Tuesday, May 8, 2007

فاقد الشئ

بتمشي كعادتي لتفقد عشش الزملاء الأفاضل ؛ عجبني اوي بوست كاتبه
الزميل هيثم ابو عقرب بعنوان فوائد ان تتزوج مدخنه ؛
فأنا من وحي البوست ده و من وحي بوست قديم ليا بعنوان اذا كان رب البيت
هكتب البوست ده 00
************************************
فاقد الشئ لايعطيه

ازاي واحد بيعمل حاجه يحكم علي حد تاني بأنه ما يعملهاش ؛
و خاصة لو ان الشخص الأولاني ده كان حدوه قصدي قدوه ؛
شئ متناقد بيتهيألي ؛ يعني مثلا و انا بقرا الموضوع بتاع ابو عقرب
جالي الهاتف ده ازاي واحد بيدخن بيجيلوا عين يقول لمراته او لخطيبته متدخنيش ؛
ما هو الحرام عليك و عليها سواء و الضرر عليك و عليها برضو سواء ؛
او ام مثلا بتدخن و تقول لبنتها او ابنها متدخنش ؛ الله طب ما هو انت صوره
بيتبعها ازاي ميدخنش و ازاي هو يقتنع انها غلط او خطر او حرام اين كانت التسميه
و انتي و باباه بتدخنوا ماهي حاجه تمخول المخ ؛
طبق بقي الموضوع ده بقي علي حاجات كتير شبه كده ؛ و منها المثل اللي انا ضربته
في البوستايه القديمه اللي كتبا اسمها فوق ؛ طب معني كده ان المثل اللي بيقول
ان فاقد الشئ لا يعطيه ده صحيح ؟؟ يطلع واحد يقولك لأ في ناس رأيها ان المثل ده مش صحيح
و مبررهم ان فاقد الشئ بيحس بأن عنده نقص تجاه هذا الشئ فبيحاول بعد كده انه يتحشاه
يعني مثلا لو ان حد اتربي علي ان اهله بيضربوه هو لما يخلف مش هيضرب ولاده ؛
او لو اتربي في بيئه مفككه هيحاول انه يخلي الأسره بتاعته مترابطه ؛
او لو ان اهله مش كانوا بيدولوا فرصه يتناقش و يعبر عن رأيه هو هيعمل العكس مع ولاده ؛
انا شخصيا من رأي ان مفيش قاعده و ان الموضوع نسبي لأن ممكن الواحد الموضوع يقلب معاه عقده
و يطبقه بشكل مبالغ فيه فيبقي فاقد الشئ بالجامد اوي 00
فمؤقتا انا هغير شويه في صياغة المثل لحد اشعار اخر و هخليه 00
فاقد الشئ ممكن يعطيه بس لو معطهوش يا ريت تعذروه
سلام
بعد قراية الكومنتات اضافه بسيطه 00
كتب لي الزميل ياسر حسين الكومنت ده
و يا ريت اللي مهتم يقرا البوستايا اللي عنده لأن الموضوع عنده مشيق
جداااااااااااااا 00
و ده كان نص الكومنت باللينك بتاع البوتايه
******************************************

أنا معاكي مليون المية في كل الكلام اللي قلتيه
وخصوصاً إني بأعتبر نفسي عدو التدخين رقم واحد
ولو تتذكري كان ليا تدوينة عن الموضوع ده وعن ارتباط بعض المبدعين بالكيف وأنتي شرفتيني بتعليقك الجميل عليه وللتذكرة مش أكتر ده اللنك بتاع الموضوع لعله يكون فيه إضافة أو إفادة لقراءك الأعزاء
http://cartoonya.blogspot.com/2007/03/blog-post.html

10 comments:

Anonymous said...

السلام عليكم

ممكن نكتب شويه عن كوكو الكميل
و ممكن تعمل مدونه تاني تكتبي فيها عن حاجات تانيه ملهاش علاقه بكوكو الكميل

انا مش بعرف انام الا ما اطمن علي كوكو الكميل

لو سمحتي حرصا علي المصلحه العامه و عدم الاضرار بالمواطنين و السفاحين
اكتبي عن كوكو الكميل

بد بجد هعزل و انا بجد سفاح فراخ و مش بهزر يعني مش هخليها سنه كويسه علي بتوع التدوين
يلا سلام
و مش هعدي الا بجد لما الي كلام عن كوكو الكميل

سلام

سفاااااح الفراخ الزعلان

Amr Ahmed said...

لا ممكن يعطيه طبعا

والامثلة اللي انتي قلتيها صحيحة

بس علي حاجات وحاجات

يعني اللي مش متعلم ميقدرش يدي علم

المتدين مينفعش يدي دين

يعني هي نسبية شوية

تحياتي

The Groom said...


عين العقل يا كوكو

تحياتي من ماناساس البلد

Diyaa' said...

انا موافق علي النتيجة النهائية
إنه بتقلب معاه بعقدة
يعني أنا ضعيف أدام الشئ الحقير ده اللي اسمه سيجارة
مش عايز أشوف أقرب الناس ليا زيي
مع العلم إني مش مدخن
بس ناقشت الموضوع ده كتير
بس برضه مسألة البنت المدخنة
بتفرق في حاجة تانية
إن البنت بحسها أجمل من إنها تبقي ماسورة دخان ..مش قصدي شكلاً ..أقصد شخصية ..وحتي لما بتشربها بتحسي إن في نوع من العهر في الموضوع ومش بتكلم عن صورة الإفلام ..بتكلم عن المنظر اللي قدام عيني...بجد مش لطيف خالص..عكس الراجل بتحسي إن السيجارة علي تفاهتها مش بتبقي متناقضة معاه أوي ..
وعموماً أنا بقيت قافش علي كل اللي عرفتهم مدخنين وتقدري تقولي إنهم مبقوش قريبين مني...لأني بحتقر العادة عموما
بحييكي علي فتح الموضوع ده ..والنتيجة أنا شفتها بيعنيا
إن التناقض بيكون هدفه تجنب اللي الواحد خايف منه
سلام

يعقــــوب .... said...

انت قلتيها بنفسك ,الحلال والحرام واحد على الكل...و ربنا مفرقش بين الراجل و الست

يا مراكبي said...

العبارة سليمة تماما .. فاقد الشيء لا يعطيه معناها إن الشخص لازم تتوفر فيه صفة معينة علشان يقدر يعطيها للآخرين

ما تطلبيش من واحد ما يعرفش إنجليزي إنه يدرسلك إنجليزي

ما تطلبيش من واحد ماشافش حنان إنه يفهم إيه هو الحنان ويديهولك

قليل قوي لما تلاقي حد بيبقى عارف إنه ناقصة حاجة ويركز في إنه يسيطر على تصرفاته ويتصرف عكس كده .. وحتى لو كان مركز مش هيقدر يسيطر على ردود أفعاله السريعة اللاإرادية

شادي فايد said...

كوكو وهو بيتمشى في العشش
ما افتكرش كده ان في عشة بقاله زمان مدخلهاش

وان صاحب العشة حيقفلها لو كوكو مش يدخلها

ياسر حسين said...

أنا معاكي مليون المية في كل الكلام اللي قلتيه
وخصوصاً إني بأعتبر نفسي عدو التدخين رقم واحد
ولو تتذكري كان ليا تدوينة عن الموضوع ده وعن ارتباط بعض المبدعين بالكيف وأنتي شرفتيني بتعليقك الجميل عليه وللتذكرة مش أكتر ده اللنك بتاع الموضوع لعله يكون فيه إضافة أو إفادة لقراءك الأعزاء
http://cartoonya.blogspot.com/2007/03/blog-post.html
خالص تحياتي

شادي فايد said...

انا والله مش زعلان

انا بس بخاف الناس هما اللي يكونوا زعلانين مني

Blank-Socrate said...

شكرا يا كميل على البوستايه دى
لان فعلا
الموضوع نسبى
و كلمه فاقد هى مفتاح الموضوع
فاقد بشكل تام و لا نسبه بسيطه مخلياه تحت تاثير الشيىء المش كويس لكن مش حابب انه يكون كدا فبينصح الناس