Wednesday, January 31, 2007

مناخيره و الأوسكار 00جزء 2

انا بكتب البوست ده بناء علي طلب زميلتنا البلوجويه ضربة شمس
لأنها طلبت مني مختصر عن قصة الفيلم اللي كنت كتباله بوست بعنوان
مناخيره و الأوسكار00
perfume..the story of a murderer
ده اسم الفيلم00و بالمختصر المفيد الفيلم بتجري احداثه
في فرنسا ايام العصر الملكي و التدهور اللي كانت فيه فرنسا
بيتولد واحد من و هوبيبي امه بتولده في بيئه قذره
و مرمي علي الأرض و حواليه كل ما تتخيلوا من الروايح
و ده بيخليه صاحب حاسة شم قويه جدا ناحية كل شئ
و لو شم الحاجه مره واحده يقدر انه يسترجع ريحتها علي طول
و بتتطور حياة الشاب ده من مكان لمكان00و يشتغل شويه
مع واحد من اللي بيركبوا عطور و بينجح جدا 00و لكن
الموضوع بيتطور معاه لحاله مرضيه بتدفعه انه يموت الناس
عشان يعمل ايسانس من ريحتهم00
كفايه كده 00لأن الحكي مش زي الفيلم00لازم تشوفوه
سلام

ثقافة الحلل00

شئ عجيب موضوع ارتباط الأكل بكل و اي حدث بيحصل في الحياه
عند الشعب المصري00يعني مثلا اي عيد سواء عيد مسلمين
او اقباط تلاقي الأكل مرتبط بهذا العيد00العيد الصغير فيه كحك
و الكبير فيه لحمه00و عاشوراء فيه عاشوره و مولد النبي
فيه حلويات و شم النسيم فيه فسيخ و رنجه وبصل و الذي منه
و مايمنعش لو فيه اكله تخص عيد الشرطه؛
و عيد العمال ؛ و عيد وفاء النيل 00
ده بخصوص الاعياد00اما بخصوص الفسح و الخروجات
فتلاقي ناس الحلل ما بتفارقهاش و مرتبطين بالحله ارتباط شرطي
هي تسمع كلمة فسحه او جوزها يقولها00احنا بكره هنخرج
يا وليه تلاقيها قامت منومه مغناطيسيا ناحية الحلل و
نايمتهم جانبها في السرير عشان متنساهم بكره
و هي خارجه00حاكم الخروجه من غير حلة المحشي متحلاش
و يا ريتها حله المحشي بس لأ ده المحشي و مكملاته00
و تفرش و تاكل في اي حته و مفيش احترام للمكان اللي هما فيه
لأنهم ياكلوا و يرموا علي الأرض00و فيه اماكن مش لازم
يعني الواحد ياخد معاه اكل 00زي مثلا اي معرض يفتح في ارض المعارض
عايزاكوا تروحوا تتفرجوا00 الناس مش رايحه تستفيد او تشتري
لأ رايحه و معاها الحلل و الشفشق ما هو برضه الواحد يبلع بعد الأكل
نفس الشئ في الجناين الأسماك و الحيوانات 00الخ الخ 00هي القضيه هنا
انه لكل مقام مقال و لكل مكان اكله 00ما هو لو الخروجه هطول
و انت بتجوع بسرعه مثلا خد معاك سندويتش او
بسكوت اهي حاجه سريعه 00
و في نفس الوقت متوسخش الدنيا حواليك و تقوم و تسيبها00
ما هي اصل الدنيا مش ناقصه مهملات و زباله 00و حلل
سلام

Tuesday, January 30, 2007

تلت ريشات00

الحلقه اللي فاتت00
كوكو فاق من الحلم
الحلقه دي00
كوكو الكميل معرفش ينام تاني من بعد ما صحي من الحلم
و فضل يفكر و يفكر 00و زهق من القاعده في السرير
فسند علي السرير و الكراسي اللي في الأوضه عشان يقوم
يتمشّي 00و هو ماشي عدّي من قدام المرايه فلفت نظره
جسمه اللي من غير ريش00فقرّب كوكو الكميل علي المرايه
يتفرج علي نفسه و يلعب بجناحه في التلت ريشات الكيميلين
اللي اتبقوا علي راسه00و قعد كوكو يكلم الريشات دول
و يقولهم00انتوا دلوقتي اصحابي الوحيدين اللي اتبقيتوا معايا
و ماسبتونيش اوعوا تقعوا انتوا كمان خليكوا جامدين 00و قعد كوكو
يدندن اغنيه يغنيها لريشاته و يقول00تلت ريشات يا وحشني
تلت ريشات00في راسي ريشات00ريشات كومال 00تلت ريشاااات
و فجأه كوكو سكت و حس بحاجه غريبه00
و سمع كوكو صوت جاي من جواه بيقولوا00يا كوكو يا كميل
لازم تتماسك و متفقدش الثقه في نفسك و لازم تخلّي عندك
رضا بشكلك ده و متتمردش عليه00و يكون عندك ايمان
ان ريشك الكميل هيطلع تاني00و يكون عندك صبر و متستعجلش انه يطلع
كل ما هتعمل حاجات كميله كل ما ريشه عندك هتطلع 00كل ما تعمل حاجه كميله
كل ما ريشه هتطلع00افتكر كويس الرضا و الايمان و الصبر00
الرضا و الايمان و الصبر00و ابتدي الصوت يعمل فيد اوت و كوكو
يقول انت مين استني استني00لكن الصوت كان مشّي00
و راجع كوكو الكميل الكلام جواه تاني 00و قال لنفسه00
ايه رأيك يا كوكو يا انا يا كميل في الكلام اللي سمعته
انا حاسس انه كلام كميل و لازم التزم بيه00و فكر كوكو
شويه و قال00انا عشان افضل فاكر التلت اسامي اللي قالي عليهم
الصوت انا هسمّي كل ريشه من ريشاتي بأسم 00و بص
كوكو للريشات الكميله و قال00انتي يا ريشه ياكبيره
هسميكي الايمان و انت يا كميله يا وسطانيه الرضا
و الصغنونه خالص هسميكي الصبر00و طبطب كوكو الكميل
علي ريشاته في نفس الوقت خبط الباب و دخل الكوكتور00
هاه يا كوكو انت كويس اهو تقدر دلوقتي ترّوح و تبقي تجيلي كل
يومين عشان اغيرلك علي الجروح و اطمن عليك00
رد كوكو 00شكرا يا كوكتور يا كميل بس ممكن اطلب منك
طلب انا ممكن اّخد الملايه اللي علي السرير الف بيها نفسي
و ابقي ارجعهالك لحسن انا بردان اوي؟
رد الكوكتور00طبعا يا كوكو 00و اخد كوكو الملايه و سلم عالكوكتور
و لف و خرج من الاوضه بس افتكر حاجه و لف و رجع للكوكتور
و قاله00 ممكن اطلب منك يا كوكتور طلب تاني 00رد الكوكتور
اتفضل ياكوكو انت تؤمر00قاله كوكو 00انا مكسوف منك يا كوكتور بس انا
محتاج استلف منك 50سينتكوبورو00عمله الكوكو زي القرش00
عشان انا فلوسي كانت في الكيب و الكيب كان في البدله و البدله راحت
في الحادثه اللي مش كميله و انا لازم اركب حاجه عشان مش اعرف اطير
و رد عليه الكوكتور00عيب يا كوكو انت مكسوف من ايه
ده برضو الكوكوهات لبعضيها و مد ايده في جيبه
و طلعله الفلوس و سلم عليه و مشّي كوكو و هو مستغرب طبعا
كل حاجه حواليه و بعد ماكان بيبقي طاير بعيد عن الأرض
و زحمتها و ارضها اللي مش كميله بقي ماشي ركليه الكميله
تتوسخ و الشحاتين تقف قدامه00ووصل كوكو محطة الأوتوبيس
ووقف كوكو يستني الأوتوبيس و هو لافف نفسه بالملايه و بيقول
في نفسه00يا تري يا كوكوبيس هتبقي كميل و تيجي بسرعه و لا لأ
و فضل كوكو واقف يبص حواليه00و فجأه جت عينيه الكميله
في عينين كيميله تانيه00
سلام

حاجات تفّور الدم 00جزء 3

مش قولتلكوا ان للحديث بقيه 00من غير مقدمات لأني قولت المقدمات المرتين
اللي فاتوا00هدخل في حرقة الدم علي طول00
اولا00 يا تري ليه الناس بتستني بعد ما تنزل من التاكسي تبتدي تتطلع
الفلوس من جيبها 00مش اللي راكب ده عارف من اول ما ركب انه
هيدفع و لا فاكر مثلا ان السواق هيعملهاله بجميله و يعزمه علي الركوبه
شئ غريب جدا 00تلاقي التاكسي وقف في نص السكه او علي ملف شارع
و بينزل سيادة السفير اللي راكب و يقعدوا بعد كده يتاحوروا في الفلوس
مش الناس المفروض تراعي الناس اللي زيّها
ثانيا 00الموضوع ده يخص الجنس الناعم00و هو ان ليه مش كل واحد
يحترم نفسه و يخلي عينيه في وشه و بلاش يبحلق علي كل واحده رايحه و جايه؟
الموضوع ده علي فكره سواء كانت البنت عامله شئ ملفت او مش عامله
في ناس كده اول متشوف بنت تبحلق و عينيها تلزق زي مايكون شاف
كائن فضائي مافيش اخوه علي الأرض 00و الغريبه ان لو الواحده
تحرجه و تبصله بصه محرجه ولا حاجه و لا بتفرق و كأنها بتبص لحد تاني
لو كل واحد فكر في امه او اخته او مراته ؛عمره ما هيبص علي واحده
حتي لو هيا عامله حاجه ملفته لأنه خليه متأكد انه هتتردله00و كما تدين
تدان
ثالثا00سمه عامه عدم احترام المواعيد 00تدّي ميعاد لحد الساعه 7
يجي هو 7 و ربع 7 و نص مش مهم دي كلها نص ساعه مش حاجه
و لما تيجي تتفق مع حد علي ميعاد 00طب هنتقابل الساعه كام00
يعني العصريه كده00طب ما هو يا بشمهندز العصر ده من الساعه 3 لغاية
الساعه 5 و نص00نفضل بقي واقفين مستنين بعض الساعتين دول؟
مفيش قيمه للوقت
رابعا00علي نجوم اف ام00بسمع برنامج بيستفزني اوي ؛ البرنامج عباره
عن بنات و ستات بتتصل بمزيع 00بدون ذكر اسماء00و تقعد تحكيله علي
مشاكلها الشخصيه اوي 00مش دي بس المشكله ؛ انما الطريقه في عرض
المشكله فيها شئ من عدم الاحترام و الدلع علي المذيع 00و تسمع بقي
قصص ليها العجب لدرجة ان وشك يحمر00انا بس سؤالي محدد00
هما ما بيتكسفوش؟
خامسا00يا جماعه حرام عليكوا شوهتوا صورة المحجبات و المنقبات خالص
كلامي ده للبنات الحلوين اللي مرميين في الشوارع في مناظر فظيعه00
تلاقيها متشعلقه في دراع سوبر مان بتاعها و هاتك يا غرام00
تلاقيها لابسه بنطالون هيفرقع من كتر ماهي محشوره جواه00
تلاقيها في شله لطيفه من الشباب و الشابات و ماشيين في الشارع
يهزروا بايديهم و يضحكوا بصوت عالي يصحي الأموات00
تلاقيها بتشرب سجاير00
او ترفع النقاب و تدخل الشيشه من تحته00
طب حرام عليكوا الستات المحجبات و المنقبات المحترمات تخدوهم
معاكوا في الرجلين00
كفايه كده
سلام

Monday, January 29, 2007

ان كان اللي بيتكلم00

ان كان اللي بيتكلم مجنون00الي بيسمع عاقل
للأسف الاعلانات التجاريه بقت شئ منفر و بدل ما يكون دور الاعلان انه
يشجعك انك تشتري المنتج بالعكس يسد نفسك من سوء الاسلوب المستخدم في الاعلان
ما هو اصل الاعلان ده فن مش اي حاجه و خلاص00بس انا احب اركز اكتر في البوست ده
علي نوعيه معينه من الاعلانات اللي انا هطبق عليها المثل
و هي00التي في شوب
اللي هي اصلا بضاعتهم كلها صيني 00اكيد عارفنهم 00و لو حد ميعرفهمش
يقعد شويه و يستحمل اي فيلم علي قناة ميلودي افلام و يستني كده في الفواصل
ويشوف مدي فقر و تفاهة الماده الاعلانيه المقدمه و اللي هو مثلا الانتاج بتاع
الاعلان كله علي بعضه يوم ما يضربه الدم يبقي 250 جنيه مثلا00
ده غير الغلاسه اللي بيستعملوها في شرح المنتج مثلا كان اعلان منهم عن
طقم صيني و كان اللي بيتقال00الحله اللهلوبه اللي تطبخي فيها و انتي
مطمنه و لو اتصلتي دلوقتي هتحصلي علي الطاسه الشقيه اللي كلها حنيه و معاها مطبقيه
غنيه بالوانها الزكيه000 غير بقي ان الاعلان مش ممتع ازاي ممكن حد يشتري
حاجه ماشفهاش 00الغريب ان انا بسمع ان ناس كتير بتشتري من الحاجات ديه
و الحقيقه مش عارفه ازاي ممكن ان الواحد يثق فيهم 00عشان كده دايما بقول
ان كان اللي بيتكلم تي في شوب00الي بيسمع يقفل التي في احسن
سلام

ايش تعمل الماشطه00

ايش تعمل الماشطه00في الوش العكر
اكيد في حكمه ان ربنا خلقنا بنعجز و شكلنا بيتغير و مش بنفضل سابتين
علي شكل واحد طول العمر 00فكل سن و ليه جماله00 فظهور التجاعيد
و ان الشعر يبيض و النظر يضعف مش حاجات كخه و لا عيب
و لو كل حد عجز ما لجأش لعمليات الشد و النفخ و الفرد
و الذي منه هيفضل طول عملره شكله حلو بس هتبقي حلاوه مختلفه عن السنين اللي قبلها
انما تلاقي واحده كركوبه00بدون ذكر اسماء و هما اصلا مش واحده00تلاقيها
شدت مره و اتنين و عشره لما بقي شكلها زي العفريت و تحس انها بقت مومياء
نسيوا يدفنوها 00و لسه عندها امل انها تشد تاني 00فلازم علي طول يتقالها00
ايش يعمل الشد000في الوش ال000تيت
سلام

كوكو في المحكمه

الحلقه اللي فاتت00
كوكو قعد في العياده و حطوله محاليل
حلقة النهاره00
كوكو الكميل لابس بالطو المحاماه و داخل بسرعه قاعة المحكمه 00يروح ناحيه قفص الحجز
و يسلم علي موكله اللي هو واحد من عائلة الكوكوهات الكبيره 00و بعدين يروح علي مكان قعاده و يفتح الشنطه الكميله و يطلع ورق كتييييييييييييييييييييييير و يحطه قدامه و بعدين يطلع ازازة بارفان ماركة كوجو و يفس علي نفسه
كام فسه من البارفان و بعدين يرجعها في الشنطه؛كوكو يخبي و شه بكناحه الكميل و يقول00يارب وفقني يارب اني اجيب للمظلوم حقه و متلجلجش و اقنع القاضي بوجهة نظري 00في نفس الوقت يدخل الحاجب القاعه و يقول محكمه
و بعديه المستشارين و القاضي و يقعدوا كل واحد مكانه 00و تبتدي الجلسه و يفضل كوكو يسمع كويس قوي
و هو مركز و في النص يكتب حاجات علي ورقه قدامه 00و اخيرا جه دور مرافعة كوكو الكميل 000سيادة الكاضي الكميل حضرات المستشارين اللي جنب الكاضي الكميل 00ان موكلي الذي ترجع اصوله الي الجنس الكوكوهي الذي يتسم بالبراءه و الطيبه والكماله لا يمكن ان يرتكب مثل هذا الفعل المشين00تصفيق حاد من الحاضرين
و القاضي يخبط بالشاكوش اللي في ايده علي الطرابيزه00كوكو يكمل00الشهود شافوه ايها الكاضي الكميل و هو واقف علي جزع شجره في حديقه الأندلس في نفس وقت ارتكاب الحادث فهو برئ من سرقه الحبوب من عش المجني عليه و الله برئ براءة الذئب من دم ابن يعقوب ؛ برئ؛برئ؛برئ00تصفيق مره تانيه لكن اقوي من المره الأولي و القاضي يخبط اكتر بالشاكوش بتاعه و يخبط و يخبط0000فجأه كوكو الكميل يقوم مفزوع من الحلم و يبص حواليه يلاقي نفسه لسه نايم في سريره في المستشفي و في ايده المحاليل 00و فاق كوكو معرفش ينام تاني و قعد يفكر هو ازاي هتعدي عليه الفتره دي لغاية ما يطلعله ريش 00
كاكان

Sunday, January 28, 2007

ميكروباصات حتي الثماله

انا كان في نيّتي اني اكتب البوست ده جزء تالت لحاجات تفوّر الدم00بس من كتر الحواديت بتاعة الميكروباصات قررت اني اخصص البوست ده للميكروباصات00 اللي بيحصل فيها حاجات تحرق الدم مش تفوّره بس
خدوا عندكوا000000000
اولا00الاستغلال اصبح سمه بيتفق عليها سواقين الميكروباص و الغريبه ان ضميرهم مش بيوجعهم و بيبجحوا بالنصب و السرقه؛ فمثلا الميكروباص اللي بيجي من اّخر الهرم للجيزه المفروض ان اجرته 50 قرش طول الخط 00بس تلاقيهم ايه يقسموها يعني مثلا من اّخر الهرم لشارع العريش ب50 قرش و بعدين من العريش للطالبيه 50 قرش 00قيس علي كده لاّخر الخط اللي هو في الجيزه00 انت لو جاي من اّخر الهرم للجيزه هتلاقي نفسك دافع اكتر من الضعف اللي هو تزوّد عليهم شويه و تاخد تاكسي ماهي مش فرقه كتير00
ثانيا 00 و الموضوع برضه عن الأجره 00 اللي بيركب محطه زيّه زي اللي راكب طول الخط و يقولك اصل الأجره موحده يا فندم طب مدام موحده يبقي انت هتكسب يبقي ليه تقسمها محطات من الأول؟؟؟؟؟
ثالثا 00تبقي راكب و المنادي اللي واقف علي الباب بينده علي المكان اللي رايحه و بيقول العربيه فاضيه00تعالوا نبص كده جوه العربيه هتلاقي الناس واصلين للسقف من كترهم 00و بيبقي المكان الوحيد اللي فاضي 00علي حجر الناس اللي راكبه
رابعا 00 بدعوكوا لنزهه من الجيزه للهرم في واحده من عربيات الميكروباصات البيضه الفولكس 00و جرب كده تقول للسواق يوطي صوت الكاسيت و اسمع من المنقي خيااااار 00و يأما تسكت و تضطر انك تفقد حاسه السمع و تصدع
يأما تخدك الجلاله و الكرامه و تشتمه و تنزل و انت الخسران و شوف بقي هتركب امتي تاني00
خامسا 00لو في كذا ميكروبا ص وقفين في حته عشان يحملوا و انت فكرت انك تروح تركب ابقي اعمل حسابك و انت نازل من البيت في طقم تاني غير اللي انت لبسه لأنه ممكن في خناقة السواقين و شدهم ليك انك تركب العربيه دي00لأ الدور علي دي 00من الممكن ان هدومك تتقطع00
سادسا00 ساعات تبقي راكب و قايل للسواق انت هتنزل فين و يجي في حته يقولك00 معلش انا اسف يا استاذ انا افتكرت اني مروّح هوقفلك ميكروباص تاني تكمل معاه 00لا تعليق
سابعا00 و انت واقف مستني مواصله ممكن تلاقي كل المواصلات اللي معدّيه رايحه مكان واحد 00و بقيت الأماكن ملهاش مواصلات و تفضل الناس اللي واقفه مستنيه المواصله اللي مفيش منها تزيد و تزيد و لما تيجي المواصله تلاقي الناس بتدوس علي بعض و بيضربوا بعض 00كل ده بسبب ان مفيش تنظيم00و الكلام ده بينطبق علي الأتوبيسات كمان فتلاقي مثلا الأوتوبيس رقم 88 جه اكتر من تلت مرات ورا بعض و 99 مجاش 00هما الحاجات دي مش المفروض يبقي ليها مواعيد ثابته؟؟؟؟؟؟؟؟
ثامنا 00بلاش تلبس حاجه بيضه او لونها فاتح او عليها القيمه لو عمل في حسابك تركب ميكروباص لان اضمنلك انك هتندم اوي لما هدومك تتبقع و تتشبك في حاجه و تتقطع00فخدها من قاصرها و بلاش احسن
و اخيرا و ليس اّخرا00 تلاقي يافطه او اكتر مكتوب عليها التدخين ممنوع او عذرا يرجي عدم التدخين 00و تلاقي افندي قاعد تحت اليافطه و مولع سيجاره00علما بأن التدخين ممنوع في المواصلات و يعاقب عليه القانون بدفع غرامهههه00و فكر كده تقوله يطفيها و انا مش هقولك علي ا للي هتسمعه
يارب0000000000000
سلام

Saturday, January 27, 2007

الفاضي يعمل 000

الفاضي يعمل000قاضي
المثل ده بينطبق علي كتير من الفاضيين و اللي ما وراهمش حاجه في حياتهم تشغلهم00
بس انا نقيت من الناس الكتير دول فئه معينه من فراغهم بيملوا الوقت و بيحسوا كمان بأهميتهم
و هما 00السياس00جمع سايس00اللي هو تلاقيه مطرح مطروح تركن جاي و بيمسح الأزاز
و يبقي سايب العربيه و لا معبرها و لا انت عايزه يعبرها اصلا بس اول ما يشوفك جاي عالعربيه
يجري يغرقهالك ميه و يقف يعطلك و يلحوسلك الازاز اي حاجه بس عشان تديله اللي فيه القسمه
و ده نص من السياس00في نص تاني منهم بقي ظاهره تستحق المتابعه و هما00الي تلاقي واحد
واقف في نص الشارع و في بقه سفاره و في مكان مفيهوش اشاره من اصله و ده واقف عامل اشاره خاصه ليه وواقف يصفر و يوقف العربيات و يشتم الناس اللي بتحلقله و تعدي و دول بقوا كتير 00المشكله بقي انهم حاسين بأهميتهم و لا لما يكون الواحد منهم ظابط مرور 00حقيقي الفاضي يعمل قاضي
سلام

شياكه و بس00


اللي شجعني اتفرج علي الفيلم هيا الممثله العبقريه اللي بحبها من زمان ميرل ستريب
هو الحقيقه ان الفيلم مقدرش اقول انه وحش بس هو مفيهوش فكره هو فيلم لايت
عادي جدا ماشي علي وتيره واحده بس اللي لفت انتباهي اوي 00شياكة الأستاذه ميرل ستريب
اللي متتوصفش 00لأنها بدأه من طرطوفة شعرها لصباع رجلها الصغير
و كمان اللوكيشن و ديكوراته شيوكين جدا برضه00بس في العموم هو فيلم اجتماعي عادي
و احب اقول مثل جه علي دماغي بمناسبة اني بقول ان الفيلم مقدرش اقول عليه و حش
ان الأعور احسن من الأعمي
و الحدق يفهم بقي مين الأعور و مين الأعمي000000
سلام

Friday, January 26, 2007

حاجات تفوّر الدم00جزء 2

الحقيقه اضطريت اكتب جزء تاني من البوست ده و يمكن يبقي في تالت و عاشر و ده بسبب ان الحاجات اللي بتحرق دمي و تعصبني كتير و مبتخلصش 00خد عندك00
تبقي واقف في مكان تدفع و المفروض ان فيه اختراع من ايام العصر الحجري اعتقد اسمه طابور ده لو انا فاكره لأن
طبعا انا بقالي كتير مشوفتوش فخايفه اكون نسيت اسمه و لا حاجه00
و اضربلكوا مثال00المترو مثلا ممكن تفضل واقف قدام الشباك و اجيال تعدّي عليك و تلاقي شعرك ابيّض عشان تشتري تذكره00 تلاقي ناس تحط ايدها فوق ايدك و انت حاطط ايدك عشان تدفع00او مثلا فيه فتحه مدوره كده قدام الراجل في الازاز الفتحه دي عشان انت تكلم الراجل منها فتبقي انت حاطط ايدك تحت و تلاقي واحد يجي و يحط ايده في الفتحه اللي فوق00طب بالله عليكو 00علي رأي عمرو خالد00 شئ يفقع المراره و لا لأ00
في اختراع تاني غير الطوابير اسمه اشارات و ده بيكون في العربيه حتي لو كانت العربيه ب3جنيه00بس الظاهر
الناس فاكره ان الاشارات دي حاطوها في العربيه كماليات او زيّ الفواحه مثلا محطوطه ديكور 00تلاقي ناس تسوق و مبتستعملش الاشارات دي اصلا غالبا الكلمه مش عندهم في القاموس 00و ناس تانيه يبقي الّي قدامها مدّيها اشاره من فتره و تلاقي اللي ورا كابس برضه00شئ عجيييييب
تكمله لموضوع العربيات برضه00 الكلاكسات00تلاقي واحد ماشي في الشارع لواحده و عمال يكلكس طب ده يبقي تصنيفه مريض و لازم يخش المصحه و لا لأ00واحد تاني واقف في الاشاره بيكلكس 00طب ايه ؟ تفتكر سعادتك
ان الاشاره هتفتح لما نيافتك تقعد تكلكس00شئ اعجبببببببببببب
خلينا في الشارع برضه000واحده واقفه تحت العماره 00يا بسمااااااااااااااااااااااااااااااااااااااااااااااااا0000يا بسما ا ا ا
خد عندك كده ربع ساعه عقبال ما بسمه تحن علينا و ترد00لا تعليق
في اي مواصله عامه 00تلاقي الشباب اللي يجرّوا جبال قاعدين و البنات بتقوم تقف عشان تقعد راجل عجوز او واحده حامل او حد عيان00علما بان في كراسي قدام للمعاقين و المسنين و تلاقي الشباب قاعدين و مسقعين ودانهم00طب مش عيب دي رجوله و شهامه برضه
كفايه دلوقتي 000و انا متأكده ان للحديث بقيه
سلام

كوكو اتسحل00

الحلقه اللي فاتت00
كوكو لف لقا في وشه عربيه كبيره من اللي مقشتها حديد
حلقة النهارده000
و صرخ كوكو اه ه ه ه 00و فجأه كوكو الكميل حس نفسه ف الغساله الفول اتوماتيك و قعد يصرخ
و فلت كوكو من المقشه بتاعت العربيه بعد ما عدت فوقيه و سحلته و مسحت بيه الأرض
في نفس الوقت عربيه معدّيه داست في الميه اللي علي الأرض اللي نزلتها عربيه التنضيف اللي مش كيميله
راحت مطرطشه عليه ميه و ياعيني دخلت الميه في عينه الكميله و حرقته فقال كوكو الكميل 0اه يا عيني يا كيميله فجه يمسح عينه بكم البدله و اتخض و قال00ايه ده هي البدله راحت فين؟ فتح كوكو عينيه و هيا لسه بتحرقه لقا جناحه بلبوص مفيهوش ولا ريشه00 راح بص بسرعه علي ضهره ملقاش و لا ريشه برضو و اكتشف كوكو ان مش فاضل له و لا ريشه الا 3 ريشات كومال جنب عرفه الأحمر الكميل 00كوكوصعبت عليه نفسه الكميله
و قعد علي الرصيف يفكر و يقول لنفسه00يا تري يا كوكو يا كميل هتعمل ايه في ميعاد الشغل اللي عندك 00و قام كوكو حاول يطير فراح واقع علي الأرض 00ففكر كوكو الكميل و هو واقع علي الأرض انه يتصل بالأستاذ خيّور و يحكيله
و جه كوكو يحط ايده في كيبه الجميل ملقهوش و قال00ييييييي الكوكوبايل كان في كيبي و كيبي كان في البدله
و البدله في المقشه 00و برق شويه كوكو و راح قعد يعيط اوييي000و لقي واحد معدّي فراح نادهله 00لو سمحت
لو سمحت00فلف له الواحد ده فقاله كوكو00ممكن اتكلم من الكوكوبايل بتاع حكرتك دكيكه واحده بس 00ووافق 00 قعد كوكو الكميل شويه يفكر بدماغه الكميله عشان يفتكر نمرة الأستاذ خيّور 00و أخيرا افتكر0000الو انا كوكو الكميل يا استاذ خيور 00انا اصلي عملت حاكسه و قاعد في الشارع و بعيط مش عارف اعمل ايه و كل حاجه ضاعت
مني00ميرسي يا استاذ خيور 00و قفل كوكو مع الأستاذ خيور و رجع الكوكوبايل لصاحبه و قعد يستني المنقذ اللي هيبعتهولوا الأستاذ خّيور 00و فضل كوكو الكميل قاعد علي كنب في الرصيف زيّ الغلبانين و شكله مسكين بالتلت ريشات اللي علي راسه و كل ما عربيه تعدّي تجيب عليه هوا فكسمه يقشعر و سنانه الكميله اللي باقيين في منقاره
يتكتكوا00و اخيرا ظهر علي الأفق في السما حاجه من بعيد و فضلت تقرب لغاية ما كوكو عرفه من اليونيفورم بتاع الشغل اللي لونه احمر وفيه خطوط صفرا00اه وصل المنقذ00 بس كوكو الكميل بص له و قال له انت هتنقذني ازاي ؟ انا مش قادر اطير00فرد عليه المنقذ 00متقلقش يا كوكو يا كميل انا جايب معايه حاجه كميله عشان انقذك بيها00و دخل المنقذ ايده في جيبه و راح مطلع حاجه مطبقه و قعد يفرد فيها لغاية ما كوكو عرف ان دي طياره ورق و قاله كوكو شوف يا منقذ يا كميل انا مش قادر اطير تقوم تجيبلى طياره علشان العب بيها 00؟على فكره انت مش كميل انت جاى علشان تغظنى00رد المنقذ00بص يا كوكو يا كميل انت هتتشعلق من منقارك الكميل في الطياره و انا همسك الدوباره بمنقاري و اطير و هشدك00فبص له كوكو و هز راسه الكميله انه موافق00و فعلا طار المنقذ بس كوكو ماكانش لحق يتشعلق00و قعد كوكو يزعق بصوت عالي00استني استنييييي00و سمع المنقذ صوته فبص لقاه لسه علي الأرض و حاولوا تاني كوكو شعلق منقاره وقعد يتجرجر على الارض ويخبط الميه اللى على الارض لحد ما تعلم التزحلق على المياه وبقى يلعب وسرعة المنقذ بتزيد لحد ما كوكو اترفع حبه حبه من على الارض0000
قعد كوكو يتفرج حواليه و هو طاير ويبص علي صحابه اللي عندهم ريش و يزعل و يقول 00كان زماني بطير انا كمان0و فجأه قال المنقذ لكوكو00العياده هناك اهيه و الشباك مفتوح امسك يا كوكو كويس عشان هزود السرعه00و فعلا زود المنقذ السرعه و فوووووووووووو0000دخل المنقذ من الشباك بس كوكو الكميل اتحرك غلط راح طراخخخخخخخخخ00خبط في الازاز و داخ و راح واقع في البكونه اللي تحت 00و بص المنقذ من الشباك هو و الكوكتور لقوا كوكو واقع تحت 000راح المنقذ نادي علي كوكو00انا هحدفلك الدوباره بتاعة الطياره و امسك فيها بمنقارك00و حدف المنقذ الحبل لكوكو و رفعه 00و مسح كوكو الحيطه بجسمه الكميل و هو طالع 00و اخيرا وصل كوكو الكميل عياده الكوكتور و كان خلاص مبقاش فيه حته سليمه و قعد يهزي من التعب و يقول00 انا خلاص مبقتش كميل 00ايهئ ايهئ مبقتش كميل و نايموه الكوكتور علي سرير و علقّله محاليل و عالجله الحتت المتعوره و قال له00يا كوكو انت هتفضل طول عمرك كميل و انشاءالله كله هيبقي كويس بس انت لازم تبات في العياده النهارده يا كوكو لغاية بكره لما تبقي كويس00و روّح المنقذ و فضل كوكو الكميل نايم و في ايده المحاليل0000
كاكان

يا عيني يا كوكو00

الحلقه اللي فاتت00
كوكو مطلوب في مهمه سريه
حلقة النهارده00
طبعا كان لازم كوكو اول ما يعرف انه مطلوب في مهمه سريه انه يبقي شيك و علي سنجة عشره
فراح كوكو و هو مروّح من الشغل دخل اكمل محل بدل في المنطقه و اشتري بدله محصلتش
و معاها جزمه كميله و اشتري جيل00زودوا نقطتين علي الجيم00عشان ريشه الناعم الكميل
و روح اتعشي و قعد مع انكل كاكا شويه و نام00نام كوكو يحلم بمستقبله الباهر اللي هيكون لو
نجح في اداء المهمه السريه00و صحي كوكو منفوض يا عيني علي صوت انكل كاكا و هو بيكاكي
و يصحي الناس 00فقام بنشاط اتوضي و صلي الصبح علي سجادته الكميله00و دعا ربنا00
و قام حضر الفطار الكميل ليه و لأنكل كاكا00و قعدوا ينقروا سوا 00و بعدين قام غسل سنانه الكميله
و لبس البدله و الجزمه الجداد و حط الكوكوبايل بتاعه في جيبه و قرر انه يطير علي المقابله
السريه اللي فيها هيعرف كل تفاصيل المهمه السريه اللي هو مكلّف بيها00و عدي كوكو في سكته
علي بياع الكورانين عشان هو لازم يقرأ الأخبار كل يوم الصبح00و فر الكورنان بسرعه
و بص في ساعة الكوكوبايل لقي نفسه هيتأخر راح حاطط الكورنان في كيبه الكميل و طار00
و هو طاير سعيد و بيصوصو وعمال يتفرج علي الطيارات اللي حواليه 00و لحظه كده
بص لطياره معديّه و افتكر مامته 00وسرح 00و فاق فجأه علي صوت رنة الكوكوبايل00
كميل كيمال مالوش ميثال؛كميل كيمال مالوش ميثال00و اتشغل كوكو يطلع الكوكوبايل من كيبه
و جناحه اتزنق في كيبه و نفس الوقت بيطير و هو بيحاول يطلع الكوكوبايل و اخيرا طلعه
وبيحطه علي ودنه و بيبص قدامه 00و فجأه ظهر في الأفق حاجه طويلههههههههههههههه00
و طخ خبط كوكو في عامود النور اللي قدامه و حس فجأه ان عصافير بتلف حوالين دماغه الكميله
و انه مش قادر يوزن نفسه و حس انه بيقع بسرععععععععععععععععه و العصافير اللي حوالين راسه
تلف اسرع و تصوصو اكتر000 و الجذبيه تشده لتحت بسرعه و هو يصرخ بصوته الكميل و يتقلب
في الهوااااااااااااااااا0000000000 و بم خبط في الأرض000000و شاف سواد قدامه
و فاق كوكو لقا نفسه مفروش علي الأرض و منقاره الكميل مزنوق بين الرصيف .........
و عجلة عربيه ركنه جنب الرصيف 000و بعد فتره من المأوحه والصراع قدر كوكو يسلك
منقاره الكميل و يطبطب علي و ينفضه من التراب و بص كوكو للبدله الكميله و هو زعلان
علي المرمطه اللي حصلتلها00 و بعد شويه قدر كوكو الكميل انه يقوم من عالرصيف و
يسترد انفاسه الكميله و يقف علي رجله الكميله بالعافيه 00و يدوبك كوكو الكميل بيقوم من
عالرصيف و فجأه 00عربية تنظيف الشوارع ام مكنسه حديد جايه من اول الشارع كوكو
قام ينظف هدومه وهوه مش شايفها تقرب العربيه ام مكنسه حديد من كوكو وهوه عمال ينضف
بنطلونه الكميل العربيه بتقرب منه اكتر واكتر لحد اما بقت ورا كتفه بالظبط كوكو لف لقاها وراه
على طول راح مصرخ ااااااااااااااااااااااااااااااااه000000
كاكان

كوكو بقي محامي

الحلقه اللي فاتت00
كوكو الكميل اتخرج و بقي معاه كوكوسانس حكوكو00
الحلقه النهارده00
روّح كوكو و هو معاه الشهاده و بيغني في السكه و هو طاير علي البيت00
و حياة كوكو و افراحه و هناه في مساه و صباحه
ده مفيش كوكو فرحان في الدنيا اد كوكو الكميل
الكوكو يرفع ايده هيييييييييييييييييييييييييييييه
و دخل كوكو البيت بسرعه عشان يفرح انكل كاكا و طانط كوكايا00
لقي مامته كوكايه تعبانه اوي و بتموت و عرف انها عملت حادثه و هي راجعه من السوك بسبب ان كان فيه طياره طايره فوقيها وواحد فتح الشباك و رمي الكان بتاع الكوكولا بعد ما شربه فوقع علي راسها
و عملها جرح عميق اوي و اتسبب في ان حالتها خطيره زي ما قال الككتور00
دخل كوكو اتصدم ووقعت الشهاده الكميله من جناحه الكميل و جري علي مامته و اترمي في حضنها
و قالها انا كنت جاي افرحك اني نجحت و بقيت محامي زيّ ما انت كنتي عايزه يا مامتي يا كميله00
فردت عليه كوكايه بالعافيه 00خليّ بالك من نفسك يا كوكو انت كبرت و لازم تعتمد علي نفسك
و خلي بالك من باباك الكميل00و دمعت عنين كوكو الكميل و هو بيبص لكاكا و راح حاضن مامته اوي
و سمعها في ودنه بتقول الشهاده و بعدين000مفيش حركه00نزلت دموع كوكو الكميل علي خده الكميل
و راح مغطي مامته و دعلها بالرحمه و خرج كوكو الكميل و انكل كاكا عشان يحضروا لمراسم الدفن
و حضر العزا الأستاذ خيّور وسامبو و كل الأصدقاء الكميلين لكوكو لما سمعوا الخبر00
و عدت ايام اجازة الوفاه اللي كان واخدها كوكو من مكتب الأستاذ خيّور00و رجع كوكو الكميل المكتب
و رحبوا بيه كل زمايله 00 و دخل علي الأستاذ خيّور المكتب و سلم عليه وقاله00
كوكو يا كميل انت مطلوب في مهمه سريه000000000
كاكان

كوكوسانس الحكوكو00

الحلقه اللي فاتت 000
كوكو قرر رفع دعوه قضائيه علي المنفسنين00
حلقة النهارده00
و جمع كوكو الكميل موافقات كتير جدا من الناس الكيميلين اللي متنفسن عليهم
و نصح الاستاذ خيور كوكو و سامبو انهم يشيلوا الموضوع ده من دماغهم و يركزو في مذاكرتهم
و كان كوكو كوّن صداقات كتيره من لم التوقيعات ؛ و بدأ كوكو و سامبو يلموا الناس الكويسين
دول و يحاربوا المنفسنين بطريقه تانيه كمان غير الدعوه المرفوعه ؛ لموهم و قعدوا
يذاكروا سوا و قرروا انهم يخدوا كل الترتيبات الأولي في الكليه لما ينجحوا عشان ميسيبوش
مركز فاضي لأي نفساني 00و قالوا كمان احنا لما نتحرك في مجموعات و نتكاتف عمر ما
واحد منفسن هيعرف يقربلنا00و فعلا طلع كوكو الأول علي دفعته و خد المركز الأول الكميل
و شهادة تقدير الكميلين 00و طلع كوكو و صحابه كلهم اللي ذاكروا معاه و خدوا الترتيبات الأولي
طلعوا سنه تالته00و كرروا نفس الموضوع و كان في خلال الوقت اللي فات ده كوكو بيروح هو و
صحابه يحضر جلسات محاكمة المنفسنين00و يسمعوا شهادة الشهود ؛ و في اواخر الترم التاني
من سنه رابعه كانت المحاكمه الأخيره و اصدار الحكم00و كان كوكو و كل صحابه في قاعة
المحكمه و قاعدين يدعوا و متوترين000و طلع القاضي 00حكمت المحكمه الكوكوهيه علي
كل من ينفسن بالنفي لبيت الزواحف و هذا الحكم ساري الي الأبد و ذللك لتطهير العرق الكوكوهي
من الأشخاص الملوثين له 00رفعت الجلسه وطبعا طار كوكو لحد القاضي و باسوه بوسه كبيره
و قالوا 00ربنا يخليك و تفضل نصير الكوكوهات 00و خرج كوكو و كل المنصورين مبسوطين
و بيكاكو من السعاده00و احب افرحكوا عشان الفرحه تبقي اتنين كوكو الكميل نجح في اّخر سنه
و بقي معاه كوكوسانس من كلية الحكوكو 00 و ودّع صحابه كلهم و قالوهم انا هفضل فاكركوا
علي طولووووووول 00
كاكان

رفع دعوه00

الحلقه اللي فاتت00
قرر كوكو انه يحارب المنفسنين بطريقه سلميه
حلقة النهارده00
في ناس كده ما ينفعش معاهم لفت النظر بالذوق 00و هما دول شلة المنفسنين اللي
و قع فيهم كوكو الكميل 00فموضوع الورق اللي علقه هو و سامبو ولا نفع معاهم
المهم ان كوكو خاف لحسن المنفسنين و نفسنتهم يأخروه عن مذكرته و شغله
ففكر و قال لسامبو 00ان ما فيش حل غير انه يعرض الموضوع علي الاستاذ خيّور
المحامي اللي هو بيشتغل عنده و اكيد هو هيساعده و يلاقيله حل عشان هو متعود ينصف
المظلومين علي النفسنيين و اللي جواهم اسود 00المهم كوكو الكميل خد سامبو و طار بيه لحد
مكتب الأستاذ خيّور00و حكوله الموضوع بحذافيره و طبعا المتوقع ان الاستاذ طبطب علي كوكو
و قالوا متخافش انا هوقفلك المنفسنين عند حدهم 00و قاله كوكو 00هتعمل ايه يا استاذ
رد الأستاذ00انا هرفع دعوه بأسم المتنفسن عليهم ضد المنفسنين هي طبعا هتاخد وقت
بس هتلهي المنفسنين عنكو شويه عشان تعرفوا تنجحوا و تطلعوا سنه تالته 00اتبسط
كوكو الكميل و هز جناحاته الكميله و ضحك من قلبه و قال لسامبو 00 مش قولتلك
ان لسه في ناس كويسين هما صحيح قليلين بس انا و انت عشان كميلين
لازم نلاقي ناس كميلين زيينا 00ده المثل عندنا في جزيرة الكوكوهات كان بيقول
الكوكوهات علي اشكالها تقع 00بس دلوقتي الكميلين علي اشكالهم يقعوا00
و حط كوكو الكميل و سامبو و الاستاذ ايديهم في ايد بعض و قروا الفاتحه 00
و قرروا انهم اولا يبدأو رحلة البحث عن المتنفسن عليهم و المضرورين عشان
يمضوا موافقه علي رفع الدعوة ضد000النفسنه و سواد القلوب
كاكان

عارفكوا يا منفسنين00

الحلقه اللي فاتت000
كوكو قرر يركز للمنفسنين و يبطل عبط
حلقة النهارده000
كوكو الكميل دلوقتي في سنه تانيه تاني او اعاده ؛ و كان سامبو انتيمه قرر انه يسقّط نفسه هو كمان
عشان يبقي مع كوكو في نفس السنه و يقف جنبو ؛ قعد كوكو و سامبو يوم يفكرو هيتصرفوا
ازاي مع شلة المنفسنين من غير ما يعملوا حاجه شريره و يبقوا و حشين زيهم ؛ و قعد كوكو الكميل
يعصر مخه الكميل ؛ و سامبو يفكر و يساعد كوكو في عصر مخه ؛ لغاية ما وصلوا لحل سلمي
و هو انهم يطبعوا ورق و يكتبوا عليه 00عارفكوا يا منفسنين علي رأي ستي اطاطا 00
عرفاكوا يا بتوع الكاميرا المستخبيه 00و يلزقوا الورق ده في كل حته في الكليه عالشجر و الحيطان
و المدرجات و القاعات بتاعت المحاضرات و حتي في الحمامات ؛ و ده طبعا بعد ما كانوا اتفقوا
مع عميد الكليه و حكولوا الموضوع من طقطق لسلاموا عليكو 00و عليكم السلام ؛
لعل و عسي المنفسنين يحسوا علي دمهم من نفسهم و يتلموا و ينضفوا السواد اللي جواهم
و فعلا كوكو و سامبو عملوا اللي اتفقوا عليه 00
كاكان

كوكو و المنفسنين

الحلقه اللي فاتت00
كوكو دخل كلية الحكوكو عشان يدافع عن حكوك الكوكوهات المظلومين
الحلقه دي00
و نجح كوكو الكميل في سنه اولي بتقدير امتياز ؛ و طلع سنه تانيه و اشتغل تحت التدريب في مكتب
محامي كبير من اللي بيدافعوا عن المظلومين حتي من غير اتعاب فكوكو حب الراجل ده عشان
كميل و بيعمل خير فقال انا هتعلم منه كويس عشان لما اشتغل ابقي كميل اكتر مانا كميل ؛
المهم كان فيه ناس في الكليه منفسنين علي كوكو عشان هو كان من المتميزين جدا و كمان المحامي
الكبير اللي هو شغال عنده عينه بفلوس و مبسوط منه ؛ المهم ان كوكو الكميل مكنش يفهم يعني ايه
نفسنه المهم ان المنفسنين دول قعدوا يفقعو كوكو الكميل خوازيق و اسافين عند
عميد الكليه و عند الدكاتره و خلوهم يسقطوا كوكو الكميل في سنه تانيه ؛
و كوكو اصلا برئ و رقيق ميفهمش الكلام ده ؛ المهم ان كان عنده صاحبه الوحيد في الكليه اسمه
سامبو هو اللي فهّم كوكو يعني ايه حد ينفسن علي حد و قالو متزعلش يا كوكو يا كميل انت احسن
منهم برضوا و قالوا انه مش لازم يبقي طيب بعبط ؛ عشان علي راي الأغنيه اللي بتقول
الطيب في الزمان ده بيقولو عليه عبيط ؛ و فهم كوكو الدرس بعد متلدع سنه زياده في الكليه ؛
و نفش كوكو ريشه و قرر انه يركز للنفسنه و انه يلاقي طريقه للنعامل مع المرضي
و النفسنيين و ده طبعا بمساعدة سامبو ؛ و كرم ربنا
كاكان

كوكو في الحكوكو

الحلقه اللي فاتت00
كوكو دخل المدرسه و كان كميل و اشترك في كل النشاطات
حلقة اليوم00
دلوقتي كوكو بقي في اولي اعدادي ؛ و بيذاكر كميل جدا ؛ وبيسمع كلام مامته في البيت؛
و عشان كده كان انكل كاكا بابا كوكو الكميل بياخدوا في الاجازه بتاعتوا كل اسبوع و يدخلوا السينما
و كان كوكو يقعد يتفرج و كان قلبه رهيف و بيتأثر اوي بكل المشاهد اللي بيشوفها ؛ و كان بيحس انه
مكان الممثلين اللي في الفيلم ؛ و كان نفسه انه يبقي بيمثل معاهم ؛ و كان بعد ما يروح من السينما
يقعد في البيت يقلد كل اللي شافو في الفيلم ؛ لدرجة انه يوم طارمن الشباك علي الجيران اللي
في الشجره اللي جنبهم و مسك فس ايده المشط بتاع شعره الكميل ؛ و هوب عمله مسدس
و عمل فيها حرامي00بس حرامي كميل برضه ؛ المهم ان كوكو الكميل فضل يحب السينما و التمثيل
لغاية ما كبر ؛ بس انكل كاكا كان نفسه ان كوكو يدخل كلية الحكوكو عشان لما يتخرج منها
يجيب حكوك بقيت الكوكوهات اللي زيه اللي واكلها الناس الأشرار ؛ و دخل كوكو الكميل كلية الحكوكو
و هو زعلان بس كالعاده عشان هو كميل و مطيع مقدرش يزعل باباه و في نفس الوقت حس انه هيكون ليه
فضل كبير انه يرجع لعيلته الكوكوهيه الكبيره حكوكها
كاكان

كوكو الكميل في المكرسه

نهاية الحلقه الي فاتت00
عيلة الكوكو الكميل قررت تسيب الجزيره و تروح بلد كبيره عشان المكرسه00
حلقة اليوم00
و اخيرا وصلت عيلة كوكو الكميل للبلد الكبيره ؛ و كان الكميل باشا مظبط بيت كميل فوق اكبر شجره في المدينه ديه
ولما وصلوا فكوا الشنط ؛ و لكن كان الكميل باشا تعبان اوي عشان كان عجوز و الرحله كانت طويله اوي
و يا حرام بعد يومين كوكو الكميل بقي يتيم الجد ؛ و قعد كوكو الكميل يعيط جامد ؛ و جه بابا كوكو الكميل كاكا
و مامته كوكايه ؛ طبطبوا عليه جامد و قالولو انت لازم تعمل اللي جده كلن عايز ه و تروح المكرسه
و تتطلع بنمر كميله عشان كل ما تكبر تبقي كوكو اكمل و اكمل ؛
المهم كوكو غسل وشه و ينام بدري بعد ما قرقضلو طبق من اكله الكميل اللي هو بيحبه و ضرب كوباية اللبن
و صحي الصبح بدري ؛ و طار عالمكرسه ؛ و طبعا كان واخد معاه كراسته ؛وصل كوكو المكرسه
و دخل الفصل و كانت صدمته انه كان الوحيد الي كوكو من نوعه في الفصل ؛ و كل اللي قاعدين
قعدوا يبوصوله باستغراب ؛ و ناس تضحك و ناس تتريق عشان كوكو الكميل شكله مختلف؛
بس لأن كوكو عنده ثقه في نفسه فقال جواه ؛ هما اكيد بيعملو كده عشان انا الوحيد اللي كميل هنا
و مرت ايام كتير و قدر كوكو انه يثبت قد ايه هو كميل اوي ؛ و بقت كل المكرسه بتحبه؛
و اشترك كوكو في كل نشاطات المكرسه كان بيقول الاذاعه في المكرسه ؛ و كان يطلع يحي العلم؛
و حتي الكورال مرحموش00ما هو كوكو اصلا كيميل كيمال مالوش ميثال
باي بقه
كاكان

فرح او زعل00

انا اكتشفت اننا شعب نعشق الدوشه و الازعاج بكل صورها 00سواء في فرح
او في زعل 00 و اللي خلاني افتح الموضوع ان طلع قرار بمنع اقامة الصوان اللي بيتعمل
في الشارع لفرح او لعزي و انا شخصيا سعيده لصدور القرار ده 00بس اللي خلاني مستغربه
ان في ناس اعترضت و قالت000احنا عايزين نفرح يا بيه 000ليه يا باشا كده
شئ عجيب جدا هو يعني لازم اللي بيتجوز ده يتفضح من باب الكوافير لغاية ما يوصل بيته
و تفتكروا ان اللي مات هيفيدوا ايه الميكروفون العالي اللي استغفر الله العظيم بيشوهه حلاوة
القراّن و يخلي الواحد يسد ودانه و يشيل ذنوب0000000
لو كل واحد فكر في نفسه و مراعاش جيرانه و الناس اللي سكنه جنبه اعتقد ان ده هيتسبب
في مشاكل كتيره ممكن تقلب الفرح عزا او تخلي العزا 00عزيين
و ربنا يستر
سلام

محو الأميه00

يا استاذ 000ابني اسمه 00محمد احمد الوزير مش00 الغفير -
يعني ايه يا حضرت ده كمبيوتر مش ممكن يغلط -
و الله يا استاذ شهادة الميلاد الأصليه مكتوبه صح اهه -
طيب مدام معاك شهادة الميلاد الأصليه اطلع بقي لمدام نجاح في الدور التالت -
و طلع الراجل الغلبان الدور التالت بس للأسف في وقت غير مناسب 00
لأن مدام نجاح كانت خلصت فطار و دخلت الحمام00بعد نص ساعه
خير يا حضرت ؟ -
دلوقتي يا مدام ابني عايز يطلع البطاقه الجديده فلما جبتلوا شهادة الميلاد بقي -
اللي معموله بالكمبيوتر كتبوا الاسم غلط ؛ انا اسمي احمد الوزير و ابني اسمه
محمد احمد الوزير ؛ بصي حضرتك هنا دي شهادة الميلاد ام خمسه جنيه مكتوبه
محمد احمد الغفير ؛ و ديه الشهاده الأصليه مكتوبه اهه محمد احمد الوزير
طب و فيها ايه دي؟ -
فيها ايه ازاي 000ازاي الوزير يبقي غفير -
شوف يا استاذ؛ حل المشكله دي مش عندي انت تروح جنب ارض المعارض -
هتلاقي المجمع الرئيسي اللي ممكن يحللك مشكلتك
و راح الراجل المجمع الرئيسي ووقف في طابور طويل عريض بلاد تشيله و بلاد تحطه
لحد اما وصل قدام موظف الشباك و هناك علجوله المشكله بمنتهي السهوله
و قلوله بكره تروح تطلع شهادة ميلاد تانيه جديده بخمسه جنيه هتلاقي الاسم اتصلح
و راح الراجل تاني يوم و دفع الخمسه جنيه و طلع شهادة جديده 00و فرح قوي
لما لقي الاسم اتغير؛ و خرج عم احمد من مكتب السجل مزقطط عمال يبص
في الشهاده 00و فجأه رفع عم احمد حواجبه مندهشا لما لقي اسم الام
فاطمه السيد البدوي000مكتوب000فاطمه المرسي ابو العباس
و كانك يا ابو زيد ما غزيت000
بس غريبه اوي الموضوع ده لأن انا بقالي كتير بشوف اعلانات عن انتشار فصول 00محو الأميه
سلام

شقاوة عيال

طفل في ابتدائي ؛ خارج من مدرسته ؛ مروح ؛ و جنب مدرسته ؛ كشك كهربه من اللي فيه الكابلات
مفتوح و السلوك و الكابلات عريانه ؛ الولد معدّي عالرصيف جنب الكشك ؛ كان الفولت عالي؛
سحبت الكهربه الطفل و نطرته بعيد 000اغم عليه0
صحي الطفل لقي نفسه في سرير مش سريره بجسم مش جسمه ؛ سرير مستشفي و دراعاته 000مبتوره
و جنب السرير ام منهاره و اب مذهول 0
علي طول00 و في الحال00 بعد اربع ايام من الحادثه حصل تحقيق 00
بعد شهر طلع قرار بأن الحادثه0000 شقاوة عيال
سلام

لبّس قي الكياس00

الظاهر يا جماعه ان زي ما بيحصل لبس في اي شئ زي موضوع او نقاش او سوء تفاهم بمعني تاني؛
بيخصل كده برضه في الكياس ؛ و ده اللي خلاهم بدل مينقلوا الدم في كياسه المخصوصه
او اللي بيطلق عليها القربه ؛ الظاهر حصل لبس و نقلوه في اكياس زباله ؛؛ و ده الي اتسبب في ان الدم اتلوث
و عجبي
سلام

الكدب مالوش رجلين000

الكدب مالوش رجلين ؛ عادي كلنا عارفين كده من وحنا بنمص صوابعنا
و لكن حد سمع ان الكدب ملوش000توظيف؛ متستغربوش؛ اصل بمنتهي البساطه
المصريين طلعوا هما السبب في ارتفاع نسبة البطاله و التي تؤدي بكثير من الشباب
انه يكره نفسه و العيشه و اللي عايشينها و يحس بالعجز و قصر اليد و القهر ؛
مسألتونيش يا تري ازاي؟
مش مهم انا هقولوكو00 صلوا عالنبي00انا كنت قاعده في امان الله لا بيا
fm و لا عليا بسمع نجوم
ميه فصله 6 مزيكا علي كيف كيفك
و فجأه اكتشف اننا السبب في البطاله لأننا بنخبي عددنا الفعلي عن
المسؤلين عن حصر التعداد
و قال ايه لو احنا اتعونا معاهم في جمع التعداد السكاني الصحيح
الشباب هتشتغل و القاشيه هتبقي دهب ؛ طبعا قمت انا علي طول ضربه نفسي بالجزمه
و اقعت اقول انا الي جبت ده كله لنفسي00
و بطلب من يومها الغفران من الله و باتوب ليل نهار عن معصية الكذب
و قلت اقولكو عشان تلحقوا نفسوكو قبل متغوطو في المعاصي
و عيب بقي مش كل حاجه نتهم فيها ناس شافين شغلهم كويس ده حتي الظلم حرام يا ناس؛
و بلاش نرمي بلاوينا علي الناس
و خليكو فاكرين كويس و قولو ورايا بصوت عالي00
الكدب مالوش رجلييييييييييييييييييين
سلام

Thursday, January 25, 2007

قال يا قاعدين

قال يا قاعدين000يكفيكوا شر الجايين
بيت هادئ 00باين عليه انه الصبح بدري 00نايم الأستاذ مسرور في امان الله
صوت جرس الباب 00تيت تيت تيييييييييييييييييت00يقوم الأستاذ مسرور مفزوع و يقول
خير اللهم اجعله خير 00يروح عالشماعه بسرعه يلبس الروب 00و يجري في الطرقه
و كل ده الجرس بيرن00000يفتح الباب 00
في زباله يا استاذ؟ -
لأ00و يهم انه يقفل الباب 00يروح الزبال زانق بوز جزمته في الباب قبل ما يقفل -
يا استاذ النهارده اول الشهر عايزين الشهريه -
و يلوي مسرور بوزوه لسماع كلمة اول الشهر00هو كتير بيحاول ينسي ان فيه حاجه اسمها اول
الشهر 00المهم بيقفل مسرور الباب و يرجع اوضته يجيب الشهريه و يفتح المحفظه و هو متضايق
و يرجع يدّي الزبال الفلوس00و يدوبك يرجع مسرور يقلع الروب و الشبشب و لسه هيخش
السرير و يكمل الحلم000تييييييييييييييييييييتتيييييتيتيتيتيتيتييتيتيتت00
تاااااااااااني ده ايه الصباح المهبب ده -
و يرجع مسرور مكررا كل اللي عمله قبل كده
صباح الخير و الله يا فندم ؛ عايز اشوف عداد النور -
يزمجر مسرور في سرّه000و يدخل الراجل و يسأله مسرور
تاخد فلوس وصل النور بالمره؟ -
لا و الله يا فندم مش معادها -
و يخرج الراجل00و ميصدق مسرور انه يجري بسرعه يخش السرير علي اساس انه
يا ريت يروح في النوم بسرعه قبل ما الباب يرن تاني 00بس و ده كلام برضه 00
تييييييتيتيتيتيتيتيتيتيتيتيتيتيتيتيتيت0000و فضل مسرور كده من بتاع الغاز لفاتورة الكهربه
رغم انه مش معادها و كمان دفع عليها فلوس الزباله لبتاع اللبن و حتي مندوبين المبيعات مرحموهوش
و كانت اخرتها لما رن جرس الباب و فتح لقا قدامه بياعه صينيه شايله علي ضهرها شنطه كبيره
موش اوز هاجه00ماايا هاجات هلو كتير -
لأ يا ستي شكرا -
ليه00دي هاجات هلو كتير 00بوص -
و اضطر انه يقف و يشوف البضاعه اللي معاها رغم انه ما كانش ناوي يشتري حاجه لمجرد انه
مايكسفهاش 0000و بعد متخلص من البياعه الصينيه 00دخل اوضته و سحب اللحاف و المخده و
فرشهم ورا الباب 0000اهو يمكن حد يعدّي
سلام

ان كبر ابنك

ان كبر ابنك 000خاويه
هثبتلكم بالخطوات ان المثل ده هو السبب في مشكلة اطفال الشوارع
تبدأ اصول المشكله ان الناس تقريبا فهموا المثل غلط او كان خطأ قرايه او غلطه مطبعيه
مثلا 00المثل بيقول ان كبر ابنك00مش ان كبروا عيالك و من هنا تبدأ المأساه
فتلاقي الناس بتخاوي ابنهم السابع مثلا و تكون اصلا مش لاقيه تأكله و لا فيه صحه
و البيت ضيق يخنقهم فتضطر انها تشغل العيال و هما صغيرين او العيال تهرب من البيت
او يتخطفوا من قدام البيت ما هي امهم هتركز لمين و لا مين00و نسبة اطفال الشوارع
و المتشردين و الجرايم تزيد 00فكان عندي حل من الحلين اعرضهم عليكوا00انه يااما
يتلغي المثل ده من كتاب الأمثال الأم 00او يحصل حملة توعيه تعلم الناس الفرق
بين كلمة ابنك و كلمة 00عيالك
سلام

اللي مربي قرد

الي مربّي قرد00عارف لعبه
المثل ده بيجي في دماغي كتير و خصوصا و انا بتعامل مع اي شئ يخصني00
يعني مثلا عندي حنفيه في البيت لو القرد نفسه جه يفتحها من غير ما ياخد الكتالوج
مني و لا هتتفتح و اللي عايز يغسل ايده هيروّح بيها مش نضيفه
فلازم انا اللي افتحها او اقول سر القرد00 قصدي الحنفيه للهيستعملها
و ده بينطبق كمان مع الكمبيوتر بتاعي لو عيلة القرد كلهم جم يحايلوه
عشان يمشي كويس ولا هيعبرهم 00علي فكره المثل ده بيمشي مع البني ادمين
كمان يعني مثلا انا في حياتي اشخاص لو حد ما يعرفهمش هيستغرب انا ازاي بتعامل معاهم
صحيح ساعات ممكن القرد يفلت من ايدي بسبب اني عصبيه شويه بس لما بهدّي نفسي
بعرف الاعب القرد ايّن ما كان 00فكل حد او شخص في الدنيا ليه باس وورد00
فبيتهيألي موضوع ان كل قرد 00يبقي ليه باس وورد ده هيحل مشاكل بين ناس كتير
و خصوصا لو اتطبق مع المتجوزين00و ربنا يعمل اللي فيه الخير
سلام

يا بخت من زار

يا بخت من زار000و خفف
نوال و ابراهيم غلطوا غلطه و ندموا و بقي هو ده مثلهم الأعلي00هنشوف و انتو
احكموا بقي 00
شرفتنا يا عم ايه فينك من زمان؟ -
والله مشاغل الدنيا بقي و الدنيا بقي و تواهانها -
اعمللنا شاي يا نوال من فضلك -
من عينيا00و لا تتغدوا الأول -
ايه يا عم تحب تتغدي و لا كمان شويه ماحنا قاعدين -
لا نشرب شاي الأول -
و تروح نوال تجيب الشاي 00و بعده القهوه00و بعده الغدا 00يكون عدّا تقريبا من ساعة ما الأخ جه
الساعه تلاته الظهر بتاع 4 ساعات00يعني الساعه بقت كام؟ بقت 7 00و لمت نوال الغدا
تشرب ايه يا عم بقي بعد الاكل -
اشرب كابتشسنو 00و تسلم ايديكو -
و خرجت نوال تعمل الكابتشينو و في الوقت ده كان الأخ الضيف أكل ودان
الأستاذ ابراهيم00و دخلت نوال عليهم و اتبرعت بودانها للأخ ياكلهم عشان تحمي
ابراهيم من الضيف لحسن يدّور علي حته تانيه ياكلها منه بعد ودانه
؛؛؛؛؛؛؛؛؛؛؛؛؛؛؛؛؛؛؛؛؛؛؛و المهم بعد 8 ساعات كمان فكر الضيف انه يقوم يمشي
و كان اللي متبقي من نوال و ابراهيم 0000هدومهم وبس
سلام

يدي الحلق

يديّ الحلق00 للي بلا و دان
قريت مره نقد للمثل ده مضمونه ان المعني منه انه اعتراض علي تقسيم الأرزاق
اللي مقسمها ربنا سبحانه و تعالي ؛ هي وجهة نظر برضه 000بس انا بصيت للمثل من
ناحيه تانيه ؛ الواحد لما بيقول المثل ده ممكن ميكنش بيعترض علي حكم ربنا انه اداله الحلق
انما اعتراضه علي ودان الأخ اللي خد الحلق و ما استفدش بيه ؛ و ديه حاجه واقعيه جدا تلاقي
ناس ربنا كرمها جدا و مّديها رزق ماشاء الله و رايح يضيع الحلق 00او الرزق اللي جاله
في حاجه حرام او لأذي الناس00 فانا شايفه ان ممكن نعدل بس من المثل شويه عشان الطرف
المعترض ما يتضايقش و نخليه 000 يدّي الودان للي خد الحلق و هو بلا ودان
سلام

مفيش اسقع من كده00


الحقيقه بطل الفيلم ساقع اوي و مفيش اسقع من كده و الحقيقه برضه اني مكتبتش اسمه
و لا فكرت اعرفه حتي لأني وخدا عهد علي نفسي اني مش هفكر اشوفله افلام تاني
كان ممكن يبقي فيلم حلو لولا لوح التلج اللي هو بطل الفيلم hidalgo
عدا ذلك الفيلم فيه مناظر طبيعيه في صحراء الربع الخالي ؛ و ملابس و ازياء جميله
و متكلفه و الأستاذ عمر الشريف منور و بسيط و جميل و هو اللي فيهم بصراحه
مع بعض التشويه للعرب كالعاده 00بس مش مشكله 00
تخيل معايا كده توصل ان ممثل يقفلك من الفيلم كله00يبقي ساقع قد ايه؟
سلام

مناخيره و الأوسكار


الحقيقه انا لو في لجنة تحكيم اوسكار او كان او اي مهرجان يشترك فيه الفيلم ده
هدّي الممثل مش جايزة احسن ممثل و بس لأ هديله جايزة احسن مناخير بتمثل ؛
ده اسم الممثل اللي انا بتكلم عنه ؛ انا شخصيا مشفتلوش افلام قبل كده ben wishaw
بس سعيده جدا اني شفتله ؛ لأن كل طرطوفه فيه بتحس و خصوصا مناخيره اللي هيا بطلة الفيلم ؛
و الحقيقه شكر خاص و ارفع القبعه للمخرج الهايل ؛ و اكتر للمؤلف اللي كاتب الروايه

perfume اللي اخدت احسن الروايات مبيعا سنة 2006 00 الفيلم اسمه
ده اسم المؤلف الألماني الجنسيه ؛ المهم ان الفيلم يستحق المشاهده
Patrick Süskind
و الحقيقه ان الشعور اللي جالي و انا بشوف الفيلم هو شعور الدهشه و الاستغراب
لأن انا كنت فكره ان خلاص مفيش حد بيفكر و بيشغل مخه و خياله عشان ينتج افكار جديده
و لكن اتصدمت لما لقيت ان لسه في امل و كلام في سرّوكه اتكسفت ؛ اتكسفت ليه؟
عشان اللي علي راسه بطحه000

سلام

جايزة اسلق فيلم

اي شء في الدنيا فيه مجموعه من الأاطراف لازم يبقي فيه منافسه جامده ؛ منافسه علي مركز ؛
علي جايزه ؛ او علي منصب ؛و كمان في السينما في منافسه كبيره برضو بين نجوم من جميع التخصصات
سواء ممثلين ؛ مخرجين او سينارستات ؛ و المفروض ان المنافسه بتبقي للارتقاء او الوصول لدرجه
او مستوي اعلي ؛ و المفروض ان الواحد بيسعي جاهدا انه يكون احسن 0
انما احلي تعليق سمعتوا امبارح في موضوع المنافسه ؛ هو نوع تاني من المنافسه او هسميه المنافسه العكسيه
و اللي اقصده باختصار ان زمان كان نجوم السينما بيتنافسوا عشان كل واحد فيلمه يبقي اجمد و انجح
من فيلم التانيين ؛ لكن دلوقتي بينفسوا بعض مين فيلمه هيبقي اكثر سوقيه و سلق بيض اكتر من التانيين
ده انا حتي بيتهيألي ان البيض بيتسلق في وقت اكتر؛ و عقبال ما الواحد يملحوا و يفلفلو بياخد وقت
فانا شايفه انهم لازم يزودوا جايزتين علي جوايز المهرجانات السينمائيه و تكون
جايزة اسلق فيلم؛ و جايزه احسن طباخ
سلام

حرف السين000


الحقيقه هو الحاجه الوحيده اللي كانت متشابه بين العملين الفنيين ؛ هو اول حرف من اسماء الأبطال 00
وهو حرف00السين
و كان نفسي و انا بتفرج الاقي حاجه تانيه شبه ؛ رغم ان العملين المصري و الأمريكي
كانوا بينقشوا تقريبا نفس الحاله المرضيه عند كلا البطلين
و بدون ذكر اسماء00و بدون الانحياز للغرب او عقدة الخواجه بالبلدي كده ؛ فالحقيقه
البطل الأمريكاني يكسب ؛ انا علي فكره بقول ده و انا متضايقه لأن كان نفسي بطلتنا sean penn
تشترك مع البطل الأمريكاني في اكتر من 00حرف السين
ييييييييييي000 شفتوا كال عاده اني اعدت ارغي و نسيت اقولكوا الفيلم اسمه ايه
i am sam , 2001

سلام

يا ميت ندامه000


يا ميت ندامه علي حال السينما المصريه؛اعتبروها كده جمله اعتراضيه ؛عشان حبه بس ارجع بيكو
شويه بالذاكره كام سنه كده ؛ للقناه التانيه او الاولي مش فاكره اوي
في التلفزيون المصري ؛ مطولش عليكو قولو طويلي00
كان في برنامج اسمه 00بانوراما فرنساوي
كان بيعرض بعض الأفلام الفرنساوي القديمه ؛ و كان اغلب الناس بتزهق
و تمل من ايقاع الأفلام و طبعا حاجز اللغه
و طبعا بالمقارنه بالسينما المصريه القديمه كانت افلام السينما الفرنساوي ساعتها تجيب الضغط
ننتقل بقي لمشهد في سنة 2007 00كل سنه و انتو طيبيين
شاشة سينما تعرض فيلم مصري 00لو قلت عليه هابط ابقي بكرمه بزياده
و مش مهم اسمو ايه الفيلم لأنه للأسف مش واحد دول كتير 00و اخاف تنامو مني و انتو بتقروا و لا حاجه
المهم ان المشهد بيعرض00قاذورات00علي رأي عوكل
و في الناحيه التانيه شاشة سينما تعرض فيلم فرنساوي اسمه
le destin d`amelie poulain
او مصير ايميلي بولان
و هو فيلم من انتاج 2005
و انت بتتفرج لازم يجي في بالك علي طول القول الشعبي المأثور
جتنا نيله في 00سينمتنا الهباب
و ارجع و اقول
يا ميت ندامه

سلام

حاجات نفوّر الدم00جزء 1

في حاجات كده يا جماعه بتحرق دمي و بتجبلي الضغط و انا بطلق عليها اسم ظواهر
لأنها منتشره جدا في اماكن كتير 000اسمحوالي افرّج عن نفسي و اكتب حبة حاجات منها000
ان مثلا واحد في مواصله عامه او كافيه او اي مكان عام مشغل النغمات اللي علي الموبايل بتاعه و *
فرحان اوي و قاعد يسمعه و يسمع الأموره و واحد صحبه قاعد جنبه و كأنه قاعد في بيتهم و لا كأن
في بشر حواليه بيزعجهم و يجيبلهم صداع
العربيات في الاشاره تقف علي الخط الابيض و ساعات بعديه00مع ان الخطوط البيضه المفروض *
عشان اللي ماشي علي رجله يعدّي من عليها 00طب يا عم الحج احنا نعدّي منين؟
الاوتوبيس المفروض ليه حاره محدده عشان يقف فيها ينزل الركاب و مثال علي ده قدام دار القضاء *
العالي 00و اماكن تانيه علي امتداد شارع رمسيس 00انما تلاقي الأوتوبيس وقف بره الحاره و انشالله
العربيات اللي وراه تزمر و لا تتحرق
طبعا المواصلات غليّت و كل اللي بيركابوها عارفين00علي سبيل المثال ؛الميكروباص اللي *
بيروح السيده زينب من الجيزه كان ب50قرش و من فتره بقي ب60 قرش مش مشكله00المشكله
بقي انك بتدفع 75 قرش عشان السواق معاهوش فكه و اعلي ما في خيلك اركبوا00و لو جيت انت
قولتلوا انك معاكش ال10 صاغ الفكه تبقي فضيحه و يبجح فيك 00المفروض ان هو ياكل حقك
بس انت تدفع اللي عليك و زياده
اطلب ديلفري كده من اي محل 00مثلا طلبت بيتزا تمنها 20 جنيه و سلطه تمنها 6 جنيه *
كده المجموع 26 جنيه صح؟ و انت هتحط 1 جدعنه تيبس يبقوا كام ؟ 27 جنيه
تلاقي الفاتوره جايه ب 33 جنيه ليييييييييييييييه؟ اصل يا فندم في ضريبة مبيعات و في ضريبة
اكلات و قطمات و مضغات و00و00و00و00و0000000
واحد راكن تحت شباك البيت عندك او تحت البلكونه لسبب ما و فاتح الكاسيت بتاع العربيه *
علي أخره و معاليه لدرجة انك حاسس بالبيز بتاع الموسيقي بيروج الازاز بتاع الشباك عندك طب يا اخ
مش يمكن في ناس نايمه او عيانه او بتذاكر و انت تسكت و تقول في نفسك زي محمد صبحي 00مش
المفروض الواحد يتعصب يا حوريه 00الشخص العصبي انسان همجي00بس مين يحس اهو اخينا
ده هو و بتاع الموبايل اللي في الأول يتصنفوا نفس التصنيف انهم00محدثين نعمه
بيتهيألي كفايه كده لحسن حسه ان مفيش حاجه عجباني لو حد عنده حاجات شبه يتفضل يقول
سلام

Monday, January 22, 2007

شيل ذنوب00

الواحد يا جماعه بيحاول علي قد ما يقدر ما يشلش ذنوب بس للأسف الواحد لازم ينزل الشارع هنعمل ايه 00بس اول ما الواحد يخطي في الشارع يبدأ عداد كتابة الذنوب يرتفع لا ما يبقي هيفرقع
ابسطها اول نزولك00 ملمع الجزمه بتبرق و اول خطوه في الشارع تبتدي تقول حرام الورنيش و
التعب اللي راحوا في الهوا و تبدأ شيل الذنوب علي خفيف وعقبال ماتكون وصلت الشغل او
المكان اللي انت رايحه تبقي عايز تقلع الجزمه و تحطها في جيبك او في شنطتك من شكلها الفظيع
يا ريت لو جت علي الجزمه و بس00تخيل بقي الدنيا ممطره و انت واقف مستني التاكسي
و جه واحد معندوش00000و لا بلاش اشيل ذنوب 00يجي سايق زي المجنون و طبعا تروح مية
المطرة اللي علي الأرض مختلطه بالتراب و طايره و مترتشه علي هدومك فتبتدي تلعن و تسب
و تشيل ذنوب 00و مش معقوله بقي الواحد هيقلع الجزمه و كمان الهدوم الشنطه متكفيش كل ده
لسه بقي غلاسة سواق التاكسي00 اللي بقت شئ اساسي تقريبا بيمتحنوه فيه مع امتحان
السواقه و الأشارات00 تشاورله 00 يقف بعد المكان اللي انت واقف فيه
يجي ميت متر كده00 و يقعد بعديها يستفتي قلبه يا تري هيتفضل
عليك و يركبك و يوصلك مكان ما انت عايز و لا ريحتك و شكلك مش عاجبينه
و لو وافق هيبقي طبعا بعض ما يتشرّط و يطلب فلوس قد كده و انت توافق
متضرر و لو موافقتش يروح طالع جامد بالعربيه و دايس بنزين بأفتره
و مكمل لحوسه و طرطشه علي هدومك00
تصوروا بقي لو استرسلت و حكيتلكوا بقيت اليوم كان شكله ايه 00
و عالعموم استغفر الله العظيم من كل ذنب عظيم
سلام

Saturday, January 20, 2007

ابوك البصل و امك التوم00

ابوك البصل و امك التوم00منين تجيب الريحه العدله يا مشموم
الحقيقه انا كلفت من قبل البصل و التوم عشان اقول رأيهم في المثل ده 00
و ده غير اني انا كمان هقول رأي اللي هو تقريبا متوافق مع رأي الاستاذ بصل و الأخ توم
البصل و التوم عملوا ثوره و احتجاج و كان سببها ارتفاع سعرهم في الفتره اللي فاتت
فتوليت انا مسؤلية ان اعرف هما زعلنين ليه ؛ و قالولي ان الدكاتره بيتكلموا عنهم و علي فايدتهم
في كل البرامج و حتي اسألوا الدكتور عادل عبد العال ؛ و رغم كده انتوا بتشتمونا في المثل
هو صحيح احنا لينا ريحه و حشه بس من جوا قلبنا ابيض و مش وحشين00
فكان اللي عليّ اني خاطرهم و افهمهم ان احنا منقدرش نستغني عنهم ابدا
بس الحقيقه انا متفقه معاهم في الرأي ؛ ده غير ان انا عندي رأي من و جهة نظر اخري
و هو ان المثل ده مش صحيح لأنه مش قاعده في ناس متربيه في اماكن مشبوهه و موبوءه
و تلاقيهم ملهمش علاقه و مختلفين تماما
سلام

لو كان القرد000

لو كان القرد بص لحاله000 ما كان جاب الرقص علي باله
حقيقي لو كل واحد مثلا ماشي في الشارع بيعاكس بص في المرايه هيكتشف
انه مش المفروض يعاكس و لا يبصبص ابدا ؛و ده وجهة نظري في المثل ان لو كل
واحد فكر انه يعمل حاجه زي ديه و بص لنفسه في المرايه عمره ما هيفرح بروحه
و انا ما بتكلمش علي خلقة ربنا استغفر الله انما بتكلم علي انه تلاقيه
مثلا عجوز و مكحكح و مفيهوش حيل يتنفس و لو واحده عدت قدامه
تلاقيه رمي كلمه ملهاش لازمه و تستحرم اللي معدّيه تشتمه و لا تهزقوا عشان قد جدها؛
و لا واحد تاني شحات مثلا او صايع واقف في الشارع و الريحه خارجه منه من كل حته
و يقول كلام يبقي عايز ياخد علي وشه باللي في ايدك00مش معني كلامي برضه
ان ده يدّي الحق لواحد امور او شباب او مستحمي انه يعاكس لأ طبعا 00
انما0000المثل يحكم
سلام

Thursday, January 18, 2007

استر و لاياك00

اظن كلنا سمعنا عن مشروع ابني بيتك اللي عملاه الحكومه في المدن الجديده ؛
و هو الغرض منه ان اللي هيكونلو نصيب هيكون عنده حتة ارض بتاعته و عليها بيته ؛
انا شايفه انه مشروع كويس لاستغلال الأراضي الفاضيه للناس اللي معندهاش سكن؛
بس شافيه ان الحكومه نسيت تحط في حسابها مكان تاني مهم جدا و ممكن يساعد في انهم يستوعبوا
عدد اكتر من السكان 000 و يستر عالولايا المكان ده هو كوبري قصر النيل
و اللي خلاني افكر في كوبري قصر النيل انه مبقاش مكان للتمشيه و الفرجه علي النيل زي زمان
لكن بقي عباره عن اوض نوم مكشوفه بيحصل فيها مشاهد غراميه ساخنه عالمكشوف
فياريت الحكومه تلحق قبل ما الموضوع يتطور عن كده و فجأه نلاقيهم جايبين معاهم
لحفه و بطاطين و تكسب فينا ثواب و ترحمنا من المناظر دي و تقفل الكوبري اوض
او شاليهات في الصيف لزوار الكوبري و لو نجح المشروع و كان مربح و ده اكيد00
تبقي تطلع بأدوار تانيه ؛ و اهو كده تبقي الحكومه ماشيه في مشروعين اسكان في نفس الوقت
مشروع ابني بيتك00 و00 مشروع000استر ولاياك
و هنيالك يا فاعل الخير و الثواب
سلام

Saturday, January 13, 2007

تاريخ كوكو الكميل

نهاية الحلقه اللي فاتت00
كوكو شغل شريط دماغه و رجع ورا بعيبببببببببد
حلقة اليوم00
و فضل كوكو الكميل يرجع بالشريط لورا لحد ما خبط في الحيطه00هاهاها بستظرف عادي ؛
لاء بجد رجع ورا لحد ما خبط في جده الأكبر الكميل باشا ؛
لما كان لسه في شبابه و كان بيسكن في الغابات المطله علي المحيط الأطلنطي ؛ الكميل باشا
اخد عيلته مراته و اولاده اللي منهم بابا كوكو الكميل الي اسمه انكل كاكا
و هرب من الغابه بسبب زحف سكان غرباء علي المنطقه في موسم الهجره ؛
و فضل الكميل باشا يطير يطير يطير لحد ما لقا مكان في وسط المحيط و كلهم لما شافوه قالوا ؛
الله ده كميل جدا ؛ و عشان كده اصبح لقب الباشا الكميل ؛ عشان هو اللي اكتشف المكان
و اتسمي المكان ده علي اسم العيله بعد كده باسم جزيرة الكوكوهات ؛
و فضلوا عايشين في الجزيره ديه وقت كتير ؛ لحد ما مره نزلت عليهم واحده غريبه
و رجلها متعوره عشان الجزمه كانت ضيقه و هي طارت بيها مسافه طويله ؛ فعلجوها ؛ ووقع في
غرامها كاكا بابا كوكو الكميل ؛ بس المشكله انهم كان لازم يعملو حفله كبيره عشان ينفع الغريبه دي تتجوز كاكا ؛
و فعلا غيروا اسمها بعد ما كان نوزا خلوه كوكايه ؛ و طبعا كان كوكو الكميل سريع من يومه و اتولد بسرعه ؛
و كان جده بيحبه اوي و كان ديما يلعب معاه و يعلمه ؛ و في يوم الكميل باشا صحي من النوم
و قال 00 لموا الشنط ؛ ليه؟ ليه؟ ؛ قالهم00احنا هنهاجر علي بلد تانيه كبيره
عشان كوكو يبقي كميل بجد لازم يتعلم في مدارس كميله اوي ؛
فرح كوكو و نط فوق و قال 000انت يا جدي اللي فيهم و كان لازم يبقي اسمك الكميل بجد ؛
و فعلا بعد يويمين كانوا في طريقهم للبلد الكبيره اللي مرسوم فيها تاريخ كوكو اللي هيوصّلو بعد كده للأوسكار
كفايه النهارده
كاكان

فاشون في الزياله00

عند كومة الزباله اللي جايه يا اسطي لو سمحت ؛ الو لو سمحت عايزه تلاته فول و 6 شاورمه
عند العماره اللي جنب كومة الزباله التانيه ؛ هشرحلك العنوان بصي يا سيتي
عارفه كومة الزباله اللي في اول شارع الحياه اهو انا العماره اللي تحت كومة الزباله00000
مش عايزاكو تستغربوا اصل ديه اّخر موضه ؛ بعد ما الناس زمان كانوا بيعلموا الشارع او المحطه اللي ساكنين
فيها بكشك او سوبر ماركت او جنينه ؛ بقت الفاشون ان الواحد يعلم مكان سكنه بكومة الزباله ؛
بس انا خطر علي بالي سؤال لما انشاء الله تيجي الشركه الأجنبيه اللي بندفعلها 10 جنيه علي فاتورة الكهرباء ؛
تشيل الزباله00 هل يا تري الناس هتعرف تروّح بدون هذه المعالم الزباليه؟
سلام

حتة الحديده و فيلم السهره00

اقتراح جديد شايفه انه هيحل مشكله تعباني اوي و اكيد مضايقه ناس غيري و خاصة الجنس الناعم ؛
الحقيقه مش عارفه اقول الاقتراح و لا المشكله الأول ؛ هقول المشكله ؛
اللي بتتمثل في ان المفروض ان الكرسي في اي مواصله عامه بيبقي لفردين
بس للأسف في اغلب الأحيان ناس تقعد و تمدد و تريح و تأيل و كأنها يوم الجمعه
قدام التليفزيون في البيت بيتفرج علي فيلم السهره مع المدام و الأولاد ؛ و يبقي الواحد قاعد لازق في الحديده
اللي ايد الكرسي او لو مفيش حديده تبقي قاعد نص قعده و اي فرمله ممكن تلاقي
نافسك لازق في البرابريز او تقع عالأرض و بالتلي هدومك تتطين و تروح مشوارك
شكلك عجيب ؛ المهم كالعاده لازم الواحد يلاقي الحل ؛ فرحت كاتبه شكوه فورا لوزارة النقل
طلبت فيها انهم يوسعو مساحة حتة الحديده شويه عشان الواحد يلاقي مكان يقعد و مايضايقش الاستاذ
اللي بيقضي يوم اجازته عالكرسي
سلام

Tuesday, January 9, 2007

koukou el kemil adventures

koukou el kemil ..koukou el kemil..koukou el kemil..koukou el kemiiiiiiiiiiiiiiil
ديه كانت صوت الهتافات التي تلقاها عند ظهوره في حفل افتتاح الاوسكار ؛
(انه كوكو الكميل00 الذي اتي من علي بعد اميال000 (صوت مراسل صحفي يهتف
لاستلام جائزته في الاوسكار 00وعلي فكره ديه ماكنتش اول واحده ؛ كان واخد واحده قبل كده في مهرجان كان و هونولولو و جزر الكوكوهات التي يرجع اصل الاستاذ ليها
دخل كوكو الكميل ما بين الحشود المتزاحمه حوله من صحفيين و معجبين ؛ وصل مرفرفا و منفوش الريش لكرسيه في صاله الاحتفال ؛ و جواه مشاعر ملخبطه من فخر و سعاده و خجل
انتبه فجأه علي اسمه بيندهوه0000طلع مسرعا ووقف قدام المايك و هو ماسك التمثال في ايده و قال انا بشكر جدي عشان هو السبب
تصفيق و صفافير و طراطير و حاجات بطير 00000 و كوكو يعيط من فرحته
cut
علي كوكو في سيارته الكميله اللي زيه و سايق و بيسمع اغنية 00انا الكوكو كريم العنصرين00
و بيرجع بشريط ذاكرته شويه لوره و عمل ستوب عند00انا بشكر جدي عشان هو السبب00
بيوقف كوكو شريط الكاسيت و يقرر انه يشغل شريط دماغه بس من اوله
فرررررر 000صوت ارجاع الشريط ؛ تك 0000داس علي التشغيل 000000000
المره الجايه بقي نسمع الشريط
كاكان 000سلام بس بلغة
كوكو الكميل

ناس فاضيه00

الناس المصريين دول يا اخي مبيعجبهومش العجب ؛ قال ايه سكان منطقة دار السلام
عملين مشكله و زوبعه كبيره عل فاضي00ناس فاضيه بقي
عشان ماسورة مجاري ضربت و غرقت الدنيا و بتهدد بانهيار البيوت القديمه اللي هناك
طب و ايه المشكله لما البيوت تقع؛ ميقعودوا في اوتيلات ؛ او حتي كل واحد فيهم بيقبض فلوس
اد كده علي قلبه؛ يشتري شقه تانيه 000و يعمل بوصية الله يمسيها بالخير
و يفشفش الزلطه اللي تحت راسها
ماري انتوانت 00مفيش عيش ؛ كلو جاتوه
و حتي اللي ميقدرش يجيب شقه او مثلا بيته نجي من المجاري
و موقعش مش لازم يعمل زوبعه و يقلق المسؤلين
و ينزل اي محل للملابس الرياضيه
و يضرب هو و العيله المايوهات
و اهو ليها كزا نفعه00اولا هتبقي وسيلة مواصلات هايله في مياه المجاري
و في نفس الوقت وفر فلوس انه يدفع للأنجال فلوس اشتراك في فريق سباحه و اخيرا ؛
اهو استفاد و استحمه
ايه رأيوكو بقي؟
مش اقولتلكو من الأول دي ناس فاضيه
سلام

Monday, January 8, 2007

اللي خايف يروّح


يروّح00 saw علي رأي عمنا مرسي الزناتي 00الي خايف يروّح00و اللي خايف يتفرج علي ثلاثية
بالصلا عالنبي تلت اجزاء مفيهمش جزء مجليّ؛ و اللي شاف اول جزء و مشفش التاني فاتو نص عمره
اللي شاف التاني و ماشفش التالت؛ فاتو نص عمره اللي باقي؛ طبعا مش هحكيلكوا الأفلا م عشان محرقهاش؛
و لأني اصلا مش هعرف اوصفلكوا مدي التقنيه في الأفلام دي؛فأنا بنصحكوا انكوا تشوفوه؛
و تبعتولي رأيوكو ؛ و نفتح باب المناقشه
و ارجع و اقول
الي خايف0000يروووّح
سلام

Wednesday, January 3, 2007

امة اقرأ لا تقرأ 00

اللي اكتب البوست ده هو الموقف اللي
حصل لصاحبتي اللي شغاله في شركة كمبيوتر
و من المفروض ان زمايلها في الشغل ناس
مستواها الفكري كويس 00 و هي من عادتها
تاخد معاها كتاب عشان في فترات الفراغ تقرا
و من يومين قاعده بتقرا 00 و سألها
زميلها 00 يا فلانه انتي بتقري ايه؟؟
ردت 00 بقرا كتاب الأسلام ماهو
للدكتور مصطفي محمود 00 و كانت الصدمه
و الفجيعه لما سألوها و كان عددهم 5 او 6
مصطفي محمود مين؟؟؟؟؟؟؟؟؟؟؟؟؟؟؟؟؟؟؟؟؟؟؟
ردت صاحبتي 00 نعم انتوا بجد مش عارفين مين
مصطفي محمود و لا بتهزروا و ده من باب الدعابه
و اللطافه؟؟ و رد عليها واحد منهم 00
يعني بيبيع ايه مصطفي محمود ده؟
و طبعا هي عند الحد ده كانت و صلت بيها الصدمه
انها مش عايزه تواصل هذا الحوار العقيم
و ردت و قالت 00 الرد الوحيد اللي اقدر ارد بيه
ان ماينفعش حد يقول هي مين الشمس 00
و اما جت تحكيلي كانت قد ايه صدمتها الفظيعه ان
الناس مش عارفه مين مصطفي محمود 00
طب ده حتي مصطفي محمود من العلامات ده انا
مقلتلهمش حد مش معروف كنت هعزرهم 00
الحقيقه يا جماعه انا شايفه ان صاحبتي معاها حق
و انا شايفه ان الجهل و قلة الثقافه ليها اسباب كتير
منها 00
ان اسلوب التعليم التلقيني اللي في مدارسنا و جامعتنا
من الأسباب الرئيسيه علي ان الألف زي كوز الدره
عند اغلب المتعلمين 00
الأهل بيهتموا ان اولادهم يجيبوا مجاميع فظيعه و تكسر الدنيا
اكتر ما يهتموا انهم يثقفوا نفسهم و ليهم حق لحد كبير
و ده لأقتناعهم الشديد بأنها بلد شهادات صحيح
ارتفاع سعر الكتب بشكل خرافي علي سبيل المثال انا رحت اشتري
الروايه الجديده بتاعت علاء الأسواني شيكاجو لقيتها ب30 جنيه
مش كتير دلوقتي عندهم القدره الماديه انهم يدفعوا المبلغ ده
في كتاب هيقولك اجيب بيه عشا احسن 00 و الحقيقه
الواحد يقول اللي ليه و اللي عليه دي احد مزايا مكتبة الأسره
ان الكتب فيها بسعر رمزي بس برضو مش كل الكتب تلاقيها00
اجي بقي للشباب الأمور اللي ماشي علي الموضه و بيشرب
سجاير و بيحشش لو انه بفلوس السجاير و الحشيش دي
اشتري كتاب كل شهر هيبقي احسن من انه يبقي بلاطه
و معندوش فكره عن البطيخ 00
ارجع و اقول في النهايه ان ابراهيم عيسي كان عند حق
و جت منه في الجون لما قال في برنامجه 00 من اول السطر
ان امة اقرأ لاااااااااااااااا تقرأ
سلام