Friday, March 9, 2007

يا نهاري يا كوكو 00

الحلقه اللي فاتت 00
كوكوهايه و هي واقفه مع كاكوكاكو لقيت حاجه وراها و راحت مصرخه
الحلقه دي 00
و لقيت كوكوهايه باباها في وشها و بيزعق في وشها بصوته
الطخين المحشرج 00 انتي بتعملي ايه يا بنت يا كوكوهايه مع
جوز الشباب دول في الشارع انا شكلي معرفتش اربيكي
و حاولت كوكوهايه ترد 00 يا بابا دول 00
قاطعها الضخم 00 انا حاسس اني شفتكوا قبل كده و انا ذاكرتي
حديد في رصاص في صلب يعني مبنساش انا شفتكوا قبل كده؟
رد كوكو بصوت مخنوق و مش كميل 00 لأ اكيد حضررررتك
بييييتهيييأأألك 00 صرخ الضخم 00 لاااااااااااااااااااااااااااا
انا مش مجنون انا متأكد 00و سكت شويه و كلهم بيبلعوا ريقهم
و ركبهم بتخبط في بعض و قال فجأه00 ايوه ه ه ه ه انتوا مش كنتوا
تحت الشباك عندنا مستنين الست هانم تطل من الشباك و انا افشتكوا
و قولت يمكن انتوا مظلومين بس لأ انتوا مش مظلومين و انا مش هسيبكوا النهاره
و راح فارد الضخم جناحه الضخم اللي زيه و راح زاقق كوكوهايه راحت
مخبوطه في عامود النور و قال 00 امشي انجري انتي يا بنت يا كوكوهايه علي البيت
و انا لما اجيلك حسابي معاكي و حسك عينك متروّحيش00 و جريت كوكوهايه بسرعه
و اتدور الضخم لكوكو و كاكوكاكو اللي كانوا خلاص من كتر العرق يتعصروا
و قالهم 00 انتوا بقي فاكرني مغفل و بتستغفلوني و تعكسوا بينتي 00
رد كوكو 00 لأ يا عمي حضرتك فاهم الكلام بطريقه مش كميله
هو الموضوع و ما فيه 00 و ملحقش كوكو يكمل الجمله لقا الضخم بيقولوا00
و هو انا عندي وقت تقعد تحكيلي الموضوع و ما فيه و لا انت هتصحبني00
و ثبتوا شويه بيبصوا لبعض و فجأه قال كوكو لكاكوكاكو 00 اجري يا كاكوكاكووووو
و فجأه جري كوكو بسرعه ووراه كاكوكاكو و وراهم الضخم
و فضلوا يجروا و كوكو يدخل تحت عربيه ركنه و الضخم يجيله
من الناحيه التانيه عشان يمسكه يروح كوكو راجع تاني من الناحيه التانيه
اما كاكوكاكو فخد بعضه و طار و استخبي في وسط شجره و رقها كتير
و باع كوكو الكميل اللي كان بيحاول بكل جهده يحرك كناحاته الكميله الصغننه و يطير
و لكن مفيش فايده ريشه مش مساعده و كل ما خلاص يجي الضخم
يقبض علي كوكو يلاقيه فلت منه و استخبي تحت حاجه واطيه
ميقدرش هو يدخل تحتها و فضل كوكو يصرخ علي كاكوكاكو يجيله بس كاكوكاكو كان
خايف و ووصل كوكو لحته في شارع ضيق و جه يجري لقي الضخم في وشه
لف الناحيه التانيه ملقاش اي حته كميله يجري منها و ادور كوكو و بص للضخم
و قاله 00 اسمعني بس يا انكل انا بس كنت عايز اقولك لأ اسمعني من فضلك
و فجأه 00 الدنيا اسودت و ظهر كوكوهات صغننه علي راس كوكو
دايخين و بيصوصوا
كاكان



8 comments:

حسن محمود said...

لا يسلم الشرف الرفيع من الاذى
حتى يراق على جوانبه الدم

كوكوهايه باباها راجل طبعه حامى
مايحبش الحال المايل

الجرى نص الجدعنه صحيح بس فى الحالات دى كل الجدعنه
وطبعا متخيل المنظر الاخير
انا فييييييييييييين؟
ايه العصافير دى كلها
:)

shams said...

يا خبر .. ايه اللي حصل لكوكو ..شكله خد علكة سخنة من بابا كوكوهاية واغمى عليه
واللي صعبانة علي بجد كوكوهاية .. دي بباها هيشبعها ضرب لما يبان لها صحاب .. لأ صحاب ايه ده هم هيشبعوا ضرب هم كمان
متخليهوش يضربها يا كوكو هي معملتش حاجة غلط لحسن انا اللي هاجي بقى واشتكي الراجل ده عشان ب (أبيوز)معاملة بنته
abuse = mistreat

М€ŝЋМΣŞĦ said...

بصراحه يستاهل
حد قاله يجري ورا بنات الناس من ورا اهلهم ؟

يعيش وياخد غيرها

:D

وبعدين مش يستني يطلعله جناح وبعد كده يروح يصاحب بنات

كتاكيت اخر زمن

koukawy said...

حسن محمود 00 loooooooooooooooooooool
************************************
شمس 00 ما هو برضو خايف عليها يا شموسه و مش عارف ان كوكو غرضه كميل
**************************************
مشمش 00 اخص عليك انت بتعاير كوكو ان ريشه الكميل وقع

Anonymous said...

انا حاسس انك بجد فرخه؟

أميرة البلطجية said...

انا طول مانا بقرا حاسة اني شايفة فيلم كرتون كميل
بجد يا كوكي انتي تحفة كميلة اويييي
ويا رب بقي يحصل اللي في بالي .زلأ مش حقولك ايه هو..حستني لما اشوف كوكو حيعمل ايه المرة الجاية ان شاء الله

koukawy said...

اللي مش عارفه اسمه 00
و مش اي فرخه دي كميله اوي
*********************************
بلطجيه 00 هو كوكو كميل الا بالكومنتات الخلوه دي

Nada said...

كوكايا ههههههههههههههه انا مت من الضحك
وانتي ليه بتتكلمي مع الكوكاويين
كفاية عليك الكوكاويات كميلاتك في الجامعة

تحياتي