Wednesday, May 16, 2007

شيوخ الميكروباص

اذا كنت من رواد او الزوار الدايمين لوسائل المواصلات
و خاصة الميكروباصات هتكون اكيد عرفت ان زي ما فيه مطربين
بنطلق عليهم مطربين الميكروباص ؛ هتلاقوا في كمان شرايط دين
للميكروباص كمان؛ بجد نوعية الشرايط دي مش بسمعها غير في الميكروباصات
و هي شرايط تتسم بالارهاب و الترهيب و التخويف ؛ و بتتسم باسلوب
ركيك في الشرح ؛ و تلاقي الشيخ منهم بيصرخ و لا لما تكون النار مسكت في جلابيته
لدرجة ان صوت الصريخ بتاعه بيغطي علي الكلام اللي بيقوله ؛ يعني مثلا مش هروح بعيد
لسه امبارح في ميكروباص راكبه و السواق اللي بيشرب سجاير و بيشتم طول السكه بأفظع الألفاظ
فاتح شريط لواحد من الشيوخ دول و معليه ؛ و الشيخ عمال يقول يا الله يااللهههههههههههههههههه
و فضل مادد بصوته الجعور في كلمة يا الله تحسه انه داخل سبق علي طول النفس مع واحد تاني ؛
يا جماعه شئ يخليك بدل ما تسمع للشريط و تستفيد من الكلام اللي المفروض مفيش احس منه
يخليك تبقي عايز تقول للسواق لو سمحت اقفل الشريط ده و حطلنا شريط لكاظم الساهر
اهو علي الأقل صوته حلو
و مش بيصرخ ؛ انا بقول الكلام ده كله عشان من رأي ان نوعية
الشرايط دي بتخلي جزء من الناس يهرب ؛ و جزء يفهم الدين غلط ؛ يعني
من المفروض ان يبقي في تفتيش علي الشرايط دي و يبقي عليها رقابه قبل تداولها ؛
لأن بجد احيانا شيوخ منهم بيستعملوا الفاظ سوقيه و لا تليق و يقولوا عشان نوصل لعامة الشعب
و الأمي مثلا ؛ بس ده مش مظبوط انت كده بتقلل من رقي الدين و مرتبته العاليه ؛
و دعائي الأخير يارب الميكروباصات تبطل تشغيل النوع ده من الشرايط اللي بدل مايفيد
بيزعج و يضر
سلام


19 comments:

The Groom said...


صحيح يا كوكو
والله كلامك حلو

قلتي اللي في نفسي

جزاك الله خيرا وربنا يهديهم ويبطلو زعيق

تحياتي لك من ماناساس البلد

صاحب البوابــة said...

الاخوة الكرام لأن دورنا هو إظهار الحقيقة وتوعية الناس بها , ولأن ما علمته عن ذلك المجاهد يمثل قيمة عظمى المفترض أن نفتخر بها ونكرمها , لا أن نعتقلها ونسجنها , فإني أطلب منكم رجاءاً أن تساعدونا في بدء حملة الافراج عن شيخ المجاهدين السيد / أبو الفتوح شوشة , وتتمثل الحملة في نشر هذا البوست الجاهز يوم الجمعة الموافق 19/5/2007 , ونشر صور شيخ المجاهدين في جميع المدونات المشاركة – الصور موجودة في مدونتي- , مع توسيع نطاق الحملة لتشمل كافة المدونات التي نستطيع الوصول اليها .. وجزاكم الله خيراً ...

البوست بعنوان

أن تكون أبو الفـتوح شوشة

حملة الإفراج عن شيخ المجـاهدين :

في ظل تلك الهجمة الشرسة التي يتعرض لها كل وطني حر شريف , تتعدى تلك الهجمة هذه المرة خطوطها الحمراء , وتتمادى في غيها المنهجي , لتصطدم برمز من رموز العزة والكرامة في مصرنا الحبيبة , إنه شيخ المجاهدين الذي يربو عمره عن الثمانين , الأستاذ أبو الفتوح شوشة , ورغم ان الكثيرون من قد لا يعرفونه , ربما لأنه ليس بلاعب كرة قدم قديم أو مطرب شهير قد إعتزل ... بل إنه من القلائل الذين ما زالوا أحياء ممن سبق لهم الخروج مجاهدين وقت تقسيم فلسطين عام 48 م , ورغم أن الكل قد تناساه , في غمرة إعتقال نائبي مجلس الشعب من الإخوان المسلمين , وقد تم إعتقاله معهم وقتها بكل القسوة رغم شيخوخته وكبر سنه , إلا أنهم لم يرحموه , ولم تمنعهم كهولته , بل لفقوا له التهمة الشهيرة وهي محاولة قلب نظام الحكم !!! وكأن كهولته وكِبر سنه تسمح له بمجرد التفكير في قلب منضدة و ليس قلب نظام الحكم !!! لكننا اليوم نعلنها إننا لم ننساه , وكيف ننساه ؟؟ وقد حمل لواء الرجولة والعزة آنفاً وخرج ببدنه وماله قاصداً فلسطين ليجاهد عام 1948م اليهود الصهاينة وهو يبغي النصر أو الشهادة , , إنه اليوم له كل الحق علينا في ان ندعمه تماماً , حتى ولو لم يطلب , وحتى ولو لم يعلم , فإننا من منطلق من نمثله من صحافة شعبية , تمارس دورها في تنوير شعوب المنطقة , نعلن اليوم ما الذي يعنيه أن تكون شخصاً كشخص أبو الفتوح شوشة في مصرنا الحبيبة ...

أن تكون أبو الفتوح شوشة فهذا معناه أن تكرم وتصير رمزاً لكرامة الرجال لو كنت في بلد غير مصر ... أما لأنك في مصر ... فهذا معناه أن تصير نزيل أحد السجون وحبيس أحد المعتقلات ...

أن تكون أبو الفتوح شوشة فهذا معناه أن تخرج للجهاد في فلسطين وعمرك لم يتجاوز التاسعة عشر ...فتبلي البلاء الحسن ... ثم تعود لتنال جزائك على جهادك وبدلا من تكريمك يزج بك في السجون 15 عاماً مع الشغل والنفاذ ..

أن تكون أبو الفتوح شوشة فهذا معناه أن تعود من فلسطين راضياً عن نفسك ... راضياً عن جهادك ... راضياً عما فعلته لرفع لواء الذود عن فلسطين ... فلا يرضى عنك النظام ... لتذوق الويل والتعذيب في السجون المصرية ...

أن تكون أبو الفتوح شوشة فهذا معناه أن تخرج من السجن بعد 15 عاماً كاملةً لتمارس رسالتك في البناء والاصلاح من جديد ... بدون أن تتغير قناعاتك أو تتزعزع ثقتك في نفسك ...

أن تكون أبو الفتوح شوشة فهذا معناه أن تترشح في انتخابات مجلس الشعب لعام 1987م ... فيهب جميع أبناء دائرتك لإنتخابك ... بما فيهم أقباط دائرتك بالكامل .... فتنجح نجاحاً باهراً ... ثم يتم حل المجلس لأجل إسكاتك ...

أن تكون أبو الفتوح شوشة فهذا معناه أن تتحصن بحب الله و تحظى بحب الناس لك ...... لكنك في الوقت نفسه تجد أن النظام يُكن الكره لك ... ويعتقلك المرة تلو الأخرى ...

أن تكون أبو الفتوح شوشة فهذا معناه ألا يرحموا شبيتك وأنت قد قاربت الثمانين ... فيزجوا بك في المعتقلات غير آبهين ... ويحولوك لمحاكمة هزلية غير مستنكرين ...

أن تكون أبو الفتوح شوشة فهذا معناه أن تُحارب في رزقك وسكنك وراحتك وانت شيخ كبير ... ويضيقوا عليك كل شئ حتى يسجنوك ... في الوقت الذي تتمنى أن تنعم فيه براحتك ...

أن تكون أبو الفتوح شوشة فهذا معناه جهاد في صغرك ... تعذيب في شبابك ... بهدلة في كهولتك ...

أن تكون أبو الفتوح شوشة فهذا معناه ... اننا معك حتى النهاية ... نهاية ظلمهم أو نهايتهم ...

الروابط :
مدونة انسى تذيع نبأ اعتقال شيخ المجاهدين
http://ensaa.blogspot.com/2007/04/blog-post_9947.html

مجلّة "فلسطين المسلمة" تذيع فقرات من جهاد شيخ المجاهدين
http://www.fm-m.com/2003/aug2003/story24.htm

تقرير صحيفة المصريون عن اعتقال قدامى رجال الاخوان المسلمين
http://www.almesryoon.com/ShowDetails.asp?NewID=34088&Page=1

ملف pdf عن جهاد شيخ المجاهدين المصريين في فلسطين
http://www.fm-m.com/2003/aug2003/pdf/51.pdf

جاري تدعيم الحملة بتقرير جريدة الدستور عن شيخ المجاهدين بتاريخ 13/5/2007
جاري تدعيم الحملة بتقرير جريدة الوفد عن شيخ المجاهدين بتاريخ14/5/2007

يعقــــوب .... said...

مع احترامي الشديد لكل رجال الدين..بس انتي قلتيها خلاص...شيوخ الميكروباص!!!! و دول صوتهم لا يتعدي مسجلات الميكروباصات و بعض التاكسيات....ودول مش مشكلة عندهم بأه يأثروا ولا يوصلوا رسالة ,المهم عندهم هما والشركة المنتجة يبيعوا كام شريط ولا حتى سي دي
وانا معاكي تماما ان لازم تكون في جهة رقابية على التسجيلات ده ...بس المهم الجهة تراعي ربنا هى كمان

Diyaa' said...

عادي يا بنتي ..زي ما تطرفوا في الدعارة وبقت الكباريهات والدعارة في شرم الشيخ جزء من اقتصاد البلد
وبيع بناتنا في شارع جامعة الدول اقتصاد بلد
بقي الشيوخ دول ثقافة بلد
بيستغلوا الجهل ويعششوا في نفوس الناس اللي عايزة تقنع عقلها الباطن إنهم متدينين
والحكومة مش ممانعة
اهم حاجة
كرسي ريسنا الحكيم ميتهزش
ومن بعده جيمي العريس
جاتها نيلة بلد
تحياتي ولو اتحبست قولي معرفوش :))
أصلي عارفك بتخافي من السياسة :@

Blank-Socrate said...

اهلا كوكو
فعلا يا كميل
الموضوع دا مش بسيط لانه تشويه للدين و مضر و انا متأكد انهم مش شيوخ
مجرد حاجه تجاريه
و اغلب كلامهم منافى للدين و العقل و الانسانيه و مبتذل
و صباح الخير

Esmeralda said...

شيوخ و غير شيوخ
كفايه الاغانى اللى بيشغلوها متعرفش جايبنها منين؟؟؟؟؟؟؟
المهم يشغل اى صوت مزعج و خلاص
زى مايكون بيعاقب الركاب و يا سلام بقي لو قاعد جنب السماعات

ممكن تغير المشوار و تطلع على اقرب دكترو اذن من الطرش اللى جه

Anonymous said...

والله يا كوكو عندك حق
انا كذا مرة كنت اسمع الشرايط اللى من نوعية الشيخ اللى بيقول لو انت اتاوبت حرام عليك
اصل فتح البؤ عورة
فضلت فترة ماشية فى الشارع حاسة ان كل حاجه فى الحياة حرام - النفس الحرام - الكلام حرام - الاكل ح رام - بس فى النهاية عدت الى رشدى والحمد لله - هو مين رشدى ده اصلا - فعلا المفروض يكون فى رقابة على كل الشرايط دى - ده دينا ولازم نعتز بيه - محبتى يا جميله
اختك
قطة الصحراء

شادي فايد said...

طب بس أحسن يكفروكي
ويقولو بتغلط في علماء الاسلام
ومشايخهم

koukawy said...

the groom ..
طب الحمدلله ان مبقاش في نفسك حاجه
*****************************
البوابه 00 اعفيني انا من الموضوع ده
*******************************
يعقوب 00 علي رأيك تجاره
********************************
ضياء 00 طب كويس انك عارف اني عندي ارتكاريه من السياسه و سيرتها
********************************
بلانك سقراط 00 اوافق
******************************
ازمرلدا 00 اه يا بنتي و لو مش عجبك اولعي او انزلي من العربيه
*********************************
قطة الصحراء 00 اه فعلا يحسسوكي ان الدين اتحصر في حته قد خرم الابره
************************************
شادي فايد 00 يبقوا بيحطوا راسهم في التراب
و ودانهم حديد لو مش بيتضايقوا

أميرة البلطجية said...

ايوة صحيح يا كوكي على رأي شادي..دلوقتي يطلعلك ميت واحد يندموكي ع اليوم اللي فتحتي فيه البلوج..او ركبتي فيه مكروباص
ههههه
وزي برضه ما ازميرالدا قالت
سواقين المكروباصات طبقة من المجتمع ليها السايكولوجي بتعها..اغانيهم غريبة..شرايطهم الدينية اغرب..وده أكيد لاسباب الطبقة والمهنة والظروف اللي هم فيها..انا معاكي ان ده بيعمل عبأ ع الراكب..لكن..اهو..الواحد يستحمل الشوية اللي راكبهم ويقول الله يكون في عون الناس دي..تخيلي بقي انهم عايشين في الحاجات دي طول اليوم؟!!
فين البوست الجديددددددددددد

ياسر حسين said...

ياااه
مشكلة الصوت دي مشكلة
في واحد عندنا في الشغل
مُصر أنه يؤذن كل يوم لصلاة الظهر
ويصلي بالناس
المشكلة إن صوته صعب وأجش
وهنروح لبعيد ليه
زمان لما حبوا يعملوا فيلم
عن سيدنا بلال رضي الله عنه
مؤذن الرسول صلى الله عليه وسلم
جابوا يحيى شاهين وخلوه يؤذن بصوته
بالذمه ده صوت مؤذن
ده سيدنا بلال تم اختياره لأنه أجملهم صوتاً
سبحان الله .. أنا معاكي لازم يكون فيه رقابة على الشرائط دي حتى لا تصبح مادة للسخرية من الدين والمتدينين والمشايخ

خالص تحياتي

Diyaa' said...

:(

أميرة البلطجية said...

ايه ده؟ هي البوست الجديد مفيهاش كومنتس ليه؟

Shiko said...

على رأيك يا كوكو
نتمنى ان الرقابه تدقق اكتر مع الشرايط اللى بتظهر كل يوم
وللاسف بتعتمد على الترهيب اكتر من الترغيب

koukawy said...

ضياء00 مش فاهمه الريأكشن
*********************************
بلطجيه 00 معرفش ليه كان مقفول تقريبا تخاريف و كده
***********************************
شيكو 00 ياه ه ه فينك من زمان
**********************************
ياسر حسين 00 اه موضوع الادان ده كمان مشكله
********************************
بلطجيه 00 اللي يقول يقول يا بنتي

كراكيب عادل said...

هو اسم الشيخ دة اية عايز اجيبة

ههههههههههههههههههه

محروم انا من الجو دة من زمان

يا مراكبي said...

شريط ديني وسواق ميكروباص بيسب الدين .. طيب متوقعه إيه يعني؟

أكيد كلام مش منطقي وأسلوب منفر جدا طبعا .. لا يجذب حد مسلم ولا غير مسلم .. ولو فيه حد بيشاور غقله .. الشريط ده هيحسم معاه الموضوع على طول .. ويبعد عن الدين

Anonymous said...

السلام عليكم
مع احترامى لكوكو والمدونه ديه حضرتك لم تذكرى اسم الشيخ ولا اسم الدرس مع العلم بعض شيوخنا الموقرين وعلمائنا مثل الشيخ محمد يعقوب او محمد حسان ممكن يتكلم بالاسلوب اللى انتى بتوصفى به فى البوست
1-معك فى الراى بالنسبه للميكروباصات وسلوكياته والسلوكيات السيئه التى دائما ما تتكلمين عنها مرورا بالاغانى والسلوك لعام فى الشارع الى اخره...
2-اكيد عارفه ان فيه فى ديننا وقرأنناالكريم شىء اسمه ترغيب وشىء اسمه ترهيب فذكر لنا الله الجنه ونعيمها ووصف لنا الله النار وعذابها واهلها كترهيب اذن هناك ترغيب وترهيب وذلك من الله عز وجل
3-وايضاموافقك انه ليس بالصوت العالى ولكن هناك مواقف تحتاج لذلك فان لم ينفع الترغيب فهناك الترهيب وان لم يكن كلاهما فكفى بالموت واعظا
4-كلمه حق اراد بها باطل ذلك (النصرانى)شادى وحضرتك وقعتى فى الفخ يقول الله عز وجل (لن ترضى عنك اليهود ولا النصارى حتى تتبع ملتهم) صدق الله العظيم
5- اعلم انك لن تتهمينى بالتشدد والرجعيه وانك ستتفهمى كلامى اهم ما يميز كوكو الكميل انه غير منفسن يعيش بفطرته وعشان كده جذب له اصحاب كميلين
والسلام عليكم ورحمه الله

koukawy said...

كراكيب 00 مش عارفه و مردتش اسأل السواق و ده كان اكتر من مره اسمعه
***********************************
يا مراكبي 00 اكي موافقاك ؛ و موافقاك في التناقض الفظيع بين سلوك السواق و اللي بيسمعه
***********************************
اللي مش عرفاه 00
مع احترامي لمحمد حسان او يعقوب انا لا اقتنع لا بده و لا بده انا اقتنع بالشيخ الشعراوي اللي كان اسلوبه يجبرك علي السمع غصب عنك
انا لا اشكك في علم الأخرين لأنهم اكيد احسن مني و لا مقارنه طبعا بس الأسلوب حتي لو ترهيب يكون ليه اسلوب
؛ انا حساك بتقول نصراني علي شادي زي ما تكون شتيمه ؛ و الاّيه بيتهيألي بعيده لأن لو شادي نصراني و الله اعلم فهو نقل صوره لغير المسلم و انطباعه عن اللي بيحصل كرد فعل من الشرايط دي
صدقني ولن اتهمك بأي شئ و ربنا يعلم و كل اللي عجبني فيك هو عرض و جهة نظرك بمنتهي الذوق و اشكرك علي رأيك اللي نور مدونتي بس كنت احب اعرف انت مين عشان مكلمكش من غير اسم
يا ريت تنورني باستمرا ؛ بس ابقي اكتب سيم عشان اعرف ان انت
هههههههههههههههههههههههههه