهوش اى حاجه من يوسف شاهين اللهم الا قد يكون اسم الفيلم فقط .. فمخرج فيلم الارض لا يستطيع ان يخرج فيلم بهذا المستوى الوضيع المفتعل ولو حرص على ذلك فهو ابن غير شرعى ينسب له.....انا ارى بشكل شخصى ان الفيلم هو اضعف ما انتجته السينما المصريه من افلام خلال السنوات الاخيره..وعلى الرغم انه يتناول قضيه فى غاية الاهمية الا انه خرج الفيلم تافها ملفقا مهلهلا من حيث النسق الدرامى والتقنى فرأينا مشاهد نهايه الفيلم وثورة الحى على شخصية حاتم تصور بعشوائيه مفرطه وتلفق رغم ضعف مستواها التقنى فرأينا اكتر من مره ان عيون الكومبارس تداعب عدسة الكاميرا وهم فى قمة ثورتهم....والمخرج العالمى خالد يوسف لم نرى منه من العالميه الا الشتائم والعرى.....هل هذه هى العالميه من وجهة نظره ؟احداث الفيلم اغلبها ملفقه ولا تحترم عقلية المشاهد بل على العكس تسخر من رؤية الجمهور للشارع .فبعد الافان تيتر العظيم الذى رأيناه لمشاهد الانتهاكات الحقوقيه من رجال الشرطه فى المظاهرات .....ذهبت القصه الى الشاب وكيل النيابه وخطيبته التى تعيش بلا مبالاه وبتحرر عبيط.....انها سهرة تيلفزيونيه باهته ....بالتوازى مع عشق امين الشرطه لنور جارته الذى يصل الى الحب المرضى وعلى مدار اكثر من ساعه من الملل المتواصل والمشاهد الكوميديه لشخصية حاتم المحشوه حشوا وليس لها اى علاقة بدراما الفيلم وبعد ان نصل الى حاله من النفق والزهق تاتى عقدة الفيلم وهي اكتشاف ان نور تحب شابا وستتزوجه ......بعيدا عن القفزه الفجائيه لعلاقة نور بالشاب وكيل النيابة الذى ترك حبيبته بالامس وفى اليوم التالى رأيناه يذوب عشقا فى نور ..الا انها ايضا سهره تلفيزيونيه باهته من حيث بناءها الدرامى.. فرأينا شبكة العلاقات هذه اكثر من مليون مره....وليس لها اى علاقة بالفوضى ولا بالجموع الغفيره للامن المركزى التى تقمع المتظاهرين التى رأيناها فى بداية الفيلم ...يتطور هذا الصراع الى ذروته بعد ان يغتصب امين الشرطه نور بعد اختطافها فى مشاهد اقل ما توصف به انها ساذجه وتسخر من عقولنا وتحمل فى طياتها دلالات على انهم يقدمون هذا الفيلم لقبائل الزولو بافريقيا... وفى نهاية الفيلم يأتى الحل عن طريق اكثر سذاجه وهو عجوز الافلام الذى يخبر البطل بالحل فيدله على طريق الزنزانه الثانيه بمنتهى الهبل وسط عجز ساذج من الطرف الاخر للصراع وهم رجال الشرطه الفاسدين ...وانا اعطيه مبرر فى ذلك لانه يحاول ان ينهى الفيلم الذى طال ملله باى وسيله ..فهذ المخرج الذى اؤكد على انه ليس يوسف شاهين يسخر من معاناة المصريين ويحاول ان يصنع من نفسه بطلا يحارب الفساد ويطرح قضايا ساخنه فى السينما ويحاول جاهدا ان يوصف بانه مخرج عالمى فيسهب فى مشاهد العري والالفاظ الجارحه التى يتقزز منها جمهور السينما الغير عالمى كما سيصفهم.......فالفوضى فعلا موجوده ولكن داخل عقول هؤلاء المهوسين بأن يكونوا ابطالا على حساب البسطاء من الناس... ولكن احب ان اقول لهم امالكم ستخيب لان الفن الجيد يبقى والباهت يذوب...... يوسف شاهين المهاجر، الارض ،المصير، الناصر صلاح الدين، بابا امين.... مازلنا نذكره حتى الان وهذه المجموعه على سبيل المثال لا الحصر ......الى مذبلة السينما ايها الارزوقيه واتركوا الفن لناسه وارحموا الناس بقى قد تلاحظون فى كلامى حرقه وعصبيه ....اقسم انه ليس تحاملا ...فهذا الفيلم للاسف خيب امالى بشكل كبير لانى انتظرته منذ أن كان خبرا فى الجرائد واتخيله دائما منذ عرفت قصته من الجرائد وبعد ان رأيت التريللر والافيش قلت انه سيقلب مسار السينما العربيه....وفتره انتظار طويله.....ثم الفيلم بهذا المستوى ...لا انسي ان اؤكد براعة الفنان خالد صالح فى الاداء الجميل فعلا والصدق الفنى والفنانتان هاله صدقى وهاله فاخر
واخر كلامى ارجوكم لا تجاملوا على حساب الفن والمجتمع
والسلام عليكم

Friday, November 16, 2007

نداء للقلوب الرحيمه

ازيكوا عاملين ايه كلكوا؟؟
بقالي كتير مش بكتب و لا برغي معاكوا زي زمان
و السبب هو مرور كوكو الكميل بظروف نفسيه و اجتماعيه صعبه اوي
خلت كوكو يسيبني ويهرب و طبعا انا من غيره مسواش
فأنا دلوقتي بكتب نداء للقلوب الرحيمه
اللي يشوف كوكو كميل اصفر و صغنن و لابس ظعبوط و فردة بوت
تايه من قبل رمضان يتصل بيا في العشه
عشان اجي اخده و يرجعلي تاني بنشاطه المعهود
ادعولي و اعوا لكوكو انه يرجع لقواعده سالما

Tuesday, October 30, 2007

وحشتونيييييييييييييييييي

ياه ه ه ه ه ه ه ه ه .... و حشتوني يا كميلين كلكوا
كل سنه و انتوا طيبين هي صحيح متأخره بس غصب عني
ربنا ما يوري حد ... انا قضيت رمضان و العيد في حاله صحيه سيئه جدا و ما كنتش بشوف الكمبيوتر مش بقعد عليه
كنت واخده اجازه من كل حاجه و مر علي الشهر اللي فات كله في غيبوبه تقريبا
بس الحمدلله عدت الي قواعدي سالمه
و عدت الي اصحابي الكميلين و العشه الكميله اللي وحشتني اوي
و انشالله هرجع تاني اواظب علي مغامرات كوكو ... و الكتب و الأفلام اللي عودتوكوا عليها
يومين و هنزل اّخر حلقه كنت كاتباها عشان تفتكروا لأنها كانت من كتيييييير اوي
و انشالله هعدي علي كل واحد في عشته عشان ازورها لأن عششكوا كلها وحشتني جدا
كل سنه و انتوا طيبين و الحمدلله علي سلامتي
كاكان

Saturday, October 20, 2007

التراويح راحت

نزلت اول يوم رمضان بعد المغرب علي طول لأداء صلاة التراويح في مسجد عمرو
و ده لأني بحب المسجد ده ... و كمان جالي اشاعه بتقول ان الشيخ محمد جبريل هيصلي
التراويح هناك و انا بحب صوته و دعائه ..
دخلنا مصلي السيدات .... و بدأت المأساة
كالعاده في مصلي السيدات .... كل واحده جايبه العيال و ناقص تجيب معاهم صندوق اللعب
بتاعهم و العشا و المسجد عباره عن حديقه عامه مليانه عيال و صريخ و صويت
و حاجه عجيبه ... المهم انا قولت اكيد الواحد و هو بيصلي مش هيحس
و ان العيال تسكت طبعا بحلم .. هو في عيال بتسكت برضو
لغاية ما حصل موقف خلاني قولت ان صلاة التراويح في ابيت نعمه و ارحم كتيييييير
و الموقف هو ... واقفين بنصلي و انا ماسكه المصحف في ايدي عشان اتابع
و سامعه من بعيد صوت طفل بيعيط .... يا ماما ماااا ما
و ابتدي الصوت يقرب ... لحد ما فاجأه لقيت الطفل ده قدامي و بأعلي مع عنده من صوت
راح فاتح الجعوره و صارخ ........ يا مااااااااااااااااااااااااااماااااااااااااااااااااااااااااااا انتي فيييييين
لدرجة ان انا اتخضين و المصحف كان هيقع من ايدي و بالتالي صحبتي اللي جنبي كانت هتضحك هي كمان من الخضه
و حاجه استغفر الله العظيم
اللي زاد و غطا ان الركن اللي انا كنت بصلي فيه كان مليان جزم علي شباشب من كل نوع اللي بصباع
و اللي بورده و اللي اسود و اللي احمر .... جوه الجامع علي السجاده الللي الناس بتسجد عليها
طب ليه ما هو الدواليب ماليه المسجد
انما تقول لمين ... هي دي مصلي السيدات للأسف
يخلوا الواحد يدخل المسجد و هو مضطر و يبقي عايز يخرج بسرعه
اميرة البلطجيه علي فكره لقيتها مناقشه الموضوع ده برضو بعنوان ..... صلي في البيت
و يا ريت فعلا ده اكرم ليكي و للناس
سلاااااااااااااااااااام

Monday, October 15, 2007

رمضان كمييييييييييييييييييييييل


يا اهالي العشه الكميله ..... طك ططك طك طك
يا اصدقاء كوكو الكميل ...... طك ططك طك طك
يا جميع البلجويه .... طك ططك طك طك


رمضا ا ا ا ا ا ا ا ا ا ا ا ا ا ا ا ا ا ن كمييييييييييييييييييييييييييييييييييييييييل

نبشركم بعودة الكوكو .... طك ططك طك طك
و في الصباح و المساء ندعوكوا .... طك ططك طك طك
تستنوا مغامرات كوكو ..... طك ططك طك طك
بعد الشهر الكميل .... طك ططك طك طك


قوموا الليل و اتفرغوا للعباده .... طك ططك طك طك
و مترمرموش لتروحوا العياده .... طك ططك طك طك
شهر الخير والفرح والسعاده
.... طك ططك طك طك
شهر رمضا ا ا ا ان الكمييييييييييييييييييل




Thursday, August 30, 2007

رضينا بالهم ....و الهم مش راضي بينا


رضينا بالهم ........... و الهم مش راضي بينا

حد فيكوا جرب يتعامل مع اكذوبة ...... تاكسي العاصمه
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
علي العموم للي ما تعاملش قبل كده هحكي اللي حصل معايا في المرات اللي عصرت علي نفسي
كيلو لامون و اتصلت بيهم ....و شوفوا بقي انا ليا حق اطق و لا لأ؟؟؟؟
**************************************
اول مره ... جه متأخر عن معاده حوالي نص ساعه و كنت طلباه لنفسي
تاني مره .... كنت طلباه لناس صحابي اجانب و عايزين يروحوا بليل
و اتأخر بتاع ساعه ساعه و ربع ؛ و طبعا كان شكلي وحش قدام بتوع بلاد بره
تالت مره ... كنت عند اصحاب و طلبته يجي ياخدني اتصل بيا بمعدل 5 مرات مثلا
عشان يعرف العنوان فين ؛ و طبعا كالعاده اتأخر
رابع مره ... اتصلت عشان عايزه تاكسي قالي الموظف اللي رد ... لأ حضرتك لازم تحجزي قبلها لأنه
مفيش تاكسيات فاضيه و كلهم مشغولين
خامس مره .. قلت في عقل بالي .. يا بت احجزي من قبلها و يا مصبر الوحش ع الجحش
و اتصلت بليل و قلت للموظف .. لو سمحت انا عايزه تاكسي بكره يكون عندي 12 ظهرا
و لو سمحت ما يتأخرش ؛ رد الموظف .. عينيا يا فندم بس حضرتك اتصلي الساعه 11
عشان تتابعي هو وصل فين .. و اتصلت تاني يوم الساعه 11 في الميعاد المحدد
رد علي الموظف .. انا اسف يا فندم اصل هو السواق مش هيقدر يكون عند حضرتك
قبل 12 و نص .. طبعا مسكتش و رحت مدياله اللي فيه القسمه و قلتله متبعاتوش طبعا
سادس مره .. و اعتقد انها هتكون الأخيره ؛ كانت اول امبارح .. اتصلت بليل
عشان احجز تاكسي لتاني يوم الساعه خامسه بعد العصر ؛ و رد عي الموظف و اخد كل البيانات و اكد علي
اني مش محتاجه اتصل أأكد بكره و انه 5 بالثانيه هيكون تحت العماره ؛ جه تاني يوم الساعه اربعه
قلت برضو في عقل بالي يا بت قومي اتكلمي برضو و اعملي اللي عليكي ؛ و قمت
و انا فرحانه بروحي اتصل بالخط الساخن بتاعهم من الساعه 4 للساعه 5 الاربع
التليفون يرن و حد يرفع السماعه و يحطها ؛ لحد ماتخنقت .. و بعد شويه الساعه 5 رن الموبايل
و لقيت الموظف المسؤل عن الحجز بيتصل بيا و بيقولي .. انا اسف حضرتك اصل السواق حصله ظروف و مش هيقدر يجي في الميعاد .. محستش بنفسي الا و انا بقوله يا بني ادم اللي بيعتذر ده يعتذر ساعة الميعاد
و لا قبله ؛ اديني نمره للشكاوي .... و فعلا اخدت قرار في نفسي اني مش ههدي و لا هيرتاحلي بال
الا لما اتصل اشتكي .... و لما اتصل اشتكي هقترح عليهم اقتراح و هو تغيير اسم المشروع
من تاكسي العاصمه ... الي ... طابونة
العاصمه
و قال علي رأي المثل
رضينا بالأجره .. و التاكسي مش راضي بينا

سلااااام


طلب خاص .. اللي فيكوا ليه نوادر شبه دي مع تاكسي الغرام يكتبهالي في الكومنت و انا هزودها علي البوست
****************************************************
و ادي خبرة الاّخرين و مواقفهم اللي كتبوهالي في الكومنتات
.... خدوا عندوكوا



سفاح كرموز

كنت رايح فرح مع والدتى واخواتى البنات ...ومش معانا عربية ...والفندق من ضمن فنادق المطار...فلو تاكسشى عادة ...هيلهفله مش ااقل من 60 جند اصلا ..

بس ماما كلمته ...والراجل اللى فى الشركة كلمنى وقالى ده تحت البيت وفى الميعاد 7.30 بالليل...قلت اشطز يابو السفافيح دول عالم مزبوطة...المهم ابص من جميع الشبابيك مش الاقيه ..

فين وفين على ما اقنعت الراجل بتاع الشركة انه مش تحت العمارة واخدت منه رقم موبايل السواق بالعافية ...لاكتشف ان الراجل ادوله عنوان غلط...وهوا واقف مستنى عنده...فقولتله العنوان صح وجالى

بالليل واحنا مروحين كلمته عالساعه 12 قلتلهم عايز عربية تكون عندى 1.30 بالكتير اوى ...الموظف قالى حاضر واى تغييير هنكلمك قبلها بنص ساعه ...جت الساعه 1.30 لقيت الموظف بيدينى نمرة السواق بيقولى كلمه وشوفه فين ...انا مسكت نفسى عشان كنت فى فندق محترم وكنت هشتم اهله اصلا ..

كلمت السواق لقيته وبقوله فندق كذا عند المطار...يقولى مطار القاهرة ولا مطار امبابة !!!!!!!!!!!!!!!!!!!

قولتله لاء القاهرةة...قالى اسم الفندق ايه ...طب هلاقيه كويس...طب هدفع فلوس ...حوارات عبيطة وحسيت انى هلاقى عربية كارو هتجيلى...قالى ربع ساعة بالظبط واكون عندك...

وصلنا للساعه 2 قلت يلعن ابوهم مش راكب ...ورحت لبتاع الامن فى الفندق وخليته يجبلى تاكسى تبع الفندق ...اهو اسمه معروف والورق بتاعهم عند الفندق والامن ...وسألته عن الاجرة قالى اديهله 50 جنيه ...ووصلنا البيت

بس ولا اتصلت الغى ميعاد ولا يحزنون...اللى ما يحترمش ميعاده خصوصالو شركة يبقى ملعون نفسه بقى يتحمل

العملية مخلصتش لحد كده ...تانى يوم بالليل السواق بيكلمنى وبيستظرف وبيقل ادبه عشان لطعته فى الشارع ...انا خليته يحب يتلطع فى الشارع بعد ما كلمنى ...او بالاصح بعد ما قفلت معاه بعدها بربع ساعه اتعلم انه لما ييجى فى ميعاده احسن بكتيييييييييييييير من لما يتأخر...ولا شكوى ولا بتنجان

ههههههههههههههههههههه
*********************************************
شيماء

دانا حصلت معايا مرتين وحرمت والمره التانيه كانت فرح فى اقاصى الارض
وكلمتهم على اساس ان التاكسى يجى الساعه 8 عشان ده فرح ومواعيد بقى وكده
رد عليا بمنتهى الزوق والادب وقالى طبعا يا فندم الساعه 8 بالظبط هيكون عندك ولو حصل اى تغيير هنكلم حضرتك قبلها بنص ساعه
على اساس ان التغيير عادى فى الحالات دى ..محنا تحت رحمه حضراتكم امال شركه ايه وتاكسى عاصمه ايه
المهم البارد اتكلم الساعه 8 وقالى برضه بمنتهى الزوق والادب التاكسى هيجى الساعه 9ونص يا فندم .. نعم ليه ..اصل مفيش تاكسى فاضى دلوقت .."يا سلام امال انا مكلماك من بدرى وعامله حجز ليه؟؟؟؟؟"...المهم قلتله مينفعش احنا متاخرين ومرتبطين بمعاد" وبعدين انا عايزة الحق الزفه"..يهديك يرضيك يقوم البارد يرد يقوللى مفيش حل غير كده
اه ه ه ه ه ه ه البارد
ومن ساعتها وانا دمى محروق
:))))بس برضه لحقت الزفه
*************************************************************
مشمش

انا لسه من تلات ايام كنت بتعرف لاول مره علي تاكسي العاصمه


كنت هناك بوصل واحد صاحبي اجنبي للمطار .. جيت من الاسكندريه علي التحرير .. وكان فاضل حوالي 3 ساعات علي معاد الطياره , فقولت اتصل بالتاكسي ويجي , اهو الواد يركب حاجه محترمه بدل بهدله التكاسي بتاعه مصر

المهم
ضربت الرقم , و فضلت مستني حوالي خمس دقايق لحد ما حد عبرني ورد عليا .. عطيتهم العنوان وقلتلهم عايز التاكسي دلوقتي .. راحت الموظفه المختصه راكناني كمان خمس دقايق عشان في الاخر تقولي .. معلش بس معندناش سيارات متاحه في الوقت الحالي , المفروض ان التاكس مشروع استثماري , يعني المفروض برضه يكون متوفر في اغلب الاحيان في معظم المناطق الحيويه

*************************************************************
,

Wednesday, August 22, 2007

البت بيت ابونا

البيت بيت ابونا .. و الغرب بيطردونا

بقالي من اول الصيف بشوف الاعلانات دي ملزقه في كل حته في شوارع القاهره
و من كتر ما اللي مكتوب عليها مستفز و من رأي مهين للستات و البنات المصريات
قررت اني اصورها و اجيبهالكوا عشان حد يشرحلي ايه ده ؟؟؟؟؟
هو للدرجه دي وصل الحال بالبنات انهم يقبلوا علي نفسهم طريقة جواز زي دي
و لا ده بجملة الاحتلال الخليجي العربي اللي عندنا ؛ و يا ريت هما جايين بلدنا و مستعمرنها
بأدبهم لأ كمان بيعاكسوا و يقلوا ادبهم .. الحقيقه هي البلد مش ناقصه نسمات زياده
كفايه علينا المصريين مش ناقصه اغراب كمان
و كفايه الشقق و السكن اللي غلي بسببهم برضو
و قال علي رأي المثل
البيت بيت ابونا .. قال و العرب كمان عايزين يتجوزونا
سلام

Wednesday, August 8, 2007

chicken little

اخيرا الحمدلله رجعت بعد غياب بسبب الظروف المتلاحقه من موت ولدي و التهاب حاد
في الحلق خلاني بشاور بدل متكلم لمدة اربع خمس ايام
بس الحمدلله انا كويسه دلوقتي .. و رجعت تاني لعشتي اللي بحبها و بموت فيها
وحشتوني كلكم .. و بشكر كل اللي قدمولي العزاء و دعوا بالرحمه
ميرسي
*************************************************************************




فيلم من انتاج شركة ديزني العالميه سنة 2005 ؛ فيلم في رأي رجع تاني
ذكريات افلام ديزني الكلاسيكيه اللي كنت بتفرج عليها و انا صغيره بس بالاضافه للتقنيه
الحديثه طبعا ؛ و من الطبيعي اني انحاز للفيلم و اقول انه كميل اوي لأنه
بطولة كوكو كميل زي القمر ؛ و كوكوهايه بنت برضو سكر ؛ ده طبعا بالاضافه لصحابهم الخنزير و السمكه

و كل الحيوانات اللي تتخيلوهم .. بتدور الأحداث في مدينه كلها حيوانات و بيحصل غزو
فضاء ؛ انما مش ده الغرض الأساسي من الفيلم انما الفيلم بيناقش موضوع مهم اوي
موجه للأبناء و الأباء مع بعض و هو .. الحوار .. ضرورة وجود الحوار و الثقه بين الأطفال
و اهلهم لازم يكون في وقت مخصوص للأب و الأم مع الأطفال للكلام و اللعب و تبادل الأفكار ؛
الغريبه يا جماعه مفيش فيلم كارتون او جرافيكس اتفرج عليه الا لما اطلع منه برساله
موجه او مورال زي ما بيقول المتخصصين .. ياللا جتنا نيله في كارتوناتنا الهباب ؛
اللي لفت انتباهي كمان في الفيلم هو خلفيات المشاهد .. طبعا هتسألوني يعني ايه يا كوكو ؟؟
يعني يا صحابي يا كيميلين اقصد الحدث اللي بيحصل في الخلفيه يعني مثلا يبقي مشهد اساسي
شغال في مقدمه الشاشه و في الخلفيه في حدث تاني فرعي يهلك من الضحك و ده حاصل في اجزاء
كتير من الفيلم .. هو صحيح شويه بياخد النظر و الانتباه عن الحدث الأساسي بس
بيبقي موقف او شخصيه تضحك جدا
في الاّخر احب اقولكوا ان الفيلم اتعمله جزء تاني انتاج 2006 بعنوان
chicken little .. ace in action
هاشوفه و اكتبلكه عنه انشالله
اما بالنسبه بقي لجوايز الفيلم.. فحصل الفيلم علي 3 جوايز و هي ..
عن دور الطفل الفضائي mathew josten
جايزه احسن صوت مدبلج سنة 2006 للمثل
في مهرجان الفنانين الشباب
و جايزه احسن اختيار للأصوات سنة 2006 في مهرجان تسكين الأدوار في امريكا
و جايزة احسن موسيقي تأثيريه و تصويريه سنة 2006 في مهرجان الأفلام التلفيزيونيه
بس هو ده اللي عندي اقوله اي خدمه يا معلمين .. علي رأي اللمبي
سلاااااام

Monday, July 30, 2007

الله يرحمك يا بابي

يرجي الدعاء لوالدي / عادل محمد .. توفي فجأه .. البقاء لله .. لا الله الا الله
ارجو الدعاء و طلب الرحمه
اللهم اسكنه فسيح جناتك
و اجعل مثواه الجنه
و ثبته عند السؤال
اللهم اغفر له
اللهم اغفر له
اللهم اغفر له
اللهم ارحمه
اللهم ارحمه
اللهم ارحمه
اللهم ترأف عليه
اللهم ارحمه من عذاب النار و من وحشة القبر
و اجعل قبره روضه من رياض الجنه
و لا تجعله حفره من حفر النار
و نقه من خطاياه كما ينقي الثوب الأبيض من الدنس
و اغسله بالثلج و الماء و البرد
و ابعثه مع الصالحين
يا رب ارحمنا و ارحم المسلمين جميعا الأحياء منهم و الأموات
اللهم استرنا فوق الأرض و تحت الأرض و يوم العرض عليك
امين
جزاكم الله خيرا و جعله في ميزان حساناتكم

Sunday, July 29, 2007

the pianist




قصه واعيه جرت احداثها في بولدنا عام 1930 عن عازف بيانو كان من اشهرهم في الوقت ده
Wladyslaw Szpilman
و مع قيام الحرب العالميه التانيه و دخول جيوش النازي لبولندا بدأت مأساة اليهود اللي بتدور حواليها احداث الفيلم من خلال قصة العازف اليهودي العرق .. مكدبش عليكوا نجح الفيلم في تصوير الماّسي اللي اتعرضولها اليهود لدرجة انهم صعبوا علي بس في نفس الوقت في اوقات وصلني احساس ان المخرج بيحاول يقطع قلبك و يخليك تتعاطف لأقصي درجه ؛ و ده يخليني اديكوا نبذه عن خلفية المخرج
مواليد 1933 ؛ فرنسا و لكنه من اصل بولندي Roman Polanski
هو ابن لأب يهودي و كان من الناجين من محرقة الهولوكست الشهيره ؛ و عاصر بناء حائط الجيتو اللي فصل اليهود في بولندا عن بقية البلد في حي منفصل ورا الجدار ده ؛ و لكن كان الأب بيحاول جاهدا انه يبعد ابنه عن السينمات اللي كان بيروح متسلل سرقه عشان يتفرج مع الغير يهود ؛ و لكن بقي مخرج قد الدنيا ؛اللي يعرف الخلفيه دي عن حياة المخرج و بعدين يشوف الفيلم هيلاقي كتير من أحداث الفيلم متطابقه مع حياة المخرج و ده طبعا لأن عازف البيانو و المخرج الاتنين كانوا مواكبين لنفس الفتره التاريخيه و طبعا تحيز المخرج بشده للجانب اليهودي و ده طبعا حقه ما هم اهل و عيله ؛ الا في مشهد واحد خلي في شئ ايجابي .. و هي شخصية ظابط الماني بيكتشف مخبأ العازف صدفه و بيسألوا انت مين ؟ و بتشتغل ايه ؟ و لما بيعرف انه عازف بيانو بياخدوا عند بيانو قديم
و بيخليه يعزفله و من عزف البيانيست بيتعاطف معاه الظابط لحد ما بيحصل الانقلاب و بيتشال الظابط و بنعرف من تسلسل تاريخه بعد كده انه بيموت في السجون السوفيتيه و ده طبعا لما الاتحاد السوفيتي بيدخل بولندا و يخرج الألمان و ينصر البولنديين علي كل طوائفهم ؛اّخر حاجه هقولها كالعاده .. الفيلم فاز ب3 جوايز اوسكار في دورة المهرجان سنة 2003
جايزة احسن ممثل عن دور البطوله
Adrien Brody
و جايزة احسن مخرج ؛ و جايزة احسن صوره و سنة 2002 حصل المخرج علي جايزه افضل اخراج في مهرجان كان.. اترشح الفيلم لجوايز كتير ؛ و حصل علي جوايز في مهرجانات تانيه كتير محليه و عالميه
في النهايه الفيلم حلو .. و خلاني اسأل نفسي سؤال ؛
الكره اللي عند الناس كلها لليهود
و طبعا عندهم حق هما يستاهلوا الحرق
ممكن يخليني لو انا ماشيه في الشارع و لقيت واحد يهودي محتاج مساعده او اسعاف
و اي شئ مش هتعاطف معاه كأنسان
و مليش دعوه باتجاهه و يكفي اني اساعد روح و اكيد ربنا هيجازيني خير
و لا هاقول لأ ده يهودي يولع و يروح في ستين داهيه ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
معادله صعبه بجد
سلام



Saturday, July 28, 2007

اتقدم .. اتقدم .. و يا كوكو بلاش تتندم

الحلقه اللي فاتت
كوكو الكميل و كوكو ابو الخطوات اتكلموا ؛ و كوكو ابو الخطوات لقا الحل
الحلقه دي
وقف الكميل باصص لكوكو ابو الخطوات بلهفه مسنتي ان يطلع الحل من منقاره المبدع
اللي بينقط سكر .. و ابو الخطوات عمال يروح و يجي في المخبأ يمين و شمال
و بيصوصو برطمه مش مفهومه كده .. و بعدين راح لافف لكوكو الكميل بسرعه و قاله .. بص
يا سيدي انا فكرت و مخمخت و نخورت في نافوخي لأخره لقيت ان الحل الوحيد اللي ممكن نعمله
هو الحل اللي كنت اتفركت عليه زمان في فيلم اجنبي و كان فيه اتنين كوكوهات بيهربوا
من السجن .. بس هما نهايتهم كنت تعيسه و البوليس افشهم يا رب احنا ننجح ..تعالي يا كميل
دور معايا علي اي حاجه نفحت بيها في الأرض .. رد كوكو الكميل .. احنا هنفحت نفق ؟؟
اه انا شوفت الفيلم ده مش اسمه الهروب الكبير ؛ بس الكوكوهات اللي كانوا في الفيلم كانوا عندهم عضلات
احنا معضمين تفتكر هنقدر نحفر نفق كبير كده يطلعنا علي حدود المدينه الخضرا ؟؟
رد ابو الخطوات .. خليك متفائل يا كميل و بص لنص الكوبايه المليان .. بص كوكو الكميل
لكوكو ابو الخطوات و هو بيقولوا كده و استرجع في دماغه صورة ام مكاوك ؛ و صورته و هو في البالطو
الأسود ؛ و افتكر اغنيه كانت بتديله امل و قوه طول عمره كان بيسمعها في فيلم .. الكوكو الأسود..و
و كانت كلمات الأغنيه بتقول
اتقدم اتقدم .. و يا كوكو بلاش تتندم الشمس النور .. ميعطلش كوكو بحور و مدام الدنيا بتدور كوكو مالدنيا يتعلم اتقدم اتعلم استحمل اتبهدل .. يا كوكو
و بدأ كوكو الكيمل يدندن صوصوه كميله بالأغنيه و ابتدا صوت الصوصوه يعلا بالأغنيه
و اتحمس ابو الخطوات و ابتدا هو كمان يصوصو .. و راحوا لافين لبعض و ماسكين في كناحات بعض
و شدوا عليهم بقوه كعلامه انهم اتفقوا .. و بداـ رحلة البحث عن ادوات للحفر في المخبأ الضلمه
اللي مش باين فيه حاجه .. يدوروا يمين و شمال و مفيش فايده .. لغاية ما لقوا كومه كده
عجيبه فيها كراكيب كتير فوق بعض قعدوا ينبشوا فيها و ملقوش غير غطا حله معووج
و مغرفه بنص ايد ؛ الظاهر كانت ست بيت استغنت عنهم و رميتهم في الزباله .. بصوا
لبعض و ماكانش عندوهم حل تاني غير انهم يستعملوهم و خلاص .. اول حاجه عملها ابو الخطوات انه
نبش في فتحه كده و طلع علبه صفيح من الواضح ان فيها اسراره و اوراقه المهمه
اللي بيحتفظ بيها ؛ و راح مدخل منقاره في العلبه و را ح مطلع ورقه ملفوفه كده و راح شايل العلبه
الصفيح تاني .. و بعدين راح فارد الورقه اللي في ايده اللي طلعت خريطه للبلد الصفراويه الأناويه
خريطه كامله للبلد كلها من حدودها مع البلد الحمرا لغاية حدودها مع البلد الخضرا ..و راح
فاردها علي الأرض و بدأ في دراسة المسافات و المواقع عشان يعرف هو المفروض هيحفروا
لحد فين .. و كل ده و كوكو واقف فارس همام شجاع ماسك المغرفه
ام نص ايد في كناحه و علي اهبة الاستعداد لبدء المعركه .. قصدي الحفر .. في اي وقت ؛
المهم بعد تفحص وتمحص قدر ابو الخطوات يحسب التقريب ان المسافه اللي هيحتاجوا يحفروها
هتكون حوالي 50 كيلومتر و بعمق 20 كيلومتر احتياطي لحسن المغرفه و لا غطا الحله يفلت
و يلاقوا نفسهم في بيت رئيس البلد و لا حمام احد ظباط الشرطه الكوكوهيه و لا حاجه ..و لف
ابو الخطوات الخريطه و رجعها مكانها و مسك غطا الحله و مسكوا كناحات بعض و قروا الفتحه
و بدأ الحفر ..و في الخلفيه موسيقي صوصويه للأغنيه الكوكوهيه .. اتقدم اتقدم ويا كوكو بلاش تتندم
****************************************************************
و بعد مرور بتاع 3 او 4 ساعات .. كان المنظر من فوق اكوام من التراب الكتير و حفره في نص المخبأ
غويطااااااااااااااااااااااااااااااااااااااا .. المنظر من تحت .. كوكوهين واحد كان كميل و بقي كوكو المترب
وواحد تاني كان اصلا مترب و ينطبق عليه مثل .. ضربوا الكوكو علي عينه قال خربانه خربانه ..و نسمع
صوت كوكو الكميل و هو مليان تراب بيقول .. ياه ده احنا قربنا نوصل حفرنا كتير .. و يرد عليه
كوكو ابو الخطوات .. يا كوكو متستعجلش احنا لسه في اول 10 كيلو انت بس بيتهيألك .. ايه الاحباط
ده يقول كوكو الكميل في نفسه.. و كمل كوكو حفر والعرق يتساقط من عرفه الصغنن ويبضريب بكناحه المغرفه ف التراب لقي حاجه جامده خبطت في المغرفه رفع كناحه وخبط المغرفه تاني عملت صوت معدني بص كوكو الكيميل لابو الخطوات وقاله ايه ده وشالوا التراب بكناحتهم الكميله لحد مالقو نقوش غريبه علي سطح صندوق خشب بص كوكو لابو الخطوات وقالوا الاتنين في نفس الوقت........الصندوق ده فيه ايييييييييييه؟
كاكان
سؤال الحلقه الصندوق ده فيه ايه؟

Tuesday, July 24, 2007

مرجان احمد ...... بتنجان


مش من عادتي اني اتفرج علي افلام في السينما كتير بفضل ان اشوفهم علي الكومبيوتر
عشان امخمخ اكتر ؛ و كان اّخر فيلم شفته وش اجرام لمحمد هنيدي ؛
و من ساعتها ما روحتش السينما غير امبارح عشان اتفرج علي فيلم ..مرجان احمد مرجان
من باب التغيير .. و من اللي سمعته عن سمعة الفيلم و مدي اعجاب الناس بيه
قلت بقي يا واد يا كوكو يا كميل ده انت هتشوف فيلم مصري حلو بقي اخيرا
و كانت صدمتي ان الفيلم مش حلو بس في نفس الوقت للأمانه في بعض الايجابيات
اول صدمتي و هي اكتر حاجه مبوظه الفيلم هو المبجل .. يوسف معاطي اللي الظاهر كده
كان جاب اخره في .. عباس الأبيض ؛ لأن من يوم المسلسل ده و انا مشوفتلوش حاجه
حلوه .. المهم و ماعلينا ؛ الأستاذ معاطي اعتقد انه متعبش في كتابة الفيلم لأنه بمنتهي البساطه
اغلب الفيلم هو مشهد و متكرر بعادل امام مع ممثلين مختلفين و لوكيشن مختلف ؛
انما هو نفس الموقف و تقريبا نفس الحوار .. و اقصد بكده مشاهد تقديم الرشوه ؛
اللي هو و انا مغمضه عرفت نهاية المشهد هتكون ازاي لأن اتكررت فاتحرقت
من الحاجات السيئه جدا برضو من الأستاذ معاطي .. تحسه انه جه في منطقه في الفيلم
معرفش يلملم الخيوط و التربيطات الأخرانيه عشان يخلص الفيلم ؛ فعمل نقله للحدث تافهه و غير منطقيه
و سطحيه ميعملهاش مؤلف في اللفه .. و اكتر حاجه استفزتني في المشهد اللي بيعتبر
مغير للأحداث اني عمري مشفت حد قبل كده ابوها يضربها بالألم تتنقل المستشفي و يجلها انهيار عصبي و تفقد النطق
كان موقف اوفر اوي بصراحه ؛ و من الحاجات برضو العجيبه في السيناريو ان عادل امام المفروض
انه راجل مش مثقف و خريج معهد لاسلكي و علي قد حاله علميا و ثقافيا و ادبيا ؛
و في اّخر الفيلم بينجح و يتخرج من جامعه انترناشيونال و امتحاناتهم بالانجليش ؛
شئ من رأي غير منطقي و مستفز في نفس الوقت
***********************************************************
من السلبيات كمان .. الماكياج اللي كان واضح اوي و بالذات علي وش ميرفت امين
و قد ايه كان مبين العجز و التجاعيد اللي في وشها و نفس الموضوع عند بسمه
الماكياج كان موضح العيوب اللي في وشها
*****************************************************
من السلبيات كمان اللي ممكن متلفتش نظر حد بس لفتت نظري اوي .. بيت مرفت امين
المفروض ان ميرفت امين في الفيلم دكتوره علي مستوي راقي من الفكر و الثقافه و بتدرس مادة
حضاره في الجامعه .. و ده يتناقض تماما مع ديكور صالون بيتها اللي كان بيتسم بعدم الذوق و لا التناسق
لا التكويني و لا اللوني .. تحس و انت بتبص ان عينك مش مرتاحه ؛ تحس ان كل قطعه من الديكور منفصله عن اخواتها .. ده غير ان حصل اكتر من مشهد في بيت ميرفت امين و كلهم حصلوا في نفس الصالون
و ده اداني احساس ان الانتاج ملحقش يفرش بقيت الشقه و كانوا عايزين ينجزوا المشاهد بتاعت بيتها كلها في يوم
فراحوا واخدنهم كلهم في نفس الحته بنفس زاوية الكاميرا
**************************************************
من السلبيات .. ان كنت منتظره ان الزعيم هيضحكني اكتر من كده بس للأسف و علي رأي ناس
كانت بتتفرج معايا علي الفيلم قالولي .. احنا ضحكنا في السفاره في العماره اكتر
*********************************************************
********************************************************
من المشاهد اللي عجبتني .. هو مشهد مجلس الشعب و هو من رأي اكتر مشهد ضحكت فيه
علي الرغم من انه يحمل نفس اسلوب يوسف معاطي الساخر من الأوضاع السيئه اللي في البلد
بس مشهد لطيف و في كوميديا لطيفه و غير مصطنعه
*********************************************************
نيجي بقي للايجابيات .. اولا عادل امام مختلف من الناحيه الاباحيه شويه في الفيلم ده
يعني مفيش حاجات خارجه كتير زي عادته ؛ و برضو مختفتش خالص زي ما كانوا الناس بتقول
يعني مثلا كان في حته ملهاش لازمه خالص و هو في قافلة الفيلم لما بيتجوزوا و اللي هيتفرج هيفهم
و برضو لم يخلوا الفيلم من رجلين واحده لا بسه قصير و هو بيعلق عليهم ؛
او واحده حلوه و هو بيبصلها مش عارفه ازاي
بس في المجمل مش زي قبل كده
****************************************************
عجبني اوي .. احمد السعدني .. و ده لأنه من اللي اجتهدوا في الفيلم رغم ان مساحة الدور
مش كبيره اوي ؛ يعني علق معايا اكتر من شريف سلامه ؛ رغم ان شريف سلامه كويس
مش وحش ؛ بس الحقيقه احمد السعدني اجتهد في دوره ؛ بس يا ريت المره الجايه ياخد مساحه
اكبر من كده عشان يسبت نفسه اكتر من كده ؛ و ياريت ميزنقوهوش في نوعية الأدوار دي
زي عادة المخرجين اللي بيحولوا الممثلين لأنماط لحد ما الناس تتخنق
******************************************************
مش هتكلم عن احمد مكي لأني حاسه اني كنت بشوفه في تامر و شوقيه برضو
حلو بس مكرر
****************************************
الأغنيه من رأي هي احلي حاجه في الفيلم ؛ حقيقي عجبتني
لحن و كلمات و حتي الاستعراضات و المجموعات كان شكلها حلو في الكادر
***************************
عجبني كمان اوي الأفيش بتاع الفيلم و عدم انفراد عادل امام و ميرفت امين بالبوستر و انهم ادوا
الشباب فرصه للظهور ؛ علي خلاف ناس تانيه ناقص تطلع البوستر وشها بس من كتر الغرور
اللي عندهم .. و من راي شئ يحسب للزعيم ؛ و طبعا انا مبقصدش البوستر اللي انا حطاه
لأ اللي متعلق علي السينمات
********************************************************
في الاّخر طبعا كل اللي فات ده رأي واللي عنده كلام تاني يقول احنا مبنخافش لا مؤاخذه
هههههههههههههههههه
سلام

Sunday, July 22, 2007

The Incredibles


فيلم ينطبق عليه المثل المعروف .. يموت الزمار و صوابعه بتلعب
و في نفس الوقت المثل التاني اللي بيقول .. مين فات قديمه تاه
و هي دي الفكره اللي بتدور حوالها الفيلم .. و هو بعد هجوم شديد من الناس
و حقد علي الخارقين رغم انهم كانوا بيقدمولهم مساعدات كبيره و بيقوموا بعمليات انقاذ
كتير ؛ و لكن هما كده البني ادمين لما يشوفوا حد ناجح يفضلوا وراه لحد مايدمروه
خلف و طلع نسله في نفس الصفات الخارقه بس كانوا بيحاولوا يداروا عشان المشاكل mr .incredible
و بعد تقاعده من شغلته كخارق اشتغل شغلانه مش حاببها بس فضل علي طول
يحن لشغلته الخارقه اللي هو اصلا اتولد عرفها لأنه لما فات قديمه تاه و فضلت صوابعه تلعب
******************************************
شخصيات الفيلم الأساسيه هي
اللي بيمتاز بقوه خارقه و جسم قوي و متين و رشيق
mr .incredible
مراته و اللي عندها قوه خارقه من نوع تاني و هي المطاطيه جسمها بيمط في كل الاتجاهات elastigirl

بنته الكبيره اللي ليها قوه في الاختفاء و بتقدر تعمل حواليها حقل من الطاقه يحميها من اي هجوم violet

و عنده سرعه خارقه يسبق الصاروخ dash

ابنه البيبي لسه مش معروفله ايه هي قوته الخارقه انما اللي بان عليه انه بيولع نار jack jack

و هو صديق للبطل و عنده القدره علي تجميد اي حاجه قدامه frozone

في شخصيات تانيه برضو في الفيلم لطيفه جدا زي
و هي مصممة ازياء الخارقين و شخصيه تنكه اوي و تعتبر محرك للأحداث eda moda

و اّخر شخصيه هي شخصية الشرير و هو الضد للبطل اللي حدوته في الفيلم لطيفه جدا و غير متوقعه
و هو صاحب قوي خارقه متعدده sydrome

في شئ لطيف استهواني جدا و انا بدور علي صور للفيلم عشان البوستايه و هو الممثل اللي عامل شخصية مدير البطل
في الشغل ؛ و جبتلكوا الصوره اهو صورة الممثل فيها شبه كبير من صورة الشخصيه
في الاّخر احب اقول ان الفيلم من انتاج 2004 و هو قصة و اخراج المخرج
اللي برضو من باكورة اعماله
brad bird
ratatouille 2007فيلم جرافيكس انتاج ديزني هكتبلوكوا عنه قريب انشالله
jack jack attack 2005
عباره عن فيلم قصير تصور
لمكالة تليفون حصلت في الفيلم الأصلي بين الأم الخارقه و المربيه اللي كانت قاعده مع الولد الصغير
فكره عجبتني اوي ؛ انا كنت شفت الفيلم القصير قبل الأصلي و مفهمتش اوي و بعد ما شفت الأصلي
فهمت و لقيتها فكره لطيفه جدا
اخيرا حصل الفيلم علي جايزتين اوسكار في سنة 2005
جايزه احسن مؤثرات صوتيه للأفلام الجرافيكس
و جايزه احسن مخرج للأفلام الجرافيكس
و طبعا حصل علي جوايز في مهرجانات كتير و اترشح لجوايز اكتر
بس مش قادره احكي اكتر من كده باي باي بقي
سلام

Saturday, July 21, 2007

مين اللي عليه الدور ؟؟؟؟؟

يا تري مين اللي عليه الدور في موضوع الأنابيب اللي بقالنا فيه اكتر من سنه مثلا
بسمع دلوقتي الساعه العاشره .. حريق هائل في حدائق حلوان بسسب انفجار انبوبه
ادي اللي مقتل اسره من 8 افراد و 5 منهم اطفال ما بين ال6 شهور و ال6 سنين
و للأسف و كالعاده و صلت المطافي بعد ساعتين بعد ما الناس بقوا رماد لدرجة ان المراسله بتقول
انهم مش عارفين يحددوا هوية الناس اللي ماتوا
طبعا انا نقلت لكم الخبر و مش مستنيه اي شئ غير اني اسمع خبر الأسره الجديده اللي بعدها
اللي هتموت بسبب الأنابيب
يا رب ارحمنا جميعا الأحياء منا و الأموات
و تقبلهم يا رب و ثبتهم عند السؤال
و حسبي الله و نعم الوكيل في ............................. الأنابيب
سلام


Monday, July 16, 2007

يا سلام علي الدنيا



ياسر حسين الفنان البلوجاوي صاحب الشخبطات الرائعه .. تفضل مشكورا و رسم تصور
لشخصية البطل الاسطوري .. كوكو الكميل .. الحقيقه انا اول ما شفت الرسمه فكرتني
بشخصيه عزيزه علينا جدا .. و علي طول دموعي جريت علي خدي و فضلت انشف
و مفيش فايده تنزل برضو ..
و اعيط .. و اقول ميرسي يا ياسر .. و اعيط ..
و اقول ميرسي يا ياسر..

و قولت يا سلام اللي يعمل الطيب عمرنا ما ننساه ابدا..
لو عرفتوا الشخصيه دي مين .. هتحيوا ذكري بطل من ابطال مغامرات الكميل
ياللا بقي شغلوا الذاكره و قولولي يبقي البطل ده مييييييييييييييييييييييين؟؟؟؟؟؟؟؟
كاكان
***********************************************************************

Friday, July 13, 2007

notes on a scandal

مباراه تمثيليه شديدة الوطيس .. زي ما بيقولوا .. بين اتنين ممثلات جامدين اوي
حقيقي الفيلم اكتر حاجه فيه عجبتني هما الممثلات ؛ طبعا الفكره حلوه و نجح السيناريست
في رسم نفسيات الشخصيات ؛ و رسم المواقف المختلفه بين الشخصييتين ؛
و المخرج هايل برضو ؛ بس احتمال لو ان الفيلم مفيهوش الممثلات دول كان يبقي فيلم عادي
لأن في ما بين الممثلات اللي بيسموه الكيميا .. تحس انهم بيسلموا و يستلموا من بعض
الأحاسيس و النظرات و الأنفاس بمنتهي البراعه و الحساسيه و الانسيابيه ؛
فكرة الفيلم قائمه علي الوحده و الفراغ وبيعملوا ايه في نفسية البشر ؛ و كمان ان الوحده مش لازم
ان يكون الواحد لوحده لأ ممكن يبقي عنده عيله و اهل و اطفال بس هو وحيد ؛ و ده اللي جمع
ما بين الشخصييتين و هي الوحده علي اختلاف صورها واللي وصلت ليه كل شخصيه منهم ؛
الفيلم جديد من انتاج 2006 و كان مشارك في اّخر دوره لمهرجان الأوسكار
و اترشح لأربع جوايز منها جايزه احسن ممثله للرائعه

judi dench
و جايزة الممثله دور مساعد للممثله الهايله
cate blanchett
و كمان اترشح لجايزة احسن موسيقي تصويريه و جايزة احسن سيناريو
بس للأسف و ده شئ غريب مخدوش و لا جايزه مع ان الممثلات كانوا يستهلوا
بجايزة احسن ممثله مساعده في مهرجان دالاس cate blanchett
و لكن فازت
و تورينتو في نفس سنة الانتاج
فيلم يستحق المشاهده و اللي يحب يتعلم تمثيل يقعد ياخد دروس علي ايدين
جوز المبدعات اللي في الفيلم
يالللا بقي كفايه عليكوا
سلام

Friday, July 6, 2007

corpse bride


فيلم جرافيكس هايل و فريد من نوعه سواء في الرسومات او في الفكره
مدة الفيلم ساعه و ربع متحسش بيهم من كتر ما الفيلم يشد ؛
فيلم مليان بالشخصيات و الأنماط الغريبه زي شخصية العنكبوت و الدوده
طبعا اللي هيتفرج هيفهم قصدي ؛ هو فيلم انتاج 2005
و المبهر في الفيلم هو خيال المؤلف و الفكره اللي كاتبها ؛
ده طبعا بالاضافه للموسيقي التصويريه اللي بتتسم بالبساطه و الروعه و التأثير
و كمان برع الممثلين بأداء اصوات الشخصيات ؛ و المضحك انكوا لو شفتوا
الشخصيات الجرافيك هتلاقوا فيهم شبه كبير من الممثلين اللي عملين صوتهم ؛
شخصيات الفيلم الرئيسيه 3 ؛ و الشخصيات الثانويه كتير بس تحس ان الفيلم من غيرهم
مينفعش عاملين جو بالبلدي كده ؛ ده غير بقي زي ما قولت في الأول ان رسم الشخصيات
جديد يعني الرسومات او الخطوط اللي مكونه الرسومات غريبه مشفتهاش بالشكل ده قبل كده ؛
اللي احب تعرفوه كمان ..
اللي قام بصوت شخصية
او الشخصيه الرئيسيه هو ممثل انا مش بحبه اوي بس هو عامل الصوت حلو في الفيلم هو الممثل victor
؛ و حصل الفيلم علي اربع جوائز في اخراج الجرافيكس خلال 2005 و 2006 jhonny deep
في الاّخر احب اشجعكوا تتفرجوا علي الفيلم .. و ارجع و اقول انه فيلم غريييييييييييييييييييييب
اوي
سلااام

Thursday, July 5, 2007

كوكو ابو الخطوات

الحلقه اللي فاتت
كوكو فجأه الدنيا اسودت في وشه
الحلقه دي
مكان عجيب غريب مريب .. ضلماااااااااااااه و مش كميل خالص
تفوح منه رائحه شنيعه ملهاش وصف .. حشرات من كل الأنواع بتجري
في كل مكان .. شوال مرمي علي جنب .. صوت رجلين بيقرب بيقرب بيقرب .. ظهرت الرجلين
في الشاشه رجلين كوكوهيه و تعرف كده من النظره الأولي .. فضلت الرجلين تقرب
من الشوال براحه براحه لحد ما وصلت .. الله الله دي في كناحات كمان ظهرت مع الرجلين
الكناحات قربت من الشوال .. بتحاول تفتح الشوال .. تفتح الشوال .. تزق الشوال
لتحت .. صوت كحه خارجه من الشوال .. حاجه بتتحرك في الشوال و بتصوصو ..زعيق جامد اوي
خرج من الشوال .. ظهر من الشوال .. كوكو الكمييييييييييييييل.. هيييييه هييههههه .. خرج كوكو و هو متضايق
و بيصوصو و يزعق و في نفس الوقت خايف .. كوكو مش فاكر حاجه خالص غير ان الدنيا اسودت فجأه قدامه
خرج كوكو و عقبال ما عينيه الكميله جمعت ايه اللي بيحصل .. سكت كوكو وهو بيبص لصاحب الرجلين اللي واقف
قدامه باستغراب .. لقي قدامه كائن كوكوهي صحيح بس عجيب من نوعه..و ركز كوكو في شكل
الكوكو صاحب الرجلين لقا شكله عليه اثر السنين رغم انه مش عجوز و لقا عنده عين متغطيه
بقماشه سوده .. و هدومه مقطعه و متوسخه و مش كميله خالص يا حرام .. و ريشه لونه
كأنه متحماش من ايام الحرب الكوكوهيه الأولي .. و حاول كوكو الكميل يعرف من ملامح الكوكو التاني ده
اذا كان كميل و لا مش كميل بس معرفش .. و بدأ كوكو الكلام بعد فترة صمت ..هو انت مين؟؟؟؟
و انا هنا ليه ؟؟؟؟؟ انت خطفتني في الشوال ده صح ؟؟؟؟ ليه انت حرامي و مش كميل .. ابتسم
الكوكو ابو الخطوات ابتسامه مريحه و قال .. ليك حق تفتكر فيا كده ؛ بس انا مش خاطفك
ده انا عايز مصلحتك صدقني ؛ انا كنت كوكو زيك كده حر و منطلق بس منهم لله اللي كانوا السبب؛
اتأثر كوكو الكميل اوي و قاله .. انا اسف سامحني بس اللي انت عملته يخليني افكر فيك مش كميل
بس متزعلش بقي .. و مد كوكو كناحه يسلم علي الكوكو ابو الخطوات و كمل كلامه و قال ..انا اسمي
كوكو الكميل و انا ضيف لمدة ساعات في البلد الغريبه بتاعتكوا دي و حصلي فيها حاجات غريبه
رد الكوكو ابو الخطوات .. ما هو انا عارف اللي حصلك و انا خطفتك كده عسان الحقك من اللي ممكن يحصلك
اكتر و يجرالك زي ما جرالي .. رد كوكو الكميل .. و انت ايه اللي جرالك .. رد ابو الخطوات و هو بيحط كناحه
علي كتف كوكو و بيقوله .. تعالي طب نقعد هنا علي الطوبخ دي و انا هحكيلك .. و قعدوا و بدأ ابو الخطوات في
سرد حدوتة حياته .. انا يا سيدي يا كوكو يا كميل كنت زائر زيك كده جاي المدينه سياحه
اهو اتفسح و اشوف اماكن جديده مشفتهاش قبل كده و الكلام ده من حوالي 10 سنين كده ؛ و اللي حصل
اني حاولت اعمل زي ما انت عملت و حاولت اساعد اللي يحتاج و فضلت مصر علي اللي في دماغي
و كان غصب عني لأن انا ربنا خلقني كده بحب اساعد غيري ؛ لحد ما في يوم نجحت اني اساعد عيله
كامله من الموت ؛و عينه اللي متغطي دي حادثه حصلتلي و انا بحاول افتح باب الشقه اللي كان ماليها الغاز
عشان الحق العيله و انا بزق الباب جامد رجعت علي ضهري عشان اخد دفعه افتح الباب راح مفتوح فجأه
رحت متزحلق و طاير و راشق بعيني في حدديه بتاعت اباجوره كانت علي الطرابيزه في صالة الشقه
و من يومها و انا بهرب مش لاقي وقت اعالجها و خلاص اتعمت مش بقيت اشوف بيها خالص ؛
المهم ان اتقلبت الدنيا و مقعدتش و طلع ضدي احكام كتير بالغرامه و الشنق ؛
و هربت و فضلت اهرب من مكان لمكان كل ما يلاقوني ؛ لحد ما وصلت المكان اللي احنا فيه ده
في البلاعات اللي بيعدموا فيا الخارجين عن القانون القاصي الظالم ده ؛ و طبعا عمرهم ما فكروا
اني هكون مستخبي في مكان الموت نفسه و بقالي هنا كتير مش عارف قد ايه لدرجة ان انا لما بخرج دلوقتي
لو اضطريت محدش بيركز لشكلي اوي لأن بقي شكلي مختلف شويه عن الصور اللي ملزقه في كل
حته بأعلان مكفأه عن اللي يلاقيني ؛ تخيل يا كوكو مش عايزينا نساعد حد بس هما عايزين اللي يساعدهم يلاقوني
تناقض مش كده ؛ المهم يا سيدي انا عرفت مشكلتك و انا خارج في رحلتي السريه الشهريه لأني اجيب اكل
من صفافيح الزباله و انا في صفيحه من الصفافيح سمعت المحكمه اللي كانت معمولالك في الشارع
فأفتكرت نفسي علي طول فقررت اني لازم اساعدك عشلان متتكررش المأساه معاك تاني ؛
بس هي دي الحدوته من طأ طأ لسلاموا عليكوا .. ايه رأيك بقي مش احسن كنت عملت معاك كده و لا كنت سبتك
اتبهدلت بهدلتي ؛ انا مستعد اساعدك يا كوكو ياكميل انك تخرج من هنا .. رد كوكو الكميل بسرعه .. يا
سلام انت بتتكلم بجد انا عايز اطلع علي البلد الخضرا عشان انا عايز اوصل لطانط ام مكاوك اصل الموضوع
..............................................................و كمان الخطاف قالي .............................
و بعد مارحت البلد الحمرا حصل ...............................و بعدها جيت هنا و لازم ارزح البلد الخضرا
عشان هي البلد اللي هتوديني للخطاف يا ريت تساعدني .. سكت الكوكو ابو الخطوات شويه ..
و قام اتمشي حوالين كوكو الكميل و كل شويه يبصله و يقف كأنه هيقول حاجه و بعدين يهز راسه
كأنه بيقول لأ و يكمل مشي تاني .. و بعد فتره علي نفس الحال وقف فجأه و بص لكوكو و قال .. بس
لقيت الفكره الجهنميه بس لازم نبتدي فيها حالا .. اتبسط كوكو اوي و قال .. يا سلام هنعمل ايه ؟؟؟؟؟؟؟؟
كاكان
سؤال الحلقه
يا تري ايه الحل اللي لقاه كوكو ابو الخطوات ؟؟؟؟؟؟؟؟؟؟؟؟؟؟؟
سؤال الحلقه اللي فاتت
للأسف محدش عرف الحل .. معلش حاولوا المره دي
كاكان

Sunday, July 1, 2007

حدوتة زمان منين ؟

نتيجه الاستفتاء المره دي و اللي كان بيتكلم عن حواديت زمان و مين اللي كان
بيحكيهالنا كانت بالشكل ده
من ناتج 37 صوت كانت النتيجه


مامتك 18 49%
باباك 6 16%
تيته 7 19%
جدو 2 5%
اخواتك الكبار 1 3%
OTHER 3 8%

احب اعرف بقي ايه نوعية الحواديت اللي كانت بتتحكلكوا؟؟

و اللي جاوب بالجواب الأخير احب اعرف مين كان بيحكيله حكايات غير الناس اللي انا كتبتهم ؟؟

و شدوا حيلكوا في الاستفتاء الجديد عن افلام الصيف

سلام

Thursday, June 28, 2007

تفتكروا هيخش النار؟؟؟؟

نظرا لأن الفتره دي في حاله من الركود التدويني العجيب و في حركه الزيارات
العائليه البلوجيه و اللي اثرت علي نفسية الكوكو الكميل الرقيقه
قرر كوكو انه مينزلش الحلقه الجديده الخميس ده لأن الحلقه اللي فاتت كوكو و المنشور كتير من اللي بيتبعوها
متبعوهاش ؛ بس انشالله الأسبوع الجاي ينشرها
بس انا مش عارفه حركة الركود الغريبه دي سببها ايه ؟؟
تفتكروا الصيف و الحر و سنينه و قرفه ؟؟؟؟؟
ما علينا خدوا بقي البوستايه الصغننه اللي جايه دي علي الماشي
***********************************************************
النهارده راكبه الأتوبيس رقم 900 اللي لونه اخضر و اللي متجهه
الي عبد المنعم رياض .. و كنت قاعده في مكان ورا و بعدين لما كرسي فضي
قدام قمت رحت قعدت .. قعدت جنب ست مخدتش بالي من شكلها في الأول
لحد ما قالتلي .. لو سمحتي ممكن اسألك سؤال .. لوهله مكدبش عليكوا
قلت هتشحت فمحضره علي لساني الله يسهلك عشان الواحد اتهري من قصص
و افلام الشحاته التمثيليه اللي انتوا عارفينها .. و في نفس الوقت قلقت
عشان متعرفنيش و بتكلمني ؛ المهم ميلت عليها لأن صوتها كان واطي
اوي .. و قلتلها .. مسمعتش عيدي الكلام تاني .. قالت تاني .. هو
لو سمحتي يعني تعرفي لو ان حد عارف واحده متجوزه و راح قالها
ان جوزها متجوز عليها هيخش النار؟ .. تنحت لها بنظره كلها بله
و هبل و استغراب و كل الأحاسيس اللي ممكن تتخيلوها في الدنيا
و بعد شويه رديت و قولتلها .. لأ معرفش .. و دورت وشي و كنت كل شويه
ابص في الازاز اللي في وشي اشوف وشها معكوس عليه و مليان حيره
و قلق و توتر و صعبت عليا .. بس اللي فضل شاغل بالي هو سؤلها ..طب
تفتكروا انتوا لو حد عمل كده هيخش النار ؟؟؟؟؟؟؟؟؟؟؟؟؟؟؟؟؟؟؟؟؟؟؟
سلام

Thursday, June 21, 2007

كوكو و المنشور

.. الحلقه اللي فاتت
طيبة قلب كوكو المعهوده و ديته في داهيه
الحلقه دي
وقف كوكو مش فاهم ايه اللي بيحصل بالظبط بس هو احاسيسه المرهفه الكميله
كانت بتقوله و بتوشوشه ان فيه شئ مش كميل خالص بيحصل .. و فعلا
بدأ الموضوع يبان لكوكو لقا كوكو افندي لابس بدله كده و متأيف
و بيقرب عليه و بيقوله .. انت كوكو الغريب اللي دخلت المدينه الصفرا
من ساعه كده صح ؟ رد كوكو .. اه انا دخلت من ساعه بس انا كوكو الكميل مش كوكو الغريب
رد عليه كوكو الأفندي بسرعه .. انت هتهرج معايا مش ده المهم المهم انك في ساعه
حققت نسبة مخالفات مححقهاش حد علي الاطلاق ده انت تدخل موسوعة كوكوز ريكورد
في للمخلفات يا اخي .. رد كوكو .. ليه انا عملت ايه هو انا لحقت انا لسه حتي ملقتش حد يساعدني
و فجأه كوكو الكميل لقا كوكو افندي اول ما سمع يساعدني جاتله رعشه و منقاره اتعوج واترمي في الأرض
و جاتله حاله عصبيه .. و بسرعه جه واحد من اللمه اللي واقفه الظاهر عليه انه
كوكو موظف تحت ايد كوكو افندي و فتح شنطه كبيره و طلع منها حقنه و راح مدخلها في كناح
كوكو افندي اللي تدريجيا ابتدي يهدي و اول ما فاق راح مزعق في كوكو الكميل و قاله .. اوعاك
تقول الكلمه دي في وشي تاني انت فاهم .. راح كوكو بهبله قاله كلمة ايه يساعدني
و فورا راح كوكو افندي جاتله الحاله تاني و مفاقش منها غير بالحقنه برضو .. و اول ما فاق
من غير ما يتكلم فتح شنطته و طلع منها فاتوره و طلع كوكوليتور و قعد يعمل حسابات كتير
في سره و كل شويه يطلع منه رقم كده ؛ و كوكو الكميل واقف و لا فاهم ايه اللي بيحصل
و بعد ما كوكو افند خلص بص لكوكو الكميل و قاله .. نسبه الأضرار اللي انت سببتها
ما كانتش عاليه اوي احمد ربنا و لذلك قررت دولة انا الصفراويه انها تدفعك
مبلغ 300 حبوبورو مخالفات زائد 50 حبوبورو دمغات زائد 5 حبوبورو تمن
المنشور الجمهوري لقيمة مخالفات قوانين الدوله الصفراويه دولة انا لوحدي و لا حد غيري
و فتح كوكو منقاره و مش مستوعب حاجه خالص و مش مصدق ودانه .. و فجأه
من غير ما يحس لقا نفسه متسلم و بيدفع الفلوس اللي عليه .. و علي طول طلع
كوكو افندي ورقه كبيره اوي ملفوفه و مربوطه بشريطه من شنطته ؛ و راح كوكو افندي
فاكك الشريطه راحت اللوحه الملفوفه دي مفروده قدام كوكو علي الأرض و بدأ كوكو الكميل يقرا
قيمة المخالفات .. و كل ما يقرا يذبهل اكتر و اكتر.. و كان ترتيب المخالفات من الأكتر للأقل
انقاذ حد من الموت .. 100 جلده و دفع غرامه 1000 حبوبورو
محاولة انقاذ حد من الموت بنفسك .. 50 جلده و غرامه 500 حبوبورو
محاولة حد من الموت بمساعدة حد ..غرامه 300 حبوبورو
مساعدة حد في العموم .. 400 حبوبورو و كلمتين في جنابك
محاولة مساعدة حد في العموم .. 200 حبوبورو و كلمتين في جنابك اخف شويه
لو حد طلب مساعدتك ووافقت .. 150 حبوبورو و شلوتين
لو ماوافقتش و سمعته بس .. 100 حبوبورو و تاخد شلوت يواديك اسيوط و ترجع مبسوط
لو حد ندهلك و بصيتله .. 50 حبوبورو و قلمين علي وشك علي الماشي
و يراعي في هذه المخالفات ترتيب تكرار المخافه .. يعني لو كررتها يبقي الضعف من كل حاجه
قرا كوكو المنشور و بعدين برمه تاني و ركب الشريطه و من غير ولا صوصوه واحده اداهم ضهره و مشي
و عرف انه هالك لا محاله لأنه شخصيه خدومه بطبعه .. بس قعد كوكو و هو ماشي يقنع نفسه انه لازم يعود
نفسه علي عادات البلد الصفراويه النفساويه دي لحد ما يلاقي بر الأمان .. و مشي كوكو كتير
و يحاول يعتمد علي نفسه في انه يلاقي المعبر للبلاد الخضرا .. و فجأه اسودت الدنيا في وش كوكو
كاكان
السؤال ؟؟؟؟
يا تري الدنيا اسودت ليه ؟؟؟؟؟؟؟؟؟؟؟؟؟؟
سؤال الحلقه اللي فاتت .. مبروك لكل اللي جاوب صح اللي هما
مشمش
البلطجيه
سمسم
شدوا حيلكوا بقي
كاكان









Monday, June 18, 2007

الطريق الي زمش


كان يوم 27 مارس 1959 هو اليوم العاشر علي ما عتقد في شهر رمضان المبارك في هذا اليوم دخل مكتبي .. عبد الستار الطويله .. و ابلغني بأن مسألة اعتقاله هي مسألة ساعات ؛ و انه علي الأغلب سيكون الليله مع الرفاق الذين سبقوه الي المعتقل ؛ و اوصاني مره اخري بأهل بيته و بحقوقه لدي الجريده .. و مره اخري وعدته خيرا بشرط ان يذهب الي المعتقل هذه المره و لا يخلف وعده كما حدث في المره السابقه و بعد انتهاء العمل في المساء ؛ غادرت مكتبي في شارع محمد سعيد خلف مجلس الوزراء و ذهبت الي منزلي ؛ و لم يكن عدندي من الأطفال الا .. هاله .. و كان عمرها عاما و بضعة شهور ؛ و زوجتي حامل في شهرها التاني .. و بعد السهره قمنا لتناوا طعام السحور ؛ و لكن جرس الباب دق عدة مرات متواصله فقمت افتح الباب ؛ و فوجئت بأن الطارق افندي في التلاتينات من عمره و معه شخصان ؛ و قال الرجل بأدب شديد .. لدينا اذن بتفتيش الشقه ؛ و سألته عن السبب .. فأجاب للبحث عن منشورات ؛ و لما لم يكن لدي اي منشورات من اي نوع فقد رحبت بهم و دعوتهم لدخول الشقه ؛ و يبدو انهم اصيبوا بخيبة امل لعدم العثور علي منشورات فاستولوا علي بعض الكتب من بينها كتب ادبيه و كتب ثقافيه و كتب سياسيه ووقفوا طويلا امام احدها كان يحمل غلاف شعار الشيوعيه العالميه .. المطرقه و السندان .. و هو كتاب اّثرت الحياه .. لكرافيشينكو ؛ و تصورت ان الأمر انتهي عند هذا الحد؛ و لكن الضابط طوسون طلب مني فيما يشبه الرجاء ان اصحبهم الي مباحث الجيزه مؤكدا للعبد لله ان الأمر لن يستغرق الا دقائق
********************************************************
و طبعا الدقايق دي بقت سنين قضاها محمود السعدني يتنقل من معتقل لمعتقل
و لا المجرم اللي بيخدوه كعب داير من قسم لقسم .. من معتقل لقلعه للواحات للفيوم
و شاف عذاب و لا سجون النازي .. بس رغم كده مختفتش عنه خفة الدم
و الفكاهه و السخريه حتي و هو جوه المعتقل و في وسط العذاب و الذل
و الاحتقار .. كل ده ليه هو نفسه ما يعرفش يا عيني و لا كان شيوعي و لا يحزنون
و كان اصلا بيتريق علي الشيوعيين .. لكن نصيبه جه كده .. شعور جالي و انا بقرا
و هو اني بتفرج علي فيلم البرئ للامبراطور احمد زكي حقيقي قد ايه قدر الفيلم انه يوصل نفس
الصوره الحقيقيه اللي ناقلهالنا السعدني عن تجربه شخصيه مريره
و من المناطق اللطيفه جدا في الكتاب فصل اسمه .. حكايات الصول شاهين
و د صول اتصاحب عليه السعدني و بقي يقعد معاه يشربوا سجاير و قدر السعدني يكسبه
بحكبياته اشيقه و المثيره عن البلاد اللي سافرها و اللي فيها و اللي قري عنها كمان
و كان عامل و لا شهرزاد اللي بتحكي لشهريار و في يوم في وسط حواديته للصول شاهين
حصل المشهد ده ما بينهم .. من نص الكتاب
رحت اطوف مع الصول شاهين في كل ارجاء الأرض الواسعه حكيت له عن جزيرة بالي و جزر هاواي و جزيرة مالماو ؛ و عندما انهت الأسماء الموجوده علي خريطة العالم ؛ رحت اخترع اسماء من عندي ؛ و عندم خيل الي انني احكمت السيطره علي عقل الصول شاهين وجدت نفسي واقعا في مطب لم استطع الخروج منه الا بصعوبه شديده ؛ فبعد شهرين من الحديث عن البلاد التي زرتها و البلاد التي لم ازرها ؛ سألني شاهين فجأه .. مارحتش ياجوج و ماجوج ؟ و قلت له دون وعي .. ايه ياجوج و ماجوج ؟؟ و استفزه سؤالي فسألني بحده .. ما تعرفش ياجوج و ماجوج .. ثم قال كأنه يحدث نفسه .. طبعا ما انت شيوعي و ابن هاوهاو .. ياجوج و ماجوج مذكوره في القراّن .. و لم اجد ما اقوله لشاهين فتوقفت عن الكلام و اكتفيت بالتحديق في وجهه .. و راح شاهين يتكلم و كأنه يخطب .. تقدر تقولي مرحتش ليه ياجوج و ماجوج؟؟ اهو انت لفيت الدنيا كلها .. تقدر تنكر انك شيوعي و تستاهل الحرق انا مش فاهم الناس اللي ربنا اداها عقول زيكم و اتعلموا ليه يبقوا شيوعيين؟؟ و قلت للصول شاهين يا حضرة الصول انا عاوزك تعذرني و تفهم موقفي .. انا فعلا مزرتش ياجوج و ماجوج بس ده حصل غصب عني انا كنت عاوز اروح و هما مرضيوش
المهم ان السعدني قدر يضحك علي عقل شاهين و يقنعه انه معرفش ياخد فيزا عشان يسافر
ياجوج و ماجوج .. هههههههههههههه
هتلاقي بقي في الكتاب من اصناف الطبقه دي كتير و انماط كتيره تانيه زي واحد اسمه
فهمي جبيب .. اطلق عليه السعدني مفتي الديار الشيوعيه ؛ كان واحد من المعتقلين
اللي حاسس نفسه فاهم في كل حاجه و انه زعيم الشيوعيه في مصر و بيفتي في اي شئ
و كان مش فاهم حاجه خالص
اخر حاجه عايزه اقولها ؛ ان دي مش اول مره اقري فيها الكتاب انا قريته بتاع اربع مرات
بس في اعمار مختلفه و طبعا كل ما اكبر و اقراه اكتشف حاجات جديده
اللي يحب يشتريه هيلاقيه في
مدبولي
روزاليوسف
و ثمنه .. 7 جنيه
طبعة .. اخبار اليوم
سلامممممم

Thursday, June 14, 2007

ايه ده ؟؟ ايه اللي بيحصل ؟؟

الحلقه اللي فاتت ..
كوكو وصل مدينة انا
الحلقه دي ..
عدي كوكو من باب المدينه و كان اول انطباع جاله هو احساسه بأن الجو خالي
من الأوكسجين تماما و انه مش عارف يتنفس طبيعي و مكنش عارف ايه السبب
لا هو الجو حر و لا في تراب ؛ المهم طنش كوكو و قال يا كوكو يا كميل طنش خالص
دي كلها حاجات سطحيه و مش اساسيه ؛ و فضل كوكو ماشي شويه و الحياه
رايقه من حواليه بس هو جواه احساس مش كويس و هو كوكو الكميل لما احساسه يشتغل
و ريشات الاستشعار عنده تتهز يبقي في شئ غريب ؛ و فعلا الحاسه الساسه عنده
قويه لأنه بص لقا كوكو واقع علي الأرض و رجله مكسوره و عمال يعيط
اوي فجري كوكو الكميل عليه و قاله ..اقدر اساعدك ؟؟ اجيبلك كوكتور ؟؟
رد عليه الكوكو المكسور .. لأ
استغرب كوكو من الرد جدا بس قال في نفسه يمكن هو محرج يطلب حاجه من حد ميعرفوش
و رجع قاله تاني .. لأ بجد مش عزومة كوكارجبيه انا بقول بجد انتي مش قادر تتحرك
رد عليه الكوكو التاني بانفعال شديد اوي .. انت مالك يا اخي ملكش دعوه امشي
بقي لأن شكلك كده هتدفع كتير
و مفهمش كوكو يعني ايه .. شكلك كده هتدفع كتير
و مشي كوكو و هو بيبص علي المكسور اللي قاعد علي الأرض يتألم و رافض المساعده
و فضل الموضوع شاغل دماغ كوكو و مستغربله اوي ..
لحد ما لقا قدامه حاجه شغلتله دماغه عن التفكير ..منظر لفت انتباهه جدا
لدرجة انه فتح منقاره و لسانه دلدل من الدهشه .. شاف كوكو بيت والع
و طلعه منه النار من كل حته و في صريخ استغاثات طالع من جوه البيت ..بس
مش هو ده الشئ الغريب اللي لفت نظره .. الأغرب ان الكوكوهات السكان ماشيين رايحين
و جايين عادي جدا زي ما يكون مفيش مصيبه بتحصل .. و طبعا مكنش من كوكو
غير انه يجري بسرعه ناحية البيت عشان يحاول ينقذ حد .. و كوكو من طيبته و سذاجته
ابتدي يجري في وسط الشارع و يصرخ .. حريقه يا كوكو هات المدينه حريقاااااااااااااااااااااااه
و مفيش رمش و ريشه في المدينه اتحركت للمصيبه دي .. و كل ما كوكو يجري ناحية حد عشان
يطلبه مساعدته يلاقيه ماشي باصص قدامه و لا كأنه شايفه واخد في وشه
و ماشي زي الروبوت .. و فضل كوكو يحاول يدور علي مساعده و هو في قمة ذعره
لحد ما الصريخ اللي جوه البيت سكت و الكوكوهات المساكين اللي كانوا جوه اتشوا
ووقف كوكو يبص علي البيت لحد ما النار اكلت الخشب و بقت رماد و اطفت النار و بقي البيت
عباره عن كوم تراب .. و كبر الموضوع في دماغ كوكو جدا و بقي نفسه يعرف هو المدينه دي
ليه الكوكوهات عمله كده معقوله كلهم من ذوي الاحتياجات الخاصه و مبيسمعوش
مش ممكن .. امال يا تري المشكله جايه منين يا كوكو يا كميل ؟؟
المهم كمل كوكو طريقه و كان كل هدفه انه يلاقي حد يساعده يخرج من البلد دي
و يلاقي طريقه في المدينه الخضرا و يلاقي طانط ام مكاوك بقي و نخلص .. و ابتدا كوكو
يدور علي حد يساعده و اول واحد لقاه قدامه جري كوكو ناحيته و بمنتهي الأدب
قاله .. انا كوكو الكميل و كنت عايز حضرتك تساعدني اني الاقي المخرج من هنا .. و سمع
كوكو صوت دربكه حواليه خلته مش فاهم ايه اللي بيجري حواليه .. عربيات و ناس
و دوشه و زعيق .. و حبه حبه ابتدا كوكو يدرك ايه اللي حصل .. بس مش بالظبط
اكتشف كوكو انه مدبس في مصيبه كبيره بسبب حسن نيته و طيبته .. معقوله يا كوكو
الطيبه و القلب الأبيض يدوك في داهيه كده .. و بدأ كوكو مشوار عذاب جديد
و معاناه مع اللي حصل .. هو ايه اللي حصل ؟؟
كاكان
السؤال .. يا تري ايه اللي حصل ؟؟
يا للا بقي شدوا حيلكوا

Wednesday, June 13, 2007

لا تغضب

كنت في منطقة مدينة حدائق الأهرام في منطقة التجنيد في الهرم .. و حصلت في وجودي
هناك جريمة قتل احمد ربنا ان انا مكنتش شاهد عيان و الا كان زماني
في المصحه النفسيه .. الحمدلله .. مش المريع ان حصلت جريمة قتل .. لأ
المريع و المفزع هو السبب اللي حصلت عشانه الجريمه دي .. الموضوع و ما فيه
و ده بعد رواية احد الشهود العيان .. المنطقه دي مدخلش فيها وصيلة مواصلات الا التوك توك
قصدي اللهم احفظنا التوك توك الملعون .. و هعملكوا انشالله سلسله مع مغامراتي مع التوك توك
المهم ان واحد من التكاتك كان ماشي في نص الطريق ووراه لودر من بتوع البنا
اللي هو بيبقي في شوكه كبيره من قدام لرفع الحاجات .. و ده للي مش عارف شكله .. ماشي
اللودر ورا التوك توك زمرله يوسع التاني ما وسعش شدوا قدام بعض شتموا بعض ؛
راح سواق اللودر شايل التوك توك من ورا بالسواق بتاعه و هاتك يا رفع و تنزيل
و مرجحه ؛ و بعدين نزله علي الأرض و نزلوا الاتنين و حصل تشابك بالأيدين
اسفرت عن ان سواق اللودر بأله حاده حديده مثلا كانت في الأرض و هاتك يا ضرب في سواق التوك توك
لحد ما رقده ميت مبيتحركش .. انا عديت قرب مكان الجريمه بعد الجريمه بعشر دقايق
و كان السواق اللي ركبه معاه الميكروباص الخاص شاهد للحادثه و قالي .. تعرفي
حضرتك الناس اللي هناك دول بيصرخوا و بيعيطوا و يلطموا ليه ؟؟
قلت .. ليه ؟؟
قالي .. عشان .. و راح حاكيلي كل اللي حاكيتهولكوا
علي طول جه في دماغي كل الجرايم اللي عملين نسمع عنها بقالنا فتره
و قد ايه زادت و ببجاحه و علي امور اتفه من التفاهه .. يعني مشاده
علي شئ هايف ادت لقتل روح .. يعني كان هيجري ايه لو وسعله السكه و عداه
او كان هيجري ايه لو معداش و خلاص .. حقيقي الغضب يؤدي للقتل .. لا تغضب
مش متخيلين انا قعدت بعديها قد ايه قلبي واجعني و مش قادره افكر كويس
و اللي زاد و غطي الاشاعات اللي بتنتشر زي القمل في الشعر
و اول اشاعه سمعتها .. ده لودر داس علي دماغ عيل موته
و لو استنينه لبكره الصبح مش بعيد نلاقي القصه تطورت و بقت حاجات تانيه
و تغيب الحقيقه و تروح .. لازلت مش عارفه .. ليه و ايه سبب
انتشار الجريمه بالشكل المفزع ده اللي يخلي الواحد يخاف يخرج من البيت
اللهم احفظنا و صبر اهل القتيل و اهالي كل اللي فقدوا اعزاء و احباء
سلام حزايني


Tuesday, June 12, 2007

الهلاهيل كسيانا

الهلاهيل كسيانا .. و العنطزه مليانا

مشهد بيلفت نظري كتير جدا و يجبرني غصب عن منخيري
اني اتأمله ؛ المشهد هو راجل يوقف الميكروباص او الأوتوبيس
او اي مواصله عشان يركب في ايده سيجاره ماسكها زي متكون هتهرب منه
و قبل ما يحط رجله علي سلمة الميكروباص عشان يركب
يسحب قد 30 نفس دفعه وحده قبل ما يرميها و لا لما يكون الحبيب
مسافر بلد عربي و بيودع حبيبته بشوق حار ؛ منظر الحقيقه
لازم يستوقفني و يخليني افكر هل فعلا السيجاره عند ناس هي الحياه؟؟؟
و ايه اللي هيحصل انه يرمي السيجاره ببساطه ؟؟
يعني مره حصل معايا موقف عصبني جدا ؛ ركبت الميكروباص و اول كرسيين اللي بره كان فاضي و علي جوه
قاعد واحد ماسك سيجاره و هاتك يا دخان معبأ الدنيا ؛ و لما قلتله من فضلك ممنوع التدخين في المواصلات
رد عليا بأسلوب حقير و زعق فيا و لا لما يكون هو اللي علي حق و قالي ببجاحه
ما انتي اللي جيتي قعدتي جنبي .. طبعا انا اكيد مسكتش و فهمته انه انا من حقي اقعد في اي حته
ده ملك عام انما انت مش من حقك تدخن لأن انا لو وقفت بيك عند اول ظابط هتدفع غرامه
و هتاخد اللي فيه القسمه .. بس طبعا كنت بنفخ في قربه مهربده مش مقطعه
و متقفلش الموضوع الا بتدخل السواق لفك الاشتباك
و انه قومه من جنبي خالص الحمدلله .. يا تري ليه السيجاره مهمه اوي عند اللي بيشربها؟؟
لدرجه ان ساعات ستات تحس ان السيجاره درتها .. شئ يضايق و محتاج مراجعة تفكير من اللي بيشربها
ده غير بقي انك تلاقي واحد هدومه مقطعه و شكله باين عليه الغلب و الفقر ماصص دمه
و ماسك في ايده سيجاره !!!!!! شئ عجيب جدا يا سيدي انت فيك صحه ده انت شكلك
اخف مرض عندك سوء التغذيه و كمان بتشرب سجاير !!!!!!!!!اكيد ده مش عقل
و النوعيه دي بتخليني علي طول افتكر المثل اللي بيقول

الهلاهيل كسيانا .. و السجاير خنقانا و قرفانا

سلااااااااااااااام