Thursday, June 28, 2007

تفتكروا هيخش النار؟؟؟؟

نظرا لأن الفتره دي في حاله من الركود التدويني العجيب و في حركه الزيارات
العائليه البلوجيه و اللي اثرت علي نفسية الكوكو الكميل الرقيقه
قرر كوكو انه مينزلش الحلقه الجديده الخميس ده لأن الحلقه اللي فاتت كوكو و المنشور كتير من اللي بيتبعوها
متبعوهاش ؛ بس انشالله الأسبوع الجاي ينشرها
بس انا مش عارفه حركة الركود الغريبه دي سببها ايه ؟؟
تفتكروا الصيف و الحر و سنينه و قرفه ؟؟؟؟؟
ما علينا خدوا بقي البوستايه الصغننه اللي جايه دي علي الماشي
***********************************************************
النهارده راكبه الأتوبيس رقم 900 اللي لونه اخضر و اللي متجهه
الي عبد المنعم رياض .. و كنت قاعده في مكان ورا و بعدين لما كرسي فضي
قدام قمت رحت قعدت .. قعدت جنب ست مخدتش بالي من شكلها في الأول
لحد ما قالتلي .. لو سمحتي ممكن اسألك سؤال .. لوهله مكدبش عليكوا
قلت هتشحت فمحضره علي لساني الله يسهلك عشان الواحد اتهري من قصص
و افلام الشحاته التمثيليه اللي انتوا عارفينها .. و في نفس الوقت قلقت
عشان متعرفنيش و بتكلمني ؛ المهم ميلت عليها لأن صوتها كان واطي
اوي .. و قلتلها .. مسمعتش عيدي الكلام تاني .. قالت تاني .. هو
لو سمحتي يعني تعرفي لو ان حد عارف واحده متجوزه و راح قالها
ان جوزها متجوز عليها هيخش النار؟ .. تنحت لها بنظره كلها بله
و هبل و استغراب و كل الأحاسيس اللي ممكن تتخيلوها في الدنيا
و بعد شويه رديت و قولتلها .. لأ معرفش .. و دورت وشي و كنت كل شويه
ابص في الازاز اللي في وشي اشوف وشها معكوس عليه و مليان حيره
و قلق و توتر و صعبت عليا .. بس اللي فضل شاغل بالي هو سؤلها ..طب
تفتكروا انتوا لو حد عمل كده هيخش النار ؟؟؟؟؟؟؟؟؟؟؟؟؟؟؟؟؟؟؟؟؟؟؟
سلام

Thursday, June 21, 2007

كوكو و المنشور

.. الحلقه اللي فاتت
طيبة قلب كوكو المعهوده و ديته في داهيه
الحلقه دي
وقف كوكو مش فاهم ايه اللي بيحصل بالظبط بس هو احاسيسه المرهفه الكميله
كانت بتقوله و بتوشوشه ان فيه شئ مش كميل خالص بيحصل .. و فعلا
بدأ الموضوع يبان لكوكو لقا كوكو افندي لابس بدله كده و متأيف
و بيقرب عليه و بيقوله .. انت كوكو الغريب اللي دخلت المدينه الصفرا
من ساعه كده صح ؟ رد كوكو .. اه انا دخلت من ساعه بس انا كوكو الكميل مش كوكو الغريب
رد عليه كوكو الأفندي بسرعه .. انت هتهرج معايا مش ده المهم المهم انك في ساعه
حققت نسبة مخالفات مححقهاش حد علي الاطلاق ده انت تدخل موسوعة كوكوز ريكورد
في للمخلفات يا اخي .. رد كوكو .. ليه انا عملت ايه هو انا لحقت انا لسه حتي ملقتش حد يساعدني
و فجأه كوكو الكميل لقا كوكو افندي اول ما سمع يساعدني جاتله رعشه و منقاره اتعوج واترمي في الأرض
و جاتله حاله عصبيه .. و بسرعه جه واحد من اللمه اللي واقفه الظاهر عليه انه
كوكو موظف تحت ايد كوكو افندي و فتح شنطه كبيره و طلع منها حقنه و راح مدخلها في كناح
كوكو افندي اللي تدريجيا ابتدي يهدي و اول ما فاق راح مزعق في كوكو الكميل و قاله .. اوعاك
تقول الكلمه دي في وشي تاني انت فاهم .. راح كوكو بهبله قاله كلمة ايه يساعدني
و فورا راح كوكو افندي جاتله الحاله تاني و مفاقش منها غير بالحقنه برضو .. و اول ما فاق
من غير ما يتكلم فتح شنطته و طلع منها فاتوره و طلع كوكوليتور و قعد يعمل حسابات كتير
في سره و كل شويه يطلع منه رقم كده ؛ و كوكو الكميل واقف و لا فاهم ايه اللي بيحصل
و بعد ما كوكو افند خلص بص لكوكو الكميل و قاله .. نسبه الأضرار اللي انت سببتها
ما كانتش عاليه اوي احمد ربنا و لذلك قررت دولة انا الصفراويه انها تدفعك
مبلغ 300 حبوبورو مخالفات زائد 50 حبوبورو دمغات زائد 5 حبوبورو تمن
المنشور الجمهوري لقيمة مخالفات قوانين الدوله الصفراويه دولة انا لوحدي و لا حد غيري
و فتح كوكو منقاره و مش مستوعب حاجه خالص و مش مصدق ودانه .. و فجأه
من غير ما يحس لقا نفسه متسلم و بيدفع الفلوس اللي عليه .. و علي طول طلع
كوكو افندي ورقه كبيره اوي ملفوفه و مربوطه بشريطه من شنطته ؛ و راح كوكو افندي
فاكك الشريطه راحت اللوحه الملفوفه دي مفروده قدام كوكو علي الأرض و بدأ كوكو الكميل يقرا
قيمة المخالفات .. و كل ما يقرا يذبهل اكتر و اكتر.. و كان ترتيب المخالفات من الأكتر للأقل
انقاذ حد من الموت .. 100 جلده و دفع غرامه 1000 حبوبورو
محاولة انقاذ حد من الموت بنفسك .. 50 جلده و غرامه 500 حبوبورو
محاولة حد من الموت بمساعدة حد ..غرامه 300 حبوبورو
مساعدة حد في العموم .. 400 حبوبورو و كلمتين في جنابك
محاولة مساعدة حد في العموم .. 200 حبوبورو و كلمتين في جنابك اخف شويه
لو حد طلب مساعدتك ووافقت .. 150 حبوبورو و شلوتين
لو ماوافقتش و سمعته بس .. 100 حبوبورو و تاخد شلوت يواديك اسيوط و ترجع مبسوط
لو حد ندهلك و بصيتله .. 50 حبوبورو و قلمين علي وشك علي الماشي
و يراعي في هذه المخالفات ترتيب تكرار المخافه .. يعني لو كررتها يبقي الضعف من كل حاجه
قرا كوكو المنشور و بعدين برمه تاني و ركب الشريطه و من غير ولا صوصوه واحده اداهم ضهره و مشي
و عرف انه هالك لا محاله لأنه شخصيه خدومه بطبعه .. بس قعد كوكو و هو ماشي يقنع نفسه انه لازم يعود
نفسه علي عادات البلد الصفراويه النفساويه دي لحد ما يلاقي بر الأمان .. و مشي كوكو كتير
و يحاول يعتمد علي نفسه في انه يلاقي المعبر للبلاد الخضرا .. و فجأه اسودت الدنيا في وش كوكو
كاكان
السؤال ؟؟؟؟
يا تري الدنيا اسودت ليه ؟؟؟؟؟؟؟؟؟؟؟؟؟؟
سؤال الحلقه اللي فاتت .. مبروك لكل اللي جاوب صح اللي هما
مشمش
البلطجيه
سمسم
شدوا حيلكوا بقي
كاكان









Monday, June 18, 2007

الطريق الي زمش


كان يوم 27 مارس 1959 هو اليوم العاشر علي ما عتقد في شهر رمضان المبارك في هذا اليوم دخل مكتبي .. عبد الستار الطويله .. و ابلغني بأن مسألة اعتقاله هي مسألة ساعات ؛ و انه علي الأغلب سيكون الليله مع الرفاق الذين سبقوه الي المعتقل ؛ و اوصاني مره اخري بأهل بيته و بحقوقه لدي الجريده .. و مره اخري وعدته خيرا بشرط ان يذهب الي المعتقل هذه المره و لا يخلف وعده كما حدث في المره السابقه و بعد انتهاء العمل في المساء ؛ غادرت مكتبي في شارع محمد سعيد خلف مجلس الوزراء و ذهبت الي منزلي ؛ و لم يكن عدندي من الأطفال الا .. هاله .. و كان عمرها عاما و بضعة شهور ؛ و زوجتي حامل في شهرها التاني .. و بعد السهره قمنا لتناوا طعام السحور ؛ و لكن جرس الباب دق عدة مرات متواصله فقمت افتح الباب ؛ و فوجئت بأن الطارق افندي في التلاتينات من عمره و معه شخصان ؛ و قال الرجل بأدب شديد .. لدينا اذن بتفتيش الشقه ؛ و سألته عن السبب .. فأجاب للبحث عن منشورات ؛ و لما لم يكن لدي اي منشورات من اي نوع فقد رحبت بهم و دعوتهم لدخول الشقه ؛ و يبدو انهم اصيبوا بخيبة امل لعدم العثور علي منشورات فاستولوا علي بعض الكتب من بينها كتب ادبيه و كتب ثقافيه و كتب سياسيه ووقفوا طويلا امام احدها كان يحمل غلاف شعار الشيوعيه العالميه .. المطرقه و السندان .. و هو كتاب اّثرت الحياه .. لكرافيشينكو ؛ و تصورت ان الأمر انتهي عند هذا الحد؛ و لكن الضابط طوسون طلب مني فيما يشبه الرجاء ان اصحبهم الي مباحث الجيزه مؤكدا للعبد لله ان الأمر لن يستغرق الا دقائق
********************************************************
و طبعا الدقايق دي بقت سنين قضاها محمود السعدني يتنقل من معتقل لمعتقل
و لا المجرم اللي بيخدوه كعب داير من قسم لقسم .. من معتقل لقلعه للواحات للفيوم
و شاف عذاب و لا سجون النازي .. بس رغم كده مختفتش عنه خفة الدم
و الفكاهه و السخريه حتي و هو جوه المعتقل و في وسط العذاب و الذل
و الاحتقار .. كل ده ليه هو نفسه ما يعرفش يا عيني و لا كان شيوعي و لا يحزنون
و كان اصلا بيتريق علي الشيوعيين .. لكن نصيبه جه كده .. شعور جالي و انا بقرا
و هو اني بتفرج علي فيلم البرئ للامبراطور احمد زكي حقيقي قد ايه قدر الفيلم انه يوصل نفس
الصوره الحقيقيه اللي ناقلهالنا السعدني عن تجربه شخصيه مريره
و من المناطق اللطيفه جدا في الكتاب فصل اسمه .. حكايات الصول شاهين
و د صول اتصاحب عليه السعدني و بقي يقعد معاه يشربوا سجاير و قدر السعدني يكسبه
بحكبياته اشيقه و المثيره عن البلاد اللي سافرها و اللي فيها و اللي قري عنها كمان
و كان عامل و لا شهرزاد اللي بتحكي لشهريار و في يوم في وسط حواديته للصول شاهين
حصل المشهد ده ما بينهم .. من نص الكتاب
رحت اطوف مع الصول شاهين في كل ارجاء الأرض الواسعه حكيت له عن جزيرة بالي و جزر هاواي و جزيرة مالماو ؛ و عندما انهت الأسماء الموجوده علي خريطة العالم ؛ رحت اخترع اسماء من عندي ؛ و عندم خيل الي انني احكمت السيطره علي عقل الصول شاهين وجدت نفسي واقعا في مطب لم استطع الخروج منه الا بصعوبه شديده ؛ فبعد شهرين من الحديث عن البلاد التي زرتها و البلاد التي لم ازرها ؛ سألني شاهين فجأه .. مارحتش ياجوج و ماجوج ؟ و قلت له دون وعي .. ايه ياجوج و ماجوج ؟؟ و استفزه سؤالي فسألني بحده .. ما تعرفش ياجوج و ماجوج .. ثم قال كأنه يحدث نفسه .. طبعا ما انت شيوعي و ابن هاوهاو .. ياجوج و ماجوج مذكوره في القراّن .. و لم اجد ما اقوله لشاهين فتوقفت عن الكلام و اكتفيت بالتحديق في وجهه .. و راح شاهين يتكلم و كأنه يخطب .. تقدر تقولي مرحتش ليه ياجوج و ماجوج؟؟ اهو انت لفيت الدنيا كلها .. تقدر تنكر انك شيوعي و تستاهل الحرق انا مش فاهم الناس اللي ربنا اداها عقول زيكم و اتعلموا ليه يبقوا شيوعيين؟؟ و قلت للصول شاهين يا حضرة الصول انا عاوزك تعذرني و تفهم موقفي .. انا فعلا مزرتش ياجوج و ماجوج بس ده حصل غصب عني انا كنت عاوز اروح و هما مرضيوش
المهم ان السعدني قدر يضحك علي عقل شاهين و يقنعه انه معرفش ياخد فيزا عشان يسافر
ياجوج و ماجوج .. هههههههههههههه
هتلاقي بقي في الكتاب من اصناف الطبقه دي كتير و انماط كتيره تانيه زي واحد اسمه
فهمي جبيب .. اطلق عليه السعدني مفتي الديار الشيوعيه ؛ كان واحد من المعتقلين
اللي حاسس نفسه فاهم في كل حاجه و انه زعيم الشيوعيه في مصر و بيفتي في اي شئ
و كان مش فاهم حاجه خالص
اخر حاجه عايزه اقولها ؛ ان دي مش اول مره اقري فيها الكتاب انا قريته بتاع اربع مرات
بس في اعمار مختلفه و طبعا كل ما اكبر و اقراه اكتشف حاجات جديده
اللي يحب يشتريه هيلاقيه في
مدبولي
روزاليوسف
و ثمنه .. 7 جنيه
طبعة .. اخبار اليوم
سلامممممم

Thursday, June 14, 2007

ايه ده ؟؟ ايه اللي بيحصل ؟؟

الحلقه اللي فاتت ..
كوكو وصل مدينة انا
الحلقه دي ..
عدي كوكو من باب المدينه و كان اول انطباع جاله هو احساسه بأن الجو خالي
من الأوكسجين تماما و انه مش عارف يتنفس طبيعي و مكنش عارف ايه السبب
لا هو الجو حر و لا في تراب ؛ المهم طنش كوكو و قال يا كوكو يا كميل طنش خالص
دي كلها حاجات سطحيه و مش اساسيه ؛ و فضل كوكو ماشي شويه و الحياه
رايقه من حواليه بس هو جواه احساس مش كويس و هو كوكو الكميل لما احساسه يشتغل
و ريشات الاستشعار عنده تتهز يبقي في شئ غريب ؛ و فعلا الحاسه الساسه عنده
قويه لأنه بص لقا كوكو واقع علي الأرض و رجله مكسوره و عمال يعيط
اوي فجري كوكو الكميل عليه و قاله ..اقدر اساعدك ؟؟ اجيبلك كوكتور ؟؟
رد عليه الكوكو المكسور .. لأ
استغرب كوكو من الرد جدا بس قال في نفسه يمكن هو محرج يطلب حاجه من حد ميعرفوش
و رجع قاله تاني .. لأ بجد مش عزومة كوكارجبيه انا بقول بجد انتي مش قادر تتحرك
رد عليه الكوكو التاني بانفعال شديد اوي .. انت مالك يا اخي ملكش دعوه امشي
بقي لأن شكلك كده هتدفع كتير
و مفهمش كوكو يعني ايه .. شكلك كده هتدفع كتير
و مشي كوكو و هو بيبص علي المكسور اللي قاعد علي الأرض يتألم و رافض المساعده
و فضل الموضوع شاغل دماغ كوكو و مستغربله اوي ..
لحد ما لقا قدامه حاجه شغلتله دماغه عن التفكير ..منظر لفت انتباهه جدا
لدرجة انه فتح منقاره و لسانه دلدل من الدهشه .. شاف كوكو بيت والع
و طلعه منه النار من كل حته و في صريخ استغاثات طالع من جوه البيت ..بس
مش هو ده الشئ الغريب اللي لفت نظره .. الأغرب ان الكوكوهات السكان ماشيين رايحين
و جايين عادي جدا زي ما يكون مفيش مصيبه بتحصل .. و طبعا مكنش من كوكو
غير انه يجري بسرعه ناحية البيت عشان يحاول ينقذ حد .. و كوكو من طيبته و سذاجته
ابتدي يجري في وسط الشارع و يصرخ .. حريقه يا كوكو هات المدينه حريقاااااااااااااااااااااااه
و مفيش رمش و ريشه في المدينه اتحركت للمصيبه دي .. و كل ما كوكو يجري ناحية حد عشان
يطلبه مساعدته يلاقيه ماشي باصص قدامه و لا كأنه شايفه واخد في وشه
و ماشي زي الروبوت .. و فضل كوكو يحاول يدور علي مساعده و هو في قمة ذعره
لحد ما الصريخ اللي جوه البيت سكت و الكوكوهات المساكين اللي كانوا جوه اتشوا
ووقف كوكو يبص علي البيت لحد ما النار اكلت الخشب و بقت رماد و اطفت النار و بقي البيت
عباره عن كوم تراب .. و كبر الموضوع في دماغ كوكو جدا و بقي نفسه يعرف هو المدينه دي
ليه الكوكوهات عمله كده معقوله كلهم من ذوي الاحتياجات الخاصه و مبيسمعوش
مش ممكن .. امال يا تري المشكله جايه منين يا كوكو يا كميل ؟؟
المهم كمل كوكو طريقه و كان كل هدفه انه يلاقي حد يساعده يخرج من البلد دي
و يلاقي طريقه في المدينه الخضرا و يلاقي طانط ام مكاوك بقي و نخلص .. و ابتدا كوكو
يدور علي حد يساعده و اول واحد لقاه قدامه جري كوكو ناحيته و بمنتهي الأدب
قاله .. انا كوكو الكميل و كنت عايز حضرتك تساعدني اني الاقي المخرج من هنا .. و سمع
كوكو صوت دربكه حواليه خلته مش فاهم ايه اللي بيجري حواليه .. عربيات و ناس
و دوشه و زعيق .. و حبه حبه ابتدا كوكو يدرك ايه اللي حصل .. بس مش بالظبط
اكتشف كوكو انه مدبس في مصيبه كبيره بسبب حسن نيته و طيبته .. معقوله يا كوكو
الطيبه و القلب الأبيض يدوك في داهيه كده .. و بدأ كوكو مشوار عذاب جديد
و معاناه مع اللي حصل .. هو ايه اللي حصل ؟؟
كاكان
السؤال .. يا تري ايه اللي حصل ؟؟
يا للا بقي شدوا حيلكوا

Wednesday, June 13, 2007

لا تغضب

كنت في منطقة مدينة حدائق الأهرام في منطقة التجنيد في الهرم .. و حصلت في وجودي
هناك جريمة قتل احمد ربنا ان انا مكنتش شاهد عيان و الا كان زماني
في المصحه النفسيه .. الحمدلله .. مش المريع ان حصلت جريمة قتل .. لأ
المريع و المفزع هو السبب اللي حصلت عشانه الجريمه دي .. الموضوع و ما فيه
و ده بعد رواية احد الشهود العيان .. المنطقه دي مدخلش فيها وصيلة مواصلات الا التوك توك
قصدي اللهم احفظنا التوك توك الملعون .. و هعملكوا انشالله سلسله مع مغامراتي مع التوك توك
المهم ان واحد من التكاتك كان ماشي في نص الطريق ووراه لودر من بتوع البنا
اللي هو بيبقي في شوكه كبيره من قدام لرفع الحاجات .. و ده للي مش عارف شكله .. ماشي
اللودر ورا التوك توك زمرله يوسع التاني ما وسعش شدوا قدام بعض شتموا بعض ؛
راح سواق اللودر شايل التوك توك من ورا بالسواق بتاعه و هاتك يا رفع و تنزيل
و مرجحه ؛ و بعدين نزله علي الأرض و نزلوا الاتنين و حصل تشابك بالأيدين
اسفرت عن ان سواق اللودر بأله حاده حديده مثلا كانت في الأرض و هاتك يا ضرب في سواق التوك توك
لحد ما رقده ميت مبيتحركش .. انا عديت قرب مكان الجريمه بعد الجريمه بعشر دقايق
و كان السواق اللي ركبه معاه الميكروباص الخاص شاهد للحادثه و قالي .. تعرفي
حضرتك الناس اللي هناك دول بيصرخوا و بيعيطوا و يلطموا ليه ؟؟
قلت .. ليه ؟؟
قالي .. عشان .. و راح حاكيلي كل اللي حاكيتهولكوا
علي طول جه في دماغي كل الجرايم اللي عملين نسمع عنها بقالنا فتره
و قد ايه زادت و ببجاحه و علي امور اتفه من التفاهه .. يعني مشاده
علي شئ هايف ادت لقتل روح .. يعني كان هيجري ايه لو وسعله السكه و عداه
او كان هيجري ايه لو معداش و خلاص .. حقيقي الغضب يؤدي للقتل .. لا تغضب
مش متخيلين انا قعدت بعديها قد ايه قلبي واجعني و مش قادره افكر كويس
و اللي زاد و غطي الاشاعات اللي بتنتشر زي القمل في الشعر
و اول اشاعه سمعتها .. ده لودر داس علي دماغ عيل موته
و لو استنينه لبكره الصبح مش بعيد نلاقي القصه تطورت و بقت حاجات تانيه
و تغيب الحقيقه و تروح .. لازلت مش عارفه .. ليه و ايه سبب
انتشار الجريمه بالشكل المفزع ده اللي يخلي الواحد يخاف يخرج من البيت
اللهم احفظنا و صبر اهل القتيل و اهالي كل اللي فقدوا اعزاء و احباء
سلام حزايني


Tuesday, June 12, 2007

الهلاهيل كسيانا

الهلاهيل كسيانا .. و العنطزه مليانا

مشهد بيلفت نظري كتير جدا و يجبرني غصب عن منخيري
اني اتأمله ؛ المشهد هو راجل يوقف الميكروباص او الأوتوبيس
او اي مواصله عشان يركب في ايده سيجاره ماسكها زي متكون هتهرب منه
و قبل ما يحط رجله علي سلمة الميكروباص عشان يركب
يسحب قد 30 نفس دفعه وحده قبل ما يرميها و لا لما يكون الحبيب
مسافر بلد عربي و بيودع حبيبته بشوق حار ؛ منظر الحقيقه
لازم يستوقفني و يخليني افكر هل فعلا السيجاره عند ناس هي الحياه؟؟؟
و ايه اللي هيحصل انه يرمي السيجاره ببساطه ؟؟
يعني مره حصل معايا موقف عصبني جدا ؛ ركبت الميكروباص و اول كرسيين اللي بره كان فاضي و علي جوه
قاعد واحد ماسك سيجاره و هاتك يا دخان معبأ الدنيا ؛ و لما قلتله من فضلك ممنوع التدخين في المواصلات
رد عليا بأسلوب حقير و زعق فيا و لا لما يكون هو اللي علي حق و قالي ببجاحه
ما انتي اللي جيتي قعدتي جنبي .. طبعا انا اكيد مسكتش و فهمته انه انا من حقي اقعد في اي حته
ده ملك عام انما انت مش من حقك تدخن لأن انا لو وقفت بيك عند اول ظابط هتدفع غرامه
و هتاخد اللي فيه القسمه .. بس طبعا كنت بنفخ في قربه مهربده مش مقطعه
و متقفلش الموضوع الا بتدخل السواق لفك الاشتباك
و انه قومه من جنبي خالص الحمدلله .. يا تري ليه السيجاره مهمه اوي عند اللي بيشربها؟؟
لدرجه ان ساعات ستات تحس ان السيجاره درتها .. شئ يضايق و محتاج مراجعة تفكير من اللي بيشربها
ده غير بقي انك تلاقي واحد هدومه مقطعه و شكله باين عليه الغلب و الفقر ماصص دمه
و ماسك في ايده سيجاره !!!!!! شئ عجيب جدا يا سيدي انت فيك صحه ده انت شكلك
اخف مرض عندك سوء التغذيه و كمان بتشرب سجاير !!!!!!!!!اكيد ده مش عقل
و النوعيه دي بتخليني علي طول افتكر المثل اللي بيقول

الهلاهيل كسيانا .. و السجاير خنقانا و قرفانا

سلااااااااااااااام


Thursday, June 7, 2007

كوكو و انا

الحلقه اللي فاتت 00
كوكو مكنش عارف يدخل من انهي باب
الحلقه دي 00
وقف كوكو الكميل محتار قدام التلت بيبان
الدهب والفضه و الصفيح
و فضل كوكو يتمشي رايح رايح جاي قدام البيبان التلاته و يقف شويه قدام الباب
الدهب اللي كل حاجه فيه دهب من الأكره للحلق و يقول في نفسه 00
مش عارف ليه انا مش مرتاح للباب ده و حاسس انه مش الباب الكميل
و نفس الحكايه عملها مع الباب الفضه
و راح قدام الباب الصفيح ووقف و قال في نفسه 00
هو صحيح الباب شكله مش كميل و حتي صفيحه مطبق و مصدي و فيه نقر
بس حاسس انه هو و قلبي مرتاحله و بعدين فاكره يا ذاكرتي يا كميله
لما قرينا في كتاب حكمه بتقول ان احكم الناس متواضعين ؛
يا رب ساعدني يا رب و يكون اختياري صح 00
و لسه كوكو بيمد كناحه علي اوكرة الباب الصفيح المعوجه لقا الباب فتح لوحده
و سمع صوت راجل عجوز اوي فكره بصوت الممثل القدير كوكو البارودي
و حتي بيتكلم زيه 00 كوكو الكميل يا ابني مبروك عليك اختيارك
الباب المظبوط طلعت فعلا نبيه زي ما انا كنت متوقع و زي ما كيرو الله يرحمه
حكالي عنك 00 و في الوقت ده كان ظهر ورا الباب الصفيح
اوضه بسيطه خالص مفيهاش حاجه الا كتب من كل حته
و طرابيزه عليها كوكويوتر و كرسي بيلف كان قاعد عليه الحكيم كيروكيم
اللي لف بالكرسي لكوكو و شاورله يدخل ؛ و دخل كوكو ابتدي يكتشف ملامح الحكيم
اكتلر من قرب هو كوكو عجوز اوي و شعره ابيض زي القطن و ليه دقن طويله
واصله لحد بطنه و عنده علي ضهره حمل السنين اللي فاتت كلها و مخليه موطي
و حوالين عينيه خطوط محفوره زي ما يكون فنان تشكيلي نحتها بسن السكينه
و جوه الخطوط دي عنين ليها بريق غير عادي يدل علي ذكاء و طيبه
و حكمه ؛ و بين كناحاته المكرمشه اللي مغطيها الريش الأبيض ماسك
عصايه خشب راسها مدوره تحس ان العصايه دي هي اللي بقياله في الدنيا ؛
و دخل كوكو وقف قدام الحكيم كيروكيم و قاله 00
حضرتك مش عارف يا جدو كيروكيم ان كان نفسي اشوفك ازاي من ساعة
ما قالي كيرو و لو كنت اخترت باب غلط كنت هزعل اوي من نفسي
رد عليه الحكيم 00 كوكو يا ابني ؛ انت ما كنش ممكن تختار غلط لأن انت مثقف و قلبك ابيض
و اي حد قلبه ابيض بيبقا مخه صافي انه يختار صح و في اغلب الأحيان مبيختارش غلط
انت ايه الخدمه اللي انت جايلي فيها ؟؟؟؟
رد كوكو 00 فيه عصابة الخطاف اللي خطفه ام مكاوك و000000000000و كمان
000000000000 و بعدين 00000000000 بس و كيرو قالي انك ممكن
تساعدني اوصل لمكان العصابه
رد الحكيم 00 كوكو يا ابني طريقك صعب و مليان بالأشواك و عايز تحمل و ايمان
بأنك هتنجح اسمعني كويس ؛ انا هديك خريطه تتبعها و الوصفه سهله الوصفه هايله
انا مش عايزك تقلق بس لازم عشان توصل لعصابة الخطاف في عقر دارها
لازم تعدي علي البلد الصفرا و منها للخضرا و اخر الخضرا تلاقي توهان
و بعديه تلاقي المراد ؛ حط كلامي حلقه في ودنك ؛ و خد الكيس ده في خمس زلطات
اي خطر يقبلك ترمي عليه زلطه من دول علي طول و في الحال تتحول لرمال
بس خد بالك ان لو رجلك خطت الأرض الحمرا من ساعة متخرج من هنا هتكون النهايه
لأن الأرض ولعه نار و الحال بقي اسواء من اي حال ؛ حط كلامي حلقه في ودنك
و حط الخريطه دليل في كناحك لحد متوصل لمرادك بأذن الرحمااااااااااااان
************************************************
كوكو واقف علي باب المغاره بيراجع في دماغه تاني الكلام اللي نصحه بيه الحكيم كيروكيم
و بيسخن دراعاته لرحله شاقه لحد ما يخرج من المدينه الحمرا و يوصل علي ابواب
المدينه الصفرا اللي هيشعر فيها بالأمان 00
و طار كوكو الكميل و فضل طاير و حاسس بالأرض الحمرا من تحتيه بتطلع صهد
و سخونه من كتر القتل و العنف و المعارك و المطاحن و المجازر اللي لا ليها اول و لا اخر
و كان نفسه انهم ما يلوثوش نقاء السما الصافيه اللي كوكو بيلاقي نفسه
و راحته و كماله فيها انما طبعا كان امله بعيد و حلمه زي حلم الأعمي بنظر
سته علي سته بالظبط 00 و فضل كوكو طاير و حتي مش قادر يريح علي شجره
من الخوف و الجرايم اللي هو شافها 00 و ضلمت الدنيا علي كوكو و نورت 3 مرات
واخيرا بعد اربع ايام طيران حس كوكو بأن لون الجو حواليه ابتدي يتغير و ان
حمار الدنيا اتحول للون مصفر و اوضح في الرؤيه و فهم كوكو انه علي حدود المدينه الصفرا
و مد كوكو كناحه و طلع العدسه المكبره عشان يبتدي يدور علي باب المدينه
و بعد شوية تدقيق لمح كوكو باب كبير من فوق و عرف ان اكيد هو ده باب المدينه الصفرا
و ابتدي كوكو ياخد وضع النزول علي الأرض بس بدأ كوكو يحس انه كل مايقرب للأرض انه تعبان
و فهم كوكو ان ده تفسيره هو فرحته بأنه هيقعد يريح شويه و يريح كناحاته اللي
حاسس ان عضلاتها وقفت من كتر الطيران 00
ووصل كوكو علي الأرض قدام باب المدينه اللي لقا مكتوب علي بابها بالبنط العريض
اهلا بيا في مدينة انا

و استغرب كوكو الكميل اوي من اسم المدينه بس قال في نفسه الجو و لونه
و ريحته تدل علي الهدوء و اهو الواحد مش ناقص يشوف حاجات مش كميله
و قعد كوكو ريح شويه علي باب المدينه و طلع الزاد و الزواد بتاع الرحله
و بعد ششويه قام شد الرحال عشان يكمل رحلته 00
كاكان
*********************************************
مبروك لكل اللي كسبه المره اللي فاتت
و كانت ايجابتهم 00 الباب الصفيح
و الفايزين هما 00
اسراء
سمسم
مصراوي اوي
كراكيب عادل
احب الصراحه و اكره القباحه


Tuesday, June 5, 2007

ايه هو المونتاج ؟؟؟؟

البوست ده اهداء لأحد كميلين العشه اللي مقدرش يسألني
سؤال و مردش عليه ؛ الكميل يعقوب البلوجاوي الصديق
كان سألني في كومنت ليه علي البوستايه بتاعت فيلم
requiem for a dream
اللي كنت مناقشه فيه مدي اسهام المونتاج في نجاح الفيلم
و رد علي يعقوب في كومنت و قالي 00
انا نفسي من زمان اعرف يعني ايه مونتاج ؟؟؟؟
فطبعا انا لقيت ان كومنت هيبقي مش كفايه اني اشرحله يعني ايه
مونتاج فقررت اكتبله البوستايه دي و اهو اللي يحب يعرف و يستفيد
******************************************
المونتاج هو 00
مرحله في صناعة الفيلم بتحصل بعد الانتهاء من تصوير كل مشاهد الفيلم
و هي عباره عن تركيب اللقطات بالتوالي ؛ يعني لو احنا عندنا مشهد
معين اتصور من كذا زاويه كل زاويه بلقطه او شوت زي ما بيقولوا
يجوا في المونتاج يبتددوا يركبوا اللقطات دي علي بعض عشان في النهايه
يحصل المشهد اللي احنا بنتفرج عليه
كمان غير كده في مونتاج ما بين المشاهد كمان مش اللقطات بس ؛
يعني تحديد النقله ما بين مشهد و مشهد هتتعمل ازاي نقله حاده
و للا نقله بطيئه و لا هتتعمل مسحوبه اللي بيسموها
fade out
او
disolve
و طبعا بيتحكم المونتاج في ايقاع الصوره او المشاهد اللي بنتفرج عليها
عشان كده المونتاج مهم لدرجة انه ممكن يبوظ مشاهد الفيلم حتي لو تصويرها
حلو او يخلي الفيلم حلو حتي لو التصوير مش هايل اوي ؛
بس هو ده المونتاج يا استاذ يعقوب اي خدمه
سلاااااااااااااااااااااااااااااااااام

Saturday, June 2, 2007

امريكا يا ويكا


كتاب امريكا يا ويكا للكاتب الساخر اوي اللي بحبه اوي
و نفسي اكتسب نفس قدرته علي التصوير الدقيق في الكتابه
محمود السعدني ربنا يشفيه و يقاومهولنا بالسلامه ؛
هو كتاب مليان معلومات عن امريكا من كل الجهات
سواء التاريخيه من ايام مدابح الهنود الحمر ؛
و السنين اللي بعد دخول البيض او الأمريكان و ابادة العرق الأحمر
او الهنود الحمر ؛ اول فصلين او تلاته في الكتاب جوله تاريخيه
سريعه انما مفصله عن حقايق كتير يمكن محدش يعرفها ؛
و بقية الكتاب هو تحليل للمجتمع الأمريكاني بكل عناصره
من رجاله و ستات و شغل و تجاره و صناعه و كل اللي يجي علي بالك
و التحليل ده ممزوج بتجربة الأستاذ السعدني الشخصيه من خلال الاندماج
مع المجتمع الأمريكي 00
بس اكتر ما عجبني في الكتاب 00انه رغم انه قائم علي تجربه شخصيه
انما حسيت انه في قدر كبير من الموضوعيه في طرح النقط اللي
متكلم عنها و ده لوحده حرفنه في الكتابه ميقدرش عليها الا الأستاذ الجامد
و ده رأي طبعا 00
اماكن البيع 00
مدبولي
روزاليوسف
هيئه العامه للكتاب
الطبعه 00
الأخبار للنشر
السعر 00
5 جنيه
سلاممممممممممممممممم