Wednesday, March 28, 2007

كاكوكاكو جه 00

الحلقه اللي فاتت 00
كوكو اتفق مع كاكوكاكو انه يقول لكوكوهايه انه عايز يتقدملها
الحلقه دي 00
صحي كوكو الكميل من النوم مش لقا كاكوكاكو في البيت و قام عشان يدخل يتوضا و يصلي
لقا ورقه متعلقه علي المرايه بتاعت الحمام مكتوب فيها 00
عزيزي كوكو الكميل ؛ انا مرضيتش اصحيك الصبح و انا نازل
علي العموم انا هروح لكوكوهايه اعمل اللي اتفقنا عليه
و لما ارجع هجيلك
كاكان يا كميل
و فرح كوكو اوي و اخد الورقه في حضنه و اقعد يبوس فيها من الفرحه الكميله
اللي هو فيها و بعدين حط الورقه في جيب الروب و اتوضا و صلي الصبح
و اقعد يدعي ان كوكوهايه توافق و دخل كوكو المطبخ عشان يحضر الفطار لقا الشباك
بيخبط 00 جري بسرعه افتكر انه كاكوكاكو جايبله الأخبار ؛ فتح كوكو الشباك لقا قدامه
طانط ام مكاوك جارتهم و شايله في جناحاتها صنيه كبيره اوي و متغطيه بمفرش كميل
و فتح كوكو و قال 00 اهلا يا طانط اتفضلي ؛ دخلت ام مكاوك 00 صباح الخير يا اكمل
كوكو في العالم انا اصلي شفت صحبك نازل الصبح قولت انت اكيد قاعد لوحدك روحت عملالك الفطار
عشان عارفه انك تعبان ؛ رد كوكو 00 ميرسي يا طانط ده كتير اوي ؛ نطت طنط
في منقاره و هو بيتكلم و هي رغايه اوي 00 لأ و ميرسي علي ايه انت زي ابني مكاوك الله يرحمه
فاكر يا كوكو الحادثه اللي حصلتله و مات فيها ؛ لغاية دلوقتي انا بكره الولد اللي كان بيلعب بالنبله
و جت في مكاوك موتته الله يرحمك يا بني 00 الا بقي يا كوكو عامل ايه و ازيك و ازي 00000
و لوك لوك لوكلوكلوك 00000 لوكلوكلوكلوك000 و كل ده و كوكو عمال يهز راسه و يبتسم
و هو راسه الكميله مشغوله اوي و مستني كاكوكاكو علي نار ؛ و اخيرا قالت ام مكاوك 00
اسيبك بقي يا كوكو تفطر و امشي انا احسن عندي غسيل و هروح السوق و انشالله
هجيبلك الغدا بس ربنا يسهل و الاقي الخضار كويس في السوق لحسن المره اللي فاتت مقولكش كان شكله ازاي
و لولولوكاوكاولوك صوصوصوصوصولوكولوصوصوص 00 يا للا بقي سلام اسيبك تاكل
و فتح كوكو الشباك و كانت دماغه قااااااااااد كده من الصداع ؛ دخل كوكو المطبخ و شال الغطا من علي الصنيه
لقا طنط ام مكاوك جايباله كل حاجه عيش و جبنه و قمح و لبن و عسل و كمان شوكولاته
فطر كوكو براحه عشان يضيع و قت و بعد مخلص دعا لطانط ام مكاوك و بعدين
قام بعد كده عمل كهوه كميله من كناحاته اللي هو بيحب يشربها دايما
و قعد قدام التليفيزيون يقلب في المحطات و فجأه سمع خبط علي الشباك قام خد العكاز بتاعه
و مشي بسرعه للشباك و فتح لقا قدامه الكوكوسطجي جايبله كواب 00 ازيك يا استاذ كوكو
عامل ايه حضرتك اتفضل الجواب اهو ايه ده هو حضرتك عيان لأ سلامتك الف سلامه
مش عايز خدمه مني و الله لأ اوعي تقول لأ متتكسفش ؛ رد كوكو 00 لأ شكرا يا عم كوكوسطجي
مش هتكسف عيب ده احنا اهل شكرا سلام 00 و قفل كوكو الشباك و دخل يفتح الجواب
لقاه من باباه انكل كاكا 00
حبيبي كوكو وحشتني اوي انا اسف اني اتأخرت عليك بس حصلي ظروف كتير اوي
يا رب تكون انت كويس نفسي اشوفك اوي ؛ علي العموم انا قدامي كام يوم و اوصل البيت
متقلقش علي
باباك كاكا حبيبك
قفل كوكو الكواب و هو فرحان اوي ان انكل كاكا قرب يجي عشان يروح معاه يقابل
بابا كوكوهايه ؛ يا سلام الظروف كلها كميله في نفس الوقت شكرا يا رب 00 قال كوكو كوه نفسه
الصغننه القلقانه الكميله 00
الليل قرب يجي و كاكوكاكو ما جاش يا تري ليه ؟ يا رب خير هو اكيد انشالله
هيجي بكره الصبح هو تلاقيه فاكر ان انا نمت انا اخش اصلي العشا و انام و اصحي بدري
خ خ خ خ خ خ خ خ خ خ خ خ خ خ خ خ خ خ خ خ خ خ خ خ خ خ خ خ
و اكل كوكو الكميل قمح و لبن مع الملايكه الكميلين
خ خ خ خ خ خ خ خ خ خ خ خ خ خ خ خ خ خ خ خ خ خ خ خ خ خ خ خ
صحي كوكو 00 و فات اليوم و كاكوكاكو مجاش
و فات اليوم اللي بعده و برضو مجاش و كمان مش بيرد علي الكوكوبايل و لا الكولوفون
و فاتت يوم كمان 00 و يوم كمان 00 و يوم كمان
و في اليوم السابع صحي وكوكو و هو لسه عنده امل ان كاكوكاكو هيجي
و علي بعد الضهر وصل كاكوكاكو 00 و دخل حاطط وشه في الأرض
مكسوف من كوكو اوي 00 و بصله و قاله 00
انا اسف يا كوكو يا كميل انا هحكيلك اللي حصل
و بصله كوكو و قاله 00 قول انت قلقتني
كاكان

مش هحط سؤال جديد الحلقه دي و هفضل اسأل نفس سؤال الحلقه اللي فاتت
عشان اديكوا فرصه لأن الاجابات كانت مش كتيره فعندوكوا فرصه كمان
و السؤال كان 00 تفتكروا كاكوكاكو هيقول ايه لكوكو الكميل ؟

17 comments:

كراكيب عادل said...

مدونتك بترجعلي شعور جميل
بحس اني طفل صغير بيسمع حواديت

احييك بجد علي الشعور الحلو الي بتحكي بية

يعقــــوب .... said...

يا هانم أرجوكي أرجوكي عشان خاطر كل الكوكوهات اللي في الدنيا أنا طول عمري مبحبش المسلسلات عشان مبتكملش و بتوقف على حتت مهمة بس بحب المسلسلات البتكون حلقة واحده او غير مترابطه.متكبريش العقدة ليا اكتر من كده

ert3ashat said...

بحس اني طفل صغير بيسمع حواديت

نفس احساسي و الله..
كملي :)

fad-fadat nour said...

مش عارفة كاكو حايقول ايه لكوكو الكميل ..بس عايزة اطلب طلب يا كوكو لو سمحت ايه اسم الموسيقي اللي بتشتغل في البلوج دي ...عشان كميلة اوي


شكرا

أميرة البلطجية said...

سبع تيام؟
لااااااااااااا
بس هما تلاقيهم بيشتغلوه
وكمان شوية وبابا كاكا حيجيى ومعاه الشبكة والملبس والذي منه
وربنا يفرحنا كلنا يا رب

مجهول said...

سأخرج عن الموضوع شويه
وحقولك
معلشي اهديتك تاج
والتاج علينا حق برضه


تحياتي

koukawy said...

كراكيب عادل 00 ميرسي جدا و مادام كده بقي هستناك تيجي تعيل معايا علي طول و تسمع حدوتة قبل النوم
***********************************
يعقوب 00 انت بتطلب مني المستحيل لازم اعمل ساسبنس و اخليك تقعد علي اعصابك
و انت ماجاوبتش علي السؤال
بجد منورني دايما
**************************************
ارتعاشات 00 هكمل
ميرسي علي احساسك
**********************************
fadfadat nour 00
بصي يا ستي انا مش عارفه المقطوعات اسمها ايه بالظبط كان عندي اسمهم و نسيتهم
بس اسم المؤلف
astor piazzola
و لو هتعميلي سيرش يبقي تعملي علي
scent of a woman theme or soundtrack
هو بتاع الفيلم ده
و مبسوطه انها عجبتك بس تابعي كوكو عشان تعرفي تحلي الأسله بعد كده
************************************
بلطجيه 00 مش هقولك معنديش نتايج بتطلع من الكونترول استني زي بقيت زمايلك لما تتعلق
********************************
مجهول 00 يا سلام عينيا يا مجهجه انت تؤمر بس

أحمد مختار عاشور said...

دمك خفيف يا كوكو
انتى بتكتبى قصص أطفال من أمتى؟
.........
تحياتى

يعقــــوب .... said...

عموما هفضل اتابع الحلقات عشان بتخليني مروق و بتفكرني بابم زمان ايام الروقان و لما الواحد مكنش شايل هم غير انه ياكل و ينام و يلعب..اما بخصوص السؤال فانا هكون متابع فقط

shams said...

كوكو يا كميل أنا مجيتش عندك من يوم تسعكاشر مارس وفاتتني بوستات زي العسل بس هعلق عليها كلها هنا لو ينفع بس معلش الكومنت هيبقى طويييييييل قوي بس ابقى اقراه على مهلك يا كميل وأنا لاحظت كمان انك غيرت هنا القاهرة لموسيقة التانجو اللي جات في الفيلم بتاع ال باتشينو
scent of a woman
******************
بالنسبة لفيلم
a walk to remember
الفيلم ده أنا حفظاه عن ظهر قلب حتى الأغنيه اللي غنوها عالمسرح حطاها في الفيفورتس عندي عالكمبيوتر ولما بشوفه بحس ان انا سبت الدنيا دي ورحت دنيا تانية وانزل منها على آخر الفيلم بس بجد أحسن حاجة ممكن تطلعي بيها ان البطلة فعلاً أثرت في حياة البطل تأثير إيجابي قوي .. الحب فعلاً يصنع المعجزات وعلى فكرة يا كوكو أنا دخلت اللينكة اللي "ضياء" عاملها عن الفيلم وروان "الله يرحمها ويسكنها فسيح جناته" ومقدرتش اسيب كومنت واحد .. زي ما تكون ايدي وقفت ومعدتش شايفة قدامي من الدموع اللي انهمرت بغزارة .... يعني أنا هارية نفسي من العياط دلوقت .... لمجرد اني تخيلت الفراق .. الموت علينا حق بس الفراق .. حقيقي مش عارفة كنت هكتب كومنت له أقوله ايه غير ربنا يصبره وتخيلت انه نفسي اقول لكل الناس اللي أنا بحبهم .. اني بحبهم .. قبل ما اموت ومش عارفة انا فعلاً سبت تأثير في حياتهم ولا لأ .. لأنهم بالتأكيد سابوا تأثير جامد عندي وحاسة اني لازم أقولهم كده .. متشكرة اوي يا كوكو بجد وربنا يخليكي
******************
اما بقى عيد مامة الكوكوهات فأنا زعلت خالص عشان كوكو قضى عيد الأم من غير مامته وقعد يفتكرها ويعيط .. بس برده قفلت قفلة أكشن خالص لما قلتي ان كاكوكاكو عرف السر الخطير .. ماشي يا كوكو البقية في العدد القادم وكل سنة ومامتك انتي طيبة يا كميل
******************
الموسيقى التصويرية بتاعة جميس حقيقي جميلة ورائعة وبتمس القلب وتدخله علطول وتثير العاطفة و .. و حاجات عاتشفية كتير بقى يا كوكو وانا سمعت وشفت كل الأفلام اللي انت قولتي عليها وكلها بجد من أروع من أروع الأفلام الأجنبي ما عدا الأخير 2006 لسه مشفتوش بس أكيد هتبقى موسيقاه التصويرية على نفس المستوى .. متشكرة قوي يا كوكو
******************
السؤال لغير الله مذلة وأي مذلة .. بس أحلى حاجة انك قلت فعلاً انه خصوصاً في البلد دي مذلة وأي مذلة .. واحنا منهمهمش في حاجة اصلاً .. ده زمانهم فرحانين ان منطقة بحالها ولعت وبيقولوا ياريت الباقي يحصلهم .. إلهي يارب تولع فيهم كلهم واحد واحد
*****************
تصوري يا كوكو عمري ما كان ييجي في بالي ان كوكوهاية تطلع معوقة .. بس اللي زعلني أكتر ان كاكوكاكو هو اللي شافها مش كوكو .. الموضوع ده حساس حبتين وكان لازم كوكو اللي يعمل ويشوف كل حاجة بنفسه .. اما من ناحية ان كوكوهاية مش عايزة حد يعرف عشان كوكو ميحبهاش لأنها صعبانة عليه .. فأنا بأيدها جداً جداً جداً .. لأني أكره هذا النوع من الحب .. حب الشفقة .. بس مش هعرف أجاوب على السؤال عشان أن متأخرة وفي حلقات جديدة جت .. أما اروح اكمل بقى اصل بوستاتك كلها شيقة اوي يا كميل
******************
أنا بثق في ذوقك جداً يا كوكو وأنا خلاص حطيت الكتاب في لستة المشتريات اللي انا عايزة اجيبها جنب كتب تانية ولما اقراه اكيد هقولك رأيي .. بس من كلامك شكله حلو
*****************
كوبري الموت .. والاسم ده موصلش لحد من المسؤولين .. يعني هم مش هيتحركوا إلا إذا حد منهم مات .. ولا دي كمان مش هتفرق .. ربنا ينتقم منهم مطرح ما كانوا .. ربنا يرحمنا ويرحم موتانا وموتى المسلمين .. آآآآآمين
****************
ده الألقاب دي تريأة يا كوكو .. آل رئيس وزراء الفنانين .. عشان غنى في مرة كلام سياسي بحب مش عارف مين وبكره مش عارف مين .. بس ان جيت للحق .. مش لذيذ ويهلك من الضحك .. وإيييييه
***************
يعني كوكو حب كوكوهاية أكتر لما عرف انها معوقة .. طب والمسكين كاكوكاكو اللي في النص ما بينهم .. يعني تفتكري يا كوكو ان كوكوهاية مش هتعرف الفرق لما كوكو الأصلي يروح يكلمها بعد ما يخف .. انا حاسة كده زي ما يكون مشاعر حب تسللت لقلب كاكوكاكو من حيث لا يدري .. ومش عارفة هيقول الحقيقة لكوكو بعد كده ولا هيعمل شهم ويبعد عنهم هم الاتنين .. طب افرضي كوكوهاية اختارت كاكوكاكو يبقى كوكو الكميل يعمل ايه ساعتها .. الحكاية شكلها لسه هتتعقد يا كوكو .. بالراحة علينا
****************
بالنسبة لبرامج التوك شو انا كنت هبقى من اللي مش متابعين حاجة بس لو كنت هتابع يبقى العاشرة مساء
***************
يعني هو الأمير ده ناوي يسيب كلابه علينا كلنا ولا ايه ؟؟؟؟ يكونش في حد مسلطه عشان كده مش عايزين يرحلوه .. آخرته هتبقى على ايد الكلاب برده ان شاء الله .. يا إما حد يعمل في الكلاب دي عملية انتحارية ويخلصنا منهم .. حاجة تنرفز .. واللي ينرفز أكتر الدم البارد بتاع الجماعة اياهم .. ايه ده هو احنا مش تبعكو ولا ايه ؟؟ ولا هم زهقوا من القضاء علينا بالطرق التقليدية قالوا لما نجرب طريقة الكلاب يمكن تجيب نتيجة اكتر
**************
هييييييه وأخيراً وصلت لآخر بوست .. منه لله النت كان فاصل ومش عارفة ادخل هنا خالص وبجد فوت علي حاجات كتير حلوة ومسيبتش العشة الا لما قريت كل اللي فاتني بس والله فيها الخير ام مكاوك وكمان انكل كاكا جاي .. والحال هيبقى تمام .. بس ايه اللي أخر كاكوكاكو ؟ أكيد مقدرش يروح يكلم كوكوهاية .. والمفروض مادام عدى سبع ايام يبقى كوكو اتحسن وبقت صحته حلوة يروح هو أحسن ولا ايه ؟

شخبطة ملوكى said...

اسلوب سلس جيد فى الامساك بخيوط الحدوتة
جميل و انتظر دائما الجديد
تحياتى

سمسم said...

يعني قلها ايه

اكيد اتكلم عن وكسه جديده

ويجعلو عااااااااااااااااامر

شادي فايد said...

ياااااااااااه
دا انا فاتني كتير قوي

أحمد مختار عاشور said...

انتى ليه فى التصويت على الجريدة المفضلة مش حاطة (أخرى)ا
؟
أنا جريدتى المفضلة هى الفجر
و بعدها جريدة القاهرة
أعمل ايه انا دلوقتى؟

esraa said...

أوعي يكون هيقوله انه حبها وخطبها لنفسه.

koukawy said...

احمد مختار عاشور 00 ده من ذوقك بس
من اول ما فتحت المدونه من 3 شهور الا يومين
************************************
يعقوب 00مع انك كسبت في السؤال ده
لما حليته في الحلقه اللي فاتت
***********************************
شمس 00 احب اقولك انك هايله و قارئه ممتازه معقوله قؤيتي كل اللي فاتك
برافو عليكي ؛ المهم عجبتك الموسيقي ؟
المهم انا مش هرد علي حاجه لأن انتب قلتي كلام جميل مفيش احسن من كده
و مبروك ابشرك انك من الكسبانين في السؤال ؟
**********************************
شخبطه ملوكي 00 سمو الملك المشخبط حضرتك نورتني بجد و يا ريت تيجي علي طول
*********************************
سمسم 00 مش هقولك يا سمسم
لالالالا
**********************************
شادي فايد 00 ياه ه ه ه ه ه انت فين
طبعا فاتك كتيييييير
و ما اشتركتش في مسابقة كوكو
*******************************
احمد مختار عاشور 00 فاتت عليا بس لما اجي اكتب بوست نتيجة التصويت هكتب انك قولتلي كده متزعلش انت تؤمر
***********************************
اسراء 00 مبروك يا اسراااااااااء
انتي كمان من الكسبانين

fad-fadat nour said...

شكرا يا كوكو علي اهتمامك ربنا يخليكي يا رب