Sunday, February 11, 2007

هو فيه بجاحه و هيافه كده00

طبعا عارفين محل التابعي بتاع الفول و الطعميه
اللي في شارع جامعة الدول في المهندسين00
اهو انا امبارح كنت هناك و حصل موقف لفت
انتباهي جدا لدرجة اننا بكتب عنه دلوقتي00
اسمعوا الحكايه صلوا عالنبي00
كنت انا وواحده صاحبتي في المهندسين
و هفتني نفسي علي طبق سلاطه مشكل من بتاع التابعي
اللي بيبقي في التلاجه و انت تنقي المكونات00
المهم قررت اني اروح التابعي اشتري00
و انا متجهه للكاشير اللي هو موقعه
في الشارع جوه بارتيشن 00
عدت واحده قدامي لابسه بالطو
طويل لغاية الركبه و في فتحه من ورا00
و بوت طويل لغاية الركبه00و باين من
الفتحه بتاعت البالطو من وره حته تيجي
مثلا 3 سنتي تبين انها لابسه كولون شبك
يعني مش باين منها حاجه اصلا00
المهم كان المنظر بالظبط00انا و صاحبتي
عاموديين علي البنت دي و هي قطعت الطريق قدامنا
و عديت00و في نفس الوقت اتنفض الشابين
بتوع الكاشير و مطّوا رقابيهم و قاموا يبصوا
علي الحته ال3 سنتي00و كان التركيز
لدرجة انهم مشفونيش و انا واقفه مده
ايدي عشان ادفع00المضحك جدا في الموضوع
ان الشاب رجع بصلي باستغراب و بجاحه
ان انا ازاي ابصله باستنكار علي اللي هو بيعمله00
و طبعا انا مسترش روحت بصاله و قايلاله 00
تعرف اننا بستغربكوا اوي00و كان نفسي
حتي يكسف علي طوله و هبله00انما فضل باصصلي
نفس بصة الاستغراب اللي كان بصصها في الأول00
المهم ان انا دفعت و مشيت00بس فضل الموضوع معلق معايا
اوي00و فضلت انا و صاحبتي نتكلم و نسأل نفسنا00
هو فيه بجاحه و هيافه كده00
سلام

5 comments:

vision said...

مش هقوللك غير ان خلااااااااااااص احنا دلوقتى وصلنا لمرحله مناليأس غير عاديه معلش يا بنتى ندعيللهم اكتر ما نستنكر الى بيحصل الى بيحصل نتيجه وارده جدا للضغوط وولليأس من واحد زى الى قاعد عالكاشير ده نو يتجوز ربنا يهدى ويلهم عباده بالصبر ويقدرنا على طاعته

heba said...

البنات اللي زي دول هم اللي جايبينلنا الكلام وهم اللي بيسيئوا سمعة البنات كلهم .. ما هي لو محترمة و3 سم دول مبانوش مكانش الواد قام بص بالبجاحة دي ونفس الشيء بالنسبة للولد لازم لما ينتبه لحاجة زي كده مايقومش يبص ويتكسف على دمه ، طوله .. أي حاجة وربنا يستر بجد وشكراً كتيير على طرحك لموضوع زي ده لأني حصل قبل كده وشفت بنات بتبقى لابسة بناطيل محزقة وملزقة ولا مؤاخذة الأندر وير بيبقى حزه باين ........ ربنا يستر بجد

kozo127 said...

بجاحه بس ..
دي بجاحه وصفاقه وسفاله وهباله وهيافه .. يتنفض عشان 3 سم بس .. ما يجيش على المجهود اللي بذله ..طب ايه رأيك في اللي بيعاكسو منقبات ومخمرات ..ويجري وراها بالمشوار .. وعايز اقولك كمان ان التحرشات اللي في الشوارع بتبتدي من نص سم مش 3 سم .. اللي مجنني انا بقى ان البنات والله ابتدو همه اللي يعاكسو الشباب ويثبتوهم في الشارع .. يالله خليها تخرب .. احنا في زمن العولمه ومين مع مين مش فارقه.. 3سم زي من غير سم خالص .. ورنا يخلي لنا هيفا وبوسي سمير ولوسي ..والدش والنت .. ربنا يستر علينا من اللي جي .. ويستر على الجيل اللي جي .. دي ايامه هتبقى مايوهات ..

أميرة البلطجية said...

افتكرت البوست دي امبارح وانا في عباس العقاد وماشي اودامي واحدة سايبة حته خمسة سانتي كده برضه..وبعدين واحد تانية سايبة نص متر ما شاء الله
ده غير اللي مغطيين كله بس بسم الله ما شاء الله..تحسي ان فيه حاجات حتنفجر كمان دقيقتين!!
طبعا عنيا اتشعلقت هنا وهناك وبعدين قلت لنفسي..يا عيني ع الشباب الغلابة..اومال دول بقي حيعملوا ايه؟
قلت لنفسي..اكيد حشعلقوا عنيهم هم كمان..حيعملوا ايه يعني
احنا بلد حرة متحررة

koukawy said...

انا يا كوزو معاك في كل اللي انت قولته جدا بس
انا شايفه ان العيب في اللي بيستعمل النت و الدش غلط لأن الاختراعات في حد ذاتها مفيده انما العيب من اللي بيشجع الحاجات المقرفه اللي بتتعرض