Thursday, May 31, 2007

كوكو و البيبان

الحلقه اللي فاتت00
كوكو كان طاير و سمع وراه حد بيندهله
الحلقه دي 00
سمع كوكو حد بيقوله 00 يا كوكو يا كميييييل
صوت حنين اوي و بيهمس لف كوكو عشان يشوف اتسمر مكانه
و من الخضه محركش كناحاته فراح واقع لتحت اللي لحقه في الهوا سلوك الكلوفونات
اللي معديه في نص السما راح كوكو واقع عليها و لافف كام لفه لغاية معرف يمسك
نفسه 00
و اول ما كوكو مسك نفسه بص حواليه عشان يتأكد ان اللي شافه مش حقيقه
و لما ما لقاش حاجه حواليه قال 00 ياه يا كوكو يا مش كيل يا عيبيط انت
و ده معقول برضه 00 سمع نفس الصوت بيرد عليه 00 اه معقول يا كوكو
بيبص كوكو علي عامود سيلك التليفون وراه و كان هيقع تاني راح الصوت ده مسكه
من كناحه و قاله 00 يا كوكو انا مش كيرو بجد انا روحه الطيبه اللي ماتت مظلومه
انا جيت عشان اقولك ان كيرو مات و هو بيحبك اوي و طول عمره كان و حيد
و كان نفسه يكون عنده صاحب زيك و هو حبك من اول مره شافك فيها ؛
هو صحيح مشفكش الا مرتين بس كان بيحبك اوي ؛ انا جايه اسلم عليك
و انا مسموحلي اني اعمل حاجه واحده علي الأرض قبل ما ارجع عند اللي خالقني
في مكاني تاني ؛ و انا عارفه انك عايز تروح للحكيم كيروكيم 00
كل ده كان كوكو قاعد متنح مش مصدق اللي بيحصل و عمال يقول في دماغه
ده و لا افلام اسماعيل ياسين 00 و بعدين رد كوكو 00 قولي لكيرو انه واحشني
جدا و نفسي انه يرجع تاني بس انا عارف انه مينفعش ؛ و لو وصلتيني للحكيم
تبقي عملتي فيا خير مش هنساهولك يا روح كيرو الكميله طول العمر 00
ردت روح كيرو 00 طب ياللا يا كوكو غمض عينيك و سيب كناحاتك خالص
و انا هوصلك هناك هتصحي من النوم تلاقي نفسك هناك بس مش هتلاقيني
عشان هيكون وقتي علي الأرض خلص خلاص 00
و فعلا نفذ كوكو كل اللي طلبته منه الروح بتاعت كيرو 00
و طارت الروح و علي ضهرها كوكو الكميل و فضلت تعلي تعلي لحد مختفت
في وسط السحاب ؛ و السحاب يشيلهم و يحطهم و فجأه اختفوا عن العين
**************************************************
صحي كوكو فجأه و قام قعد و بص حواليه و مكنش مستوعب هو بيحلم و لا
اللي حصل حقيقه ؛ بس اللي أكدله انه حقيقه ؛ المكان الغريب اللي لقا نفسه فيه مكان
مليان شجر حاضن بعضه لدرجة ان السما مش باينه من كتر الشجر ؛
و الأرض كلها عروق الشجر اللي لفه فوق بعضها فمش مخليه الأرض مستويه
و قام كوكو وقف علي رجله و ركز كده و افتكر انه قبل ما ينام كان رايح
للحكيم كيروكيم ؛ ووقف كوكو محتار مش عارف يمشي في انهي اتجاه ؛
بس بص لقا ناحيه من بين الشجر طالع منها دخان و فيه في أخره سرسوب
من النور يدل علي ان في حاجه في العمق ؛ فقرر كوكو انه يخطو اول خطواته الكميله
في المكان ده في اتجاه النور و ده اللي نصحه بيه حدسه اللي ما يخيبش ابدا ؛
و فعلا مشي كوكو وسط الدخان و كل ما يدخل الدخان يزيد يزيد يزيييييييييد 00
و اخيرا ابتدي الدخان يخف بعد ما كوكو بقي هيتخنق قبل ما يوصل ؛
و ابتدا يبان من ورا الشجر ملامح المكان اللي هي عباره عن جبل كبير
و فتح بقه و من زور بوء الجبل طالع نور جامد اوي و كل ما كوكو يقرب يسمع صوت
همهمات مش فاهم منها حاجه خالص باغه غريبه عن اللغه الكوكوهيه اللي هو اتعلمها من صغره
ووصل كوكو عند بوء الجبل و مبقاش عارف يعمل ايه فقرر انه ينادي بصوت عالي 00
ياللي هنا 00 يصقف بكناحاته 00 ياللي في الجبل من كوه يا حكيم كيروكيم 00
و فضل كوكو ينادي و لا حياة لمن تنادي ؛ و فجأه نزل علي كتف كوكو طائر مش من الفصيله الكوكوهيه
و لونه اسود اوي راح كوكو اتخض و طلع يجري من الطريق اللي هو دخله
و بعدين وقف و لف لقا قداه وطواط عينيه معمصه و علامة المخده مرسومه علي وشه خطوط خطوط
و بيقوله بلهجه سوداني 00 ايه يا امونا انتا اّمل دوشه ليه يوخروب بيت سنينك ؛
تئرف يا كوكو انت اني انا طول اومري مش بصهي الا باليل انما صوتيك المزئج دي
هو اللي صهاني ؛ انا اوثمان الوطواط اللي بيهرس بوء الجبل دي انت اوز مين ؟؟
رد كوكو 00 اهلا يا عم عثمان يا وطواط انا اسف اني قلقتك من نومك الكميل بس
انا بدور علي الحكيم كيروكيم متعرفش اقدر الاقيه فين؟؟
رد الوطواط 00 هو ساكن اندي هنا في الجبل من سنين كتير و مش بشوفوه يخرج
الا شويه يطلأ الغابه اللي وراك ده يلم شويه هاجات من اللي بيستأملها في شوغلوه
و يرجأ تاني و ده بيهحصل كل اسبوء مره بس هو جوه دلوقتي ؛
مودام انت سامء الأوصوات دي يبقي هو جوه اتفضل اودخول بس مءلش
بقي الاوسونسير خربان 00
و فجأه اختفي البواب الوطواط من غير حتي ما يلحق كوكو يقوله شكرا 00
و دخل كوكو وهو بيقدم رجل و يأخر رجل 00
مدخل بوء الجبل من برا واسع ؛ و لما دخل كوكو لقاه من جوه ضييييق
و حر اوي بسبب النور و الدخان اللي خارجين منه ؛ و فضل كوكو ماشي شويه لحد ما لقا قدامه باب ازاز
و عليه زرار احمر و الباب الازاز مش مبين اي حاجه من ورا ؛ و رفع كوكو كناحه براحه و داس
علي الزرار الأحمر و فجأه نزل من السقف جهاز فيه سماعات و صوت انثي بترد 00
ايوه نتشرف بحضرتك انا كوكوريا سكيرتيرة الحكيم كيروكيم مين معايا ؟؟؟؟
رد كوكو 00 انا كوكو الكميل و كنت طالب خدمه من الحكيم كيروكيم الكميل ممكن ؟؟
ردت كوكوريا 00 و يا تري في ميعاد سابق و لا طلبب مقابله مستعجله؟؟
رد كوكو 00 لأ مستعجله من فضلك خليكي كميله بقي انا مستعجل
ردت كوكوريا 00 طب حضرتك ثواني معايا
و طلع الجهاز تاني لفوق مكانه و فضل كوكو واقف مستني الرد 00
و بعد شويه اتفتح الباب الازاز براحه و لقا كوكو نفسه في قاعه كبيره مدوره
اوي لونها احمر و فيها 3 بيبان دايرن ميدور ؛
و سمع كوكو صوت كوكوريا بتكلمه تاني في الجهاز 00
الحكيم كيروكيم بيقولك يا كوكو يا كميل ان هو موجود ورا واحد من الأبواب دي
عليك انك تختار الباب اللي تحبه ؛ و من عندكش فرص للخساره
و لو منجحتش هتخرج من هنا زي مجيت و مش هتقابل الحكيم
و ده لأان الحكيم بيحب يقيس يقيس ذكاء اللي بيجوا ياخده منه النصيحه
و يشوف اذا كانوا هيستفيدوا بالنصيحه و لا هيكون قالها في الهوا و قلتاها احسن
ياللا يا كوكو قدامك نص ساعه تفكر و انت واحساسك ؛ و سكتت كوكوريا
و سابت كوكو مع الحيره و مع 3 ابواب واحد من الدهب وواحد من الفضه وواحد من الصفيح
و قعد كوكو يفكر و طبعا في النهايه لما معرفش يلاقي الحل ؛
اضطر يلجأ لصحابي في العشه و يسألهم يا تري يختار كوكو انهي باب ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
كاكان
السؤال اللي فات 00
مبروك للي جاوب بأن كوكو شاف روح كيرو 00
خمسه فضفضه
مبروك يا فضفوضه ياللا عقبال كل مره



11 comments:

أميرة البلطجية said...

تعبت يا كوكي وغلب حمارييييييي
الباب الدهب يا ستي

Unknown said...

هيختار الباب الصفيح
بس يارب يطلع صح
ويلاقي الحكيم ويقولو علي اللي هو عايزه

البنت الشلبية said...

الباب الفضة عشان سبب معين

هوا ان الدهب عالى اوى والصفيح تحت اوى

خير الامور الوسط يبقى الباب الفضة وده لانه بيدل على الوسطية

ها الجايزة ايه بقى؟

بيتنا القديم said...

كوكو
.....
خير الامور الوسط

الصفيح

بالطبع

!!

تحياتي

ويجعلوعااااااااااااااااااااااامر

خمسة فضفضة said...

السلام عليكم ورحمة الله وبركاته

ايه ده ، اه يا ربي ، انا كسسسسسسسسسسسسسسسسسسسسبت ، لااااااااااااااا مش مصدقه ، حد يقرصني

ربنا يخليلنا كوكو وروح كيرو يارب، فين بقي الهديه ، انتوا مش كنتوا بتقولوا اللي يجاوب صح هايخد عربيه مرسيديس موديل السنادي ، ها هانستلمها امتي بقي ....هههه

عموما انا مستنية وعنوان المدونة ما يتوهش ،

اما سؤال الحلقه اعتقد انه هاياخد الباب الفضه علشان السكوت من فضفه ودايما الحكماء بيحبوا السكوت

تحياتي ليك ولكوكو الكميل

Desert cat said...

نفسى اكسب حاجه مرة فى حياتى
انا اعتقد انه حيختار الباب الفضه

يا مراكبي said...

فضة طبعا .. واضحة جدا

شوفتي الثقة دي؟

Anonymous said...

بصراحة قصة جميلة وفضلت مشدود للاخر بس للاخر الله يجازيكي انا اساسا الفضول بينقح عليا ههههههههه

وعمال اقلب يمين شمال مش عارف اوصل

انا اقول الصفيح

وياللا بقي زي ماتيجي

يعقــــوب .... said...

جامدة عثمان الوطواط ده

كراكيب عادل said...

انا كنت هقول فضة بس لقيت الكل قال فضة

هغير الاجابة حتي لو غلط

انا هقول صفيح

لية يعني باب فضة ولية باب ذهب

الصفيح ارخص يمكن مبيهتمش بالمظاهر الحكيم

بس اية دة سكرتيرة وبواب

اش اش

انا المرة الي فاتت كمان قلت شاف كيرو

بس نسيت روحة هههههههههه

:(

Anonymous said...

متهيألي كده انه الباب الصفيح لانه مش معقول حكيم عجوز عايش في اخر الدنيا حايقعد ورا باب ذهب او فضة وكمان علشان الصفيح مش تقيل زي الذهب والفضة وبالتالي اسهل على كوكو عجوز زي الحكيم انه يفتحه ويقفله
فل