السؤال لغير الله مذله
السؤال لغير الله 00 مذله
النهاره كان يوم ما يعلم بيه الا ربنا ؛ يا ساتر يوم مليان حوادث
معديه من السيده عيشه لقيت عربيه نقل داخله في عامود الكوبري
وواقع عليها سور الكوبري من فوق مبططها زي علبة السردين
يا ساتر منظر مفزع اللهم احفظنا ؛ وصلت مكان ما كنت رايحه
بعد ساعتين عناء و مجاهده في المواصلات و السكه المقفوله بالضبه
و المفتاح الاقي الناس بتقول الحادثه الأفظع بتاعة قلعة الكبش في حي السيده زينب
حريق مهول حرق حوالي 250 بيت من الخشب و الناس بقت في الشارع ملهومش مكان يسترهم
و مأوي ؛ اسأل و كان سببه ايه الحريق يقولولي انبوبة بوتاجاز
طبعا مستغربتش خالص لأن انا كتبت بوست بخصوص الموضوع ده زمااااان
بعنوان روتين حتي مع الوفيات ؛ و كان ساعتها بيقولوا ان هتطلع لجنه للتفتيش و اجراء اللازم
حسبي الله و نعم الوكيل اهه منطقه بحالها ولعت و كانوا لسه مبعتوش اللجنه للتفتيش
يا تري مستنين ايه مصيبه اكبر من كده ؛ علي العموم اللي عايز يقرا اكتر في الموضوع
جبتلكوا لينك اهو هنا
و بدعي للناس دي كلها بالصبر و بالرحمه من ربنا و اقولهم ان حقيقي
السؤال لغير الله و خصوصا في البلد دي 00 مذله
سلام
12 comments:
عادي...... بس اللجنة طلعت خلاص و الريس قرر صرف لكل أسرة تيليفيزيون وثلاجة وبوتاجاز و للا غسالة مش عارف نوعهم إيه و كمان خمستلاف جنيه منهم ألف فوريا..أنا بقول عادي طه طبيعي في أى مكان بيهتم بشعبه مش منه وفضل منه لأ ده حأ الناس من موارد الدولة و الضرائب الزهؤنا بإعلانتها ليل نهار...بس المش عادي إن القرار ده يتنفذ و لو فعلا إتنفذ سواء قريب أو بعيد أنا بيتهيألي لأ و موتئكد إن إحنا هنسمع عن حرائق كتييييير اليومين دول في جميع عشش مصر و مساكنها العشوائية...ده تلاجة و تلفيزووووون يابا...وخلي بالك من عشتك يا كوكاى
انا عندة 3 انابيب فى البيت ، ربنا يستر
كوكايه
انا سمعت فى البيت بيتك لما جابوا عبد العظيم وزير على التليفون .. بيحمل مسؤولية الحادث لاحد المواطنين الى كان عنده انبوبة بوتجاز وهو سبب الحادث
كنت عايزة اقوله وهو وحياة الى خلفوك مش عايز الناس يكون عندها انبوبة كمان
يعنى من الاخر الناس هى الى غلطانة وتستاهل الحرق بانابيب الغاز
ومن هنا ورايح الى عنده انبوبة يعزم عليها ويبخرها ويقرا عليها عدية ياسين قبل ما تولع فيه
انا برضه شفت حدثة الكوبرى بس جبتها من فوق..كويس انك عرفتيني الموقف من تحت كان شكله ايه
يا ساتر يا رب
وبررررضه شفت عربيات المطافي وهي راجعة من المهمة..بليل بقي عرفت الموضوع..وافتكرت البوست بتاعتك
انتي بقيتي رمز الدفاع عن الغلابة عندي
:)
انهاردة طبعا طالعتنا الصحف المحلية باخبار التعويضات والتوجيهات والافتكاسات..بس اظن كده ان كمان شهر حتطلع لنا مني الشاذلى وله معتز بحلقة عن الضحايا انهم مشفوش اي حاجة من الكلام ده
جزء من السيناريو القصير المكرر
ولهم الله
في اشاعة ان الموضوع ده متدبر عشان عايزين يمشوا الناس من غير ما يكون منظر الحكومة وحش وهيدوها لمستثمرين باين او اي حاجة يكون فيها نهب
ولو الاحتمال مش صح
فكفاية انهم حاميين قصر العروبة ومنتجعات الدعارة في شرم وكباريهات شارع الهرم وناسيين العشوائيات دي ومش عارفين ينظموها ويا دوب بيعملوا مشاريع صغيرة دعاية لسوزي بس
+ ان الانابيب دي بتاعة سامح بيه فهمي اللي عايز يموتنا بالغالي
موضوع اخر مخزي يدل على سلبية الحكومة فى تعاملاتها مع المواطنين والبسطاء دون ان يكون لها دور مسبق وتخطيط ودراسة لتلافى اي كوارث او اخطار ناجمة عن الوضع المزري للعشوائيات وعدم توفر عوامل الامان والخدمات الاساسية
وكما قالوا فى الاخبار انه لولا قوات الجيش وسيارات اطفائها لكانت الكارثة اكبر وافدح
سياسة حكومتنا المعتاده هى انتظار الكارثة ثم التعامل الغبى معها
مش كلامى لوجيك برضو ؟؟؟
لكى الله يا مصر
اسامة
ساكاماكا نيوز سابقا
فعلا الحوادث بقت كتير بدرجه
تغيظ
والى يضحك ان دايما الناس الى مشين فى الشارع هما السبب فى الى بيحصل
حاجه موتنى من الضحك هند صبرى عملت حدثه وخبطت واحد ويحرام كسرته ال غريب ايه يا بنتى انها بتقول انه هو الى رما نفسه على العربيه هيه مقربتش منه
طبعا قيسى على كده كل الحوادث الى بتحصل
وبالنسبه لاانابيب البوتجاز فعلا الى حصل فى السيده زينب مأساوي جدا
والمشكله ان الناس دول مرمين فى الشارع من سعتها ولا حد اتحرك
يلا ربنا يستر علينا
تحياتى يا جميل
ياكوكو مش عايزك متشائم
هو صحيح الواقع سىء جدا ومؤلم
وصحيح ان احنا الضحايا
بس بجد هو احنا فعلا مابقاش فى حد نلجأ ليه الا ربنا
وبعدين مش انتى أكيد أكيد فى مصر؟
خلاص بقى الكوارث دى بقت حاجه عادية
كان فى واحد راح هولندا وقالى القصة الحقيقية دى
الجرايد هناك مش لاقيه موضوع لقسم الحوادث لدرجه ان لما مواطن بيعمل حادثه بالعربية بيتكتب فى الجرايد خبر الموسم
مواااااااااطن عمل حادثه
يانهاااااار ابيض
اه والله
هنا بقى الخبر ده يومى
كل يوم حوادث عربيات
كل يوم الطرق بتحصد أرواح
هانعمل ايه بس؟
ماقدرش أقول ليكى اى حاجه
مشيناها خطى كتبت علينا ومن كتبت عليه خطى مشاها
نسيت ان كوكوهايه بتطير
:)
اهه لا مش بتطير
شوفتى بقى الطيران أحسن من المشى ليه ؟
ليه كوكاااااااااااااااهيه مش بتطير ؟
شفتى بقى فعلا السؤال لغير الله مذله
;)
كاكان
Hello!
I love you work. Thank you
Good day
يعقوب 00 ربنا يستر علي عشنا الكميل
**********************************
محمد غفار 00 الله اكبر خد بالك متحط غاز احسن
************************************
بنوته من وسط البلد 00 اه يا بنتي لازم المواطن هو اللي غلطان ازاي يشتري انبوبه امال الطاقه الشمسيه دي ليه مش بدل البوتاجاز و النار و الحرايق
************************************
بلطجيه 00 يا ريت اكون نصير الغلابه و الضعفاء ما هو كوكو في الحكوكو من شويه
***********************************
ضياء 00 الله اعلم مش بعيد كل شئ وارد
***********************************
كلام لوجيك 00 طبعا لوجيك و لنا الله بس ايه سر تغيير الاسم يا سكاماكا الأول كان احلي
**********************************
محض روح 00 ربنا معاهم حقيقي ناس غلابه و ربنا يستر علي كل الغلابه ربنا ما بينساش حد
***********************************
حسن محمود 00 هما مش لقيين خبر للجرايد احنا بقي عندنا جرنان بحاله للحوادث و الجرايم
و متقلقش الرد وصل و اسمك في الكسبانين
************************************
david .. thank u
محمد عبد الغفار
هو بكيفى يا كوكو ، الغاز مدخلش سته اكتوبر كلها لسه
اما الحكومه تستكفى تصدير هتبقى تبص لنا
محمد عبد الغفار 00 ربنا معاكوا و يحميكوا
Post a Comment