Monday, February 12, 2007

خليك ورا الضرايب00

خليك ورا ال 000 لحد باب الدار
زمان و انا عندي حوالي 10 سنين00
كنت بلعب بالعجله الحمرا بتاعتي00
و دخلت علي بابا و انكل محمود صاحبه
و هما قاعدين في الجنينه بتاعت البيت
و كانوا بيتكلموا عن حاجه اسمها00
الضرايب00فسألت انكل محمود00
يعني ايه ضرايب يا انكل00و رد
عليا انكل محمود و قالي00الضرايب
دي يا كوكو عباره عن نسبه من ربح
او من الدخل المادي لكل فرد من الشعب
بتاخده منه الحكومه 00رحت انا
قايله 00الله طب انا سمعتك بتقول يا انكل
انك مش بتدفع الفلوس دي انت كده حرامي؟
و رد عليه انكل محمود بكلام مفهمتوش اوي ساعتها
بس فهمت معناه لما كبرت و بدأت اركز و افهم اكتر00
و فهمت ليه انكل محمود ماكانش بيدفع الضرايب00
لأن المفروض ان الضرايب اللي بتتسحب من الفرد
او من المواطن بتروح في اصلاحات و حاجات مفيده للبلد00
بس كنت امشي و ابص حوالي الاقي كراسي المواصلات
مكسره00و الشوارع كلها مطبقات و بلاليع بتكسر العربيات
و الشوارع عايزه تترصف00و المستشفيات الحكوميه
حالتها صعبه اوي و لو العيان يدخل يعي اكتر00
و المدارس و00و00و000الخ0
و اما كنت اشوف كل ده كنت بسأل نفسي
معقول كل الناس بتعمل زيّ انكل محمود عشان
كده كل الحاجات دي بايظه و لا ايه السبب؟
و ماكنتش عارفه الحقيقه ايه00
بس يا جماعه من كام يوم سمعت خبر اداني
شوية امل و قلت اهو شعرايا الواحد يتعلق فيها
و نفسي يا رب يكون انكل
محمود عايش عشان يعرف الموضوع ده
الموضوع اللي جابلي حبة تفاؤل هو00
ان مصلحة الضرايب في اعلانها
الجديد بتقول 00ان التهرب من دفع الضرايب
مش في مصلحة البلد و ده لأنه بيقصر في الاعمار
و التجديدات و بناء المدارس و المستشفيات
و لما الواحد مبيدفعش بيضر اخواته من الشعب
و بيعطل مسيرة النمو و التقدم و الاصلاح
و انا رأي اننا نجرب نظام الاقرار الضريبي
الجديد اللي اتطبق من السنه اللي فات
و اللي هو باعتباري من المتعاملين
مع الضرايب احسن بكتير من الكعب الداير بتاع
قبل كده00و اهو نجرب و نشوف
و علي رأي المثل00
خليك ورا الضرايب00 لحد اما نشوف النتايج
سلام


4 comments:

kozo127 said...

والله احنا مضطرين مش بمزاجنا يعني اننا نصدقهم .. لأن برضه لو كدبتهم وما صدقتش هتعمل ايه يعني .. عنك ما صدقت اضرب دماغك في الحيط .. وهنقدر جزافي وهنسجنك لو ما دفعتش ..
ثم يعني هي جت على الضرايب ..
طب بوابات اسكندريه اللي بقت تدفع وانت داخل الطريق تدفع وانت خارج من الطريق برضه تدفع .. والتمغات .. يا خوفي يبقى دخول اي مصلحه حكوميه عليها ضريبه او رسوم ..
وعلى رأيك خلينا ورا ... لحد باب النار

أميرة البلطجية said...

أما غلابة الشعب من مستوظفين الحكومة زي وزي اهلي كلهم فنحب الضرايب عشان اعلانتها الجديدة مسلية ولذيذة
نيااااهاهاها

3asfortels7ab said...

بصراحة يا كوكو انا مش هعلق علي البوست ده لا علي واحد قديم موضوع المواصلات والمكيروباصات وبما انك طلعت شريك في الكفاح وساكن في الهرم وعارف اللي بيحصلي اعععععععععع بعيط بس
مش عايزة اقلك بقي لو كنت ساكن كمان في المريوطية مثلا
لا تتخيل كم العذاب بقي
يلا ربنا يطلعنا منها علي خير
سلام يا كميل

heba said...

أنا يا كوكة مليش في الضرايب بس اللي انا اعرفه كويس اوي ان فلوس الضرايب اللي بندفعها كلنا مبتروحش في اصلاحات للبلد ولا حاجة دي بتروح في كروش المسئولين .. الله المستعان