Wednesday, March 7, 2007

osama


فيلم انتاج و اخراج افغانستاني سنة 2003
فيلم يحكي مأساة الشعب الأفغاني osama
من حركة طالبان و مدي قسوة العيشه و تطبيق
الدين بأسلوب خاطئ و منفر ؛ و الفيلم بطولة بنت عندها
13 سنه و قامت بدورها ممثله افغانيه من مواليد
كابول سنة 1989 و اسم الممثله
marina golbahari
و حصلت الممثله دي عن جايزتين عن دورها في الفيلم؛
و الحقيقه هي تستاهل لأنها هايله ؛ جايزة احسن ممثله
في مهرجان 00
cinemanila international film festival
و جايزة احسن ممثله صغيره في السن في مهرجان 00
molodist international film festival
و اخد الفيلم جايزة احسن فيلم اجنبي اللغه ؛
سنة 2004 في مهرجان
golden globe ,USA
من الناحيه الفنيه انا من رأي انه فيلم مش ممل
بمعني ان المخرج كان محافظ علي الايقاع طول الوقت رغم ان في مشاهد
طويله و رغم انه منقدرش نقول عليه مخرج جامد برضو ؛
اللي نجح في توصيله اوي هي حالة القهر و العنف ؛
ده غير كمان انه كان موفق جدا في اختيار الممثلين
اما من ناحية الحقيقه مقدرش اجزم هل فعلا الصوره اللي منقوله في الفيلم
حقيقيه و لا فيها شئ من المبالغه و الافتراء لأن انا معرفش كتير
عن نشاط حركة طالبان جوه افغانستان ؛
علي العموم انا استمتعت بالفرجه لأن كانت اول مره
اتفرج علي فيلم من السينما الأفغاني و شايفه انه فيلم
يستاهل يتشاف و قررت اني اتابع افلام من عندهم تاني
و هبقي احكيلكوا متخافوش
سلام
اضافه بسيطه بعد قرأتي للكومنتس0000000
جبتلكوا لينك للفيلم عشان لو حد يحب يعمله داونلود و يشوفه
فيلم اسامه علي سايت ميني نوفا
بس ده لأزم تنزلوا برنامج مخصوص للتنزيل اسمه
bitlord download link
اللي فيكوا ينزل الفيلم و يعجبه بعد ما يدعي لكوكو الكميل
يقولي رأيه
سلام تاني مره

13 comments:

أميرة البلطجية said...

انتي شوفتي الفلم ده فين؟؟
على فكرة دكتور محمد فتح التليقات تاني
:)

حسن محمود said...

هنا فى مشكله كبيرة انتى حاطيتى ايدك عليها
الحقيقة
فين الحقيقة؟
ما أصل الاعلام ده بيعمل تعبئة عامه وبيخلى مخ الواحد زى العجينه ويبتدى يشكلها ويحط كل اللى عايز يقوله فى الفيلم حتى لو غلط
الواحد يعرف منين بقى ان اللى اتنقل واللى اتصور فى الفيلم ده الحقيقه ولا لا؟

هاضرب ليكى مثل
شاء حظى ان فى حد جاب ليه فيلم قائمة شندلر
Schindler's List (done in 1993)
الواحد بعد لما شافه حس ان اليهود دول اتظلموا كتير قوى واتبهدلوا كتير
وانا اذا واحد مش عارف اليهود كنت هاقول انا عايز ابقى يهودى واساعدهم

انما انا منكر اصلا ان فى محرقة نازية حصلت
المهم الفكره انهم بيخلوكى تصدقى اللى هموا عايزينك تصدقيه
نفس الفكره اتكررت فى فيلم
united 93
المشكله انهم مسيطيرين تماما على السينما اللى هى أقوى سلاح علشان بتنتشر بسرعه رهيبه فى كل العالم

المهم ماقلتيش اسم الفيلم أسامه - ليه علاقه باسامه بن لادن ولا تشابه اسامى؟

وماقلتيش ايه اللى شدك فى الفيلم قوى؟

Pakinam Nasser said...

انا اول مرة اجى عندك ، واضح انك محبة قوى للسينما ، انا عندى نفس السؤال ، انتى شفتى الفيلم ده فين ،

على فكرة مدونتك ممميزة قوى

شادي فايد said...

اكيد انتي شوفتي الفيلم ده وانت بتصوري الفيديو كليب الجديد في افغانستان
:)
:)
فيلم زي ده
اكيد ليس به الحقيقة الكاملة
اكيد يامتحامل يا متهاون
القصة دايما بتكون رؤية شخص واحد

لكن بمرور الزمن بتصبح تاريخ
وميقدرش المؤلف يغير فيه
وفي اركانة وثوابته

Blank-Socrate said...

البوستر فعلا موجود فى الحقيقه و الان قال كل الحقيقه

Sharm said...

طالبان كانت مورية افغانستان الويلات

حسن محمود said...

معلش ياكوكو ياكميل
ممكن بس أرد على شرم فى التلعيق بتاعه

سؤالى لحضرتك ياشرم : عرفت منين ان طالبان كانت موريه افغانستان الويلات؟

وشكرا ليك
وشكرا ليكى ياكوكو
:)
مستنى القصة
وراكى وراكى لحد مالقصة تخلص
ورانا ايه؟

سلام

Diyaa' said...

v.good choice but i wont see it Lelasaf
btw u said
اللي نجح في توصيله اوي هي حالة القهر و العنف ؛
do u think he did it for an innocent intentions ?!
or to show how angelic was USA when they conquered afghanstan ?
btw i'm waitin ur record

safa7_karmooz said...

سورى انى هخرج عن الموضوع

بس كوكو مجاش ليه اللقاء بتاع المدونين توداى؟؟؟

koukawy said...

بلطجيه 00 نزلته من النت و علي فكره حطيت له لينك ؛ هايل هدخله
************************************
حسن محمود 00 كلامك مظبوط علي موضوع الاعلام؛ بالنسبه للأسم هو مش اسامه بن لادن هو اسم البنت بطلة الفيلم انت لازم تشوفه عشان تفهم انا حطيتله لينك
و اللي شدّني اوي الممثلين كويسين اوي و الموسيقي و اللوكيشانات
***********************************
باكينام 00 اهلا بيكي و يارب متكونش اخر مره ؛ انا نزلت الفيلم من النت و انا فعلا بحب السينما اوي
*********************************
شادي 00 هههههههههههههههههههه
انا لو كنت صورت الفيلم في افغنستان كانوا عملوا فيا زيّ ما عملوا فيهم في الفيلم
***********************************
بلانك سقراط 00 البوستر لوحده مش كفايه
*********************************
شارم 00 معلومه تستحق الشكر
*********************************
حسن محمود 00 ليك الحق تسأل طبعا
و متخافش القصه مستمره بس انا مش بنشر الحلقه كل يوم عشان البوستات التانيه متغرش
***********************************
ضياء 00 بص لو فعلا الفيلم انتاج افغنستاني و الكرو كله افغان بيتهيألي هيمون لجذب الانتباه لمأساه هما عايشينها
بس لو في يد خفيه امريكاني ورا الموضوع بيته]الي هيكون للتبرير زيّ ما انت قولت
***********************************
سفاح كرموز 00 مش عارفه انا حاسه اني مش عايزه حد يعرف انا مين و ده لأني شخصيه معروفه و مشهوره في مجالي فمش عايزه حد يعرف ان فلانه دي هي كوكو الكميل طول ما انا متخفيه مرتاحه اكتر

shams said...

شكراً يا كوكو على مشاركتك الأفلام الحلوة معانا وان شاء الله هحاول اشوف الفلم ده واقولك رأيي

М€ŝЋМΣŞĦ said...

انت عارفه ان انا مش شرير

بس مش قادر اقاوم

انا حبلغ عنك

لا لا متحاوليش

وكمان بتوزعي طرق سرقه افلام علي الناس ؟


علي فكره .. من حوالي 8 شهور تم القبض علي واحد زي حالاتك كده في كوريا و انطس 6 سنين سجن عشان استخدم التورنت في تنزيل افلام و برامج مسروقه

انا لو منك اشيل اللينك دي تاني و اخد طريق السلامه .. كفايه انك تقولي علي الفيلم , وبعدين اعتقد معظم الناس عارفه هي حتجيبه ازاي
;)

يالا سلام

koukawy said...

شمس 00 ياريت تشوفيه و اي خدمه عينايا ليكوا
***********************************
مشمش 00 خليك محضر خير و بعدين ما هو التورنتس مرميه علي النت تبقي مش سرقه يمنعوها و احنا نبطل