Sunday, May 27, 2007

تهاني و اغاني

سوء حظي خلاني افتح القناه المصريه الفضائيه ؛
و كان بقالي كتير الحقيقه متفرجتش علي الأولي و التانيه و التالته
و القنوات العتيقه دي ؛ بس مكنش متخيله ان القناه الفضائيه المصريه تعرض نوعيه
البرامج العجيبه دي و تبقي فضحيتنا علني في كل البلاد ؛ و يرجعوا يقولوا بتشوهوا
سمعة مصر ؛ و هو الربامج دي مش بتشوهه سمعة مصر 00
برنامج اسمه تهاني و اغاني ؛ نبتدي بالمذيعه اللي خروف العيد بالنسبه لها
باليرينا ؛ و تقل الفيل اخف من دمها ؛ نيجي بقي للبرنامج اللي فكرتة
من ايام ما قالوا ياللا بينا نعمل برنامج كان تقريبا سنه 1600 مثلا
برنامج ناس بتتصل تهدي و يجيبوا اغاني الناس بتطلبها 00
اكيد عارفين البرامج العقيمه اللي تشل دي ؛ المهم
نيجي بقي للي بيتصلو ؛ واحده متصله من ايطاليا و اللي يفقع بتقول للمذيعه
انتي زي القمر ؛ قمر ايه ياسيتي ده لو القمر كده كان الليل هيبقي كحل ؛
و الغريبه ان الست متابعه للبرنامج و حافظه اسم المذيعه و المعد و المخرج
و غالبا اسم بواب البلاتوه ؛ ماعلينا طلبت الست الأغنيه و قالت لتيتا و جوزي
و احمد و لكل اهل الأنفوشي و كان ناقص تقوم تنقط ؛ قفلت الست دي اتصلت واحده
تانيه موتتني من الضحك ؛ لأن علي طول جه في دماغي البوست اللي كانت كاتباه البلطجيه
بعنوان مكتوب يا حبيبي تاخدني
الست اتصلت و هاتك يا مدح في المذيعه و في البرنامج كل ده ماشي لحد ماقالت 00
و الله انا بحبكوا اوي عشان كده كتبتلكوا قصيده صغيره كده بتقول
هفضل استناك و انا مكاني هنا 00 مع ملاحظة المد في الألف عشان نحافظ علي اداء الست
و لو طال بينا البعاد مليون سنا هفضل برضو استناك زي ما انا
*****
هو ده الحقيقه اللي قدرت افتكره من القصيده العظيمه لأن الحقيقه الضحك خلاني مركزش اوي
هو السؤال بقي 00 هل فعلا في ناس هايفه و فاضيه و عندها فراغ لدرجة انها تتصل من بره مصر
و تدفع مكالمه بالشئ الفلاني عشان تقول اهداءات ؛ و لا التانيه بتاعت القصيده دي تلاقي
الطبيخ ولع علي بوتاجاز و هي قاعده ترص قصيده مكنش ليها اي دعوه بالبرنامج
علي ارغم انها قالت انها كاتباها مخصوص 00
و لا تفتكروا ان الناس دي متأجره زي مشوفنا في برنامج حسين علي الهوا
زي مديحه حاتشم كده 00
اصل لو في ناس كده يبقي هبل رسميييييييييييييييييييييييي
سلاااااااااااااام

15 comments:

Esmeralda said...

اهى القنوات ديه عماله زى البلاعه المفتوحه من غير سبب
تقعدى تقلبى فى امان الله تلاقيكى وقعتى فى واحده منهم

reri said...

هههههههههههههههه
بصي أنا لما بشوف الحاجات دي بقع من كتر الضحك
وبحس إن الناس دي بتتكلم من الإستديو
إستحاله يكونوا دول ناس طبيعيين زينا
يإما تخلفهم عالي بصراحه
لو كانوا بجد بيتصلوا بالبرامج دي
كله كوم والقصيده دي كوم تاني .. هههههههه... ست تتحط في المتحف هي وقصيدتها

سلاماااااااااااات

ادم المصري said...

والله مش بعيد فعلا تكون متاجرة
.
.
لاني ماظنش ان واحد قاعد برة بعد ما بيتفرج علي برامج عالمية
تفتح النفس كدا
يجيلة قلب ويحول علي قناة مصرية
.
.
لا ويتصل كمان
غريبة والله
.
.
تحياتي والسلام

Mohamed A. Ghaffar said...

متسيبى الناس تنبسط ، ايه الكتمه دى

shams said...

انا لما بقلب واشوف برنامج من دول بروح قالبة على اللي بعده في ساعتها .. في ساعتها مين .. في ثانيتها .. مبطيقش اشوف الشلل ده يا كوكو .. هو الواحد ناقص

سمسم said...

بالنسبة للسؤال بجد محدش بقا اهبل وان كان في حد اهبل هيجيب فلوس يتصل منين وان كان غني واهبل ايه هيخليه يضيع فلوسو في البرامج اللي هو اصلاً ما بيتفرجش عليها
نهايتو
الاعلاميين عندنا شوية عبط مدعوك بسخافة زي ما يكونوا لسه حاصلين علي إبتدائية اعلام
انا فاكر برنامج اماني واغاني اللي كان بيقدموا الواد الاقرع بتاع فيلم المغتصبون الفاشل
تحياتي
ويجعلوعااااااااااااااامر

يعقــــوب .... said...

ده مش سوء حظ..ده حد كان داعي عليكي

Blank-Socrate said...

كوكو الكميل
انا جاى اقول انى معتكف الان و معنديش نت
تحياتى و عذرا

يا مراكبي said...

طبعا متأجرين .. مش محتاجة سؤال دي أبدا .. ده بفرض إن لسة فيه حد بيشوف القنوات دي بجد

إلا إذا كانوا ناس مش طبيعيين أصلا .. وألا إيه؟

بس الغريبة بقى هو الناس اللي بتبعزق فلوسها على الرسائل اللي بتبقى في شريط أسفل الشاشة .. ناس غريبة جدا جدا .. حقيقي أنا محتاج أتعرف على حد منهم وأسأله عن اللي بيعمله ده

An Egyptian in the UK said...

يعنى يا كوكو جت على البرنامج ده و بس... فين برامج الاطفال اللى المذيعه بتبقى قاعده مع الاطفال و شكلها زى ما يكون قرقانه منهم و عايزه تخلص حلقتها بفارغ الصبر...و البرناماج تحسى انه معمول لعواجيز معندهمش قدره على الحركة .. مش لاطفال مليانه نشاط و حيويه

مع خالص تحياتى

koukawy said...

ليكوا كلكوا ميرسي علي ارأءكوا اللي نورتني
بس لضيق الوقت مش هعرف ارد علي كومنت كومنت 00
انا اسفه

كراكيب عادل said...

يمكن فية ناس تانين معجبين بيهم


:)

أميرة البلطجية said...

مش قلتلك يا كوكي..الكاميليين اللي زيك مينفعش يفتحو التليفزيون
:)

ياسر حسين said...

حقيقي أنا ضحكت أكتر منك وأنا بأقرأ البوست الهايل ده
اللي بتتصل من ايطاليا غالباً بتتصل من الحمام بتاع الاستوديو
وعلشان المصداقية
هتلاقي جواه طقم حمام ايطالي فاخر
:)
إسم البرنامج مستوحى من برنامج تلفزيوني عتيق كان يقدمه جمال الشاعر سنة 1991
وكان سبب في شهرته
وهو برنامج أماني وأغاني
بس الناس مبقتش تاكل م الكلام ده
بالنسبة للكلام اللي اصبح عادي جدا في الاتصالات التلفزيونية
الكلام التالي الذي يتم توجيهه إما للضيف أو مقدم البرنامج
أنت زي القمر
إحنا بنموت فيك
أيه الشياكة دي
أنت فظيع
أنت تجنن
أنا رغيت كتير
:)
خالص تحياتي

طهقان said...

والا الفضائية المصرية

اللي يقعدوا ساعة يشكروا في المذيعة وذوقها
رغم انها
بكتيرها..

عالمة حادثة في وشها

والا المرضعات اللي بيجبوهم

الواحدة قد لامواخذة البرميل
وطالعة عاملة لي فيها مزة من الفضائية اللبنانية

جاتهم الهم