Sunday, February 4, 2007

يا مطره رخي رخي00

انا من اكتر الناس اللي بتحب المطره موووت00و بحب امشي
تحتها و العب و هدومي تتبل00بس للأسف لما الدنيا
بتمطر في القاهره بشيل الهم00لأنها بتبقي ايام بهدله و مرمطه
و ده بسبب ان مساوئ المطره بتبقي اكتر من انك تستمتع
و بدل ما الواحد يدعي بقي في المطره و يستغل باب السما
و هو مفتوح 00يتشغل في الطينه اللي و سخت الجزمه
و الميه اللي هتبقي طينه علي البنطالون كمان شويه
و انه يدور علي حته يمشي فيها بعيد عن اللي سايق
عربيه و مش حاسس بالبني ادمين اللي حواليه
و طششششش00ينزل بعربيته في الميه و يعمل نافوره
و يغرق اللي ماشين علي رجليهم
و يا ويلك بقي و كنت انت اللي سايق و نزلت النفق
اللي بيودّي علي العجوزه00اللي هو قدام سينما شيراتون
يا سلااااام تبقي امك داعيه عليك و محلفه الأهل و الأقارب
يدعوا معاها00النفق دا يا جماعه لازم يتشافله صرفه
لأن لو عربيه بطنها واطيه شويه 00ممكن تلاقي شراب اللي سايق
اتبل00هو السؤال هنا يا تري ايه صعوبة
ان يتعمل مصارف للمياه علي الجناب؟
يعني في اوروبا و الدول المتقدمه00و محدش يقول عقدة الخواجه00
الدنيا تمطر و بعد شويه متلاقيش ميه مركنه علي الأرض
بلاش نروح بعيد و نسافر بلاد بره00سوبر جت ب 25 جنيه
و اخطف رجلك00و اطلب فديه00و روح اسكندريه
في اهتمام اكتر من كده و المطره هناك ممتعه و مفيش الطينه و
البهدله دي000ياه انا عارفه اني بتعب قلبي عالفاضي
انا شكلي اعزل و اروح اسكن في اسكندريه 00اسهل
سلام

5 comments:

kozo127 said...

يعني هو اللي ماشي على الارض اللي بيتغرق بس ؟؟
لا وحياتك يا كوكو دا اللي جوه العربيه كمان .. خصوصا لما تمشي وتنسى وتفتح الشباك بعد المطره عشان تشم شوية هوا نضيف من غير تراب .. تلاقي واحد غير محترم سايق عربيه محترمه وبيجري جنبك وشايف المايه ويروح داخل فيها زي ال.... ويغرقك انت وعربيتك .. وعلى ما تستوعب وتيجي تشتمه يكون روح .. ولو عنده شوية من الاحمر يرفع ايده ويعتذر وهو كاتم الضحك ..يالله هي دي بلدنا ودول احفاد الفراعنه .

Anonymous said...

على فكره اسكندريه كمان فيها اماكن بتغرق مش من المطره بتغرق لما حد تقع منه كبايه ميا

heba said...

ومين سمعك يا كوكو ياريت الواحد يعرف يستمتع بالمطرة ويمشي كده وهو فرحان بالدنيا اللي بتمطر ، إلا لازم يتعكنن عليه ويتعكر مزاجه وخااااااااصة الطرطشة اللي من اصحاب العربيات والطينة بقى والواحد ماشي يلاقي نفسه ... هوب .. غرز في حتة .. ربنا يستر الشتا ده

Unknown said...

اسكندريه تنور
بس كده كوكو حيشرف في الشتا بس ؟؟
ويسيب صيف اسكندريه ؟

koukawy said...

اهلا بيك يا مشمش نورت العشه00
و كوكو فعلا مش بيحب اسكندريه في الصيف
بس بموت فيها في الشتا00