Friday, March 2, 2007

تاكسي 00



كتاب 00 تاكسي حواديت المشاوير ل خالد الخميسي ؛


من رأي انه كتاب شيق و جواه حاجات كتير


تمس القلوب من جواها و احلي ما فيه انه بلغه


دارجه قريبه من الشعب يعني لو اي حد من اي طبقه


قراه هيفهمه ؛ بس انا كان ليا اعتراض بسيط علي الكتاب


او يعني هو مش بسيط هو مهم و اساسي و هو استعمال


الألفاظ الخارجه 00 انا كواحده من الناس لما بقرا كلام


خارج بتفصل عن المود اللي الكاتب حطني فيه


يعني من رأي لو ان خالد كان لجأ الي طريقه اخري غير


انه يكتب الألفاظ زي ما سمعها كان الكتاب هيكون كامل من


مجاميعه 00 و كان في طرق كتير انه يعبر بيها عن اللي


عاوز يقوله زيّ الطريقه اللي منتشره بين كتير من المدونين


المحترمين و هي التييييييييييييييت مثلا 00


بس بعيدا عن الموضوع ده انا شايفه انه هيكون من الكتب


المهمه اللي صدرت الفاتره اللي فاتت


تحياتي لخالد الخميسي علي الفكره الجديده من نوعها
ملحوظه 00 الحته دي عشان البلوجاوي العزيز اللي ماينفعش
نرفضله طلب ما هو اخونا و دي من
حقوق البلجويه عليه برضو ؛ الزميل
طلب مني مكان بيع الكتاب ؛ هو طبعة مكتبة الشروق
فهتلقوه هناك
سلام

12 comments:

safa7_karmooz said...

طب كملى جميلك وقوليلنا على منافذ البيع :$

koukawy said...

مكتبة الشروق هي طبعتها

safa7_karmooz said...

شكررا كوكو على المعلومة ... :D

Ahmed Shokeir said...

كتاب اكتر من رائع لسه قاري نصفه اليوم في قعدة واحدة وكنت لسه بافكر اكتب عليه

بالنسبة للالفاظ الخارجة هيا مش كتير زي ماحد يتوقع من كتابتك عنه بس بصراحة اعتقد انها تغيرها في المتاب سوف يفقد الجمل التي ينقلها المؤلف كثير من معناها يعني مش شتيمة لمجرد الشتيمة فالرجل ينقل احاديث اليوم العادية في مستوي لناس من مستوي ثقافي واجتماعي اقل من المتوسط

SomeOne said...

هو الراجل غلط انه كان واقعي وموضوعي

الراجل نقل الواقع اللي في الشارع المصري

ومش زنبه ان الواقع ده وحش قوي كده

مهو احنا لو كتابنا وافلامنا كانت بتنقل الوقع ده كان ممكن الناس تحس اد ايه هو واقع مرير
وكانو ممكن يتغيروا

أميرة البلطجية said...

هاى كوكي
انا كمان قريت الكتاب وصراحة عجبني وبرضه بسجل نفس الاعتراض اللي انتي قلته لأنه فعلا في مواضع كتير اوي كان ممكن يحزف الشيمة والناس كانت حتعرف برضه ان في هنا شتيمة مش كميلة وخلاص على كده
بعد كده فانا شايفة انه كتاب فيه نوع من الحكمة اللي انا بحبها
حكمة الناس الغلابة..حكمة التعبانين.. حكمة العصاة.. حكمة من لا ينتظر منه الحكمة
طبعا انا عرفت انك بتقري كتاب علاء الاسواني كمان وشمس عايزة تناقشة معاكي
لما حد فيكوا يكتب عنه حبقي ادلي بدلوي انا كمان لحسن الدلو مليان ع الاخر وبيدلدق
سلام يا كميل

koukawy said...

احمد شوكير 00 انا معاك في انها مش كتير بس عدمها كان احسن و ما كانتش هتقصر في سير الدراما المقصود انها توصل
**************************************
شادي فايد 00 انا معاك انه نقل للواقع بس ما هو الناس كلها حافظه الشتايم اللي في الواقع فلو ماكانش كتبها كنت انا شخصيا هتخيل اي شتيمه ما شتيمه عن شتيمه مش هتفرق
***********************************
بلطجيه 00 اخيرا انتي علي طول اللي نصفاني و متفقه معايا في الرأي يا بلطجيتي يا كميله و تحليلك اموضوع الحكمه كميل برضو
و بالنسبه لعلاء الأسواني انا لسه مبدأتش فيه لما اخلص الكتاب اللي بقراه

أُكتب بالرصاص said...

تشكري

بس سا ريت لو في رابط على النت للكتاب ...



في السكرتة كدة يعني

علشان مش هأقدر اشتريه

koukawy said...

اكتب بالرصاص 00 انت تؤمرني لو لقيت لينك هزوّده علي البوست بس هو انا اشك لأنه كتاب جديد و بيتهيألي مش موجود بس هدور

SomeOne said...

انا اشتريت الكتاب وقريته

بصراحة الراجل كل اللي عمله استخدم نفس الالفاظ الخارجة التي استخدمها كتاب غيره كتير ومنهم علاء الاسواني
ولكنه كررها كثير

ولكن في النهاية هذه الالفاظ بعيدة تماما عن الواقعية

صدقيني هو لم يستخدم الالفاظ الاكثر قذارة

koukawy said...

بعد كل ده مقلتش الكتاب عجبك و لا لأ؟

SomeOne said...

عجبني

عجبني دي كلمة قليلة جدا

انا قريته بس 3 مرات خلال 3 ايام

ولسة حقراه كمان و كمان