Friday, May 4, 2007

كوكو في شلاليت

الحلقه اللي فاتت 00
كوكو وقف مزعور و مخضوض من حاجه فظيعه شافها
الحلقه دي 00
كوكو بعد ما عدا من اليافطه بتاعت مدينة شلاليت فجأه
سمع صوت جامد و بيبص لقا كوكوهين فى عربيه حمرا واحد بيسوق العربيه والتانى طالع نصه من الشباك وماسك مسدس وبيضرب نار على عربيه نبيتى بتجرى وراهم و كوكو من التلاته اللي جوه ماسك في ايده
مدفع رشاش و و خارج من سقف العربيه و بيضرب النار علي العربيه اللي قدامه و بيضرب في كل الاتجاهات
و كوكو الكميل واقف مذعور و ريشه وقف من الخضه و صوت ضرب النار بيزيد حواليه و العربيات تقرب اكتر
و الرصاص بيطير زي الدبان من كل حته ؛ و اتمني كوكو ان الأرض تتشق و تبلعه ؛ و لما قربت العربيات
شاف الكوكوهات اللي بتضرب رصاص بوضوح ؛ كوكوهات كبيره و لونها اسود و شكلها يخوووف ؛
و عدت العربيات قدام كوكو بسرعه خلت ريشه يطير من الهوا الجامد ؛ و بيبص كوكو الكميل لقا كوكو
عجوز اوي هيعدي الشارع راح مصرخ كوكو و هو بيجري عشان يحاول يمنعه انه يعدي
لكن ملحقش كوكو الكميل و خبطت العربيات الكوكو الأسود العجوز و طار ووقع هو و عصيته
الخشب علي الأرض ؛ و لما كوكو شاف كده جري ناحية الكوكو العجوز و جررجره
علي الرصيف الأحمر و قاله 00 يا جدو انت لسه عايش يا جدو ؛ فتح الكوكو الصقر الأسود العجوز
عينيه براحه و بالعافيه 00 انا يا ابني اسمي صقار الحنش و انا استاهل عشان انا كنت طول عمري شرير
انا عايز اديك حاجه رغم اني معرفكش بس مد جناحاك في جيب الجلابيه اللي فوق ده و خد القلم
الذهب اللي في جيبي ده هديه القلم ده فيه كل ثروتي انا مش هقولك علي المفاجأه اللي فيه
خليه معاك و انت انت انت هاء 00 و مات صقار العجوز علي رجل كوكو اللي راح معيط
و معرفش يعمل ايه ؛ و سند كوكو راس صقار الحنش علي الأرض و قام عشان يدور
علي حد يشيله معاه عشان يدفنه ؛ و فجأه كوكو سمع صوت صريخ و صوصوة كوكو صغنن
بيستغيث و بص وراه لقا كوكو صقر بني كبير خاطف كوكو صغنن و معلقه من جناحاته
بحبل و شايله علي كتفه ووراهم من بعيد صوت كوكوهايه ماما بتصرخ 00 الحقوني
خطفوا الكوكو ابنييييييييييييييي الحقونيييييييييييييييييييي 00 و دبت في كوكو الرجوله
و الشهامه اللي من طبعه دايما ؛ و جري ورا الصقر الحرامي ده و قعد يصوصو
و يزعقله 00 انت يا حرامي سيب الكوكو المسكين الصغنن ده ده مش بتاعك انت ده بتاع مامته
اللي هناك دي 00 راح الصقر الحرامي البني واقف فجأه و مدور يبص تحت
رجليه ايه الصوت ده و جاي منين و لما شاف كوكو راح ضاحك ضحكه شريره هع هع هع
و بيّن انيابه
السوده في اصفر مطرح السجاير و راح رافع رجله و شايط كوكو زي
الكوره الشراب في الهوا و طار كوكو و هو بيصرااااااااااااااااااااااااااااااخ
و طخ راح واقع علي الأرض تحت شجره كبيره ورقها احمر من كتر الدم اللي عليها
مطرح الكوكوهات الصغننه اللي ماتت عليها ؛ و فتح كوكو عينيه لقا نفسه نايم علي ضهره
في الأرض و لسه كوكو هيقوم حس ان الشجره اللي هو نايم تحتها بتميل و افتكر
ان ده من اثر الشلوت اللي مش كميل اللي لسه واكله بالهنا و الشفا ؛ بس لأ
دعك كوكو عينيه و هش الكوكوهات اللي بتلف في دايره حوالين دماغه و بتصوصو ؛
و فتح عينيه تاني لقا الشجره بتقرب اكتر و حس انها خالاااص هتقع فوقيه و بسرعه لف كوكو
زي السوسيسايه علي الأرض بعيد عن الشجره و راحت الشجره درش بوم طخ
واقعه مبطوحه علي الأرض و سمع كوكو بعد ما الشجره وقعت اصوات ضحك شريره
هاهاها هيهيههيهيهؤهؤهي 00 و مكنش كوكو فاهم ايه اللي حصل و جه كوكو يقوم
يشوف معرفش بيشد نفسه لقا دراع الشنطه مزنوق تحت فرع شجره ؛ و قعد كوكو يحاول يفلفص
انما معرفش ؛ و قرر كوكو انه يطلع نفسه من الشنطه و بعدين يبقي يسحبها ؛
و قعد كوكو يعافر و يزق برجليه و فين و فين لما عرف يخرج و لما قام وقف
شاف ورا الشجره كوكوهات نسور سود و كناحاتهم حمرا بيفتشوا علي حاجه وسط الفروع 00
و مكانش فاهم و بعدين سمعهم بيقولوا 00 الظاهر ان خلاص يا رجاله مفيش كوكوهات صغيره
تاني علي الشجره دي ياللا بينا ؛ ووقف ريق كوكو في زوره و معرفش يبلعه و راح فجأه
نازل علي الأرض لحسن يشوفوه و يصطدوه زي اصحابه ؛ و اما سمعهم كوكو مشيوا
راح مادد كناحه تحت فرع الشجره و مخلص دراع شنطته و شالها علي ضهره
و خد قرار انه يخرج بره المدينه المرعبه اللي كلها جرايم دي و يدخل من طريق
تاني ؛ و بص كوكو في الساعه لقاها اتكسرت و كان عايز يعرف هو ضاع منه وقت
قد ايه ؛ و بص قدام شاف روستوران اسمه اكلك يتعمل قدامك ؛ فقرر كوكو انه يدخل يسأل
اي حد جوه الساعه كام ؛ و مشي كوكو و لما بقي قدام باب المحل لسه هيفتح و يخش اتسمر قدامه
؛ فتح كوكو نقاره من الخضه و الذعر لما شاف الشيف في المطعم ماسك كوكوهات
صغننه و حاططها قدامه علي الأورمه و ماسك صاطور كبير مش كميل و زوي دبح الكوكوهات
المسكينه اللي كانت تحت جناحه اللي مش كميل اللي عايز قطعه؛ و اتخض كوكو و رجع بضهره
من الخوف و مخدش باله من عامود الضلمه اللي وراه و راح متكعبل ووافق
علي الأرض و قعد كوكو يبص حواليه و هو علي الأرض علي المخرج من مدينة
الرعب دي وهو بيبص سمع صوت بيقول اه ه ه ه ه ه ه ه و الصوت كان بعيد و بيقرب
و قدر كوكو يحدد اتجاه الصوت و بيبص فوق ناحية الصوت لقا كوكو
محدوف في الهوا و كناحاته مربوطه ورا ضهره و راح نازل قدام كوكو
و رشق بمنقاره في الأرض و رجليه لفوق مجبش منطق ؛ و لسه كوكو هيلمسه يشوفه صاحي و لا لأ
سمع صوت سارينه 00 ويوا ويوا ويوا ؛ و عرف انها الشرطه الكوكوهيه في البلد دي جايه تشوف
ايه اللي بيحصل هنا ؛ و قام كوكو عشن يحكي كل اللي حصل ؛ وقفت قدامه 3 عربيات حمرا بتاعة الكوليس
و نزل من كل عربيه ظابط و ماسك مسدس و مصوبه ناحية كوكو 00 و ظابط منهم بيقول 00
سلم نفسك جناحاتك في الهوا اي حركه هضرب في الريش ؛ و اتخض كوكو ووقف و رفع كناحاته
في السما ؛ و كمل الظابط 00 هاتوا المتهم في العربيه ؛ و انقض 2 ظباط علي كوكو
الكميل يا عيني و مسكوه و كلبشوه و حطوه في عربية الكوليس و كوكو عمال ينادي و يقول 00
يا كيروووووووووووووووووووووو الحقني يا كيروووووووووووووووووو
كاكان
سؤال الحلقه 00
يا تري كوكو متهم بأيه ؟؟؟؟؟؟؟؟؟؟؟؟؟؟
سؤال الحلقه اللي فاتت 00
هعتبر كل اللي حل السؤال بأن كوكو شاف نسر يبقي كسباااااااااااااان
مبروك ؛ و للأ مانه عاشور هو اول واحد جاوب بالاجابه دي






13 comments:

Eric Matt said...


أول مرة ححاول أحل اللغز

لو من البوست ده بس يبقى متهم بجريمة من دول يعني خطف الكوكو النونو ولا اي حاجة

حجرب حظي واقول متهم بانه هو اللي عمل كده في الكوكو اللي انضرب ببوزه في الارض مجابشي منطق لانه كان جنبه

او بسرقة القلم الدهب

تحياتي لك من ماناساس البلد
:)))

Blank-Socrate said...

سورى يا كميل انا بأثبت حضور
انا كوجود دايما لكن بصراحه مش متابع كوكو وصل لفين
لكن اكيد النهايه سعيدة و انا مدعو على الفرح

أميرة البلطجية said...

الكوكو اللي وقع ع الارض ده كانت أم مكاوك
وهم حيتهموه بخطفها
واكيد الكوليس ده مش حيطلع كوليس حكيكي
وحيطلع جزء من العصابة
وحيخطفوا كوكو
-----
أحمد اخويا عنده اجابة كمان
(اجابة كميلة على رأيه ههههههه)
القلم الدهب كام في مكدرات
والكوليس حايقبض عليه بتهمة حيازة المكدرات

SomeOne said...

اهيء اهيء اهيء
انا قلت نسر انا كمان
واء واء واء

عموما انا و عاشور واحد
:)
--------------------------
هو في كوكوهات ماتت
وكوكو اتخطف
وكوكو اداله قلم

يبقى هو متهم ب
القتل
او
الخطف
او السرقة

:)

صاحب البوابــة said...

مررت فقط لأسلم على الجميع في هذه المدونة الرائعة

تحياتي

يعقــــوب .... said...

ايه الدموية و العنف ده كله..مش كفاية علينا mbc action
:)
بس الامور احدت مجرى تاني خالص...احنا لازم نرشحك لأوسكار يا كوكوهاية و لو منفعش نطلع على كان

بيتنا القديم said...

قشطة الكوكو بقا وش إجراااااااام

يعني دجليه جت في الخيه ومتهم بالخطف

وحيازة مواد ممنوعة او مسروقة

حالاً هجيب الحلاوة والعيش وهجيلكو علي

الكوليس

قصدي مقر العصابة اللي عاملة فيها

كوليس اونطة

تحياتي

ويجعلوعااااااااااااااااااااااااامر

-_- said...

متهم بالسرقة

عشان الفلم

!!!

Esmeralda said...

قبضه عليه لأنه اخد القلم من صقار الشرير

العربيات الحمرا اللى فى الاول كانت برضه كوليس كانوا عايزين القلم و بعدين الاشرار اللى بيجروا وراهم قتلوا صقار عشان كان رايح للبوليس

حلو الفلم العربي ده؟؟؟؟

:)

Diyaa' said...

ممكن يكون متهم بقلب نظام الحكم الكتاكيتي الديمقراطي وحكمة السيد الديك الكبير
المهم ربنا يستر عليه وهمشي بقي بدل ما أمن الدولة يشمعولك البلوج بسببي وضميري يأنبني
سلام عليم

koukawy said...

the groom ..
يا رب تكسب و ده يشجعك انك تحل علي طول بعد كده
***********************************
بلانك سقراط 00
لمهم انك تثبت حضور بس مهم كمان تتباع عشان يهمني رأيك
***********************************
البلطجيه 00 الله هو احمد كمان متابع برافو عليكوا بس ابقوا افصلوا الكومنتس خليه يكتب كومنت بتاعه اهو العدد يزيد
هههههههههههههههههههههه
*******************************
شادي 00 اصل لو كنت كتبت كل الناس اللي قالت نسر كنت هاخد وقت
***********************************
صاحب البوابه 00 و مقرتش الحلقه و لا معجبتكش
*******************************
يعقوب 00 انا فعلا مستحقش اقل من كان و اوسكار في بعض
**********************************
سمسم 00 هو ده العشم بس وحياتك ماع الحلاوه معاك ربع رومي عشان بس تبقي حاجه حرشه
********************************
شارم 000 ياه ه ه ه ه
انت جيت فينك ؟؟؟؟
*****************************
ازمرلدا 00 حلو منك يا جميل
******************************
ضياء 00
لأ يا ريت علي التشميع دول هيحبسوني
انا يا خويا مبتكلمش في السياسه و مش بحبها انا بحب الكارتون

خمسة فضفضة said...

السلام عليكمرحمة الله وبركاته

عديت اسلم علي كوكو الكميل الاقيه حصله كل ده
وكمان ماعدتش هايجي عندنا الا يوم الخميس بس ..عااااااااااااااااا

وبعدين انا زعلانه منك اوي ازاي يعني يحصله كل ده وهو ما شي ورا السهم الاحمر

عموما يا ستي هما ها يتهموه انه سارق القلم الذهب وخطف الكوكو الصغير وقتل الكوكوهات اللي كانت علي الشجره و بالمره خد قروض من البنوك وهرب ......ههههههههههههه

يلا بقي مهم اخيرالقوا حيطه مايله في شلاليت يقدروا يشيلوها كل الجرايم


تحياتي

heba said...

بص يا كوكو هو استحالة يكون عشان القلم خالص لأن محدش يعرف الموضوع ده إلا هو وصقار وكمان صقار الله يرحمه بقى

هو أكيد متهم بتفجيرات 11 سبتمبر

لأ لأ بهزر والله هو أكيد متهم بقتل الكوكوهات الصغيرين وباختطاف الكوكو اللي اترمى قدامه محطش منطق

بس صعبان علي اوي عشان الكوليس هياخده ويهريه ضرب على قفاه الكميل