Tuesday, March 6, 2007

انا هعبّي شريط00

بقالي فتره بفكر في الموضوع ده و اخيرا خدت القرار
انا هعمل شريط 00 هتقولولي يا كوكو اتجننتي
هقولكوا ليه ؟ و اشمعني انا 00 يا كوكو استني
اعقلي 00 لو سمحتوا محدش يحوشني و لا يمسك في كمي
ما هو انا كل مفتح التليفزيون الاقي روتانا عامله
مسابقه للأصوات الجميله افتح الراديو الاقي نجوم اف ام
بتقول انها بتعمل التصفيات النهائيه ما بين خمسه من الاصوات
الشابه الجديده 00 ازهق و ارجع افتح التليفزيون
الاقي اعلان 00 اذا كان صوتك او صوتيك حلو و بدك
اتغني شركه اللي معرفش ايه بتقدملك الفرصه 00
طب بعد كل ده يا تري معايا حق و لا لأ 00
ما هو انا مش فاهمه يعني كل البلد بتغني و كمان بنستورد
لحمه بيضه من لبنان تغني و برضه اخوانا الخليجيين
مش عاتقنا و كل سمكري و لا نجار و سباك معاه قرشين و لا و لاد الحته
عندهم لمولوا قرشين صدقه عشان يغني و لا الحاجه امه
كانت شايله قرشين عشان الحج و لا الجامعيه و ادتهومله و لما يبقي نجم
و يقرفنا يبقي يرجعهملها 00 يا تري هو المغنيين قليلين للدرجه دي انهم
يعملوا مليون مسابقه و مسابقه للأصوات الجديده 00
ده كده بقي و لا مرض الطاعون و الكوليرا 00
يا ساتر و عليهم اصوات يعدموها 00 بس الواحد بقي يقول اللي ليه و اللي عليه
هما بيوفروا كتير للمنتج لأنهم ما بيلبسوش هدوم كل واحده جايبه قميص نومها
من البيت و رايحه تعبي شريط و بالمره في ساعتين يضربوا الفيديو كلوب
يعني حد ركز كده مع شركه زيّ روتانا كمثل بس ؛ بتنتج
كام شريط في السنه في حين ان دلوقتي كله بينزل من النت
مش زيّ زمان كان الواحد يتابع الشرايط الجديده و يشتريها
ده انا لو هيدوني الشريط ببلاش مش هخده بصراحه اصوات عايزه
الضرب بالجزمه و بعدين الحرق في ميدان عام 00
انا احلي تعليق سمعتوا من احد المقربين ليا علي الموضوع ده
قال لي الشخص 00 ياه ده كده فاضلنا مطرب و ناخد 75 قرش
بعد كلللللللللل اللي قلته ده مش معايا حق 00
انا هسيبكوا بقي عشان اعبي الشريط
و انتظروا شريطي قريبا في الأسواق و الميكروباصات
سلام

11 comments:

Anonymous said...

ضحكتينى ياكوكو
كده يبقى أنتى ماشيه مع سياسة الدولة
مطرب لكل مواطن
بس فى مشكلة بقى ياكوكو ياكميل
العصافير صوتها حلو ومغرده
وزى مانتى قلتى هموا بيختاروا اصوات بتبقى عايزه الحرق
يعنى مش مكفيهم دوشة الحياه لا عايزين الدوشه التى لا تنتهى ابدا
هاتعملى ايه بقى
يعنى اذا جالهم كروان وحمار هايختاروا طبعا الحمار
مش فى اغنيه طلعت للحمار
لا يكوكو لا
مش كارك
انت كميل ماتمشيش مع الوحشيين دول
:)
سلام

Blank-Socrate said...

يا كميل انت يا كميل هتغنى و طبعا لازم كناحتك يكونوا باينين فى الكلوب و طبعا مينفعش الصوصوة دول عاوزين حاجه تانيه فانا من ابناء العشه الكميله ارفض الفكرة تماما ....

أميرة البلطجية said...

كوكي
لازم نقدر ان دول ناس بيغنوا من اجل الفن ولا يهمهم ارباح ولا غيره
دي حاجة ارقي من فكرنا بكتييير
ههههه
وانا اتفق مع بلانك سقراط
والتار ولا العار يا ولدي
ولكه الا كناحات الكميل تبان
خلينا احن هنا ملمومين مع بعض في العشة الكميلة
ونبيع الراديو خالص
ولا ليها لزمة حرقة الدم
:)

§a§a said...

اوبس

اوبس

اوبس

تلاته اوبس

ومن اعلى مكان فى العشه اشجب واستنكر

فكرة تعبئه الشريط دى

دول ناس فاضيه

عمالين يعبو دماغ الناس بكلام فارغ

واصوات ولا نهاق الحمير

SomeOne said...

انت حتعبي شريك بس
ولا حتعملي كليب كمان

هههههههههههههه

حلوة

انا ممكن اعمل معاكي دويتو

انا صوتي زي صوت شعبولا

ها ينفع؟؟؟

ولا انت عايزة بعرور

koukawy said...

حسن محمود 00 يعني انت رأيك كده اصل انا حسيت فجأه ان ده هيبقي شرط بعد كده ان الواحد يكون معبّي شريط و هتكون دي ماده في الدستور فقلت الحق نفسي
*************************************
بلانك سقراط 00 لأ اهو كله الا كناحاتي الكميله
***********************************
بلطجيه 00 انا مكنتش عارفه ان كناحاتي مهمه عندكوا كده عشان خاطركوا انتوا انا مش هعبي شريط
*************************************
ساسا 00 اهو موضوع الحمار ده هيزعل منك سعد القصير
******************************
شادي فايد 00 لأ شعبولا راحت عليه بعرور لسه جديد نقيلك انت نوع فاكهه و في نص ساعه نكتب كلام و ساعتين يكون الكليب جاهز
بس تفتكر لو ما بينتش كناحاتي الكميله هنجحححح؟

§a§a said...

سعد دا اكتر واحد بينهق

اقصد حمارة بينهق

safa7_karmooz said...

اولا ...اطالب صاصا ...برد اوبس بتاعتى ...وميلعبش بيها تانى :p

ثانيا ...كوكو هتغنى ...اوبا ...

بلااااااااااااااااااااااااااااش يا كوكو ....

خلى الناس تعيش وتسترزق

عشان لو نهزلتى عالساحه هتفرميهم ...وتفعصيهم ...ماهو مش اى حد ...دى كوكو يا كماحه ...

بس ...انا بفكر اانزل انا كمان شريط...نظرا لان كل من هب ودب بيطلع شريط....يعنى البلطجى بتاع المنطقة نزله شريط...وكان يوم نكته لما قعد يوزع الشريط بالاجبار عالبائعين ..هههههههه

عاتى عاتى ....اهم حاجه متنسيناش فى الكليب ...ااطلع وراكى اادبحلى كام واحد كده :D

yara said...

ماشى بس بلاش قميص النوم و نبى
ok?
:)

koukawy said...

ساسا 00 تفتكر مين احمر سعد و لا حماره
***********************************
سفاح كرموز 00 يا سلام هتبقي البوبي جاند بتاعي و اتشخر بيك فشاخير زي ستي اطاطا لما كانت بتتفشخر بعوكل ؛ بس ما كنتش اعرف ان صوتي عجبك كده لدرجة انه هيكتسح الساحه
*********************************
يارا 00 اهه من غير قميص نوم افشل و مبقاش نجمه يا يارا يرضيكي برضو

heba said...

ده شريط كوكو لما ينزل هيكسر الدنيا ويخلي كل المطربين النص كم والدرجة تالتة دول يقعدوا في بيوتهم احسن
ولو عايزة اي مساعدة في الكليب .. رقصة - رعشة - قصعة .. اي حاجة احنا في الخدمة بس بشرط كلنا نلبس يونيفورم ريش
سلام يا كميل