Sunday, February 25, 2007

العلاج علي نفقة الدوله 00

عمركوا حد ركز مع مقولة 00 العلاج علي نفقة الدوله
بلاش 00 طب حد ركز قبل كده مع مين اللي بيتعالج علي حساب الدوله
صدقوني لو ركزتوا هتلاقوا ان كل اللي بيتعالجوا
علي حساب الدوله ناس مش محتاجه 00
بجد انا لما ركزتلهم لقيتهم كلهم في مكانات مرموقه
و ناس الحمدلله و لا حسد عندهم فلوس قد كده
و ممكن يسافروا و يتعالجوا علي حسابهم الخاص 00
يعني اللي انا اذكرهم مثلا 00 فريد شوقي الله يرحمه
و زاهي حواس يا رب ربنا يرحموا بقي
و من فتره كان في نقاش داير في برنامج من البرامج
الحواريه عن ان السلطه القضائيه في مصر بتطالب بالعلاج علي
حساب الدوله 00 و الله ربنا يزيد و يبارك و محدش يكرهلهم
بس انا من رأي ان في ناس احق من الناس دي كلها
بالعلاج علي حساب الدوله00 و هما الناس اللي
معندهم ثمن شريط اسبرين او ريفو 00
هتقولولي طب ما هو فيه التأمين الصحي و اهو بيبقي
رخيص اوي و علي حساب الدوله يعتبر00
طيب انا هخدكوا دلوقتي رحله في احد المستشفيات العامه
الحكوميه التابعه للتأمين الصحي و انا هتكلم عن المستشفي
دي بالذات عشان دخلتها و في نفس الوقت هي مجرد
مثل لبقية المستشفيات و المستوصفات 00
مستشفي صيدناوي في العتبه 00
رحت ازور احد المرضي و اعمل الواجب
و خرجت عندي اكتئاب من اللي شفته 00
فلان اللي والدته دخلت المستشفي دي قدر انه
يوصل من خلال التأمين الصحي انه يعمل العمليه
لوالدته من غير فلوس و حتي الأوضه في المستشفي ببلاش
يا سلام نعمه 00 بس كانت المفجأه ان العمليه ببلاش اسما بس
لأنه دفع مش عارفه كام للبنج و كام للدوا بعد العمليه
غير الدوا اللي لازم تواظب عليه فتره بعد كده و الحقن و الذي منه ؛
نيجي بقي للمستشفي نفسها 00 منظر اوضة العمليات
اللي تخرج المريض عيان اكتر من الأول و عدم العنايه بتعقيم الأدوات
و خرجت الوالده و دخلوها اوضتها اللي عباره عن جحر فيه اربع سراير
مرضي و لازق في كل سرير كرسي للمرافق اما بالنسبه للتهويه
هي عباره عن فتحه عاليه قرب السقف متغطيه بالسلك 00
و طبعا مقدرش فلان انه يستحمل الجحر ده علي والدته
و صدفه لقا قريبة واحد صاحبه شغاله في المستشفي
فقدروا انهم يتقلوها اوضه تانيه بس الليله 00
ب 50 جنيه 00 و اضطر انه ينقلها و يدفع كل يوم ال50 جنيه
الأوضه ام 50 جنيه عباره عن 2 سرير و جنب كل واحد كرسي برضه
بس الحمدلله فيها بلكونه متر في متر 00
انا بقي من و انا طالعه علي السلم الخمس ادوار لأن الأسانسير كان بايظ
بدأت اكتشف المأساه اللي المرضي قاعدين فيها 00
و مش عايزه احكيلكوا كمان علي الممرضات اللي هما 00عفاريت الرحمه
مش ملايكة الرحمه و علي مدي قذارتهم و قذارة هدومهم و ايديهم و رجليهم
و طبعا ما فاتش علي اني اسأل فلان علي تمن الأوضه الفردي
و طبعا قالي ب 150 جنيه في الليله 00 و متفرقش حاجه كتير عن الزوجي
غير انها فيها سرير واحد 00
شفتوا بقي مين اللي محتاج العلاج علي نفقة الدوله 00
اللي محتاجه الناس اللي معاهاش حتي فلوس المستشفي الحكومي
اللي هي اسمها كده مجانيه انما مش مجانيه و لا حاجه 00
طب في اقتراح اللي معاه فلوس و الدوله كرمته و علجته علي حسابها
طب مايعالج هو حد من الغلابه دول علي حسابه و اهو يبقي علي الأقل
زكّي عن صحته اللي صرفتله عليها الدوله 00
و اهو تبقي عملت خير قبل ما تنتقل للرفيق الأ‘علي
سلام

13 comments:

سهر الليالى said...

الكلام اللى انتى قولتيه دى كلام مظبوط ولا يوجد مصرى واحد يقدر ينكره
بس دى بلدنا ودى حال الفقراء ومحدودى الدخل فيها
وحسبى الله ونعم الوكيل
تحياتى

The Alien said...

الدولة بتعالج اللي بياخد باله منها
يعني تاخد بالك من الدولة
الدولة تاخد بالها منك وتعالجك وتظبطك

أنا عارف وشايف اللي إنتي بتقوليه
أصل أنا طلعت كام رحلة زي بتاعتك
مستشفيات التأمين معمولة عشان اللي مش بياخد باله من الدولة
والطفلين اللي ماتوا من مدة هما الدليل

قلبتي علي المواجع
تحياتي

SomeOne said...

امال بقى لو شوفتوا المستشفيات التعليمي
اللي بيدرب فيها طلبة الطب
والذل اللي ممكن تشوفة بنت
مضطرة تعري نفسها لكل طالب عشان يتدرب وعشان هي تتعالج ببلاش

:(

Blank-Socrate said...

غالبا العلاج على نفقه الدوله اما شخص مشهور محبوب و الدوله بتعالجه دعايه او شخص واصل حبه و بياخد نصيبه من الكعكه .... المهم الانسان فى مصر بلا قيمه و احنا المسؤلين لاننا سلبين دى الحقيقه يا رب نتوحد على حاجه احنا كلنا عاوزنها قبل ما ناس مش كويسين يا كوكو الكميل يسبقونا و يعملوها و احنا نكون تابعين و نكون معاهم سلبين باااااااى

Unknown said...

هو فعلا العلاج علي نفقة الدوله مهزله,أما بقي المستشفيات العامه, فمقولكيش, أصل أنا روحت هناك مره عشان كنت بعمل بحث حاله لواحد كان في المستشفي,ويسلام علي اللي شفته هناك, طبعا مكنش في ممرضين أصلا ولما سألت واحد عيان قالي دلوقتي يجوا, طب افرضو مريض حالته اتدهورت فجأه مين اللي هيلحقو, المرضي التانين؟
ده غير انهم سابونا نمشي في المستشفي كده عادي جدا, ولما نزلنا لقيت واحد جاي في حادثه, والدكتور لسه ماجاش, فقلت للمرضه أنا أعرف اسعافات كويس, قالتلي ادخلي اتصرفي, طب افرضو أنا كدابه أو بستعبط, أموته, بس الحمدلله الدكتور جه في الأخر.

heba said...

نفقة الدولة زي أي حاجة الدولة حاطة ايديها عليها يعني حاجة كده تبع الدولة وبس اما حالة المستشفى اللي قلتيها هي بالضبط حالة كل مستشفى فيك يا مصر .. المستشفيات اللي تبع الدولة برده
لو سمعتي عن مسلسل "لحظات حرجة" جايب مستشفى نظيفة اوي عكس الحقيقة خااااااااالص كأنها مراية .. حسبنا الله ونعم الوكيل في الدولة وسنينها تعرفي ان اخوي له واحد صاحبه بباه مات بسبب الإهمال في رعايته وعلاجه وواحد تاني مات بسبب ان المستشفى سرقت اكياس الدم اللي اهله اتبرعوا بيها .. احنا ببلاااااااااااش من الآخر

koukawy said...

اماني 00 ربنا يعين كل محتاج
****************************
the alien
كوكو بيتأسف علي وجع قلبك بس هنعمل ايه بقي

*****************************
شادي 00 و الله يا شادي كومنتاتك بتنورني
و علي رأيك موضوع محزن
*******************************
بلانك سقراط 00 انا معاك طبعا اننا سلبيين بس في اللي افظع من السلبيه و هو الجهل بحقوقك
********************************
اسراء 00 ربنا يجازيكي خير علي اللي عملتيه
********************************
شمس 00 بالظبط زي الأغنيه اللي بتقول يبقي احنا اكيد في مصر الشوارع نضيفه و المدارس بتبرق زي ما يكون شعب تاني غير مصر هو اللي هيتفرج

الدبور said...

ماهو ده اللي بيقولو عليه الفساد لما واحد يكون قادر انه يتعالج علي حسابه و قال ايه الريس بطيبه قلبه يامر بعلاجه علي نفقه الدوله ليه مش كان اول واحد من اللي مرميين في المستشفيات بين الحيا و الموت في انتظار عمليه لاتتكلف الا عدد من الالاف لاتتجوز اصابع اليد الواحدة بالمقارنه بما ينفق علي هؤلاء الافراد في الخارج بمصايف قد تقارب المليون جنيه و اكثر
فعلا حسبي الله ونعم الوكيل في كل من طغي وسرق ونهب في هذة البلد

تحياتي الدبور

أميرة البلطجية said...

أؤيد بشدة
لهم الله مرضى مصر الغلابة

Anonymous said...

متفق معاكى تماما
والكلام اللى قالوا دبور ده مضبوط
الاسم الحقيقى للعلاج على نفقة الدولة: النصب على نفقة الدولة

koukawy said...

الدبور 00 علي رأيك فساد و هو ده الفساد بعينه
*******************************
بلطجيه 00 بضم دعوتي لدعوتك
***************************
حسن محمود 00 المهم ان الدوله مظلزمه و بريئه من كل ده 00 يا عيني عليكي يا مصر

خمسة فضفضة said...

السلام عليكم ورحمة الله وبركاته

شوف يا كوكو يا حبيبي هو فيه فعلا حاجه اسمها العلاج علي نفقة الدولة وده معمول للناس اللي ماعندهاش تامين صحي ، وممكن انهم يقدموا طلب ويستوفوا الاوراق وبعدين اللجنة هي بقي تقرر ها يخدوا علاج باد ايه ، او يتقرر لهم فلوس اد ايه علشان عملية معينه
مثلا ممكن تلاقي واحد بياخد علاج ربو وسكر وضغط حاجه كده حسبة 300 او 400 جنيه في الشهر وتلاقي اللجنه قررت انه تصرفله علاج ب 600 جنيه طووووووووووووووووووول السنه وياريته علاج بينفع دا في الاخر بيترمي في الزياله او بعض الصيادله اللي ماعندهمش ضمير بيشتروه باقل من ربع تمنه

او مثلا واحد عاوز يعمل عملية قلب مفتوح او زرع كلي ب 30 الف جنيه تلاقيهم قرروا يدوله 3000 جنيه فقط لاغير
وده مش بالساهل كده لا لازم يطلعوا عينه الاول ،ويطلبوا منه ميت شهاده وتحليل والذي منه ، اللجنه دي مقرها في شارع مجلس الشعب جنب مبني وزارة الصحه لو حد راح هناك الناس مناظرها تصعب علي الكافر وتلاقيهم يا عيني خلاص بيطلعوا في النفس الاخير
وكمان في لجان بتتعمل في المستشفيات علي مستوي الجمهورية بيذلوا المرضي علي ما يوفقولهم وممكن العيان يموت قبل القرار بتاعه ما يطلع

من الاخر كده اللي عاوز يتعالج صح ما يفكرش في حاجه اسمها علاج علي نفقة الدوله لان ده مش للغلابه ده لناس تانيه

وليهم ربنا العيانين اللي مش لاقيين حق الدوا

اسفه علي الاطاله

تحياتي

Diyaa' said...

موضوع قديم بس مطروح في كل وقت
كنت بدور علي أسم مدونتك في جووجل ولقيته النتيجة التانية وبصراحة يستاهل
ومشكلة الناس دي إن أولاً فلوسهم أغلبها الله أعلم بمصدرها فبيضيعوها ولو أتبقي منها ثروة في هيئة عقار او مجوهرات فبتصعب عليهم نفسهم يبيعوها ويفضلوا يتوسلوا علاج غيرهم محتاجله أكتر
ثانياً رغبة الحرامية حاكمي بلدنا في المجاملة والمظهرة الكدابة ومصلطحات من نوعية راعي الفن والرياضة وكده بتنتهي في الآخر بوعد شبيه بوعد بلفور..وعد من حد لا يملك لحد لا يستحق

ما علينا
فاكرة تورينت
A Walk To Remember
شكراً لأني نزلت الفيلم منه قريب..لما جبت النت في البيت بقي :))
تحياتي
سلام