Tuesday, March 27, 2007

لا كرامه لنبي في قومه

لا كرامه لنبي في قومه
الشهر اللي فات كتبت بوست بعنوان كلب الأمير
و استكمالا للحادثه دي هكتب بوست النهارده
بتفرج علي برنامج 90 دقيقه من عشر دقايق كده
و كانوا جايبين حادثه تانيه لكلاب الأمير السعودي
الأمير تُرك منه لله هو و اهله 00
الضحيه المره دي اسمه سيد مصطفي سيد و كان في
فندق الموفنبيك لما هجم عليه كلب الأمير و بطحه ارضا جابله
لمس اكتاف و حط بوزه و سنانه في وش الشاب و عضه و قطعله
هدومه و حاولوا يكلفتوا الموضوع زي ما عملوا مع اهل الطفله حبيبه بالظبط
قبل كده بس الولد اصر انه هيعمل محضر و مش هيسكت و فعلا طلع علي المستشفي
و منها علي معتز الدمرداش لفضح الموضوع و هو سخن كده 00
المهم ان اتصل المستشار القانوني لفندق الموفنبيك بمدينة الانتاج الاعلامي
محمد ابراهيم الزيات ؛ و حرق دمي الصراحه ؛ لأنه قال بعد ما سأله معتز
ايه الدور اللي قام بيه امن الفندق تجاه الحادثه 00 لا يا استاذ معتز امن الفندق
كان ليه الدور الأول و الأقوي في انتشال حبيبه من بين انياب الكلب ؛ و بالنسبه لحادثة
سيد ما قالش حاجه لأن الأمن معملش حاجه اصلا لأنه بشهادة الشهود امن الفندق
كان لامؤاخذه بيتلب من بوديجاردز الأمير 00
و طبعا عجبني رد معتز جدا علي الزيات لما قاله 00 لأ يشكر الأمن
بصراحه لمجهوده العظيم في انقاذ البنت لا الصراحه عمل اللي عليه
و زياده 00
اللي اتقال بقي النهارده و شد انتباهي ان الأمير ترك افندي كعب الغزال
متقدم فيه 87 محضر بنفس السبب 00
و انه في تونس طردوه شر طرده بسبب انه اتهجم علي عامل في الفندق
اللي كان متلقح فيه 00
طب يعني هو تونس اجدع مننا ؟ احنا ليه مرحلناهوش من زمان ؟
و لا هو علي رأي محمد صبحي في مسرحية تخاريف 00 بفلوسي يا كلاب
ما هو بصراحه الموضوع محير جدا 00
و الغريبه بشهادة شهود كتير ان اي حد بيجي يقدم محضر بيقع
تحت ضغط و تهديد من الأمير و دلاديله 00
يا تري مين بقي الضحيه القادمه للكلاب المسعوره ؟؟؟؟؟؟؟؟؟؟؟
و قال علي رأي الحكمه او المقوله او المثل اللي بيقول 00
لا كرامه لنبي لا في قومه 00 و لا في قوم تاني
سلام
اضافه بسيطه بعد قرأة الكومنتات 00
سمو الأميره البلطجيه تنازلت و نزلت من العرش لتتفقد
احوال الرعيه و ناقشت الموضوع ده في بيان ليها بعنوان
ههوهوهووووووهوهوهو00ووووو
و انا بشكر سموها و بنحني علي هذا الفضل العظيم
سلام تاني مره

7 comments:

البنت الشلبية said...

انا كنت لسه عاملة بوست عن نفس الموضوع ,,بأمانة انا متعكننة واكتئبت

للدرجة دى المصريين ملهمش تمن ,,ده احنا بقينا اقل من الكلاب

وللاسف مفيش حد يجيب حقنا,,,والمسئولين ولا كأنهم شايفين ,,الراجل اشترى البلد بفلوسه يا ناس

حسبى الله ونعم الوكيل

الراجل الى اسمه سيد الضحية جاتله حالة احباط ويأس عارف انه مش هياخد حقه

ياااااااااااااااااارب

يعقــــوب .... said...

أولا كنت عاوز احييكي على اسلوبك و بوستاتك أحسن حاجه فيها انها قصيرة و معبرع..أما بأه بخصوص كلاب الأمير فده مش من قريب الموضوع ده من زماااااان..و انتم زعلنين ليه أصلا..طب هو الأمير هيكون أهون على المصريين من المصريين..طب مالكلاب عمالا تنهش في الشعب والبلد من سنييييييين ولا حد عمل حاجه...لما كلابنا الظاول تبطل تنهش أكيد كلاب المير هتبطل بعد كده

Anonymous said...

هى مش كانت لا كرامة لنبى فى وطنه؟

مش فارقه كتير

للأسف الكرامة مش أختفت انما ماتت
الله يرحمها ويحسن اليها
كانت ست جدعه قوى

مش بلومك انك بتتكى على الجروح انما الواحد مش عارف يعمل ايه

طيب هاقولك على القصة دى ودى قصة حقيقية
عائلة من العائلات الكويتية الغنية - وفى نظرى السفيهه- كانت بتروح الوييك اند بتاعتها للندن ومره نيويورك

فالمهم صادف انهم وهموا هناك المدام بتاعت الراجل خلفت ولد اتولد فى امريكا
فطبعا أخد الجنسية الامريكية
مافيش بعديها رجعوا الكويت تانى
بعديها بسنه حصل غزو العراق للكويت - علشان الواحد يعرف ان ربنا بيسلط ناس على ناس- وطبعا زى ماكان معروف كل الكويته هربوا
انما فى ناس اتحاصرت ومعرفتش تخرج
وكان الراجل بتاع القصه ده من الناس دى
بيقول فجأه جالوا تليفون
ألووو
مين ؟
السفاره الاميريكة
خير؟
احنا عندنا علم ان فى مواطن أمريكى فى بيتكم
نصف ساعه وهانكون عندك
أرجوكم تحافظوا عليه ومتخفوش احنا جايين
-----------------------------
قصة حقيقية
-----------------------------
حتت العيل ده أنقذ عائله باكملها
المهم شفتى الدول المحترمه بتعامل مواطنيها أزاى؟

تعالى بقى شوفى ايام صدام حسين - انا مش معاه ولا ضده- لما كانت الجثث بتاعت المصريين بتيجى مصر فى توابيت
كان ايه موقف مصر؟؟؟؟؟؟؟
لا حول ولا قوة الا بالله

كان صدام يقدر يعمل كده اذا كان عبد الناصر ولا السادات موجودين ؟
انا بتخيل السادات كان هايكلم صدام ويقولوا استنى هنا ماتبعتش جثث مصريين
انا جاى ليكم وهاوريكم
وكان كلم ايران وقالها انا هاضرب معاكم
:)))))))))))))))))))))))
تخيلااااااااااااااااات
مش حقيقة

العنوان مؤسف
والعنوان الحقيقى لا كرمة لمصرى فى بلده

ودمتى بكل خير
سلام

أميرة البلطجية said...

توارد خواطر بنا انهاردة
انا كمان كتبت ف الموضوع ده
يله يا بنت روحي اقرى هناك

koukawy said...

shalpia 00
يا عيني اه في اخر الحلقه كان محبط جدا
نورتي العشه
**************************************
يعقوب 00 انا بفضل تكون قصيره عشان محدش يحلقلي لأن انا ساعات البوست لما بيطول ما بكملش قرايته ؛و الله الكلاب مظلومه اوي في الموضوع ده
**********************************
حسن محمود 00 تحياتي للكومنت الهايل كالعاده بس عندي سؤال انت ليه معندكش مدونه
************************************
بلطجيه 00 قريته و كمان عملتلك لينك

أميرة البلطجية said...

ميرسي يا كوكو يا كميل
عايزة اعينك ف منصب ذو حيثية..تختاري وزارة ايه؟
انا شايفة انك تاخدى الاعلام
على بركة الله
نولتهيا يا بنتي
الف مبروك

koukawy said...

اميرة البلطجيه 00 ياه ه ه ه
سموك ده كتير علي اوي ربنا يخليكي و اكون محل ثقتك و اقوم بدوري علي اكمل وجه
ههههههههه