Saturday, March 31, 2007

كل مولد النبي و انت طيب يا كوكو

الحلقه اللي فاتت 00
كاكوكاكو جه و قال السر لكوكو الكميل
الحلقه دي 00
كوكو الكميل قاعد لوحده و الدنيا حواليه شبه ضلمه و هو قاعد
علي الكرسي الكميل بتاعه و باصص في السقف و شويه
و قفل عينيه و ابتدي يسمع في ودانه الكلام اللي اتكلمه مع كاكوكاكو 00
كاكو 00 يا كوكو رد عليا قلي حاجه مش تسكت كده ؛ انت كده
بتحسسني بالذنب اكتر
كوكو 00 بص لكاكوكاكو و هو عينيه مدمعه
كاكو 00 يا كوكو اقوم امشي انت مش طايق تشوفني صح؟؟
كوكو 00 بص يا كاكوكاكو انت وجعتني و خنتني و انا موجوع
من كوه اوي انت مش عارف قد ايه ؛ بس انا مش عارف اقولك ايه دلوقتي
خايف اقول كلام وحش و انا مش كميل انا هكلمك في الكلوفون
و لف كوكو وشه الناحيه التانيه و قام كاكوكاكو و هو مكسوف و فتح الشباك
و طار 00 فاق كوكو من سرحانه علي صوت طانط ام مكاوك بتنده عليه00
افتح يا كوكو ؛ يا كوكو افتح انا طانطك ام مكاوك
و قام كوكو براحه و فتح الشباك و دخلت طانط ام مكاوك 00 ايه ده يا كوكو
انت بتعيط حد برضو يعيط في اليوم الجميل اللي احنا فيه كل مولد النبي و انت طيب يا كوكو
و مدت جناحاتها بعلبه فيها حلويات المولد و قالت 00 ياللا بقي كول من الحلويات
انا بص كمان جبتلك ايه و مدت جناحاتها بره الشباك و جابت كوكوحلاوه كبير
و قالت لكوكو 00 انا اسفه يا بني انا كان المفروض اجيلك من اول اليوم
بس بقي انكلك ابو مكاوك كان عنده العيله و انا كنت في المطبخ طول اليوم
و لسه ماشيين من شويه و قولت لازم اجيبلك الحلويات و الكوكو الحلاوه
رد كوكو 00 ميرسي يا طانط انتي فعلا بتحسيسيني انك امي التانيه و حضنها جامد
و بعدين مشيت طانط ام مكاوك و قفل كوكو الشباك وراها 00
و فتح علبة الحلويات لقا جواها 00 فستكيه و سكسكيه و ملبك و كوليه
و بص كوكو للحلويات و افتكر العيد الكميل اللي النهارده و ان في الذكري الكميله
دي لازم كل واحد يسامح كل الناس و فكر شويه و قام اتصل في الكولوفون 00
قالوا ايوه ؛ كل سنه و انت كيب يا كاكوكاكو ؛ انا سامحتك ؛ انا قلت ان انا
حتي لو خاصمتك مش هينفع لأن كوكوهايه كده كده بتحبك انت المهم انا
مبسوط ليكوا و اول كوكو تجيبوه سموه كوكو الكميل و لو احتجتني في حاجه
قولي و قول لكوكوهايه مبروك ؛ كاكان
و قفل كوكو و هو بيعيط كامد اوي و بيقول الحمدلله انا عارف ان اكيد مش كان نصيبي
و انا راضي يا رب عشان انا كوكو كميل بيسمع كلامك و جه كوكو يفتح حتة حلويات
رن جرس الكولوفون و رد كوكو 00 الو ايوه مين ؟؟؟؟؟
كاكان
للأسف يا جماعه مفيش فايزين في السؤال بتاع الحلقه اللي فاتت
شدوا حيلكوا بقي في السؤال الجديد 00 يا تري مين اللي اتصل بكوكو ؟؟؟؟؟؟؟؟؟؟؟؟؟؟؟

14 comments:

حسن محمود said...

كوكوهايه
--------------------------------
وكل سنه وانتى وكل الامه الاسلامية بخير

كاكان

سهر الليالى said...

كل سنه وانتى بخير وصحه
تحياتى

Anonymous said...

كوكو الكميل الغاليه
ده رد خاص جدا ليكي ومعلشي اني مردتش في البلوج
لان من ناحيه النت وكمبيوتري متفقين عليا
ومن ناحيه شويه مشاغل وحكايات كده
مش بقعد اساسا قدام اي كمبيوتر
اتمني تكوني بخير
وكل عام وكوكو وانتي ألف خير
وكل مولد وانتي طيبه وربنا يعيده علينا مسلمين مؤمنين نعيش بالسعاده و بالخير يارب
......
وطلعتي محاميه ياكوكو ههههههههههه
طيب ماشي
بجد كل ما أجي العشه هنا بحس اني رجعت لورا وفتحت الراديو علي ابله فضيله وصوتها العسول وهيا بتحكي حبايبي الحلوين
انتي اسلوبك ممتع بكل معني للكلمه بياخد اللي بقراه لورااااا سنين كتير من البراءه
ربنا يعزك يارب
ومش عايز كلمه دكتور دي تقوليهالي اوكي
انا مجهول مجهجه
ولا استاذ ولا دكتور ولا حاجه ومش عايز ازعل منك هااااا
ههههههههههههههه
سلام

يعقــــوب .... said...

أحسن حاجة الغخراج بتاع الحلقة ده..حلوة قوي لما كوكو سرح كده و قعد يفكر في الحصل..و لا أجدع فيلم من بتوع هوليوود..جميل موضوع الرضا..وكل سنة وانتي طيبة

يعقــــوب .... said...

أه كنت عاوز اقولك,يا ريت تكتري من حلقات كوكو ده ..أصلها بتروق الدماغ و أحسن توقيت لقرايتها هو قبل النوم على طول عشان انام من غير ضغط و مروق أو الصبح بدري قبل الشغل عشان اروق برضو...كتري من العلاج و متقطعيش

Mohamed A. Ghaffar said...

كل سنة وانت طيبة

أميرة البلطجية said...

اولا الرد ع السؤال:
كوكوهاية هي اللي بتتصل
ثانيا: كل سنة وكوكو واسرته طيبين
ثالثا: مبسوطة اوي من كوكو ان اتصل صالح حد في المولد كده حسسني انه جدير بالمواطنة في الممكلة
!!
رابعا بقي: سيااااااااااااااااف
تعالى هنا صادر لبة الكوكوحلويات دي وهتلي الملبن اللي فيها وبعدين اضرب كوكو على كناحه الكميل عشر ضربات وبلاش تموته عشان انا بحبه
بس لازم العقاب لمخالفة قوانين المملكة
!

ert3ashat said...

كل سنه و انت طيب يا رب...
مين بقى؟؟؟؟

تامر نبيل said...

كل سنة وانتى طيبة

وكل الاممة الاسلامية

بخير

تحياتى

shams said...

أكيد كوكوهاية
بس هي عرفت نمرة الكلوفون منين ؟ هههههه
وكل سنة وكوكو الكميل طيب وبخير ومتنساش تعزمني على شوية كولية يا كوكو

Anonymous said...

علي فكره انا متابع الكوكو الكيل من زمان و مش عايز اعلق انا سفااااااااااااااح الفراخ

koukawy said...

حسن محمود 00 و انت طيب
************************************
سهر الليالي 00 و انت بخير و سلامه
************************************
مجهول 00 حقك علي يا مجهجه بس من غير القاب هههههههههههه
و ميرسي علي الكلام الكميل ده
و انت طيب و بخير و سلامه و يخليك للعشه يا رب
************************************
يعقوب 00 يا ابني كوكو مخرج الروائع كوكو الامام ههههههههههه
و انت طيب ؛ و بالنسبه للعلاج انا خايفه بس يجيلك اوفر دوز منه
هههههههههههههههههههههه
**********************************
محمد عيبد الغفار 00 و انت طيب
**********************************
بليطجيه 00 الرحمه يا سمو الأميره خدي كل الحلويات بس بلاش تضربي كوكو لحسن كناحاته الكميله مصدقت يطلعلها ريش
*******************************
ارتعاشات 00 و انت طيب ؛ مش هقوللك
**********************************
تامر نبيل 00 و انت طيب
**********************************
شمس 00 بقولك ايه لو عايزه كوليه استأذني من سمو البلطجيه لحسن هي منعه حد ياكل في المملكه حلويات الا هي
******************************
سفاح الفراخ 00 يا ماااااااااااااااامي
الحقيني من سفاح الكوكوهات
طب ليه مش بتعلق بقي ؟؟؟؟
بتبخل ليه بالتعليق و اسعاد كوكو الكميل ؟؟؟؟
منور

fad-fadat nour said...

ميين ؟ كوكوهاية ؟

koukawy said...

فضغضات نور 00 مش هقولك