Saturday, February 24, 2007

كلب الأمير 00

النهارده برنامج 90 دقيقه كان جايب حادثه حصلت
في فندق الموفنبيك يوم الفلانتاين 00
عيله اب و ام و بنتهم الي اسمها 00 حبيبه
كانوا في الموفنبيك بيقضوا اليوم و هجم كلب امير
سعودي علي حبيبه و قطعلها وشها و شوّها
و البنت حاليا في المستشفي 00
و كان رد الفعل تجاه الموضوع بارد و فيه نوع
من الاستهانه بالموضوع من ناحية الأمير
صاحب الكلب ؛ لأنه مكلفش خاطره انه يروح
يزور البنت في المستشفي و اكتفي بأنه
بعت السكرتير بتاعه ببوكيه ورد
و مفكرش انه يسأل الأهل محتاجين حاجه
و لا انه يتكفل بعلاج البنت اللي لازم تعمل
عملية تجميل و لا حتي انه يتأسف
انما كل اللي عمله غير بوكيه الورد
انه غلط ام حبيبه و قال انها كانت سيباها
بعيد عن نظرها و مشغوله عنها ؛
و طبعا رد ابو حبيبه ان المكان كان فيه مراجيح
و ان البنت كانت بتلعب و ان مش المفروض
ان ادارة الفندق تسمح بدخول الكلب مكان لعب الأطفال
المهم نهاية 00 ابو حبيبه مخدش مع الأمير لا حق
و لا باطل 00 فكرتني الحادثه دي بقصيدة 00
كلب الست لأحمد فؤاد نجم 00
انت فين و الكلب فين 00 انت قده يا اسماعين
طب دا كلب الست يا ابن 00 و انت تطلع ابن مين
بشري لصحاب الديول 00 و اللي له اربع رجول
بشري لسيادنا البهايم 00 من جمايس او عجول
اللي صاحبه يا جماعه 00 له غناوي في الاذاعه
راح يدوس فوق الغلابه 00 و النيابه بالبتاعه
هيص يا كلب الست هيص 00 لك مقامك في البوليس
بكره تتولف وزاره للكلاب 00 ياخدوك رئيس
00 السؤال اللي جه علي بالي
لو ان الكلب ده كان كلب راجل غلبان مش امير كان هيبقي ده
نفس رد الفعل من جهة اللي المفروض انهم يعملوا رد فعل؟؟؟؟؟؟
سلام

6 comments:

Blank-Socrate said...

انا اسف ان فى اول زيارة اشتم و اقول ان الكلب مش الكلب لان طبعه كلب الكلب هو صاحب الكلب

Anonymous said...

احمد فؤاد نجم قالها من زمان

moodysalihamidzic said...

البنوتة صعب عليا جدا
بسم الله ما شاء الله
زى القمر
وازاى كلب لوحده فى فندق زى ده؟

أميرة البلطجية said...

فتحت امبارح التليفزيون على مكالمة واحدة اسمها الاميرة سماهر وبدأت اجمع الموضوع..بس مكتش اعرف انها طفلة
حسبي الله ونعم الوكيل
احنا ملناش تمن يا بنتي

koukawy said...

بلانك سقراط 00
اهلا بيك في اول زياره للعشه و معاك حق
مع ان انا مش مع الشتيمه عشان منشلش ذنوب زي الوحشين
************************************
بلادي 00 اه ه ه
****************************
مودي 00 انا مشفتهاش
و بعدين من فضلك هو اي كلب و لا ايه
**********************************
بلطجيه 00 اديكي عرفتي اننا ملناش تمن شفتي

heba said...

الشعر جميييييل جداً وشكراً لأنك جبتيه أما بالنسبة للأمير والغفير في حديث للرسول صلى الله عليه وسلم بيقول فيه لقريش : (أيها الناس إنما أهلك الذين من قبلكم انهم كانوا إذا سرق فيهم الشريف تركوه وإذا سرق فيهم الضعيف أقاموا عليه الحد، وأيم الله لو أن فاطمة بنت محمد سرقت لقطعت يدها)رواه مسلم.. يعني لو كان صاحب الكلب راجل غلبان كان زمانهم قطعوه لكن عشان صاحب الكلب أمير .. سابوه
ربنا ينتقم منهم