Friday, February 23, 2007

عم حماد الصياد 00

اللي فيكوا كان متابع برنامج 90 دقيقه الأيام اللي فاتت
كان هيشوف حاجه انا شخصيا لما سمعتها ذهلت و اتخضيت
لأني ما كنتش اعرف انها موجوده 00 و الحاجه دي
هي عائلة عم حماد الصياد ؛ اللي راحت مراسلة البرنامج
ساره اسامه اللي بشكرها جدا علي مجهودتها 00
راحت في النيل و قعدت وسط اسرة الصياد ده و اكلت
معاهم و عاشت مأساتهم اللي اتنقلت لنا بعد كده علي الشاشه
و المأساه هي 00 ان الصيادين دول تحت خط الفقر بحوالي
100كيلومتر 00 متخيلين ان الناس دي بتغمس العيش الحاف
ده ان لقوه في مية النيل ؛ متخيلين ان عم حماد ده عنده ورم في عينه
بقاله 15 سنه لدرجة انه اتعمي و بيشوف بعين واحده 00 متخيلين
ان الناس دي عيله مكونه من اربع افراد بيناموا جوه المركب بتاعة الصيد
و بيتغطوا بتلت كوفرتات 00 متخيلين ان بناتهم علي وش جواز
و عمرهم ما خرجوا من النيل 00 متخيلين انهم بيناموا بالأيام من غير
عشا 00 متخيلين انهم تعدّي عليهم فتره حتي النيل يعاملهم بقسوه
و ميطلعلهمش سمك 00 طب متخيلين بقي انهم بعد كل ده
بيقولوا الحمدلله احنا احسن من غيرنا 00 سبحان الله 00
لما سألوهم نفسكوا في ايه قالوا نفسنا نعيش في شقه 00
نفسنا نتعلم 00 يا جماعه احنا عندنا في البلد بلاد تانيه منسمعش عنها
حاجه بلاد او دويلات او مجتمعات صغيره جوه البلد متعرفش يعني
ايه كهربه و لا يعني اي تليفيزيون و لا يعني ايه حمام00
ناس بحس انهم عايشين تحت الأرض 00 ناس مجهولين
مش موجودين علي الخريطه ناس بدون شهادة ميلاد
ناس عايشه ببركة و رزق ربنا 00
انا الحقيقه كانت اول مره ليا اسمع عن حالة سكان المراكب
بس اعرف ان في مناطق مدفونه محتاجين نحفر و نطلع الناس اللي فيها من تحت
الفقر و الجهل 00 يا تري سؤال برئ هما الناس دي
بعد الاهمال و القهر اللي هما فيه مطالبين انهم يكون عندهم انتماء
لبلد متعرفش عنهم و لا عن احتياجاتهم اي شئ ؟؟؟؟
اّخر حاجه عايزه اقولها ان النهارده و انا بتمشي بين البلوجات
لقيت صديقه بلوجويه كاتبه بوستايه في نفس الموضوع
بعنوان العائشه في الأحلام ؛ ساقط قيد
و سألتها ان كانت متمانعش اني اعمل لينك للبوست
بتاعها لمن يهمه الأمر00
نهاية 00 بدعي من كل قلبي للدويلات المفقوده و المجهوله
بالصبر و ان ربنا يقدرنا نكون خير للناس دي ؛ زيّ
الناس الكتير اللي شافت عم حماد الصياد و عيلته
و بينت حكمة ربنا في فرض الزكاه 00
و ان لو كل فرد دفع الزكاه اللي عليه مفيش مسلم
هينام جعان او بردان00
سلام

5 comments:

رفقه عمر said...

الحمد لله انا اول واحدة اعلق كويس انى مش شوفت الحلقه دى كنت زمانى دلوقتى مكتئبه موضوعك جميل وطريقتك ممتعه جدا ربنا ينتقم من اللى واكلين البلد ومعتربنها عزبتهم حسبى الله ونعم الوكيل فيهم وبجد دة كتير عليا ان يكون اسم المدونه بتاعى موجود على البوست الجميل دة جزاك الله خير وانا عجنى كلامك وان شاء الله هاتلاقينى لازقه ليكى هنا

أميرة البلطجية said...

جزاكي الله خيرا يا كوكي ع الموضوع
ربنا يلطف بالعباد

koukawy said...

رفقة عمر 00 شئ يسعدني انك تلزقيلي و كتير علي انا ان اسمك عندي في البوست و حقيقي العشه نوّرت
************************
بلطجيه 00 يا رب يسمع منك ربنا

belady said...

بصراحه انا عارف الموضوع دا من زمان بس اللى اندهشت له ان الست بتقول انا بستحمى فى المركب طب ازاى ؟؟
انا فاكر ان صلاح السعدنى عمل فيلم عن الموضوع دا وانا اتفرجت عليه بس العيب مش على البلد العيب على اللى عايشين جوا البلد ومسلمين مفاتيحها للى سارقينها ولسه خايفين على نفسهم وعلى مستقبلهم وعلى عيالهم وعلى مستقبل عيالهم ومش شايفين ان خلاص لا عاد فيه مستقبل ولا عاد فيه حاجه ينخاف او ينبكى عليها

shams said...

يا بنتي لو فضلت تكتبي عن كل فئة شوية مش هتخلصي كلام وهتكتبي من هنا للسنة الجاية لكن للأسف لا حياة لمن تنادي

محدش حاسس بينا .. لأن ملناش صوت