Thursday, March 22, 2007

سر كوكوهايه 00

الحلقه اللي فاتت 00
كوكو قعد يفتكر مامته في عيد مامة الكوكوهات و يعيط
الحلقه دي 00
كوكو جري بالكرسي بالعجل بتاعه و فتح لكاكوكاكو الشباك و اول ماكاكوكاكو
دخل بص لكوكو الكميل و قاله 00 يا كوكو هيييييه انا عرفت كوكوهايه ليه مش بتطير
رد كوكو بسرعه 00 تعالي اقعد هنا ياكاكوكاكو بسرعه و احكيلي بالتفصيل من اول ماروحتلها
رد كاكوكاكو 00 ما شي ؛ انا يا سيدي سيبتك و روحت البيت و انا مروح اشتريت
لماما هديه و قعدت معاها و بعدين دخلت نمت و قبل ما انام قعدت افكر و افكر و افكر كتير
ازاي هقابل كوكوهايه ؛ المهم لقيت ان احسن طريقه استناها برضو علي محطه الأوتوبيس
من غير متشوفني و اركب نفس الأوتوبيس معاها و اشوف هي بتروح فين
المهم لبست نضاره و كاسكيت عشان متعرفنيش و اول ما جه الأوتوبيس رحت مستني هي تركب
و روحت راكب بعديها ؛ و فضل الأوتوبيس ماشي بينا كتير لغاية ما وصلنا مكان
انا اول مره اشوفه و نزلت كوكوهايه روحت نازل وراها علي طول ؛
و بعدين لقيتها دخلت مكان كده و بصيت علي اليافته اللي موجوده علي البوابه لقيت مكتوب
عليها مدرسة الكوكوهات ذوي الكناحات الخاصه ؛ و فهمت علي طول ان دي مدرسة
اخواتنا الكوكوهات اللي جناحاتهم مش زي بتاعتنا ؛ و روحت داخل من البواب عشان اعرف كوكوهايه بتعمل
ايه هناك ؛ و انا داخل سالني البواب رايح فين قولت له لسه في كوكوهايه دخله من هنا
انا عايزها و رد عليّا البواب 00 اه انت عايز ميس كوكوهايه طيب ادخل حضرتك
من الباب الكبير اللي هناك ده هتلاقيها في اوضتها اول اوضه علي اليمين00
و قولتله ميرسي و مشيت علي الوصفه و فعلا و صلتقدام الأوضه اللي كان بابها نصه
ازاز و ببص شوفت منظر خلاني عايز اعيط شوفت كوكوهايه من غير جناح يمين
و من الخضه معرفتش اعمل ايه و في نفس الوقت ده لفت كوكوهايه فشافتني من ورا الباب
و اتسمرت مكانها و انا كمان ووقفنا نبص لبعض ؛ و بعد شويه قربت كوكوهايه علي الباب
و فتحته و قالتلي 00 ادخل ؛ و اتحركت براحه جدا و انا باين علي اني مخضوض
و قفلت كوكوهايه ورايا باب الأوضه و قالتلي 00 انت جيت ورايا كل ده عشان تعرف سر ان انا مش بطير صح
يا كوكو و اديك عرفت ان انا معوقه و عندي جناح صناعي ايه رأيك ؟
رحت انا رديت عليها و انا مش عارف اتكلم 00 طب و دي فيها ايه ؟ انتي خبيتي عليا ليه؟
ردت كوكوهايه 00 عشان انا مش عايزاك تبقي بتحبني عشان انا صعبانه عليك
طب هو انتي بتيجي هنا ليه كوكوهايه ؟ ردت عليا 00 انا اصلا كنت تلميذه في
المدرسه هنا و لما كبرت اشتغلت مدرسه للكوكوهات اللي زي
عرفت ليه بقي يا كميل 00 و سكت كاكوكاكو و بعدين بص لكوكو و قاله بس كده
كاكان
الفائز في السؤال اللي فات 00 و لا حد كل الاجابات كانت غير مطابقه للمواصفات
بس اللي قربوا للحل كانوا 00
شارم قال 00 عشان معندهاش جناحات
حسن محمود قال 00 يكون كناحها الكميل فيه كرح
فممكن نعتبرهم نص كسبانين
مبروك يا كميلين يا نص كسبانين
هههههههه

سؤال الحلقه دي 00
هو كاكوكاكو سكت ليه و بص لكوكو ؟؟؟؟؟؟؟؟

5 comments:

حسن محمود said...

زعلتينى ياكوكو على كوكوهايه
بس والله كوكوهايه جدعه
بتتكلم بثقه ومعتزه بنفسها
وده كمييل قوى
بس برضه كوكوهايه صعبانه عليه

نيجى بقى لكاكوكاكو سكت ليه وبص لكوكو

أكيد كان عايز يشوف رد فعل كوكو ويمكن كان خايف من كوكو علشان عمل كده من غير مايقوله
ويمكن كوكو يفتكر انه كان بيلعب بديله من وراه
:)

والله يبارك فيكى
نص حل كويس برضه مكنتش متوقع انه كوكوهايه يطلع ليها كناح صناعى
يلا
كاكان

يعقــوب said...

أنا عجباني قوى الفكرة والقصة ده جدا..برتفو عليكي و أحسن حاجة الإسقاطات الفيها

يعقــــوب .... said...

أه نسيت أشترك في المسابقة..هو فضل ساكت كده و يبصلها عشان كان بيتمنى تحصل معجزة و تنشق الأرض و تبلعه ,أو بيتمني يصبح غير مرئي و هى متخدش بالها منه أو الزمن يرجع بيه عشان ميعملش الحركة ده تاني

أميرة البلطجية said...

عشان خلاص الروس اتساوت يا معلم
ولا تعايرني ولا اعايرك
:)

koukawy said...

كوكو زعلان محدش عرف الحل