Saturday, February 3, 2007

يغرس رأسه في الرمال00

يغرس رأسه في الرمال 00كالنعامه
يا جماعه سمعتوا اللي حصل00كلام في سركوا قال ايه
منعوا المصورين من حضور اجتماعات مجلس الشعب
ليه يا تري؟؟ بتقولوا ليه 00عشان المصورين
لقطوا صور للأعضاء الأفاضل و هما نايمين00
الظاهر ان العيال مانيمهومش امبارح بليل00
و بيقزقزوا لامؤاخذه لب و بياكلوا بلح
و حاجه السطه علاّخر 00طب مايغيرو اسمه
و يخلوه كافتريا الشعب00
المهم ان الصور اتنشرت في الجرايد
لأن المفروض برضه ان مجلس الشعب ده
بيتكلم بأسم الشعب مش بأسم حد تاني
و من المفروض اننا نعرف كل اللي بيحصل
ما هو اصل الواحد ما راحش انتخب الأخ عشان يروح ينام
و مايتكلمش عنه و يعرض مشاكله00 و بدل ما الموضوع يتعالج
من جذوره و يتحل من المنبع الأساسي
للمشكله 00لأ دفنوا راسهم في الرمله لامؤأخذه برضه
زيّ النعام و منعوا المصورين و اتهموهم بتشويه شكل الأعضاء
و تصويرهم في اوضاع شخصيه مش المفروض انها تتصور00
و يعني هما المصورين كانوا جابوا الصور دي من بيتهم
ما هي حاجات حاصله فعلا00و لازم تظهر و تتناقش عشان ما تزدش
انما اقول ايه بعد اللي قالوا مجدي الجلاد في الساعه العاشره
بأن غير مقبول طبعا اني اشوف احد اصحاب المناصب
العليا00بدون ذكر اسماء كالعاده00بيقزز لب
دي اهانه للمجلس و اهانه للشعب00بس انا نفسي اقول حاجه
هو مش مجلس الشعب ده ليه ريس برضه00طب يا تري كان
فين وقت حدوث هذه التجاوزات 00داهيه ليكون هو كمان
كان نايم او كان في المقله بيجيب لب00
سلام

9 comments:

heba said...

حلوة فكرة التسمية دي كافتيريا الشعب المشكلة ان الشعب ملوش نصيب في اللب مش كانو يوزعوا علينا والله عال هم ينامو في العسل واحنا ننام على الشوك

koukawy said...

اولا انتي فين يا شموسه بقالك كام يوم00كنتي مشغوله في الدهان و لا ايه؟؟
و ثانيا هو عبد الحليم قالها حكمه
فوق الشوك مشاني زماني00بس الظاهر من كتر المشي علي الشوك تعبوا فناموا عشان يريحوا شويه00
و قال علي رأي المثل 00اهي تركة ابوهم

Unknown said...

ممكن احضر افتتاح كافيتريا الشعب ؟
وياريت يكون في المينيو بتاع الكافيتريا استجوابات باللبن وتحفظات علي ميه بيضا وياريت تعملوا حساب للدايت



اميره يابلطجيه وحشتيني انتي فييييييييييين؟

Yasmine Adel Fouad said...

و لسه

Amr Ahmed said...

المشكلة ان اللي كان بياكل لب
احمد نظيف

ههههههههههههههههه
حاجة مسخرة

ادي مجلس الشعب

أميرة البلطجية said...

ياجماعة مجلس الشعب بيعبر عن الشعب
واحنا شعب نحب اللب وأزأزت اللب ونحب نروح جنينة الحيوانات نأزأز لب ونخش السينا نأزأز لب ونركب مكروباص نأزأز لب.. فأيه المشكلة بقي
بلاش الفتنة المغرضة دي يا جماعة
وأه يا شعب ..يا بو جزمة بكعب

الفيلسوف said...

و الله المجلس للجلوس يا جماعة و بلاش تريقة على الناس ..ربنا يجعل كلامنا خفيف عليهم ..و سيبونا ناكل عيش ؟

koukawy said...

يا عمرو انت علي طول فاضحني و افشني كده انا اقصد مين؟؟؟؟؟؟؟
و البلطجيه بلاش جزمه كعب عشان الشوارع مطينه للكعب يغرس و لا حاجه
انا حره00كوكو يرحب بأول كومنت ليكي و علي رأيك احنا لسه شفنا حاجه00
اما الفيلسوف00فكوكو بيرحب بيك برضه و هيستناك كتير
و علي فكره داحنا شاكلنا حتي العيش مش هنكلوا بعد كده
اما انت يا ايهاب فداخل علي طمع اوي

kozo127 said...

يا ستي الريس دا صاحب المقله اللي قدام مسرح السلام .. وموقف فيها عيل مجند معاه فيزبا لتوصيل التسالي للمجلس .. ثم يعني المجلس معمول ليه .. عشان الناس دي تتسلى بالشعب ويقزقزو القرارات ويقشروا الشعب كده