Thursday, May 10, 2007

كوكو في ورطه

الحلقه اللي فاتت 00
الكوليس بتاع مدينة شلاليت قبض علي كوكو و اتهمه
الحلقه دي 00
كوكو الكميل قاعد علي الرصيف و رافع كناحاته الصغننه الكميله لفوق
و نور عربيات الكوليس ضارب في عينيه و هو مذهول و مش فاهم
حاجه من اللي بتحصل حواليه و كوكوهات الكوليس حواليه من كل حته بيجروا
و شدوا كناحانه ورا ضهره و لبسوه الكلكشات و راحوا رافعينه من الأرض
و هو عمال يقول 00 طب من فضلك يا استاذ كوليس انا عملت ايه ؟؟
و هما يقولوله 00 اسكت يا متهم ملكش الحق تتكلم الا في القسم
و جرجروه علي العربيه و حط ظابط منهم ايده علي راسه و دخلوه
جوه العربيه و راحوا رازعين الباب 00 و كوكو قاعد في العربيه من ورا
و قدامه الشبك الحديد و هو عمال يبص حواليه و يتفقد المكان
و في نفس الوقت قلقان لحسن مايلحقش ام مكاوك و لا حاجه 00
و جريت عربيات الكوليس ورا بعض و هي فاتحه السارينه بصوت عالي
ويوا ويوا ويوا ويوا 00 و فضلت العربيات تلف من شارع لشارع و من حاره لحاره
و كل شارع تخشه يشوف كوكو جريمه افظع من اللي شافها قبل ما يتقبض عليه00
شاف كوكو شايل شوال علي ضهره و مسدس في ايده و خارج يجري من البنك
الشلاليتي بعد ما سرقه ؛ و شاف نسور موقفه كوكوهات و مرفعنهم في الشارع و بيخدوا كل
اللي في جيوبهم و منفضين ريشهم عن اخر سحتوت 00 و كوكو مستغرب الكوليس سايب
كل الناس دي و رايح يقبض علي الكميل اللي فيهم 00
فاق كوكو من سرحانه في الشوارع علي العربيه و هي بتقف قدام مبني طويل
في شارع ضلمه يدوبك شايف المبني بالعافيه ؛ و راح فاتح واحد من الكوليس الباب
و ملبس كوكو كيس اسود علي راسه و راح شده من كناحه و كوكو عمال يصوصو
و يقول انا مش شايف انا مش شايف ؛ راح مطلع الكوكو الكوليسي ده عصايه
مجعلصه من جيبه و راح خابط كوكو الكميل علي دماغه طب كوكو في لحظتها مغمي عليه
بعد ما الدنيا اسودت قدامه 0000
*******************************************************
فتح كوكو عينيه بالراحه بالعافيه و هو حاسس ان دماغه قد هرم خوفو 00
و ابتدي يحس انه نايم علي ضهره علي بلاط ساقع ؛ و حاول كوكو يقوم
لكن حس انه دايخ و محتاج يتحرك بالراحه اكتر لحد ما قعد 00 بص كوكو حواليه
لقا اوضه مش نضيفه و كلها كراتين و براميل و فيها شبابيك سلك قد فتحة الابره
قرب السقف و في كلام و شخبطه علي حتت كتير في الأوضه و السقف متعلق فيه لمبه
مدلدله من سلك و زرار فتحها و قفلها مدلدل معي السلك و اللمبه كمان واضح انها عايزه
تتغير لأنها كل شويه نورها يترعش 00
و فجأه فتح واحد شباك صغير جرار في الباب و بص علي كوكو
و راح قافل الشباك ده و مشي و بعد 3 دقايق سمع كوكو صوت المفتاح بيلف في الباب
و فضل كوكو مركز عينيه اوي علي الباب و مستني يشوف مين اللي هيدخل
و اتفتح الباب براحه و بص كوكو شاف قدامه رجلين بني كبيره
و طلع كوكو براسه براحه و عدي علي ركب ووراها فخدين كلهم ريش اسود و بعديم بطن
مكرشه و صدر عريض كله عضلات ووصل لوش شكله معب فيه منقير طرفه مكسور
شكله كده في خناقه و عين مفقوعه و اول ما فتح الكائن العملاق ده بقه
شاف كوكو سنان حمره من اثر الدم بتاع الكوكوهات ابريئه اللي بيكالها
و اول ما تكلم سمع صوت محشرج من المخدرات و الحاجات الأصفره اللي بيشربها
تنح كوكو الكميل في وش الكائن العملاق ده و هو بيضحك و بيقول 00
هع هع هع ؛ و عملينا فيها حويط يا عين امك و كوكو الكميل و كوكو الجامد
و انت طلعت كوكو الأهبل العبيط ابو رياله ؛ و دخلت عليك التمثيليه زي الشراب ابو خرم في الصباع
و شكلك بقي لامؤاخذه في اللفظ زي الشورت المبلول ؛ صوت ضحك من الحاشيه اللي حواليه ؛
احب اعرفك بنفسي يا سي كوكو يا اهبل انا ابو الأنسار المخربش اكبر مذور حبوبورو في
العالم و تاجر في كل شئ ممنوع و المسموح مبحبوش و كمان البوليس محبوش
عشان كده كل ما واحد يعملنا فيها حمش و يفكر بس انه يقدم في كليه الشرطه
بنقطع خبره و نتاويه هو و اهله فمتفكرش انك هتلاقي هنا بوليس يلحقك
و راح مايل المخربش فجأه علي قدام و راح مبرق و مصرخ في وش كوكو
لدرجة ان جت علي وش كوكو تفافه و قال 00
فين القلم ياللا ؟؟؟؟؟؟؟؟
كوكو و هو بيمسح وشه من التفافه و ناسي من الخضه 00 قلم ايه يا استاذ ابو سمسار ؟؟؟
اسمي ابو الأنسار ياللا انت هتسوق الهبل و لا ايه انت هتقول فين القلم
و للا اخليك تقول ؟؟؟؟؟؟
يا استاذ و الله انا مش فاكر قلم ايه ايه اللي حضرتك بتتكلم عليه ؟؟؟؟؟
القلم اللي ادهولك الحنش و هو بيموت و متحاولش تنكر عشان رجلتي اللي كانوا
بيطردوا الحنش قبل ما يموت شافوه و هو بيديك القلم
و افتكر كوكو بس ماردش 00
ما هو اصل انت لو مقلتش مش هنديك الشيك اللي لقيناه وسط حاجتك
لأ لأ يا استاذ ده شيك عشان انقذ بيه امي من الخطاف لأ من فضلك انا معرفش القلم
فين ممكن يكون وقع مني
الخطاف؟؟؟؟؟؟ الله الله ده احنا طلعنا نسايب اهو الخطاف ده كان من رجلتي و طلع خاين
و مصنش العشره و الطفح اللي كفحتهوله و اول ما جناحه طول و العافيه ضربت فيه
عض الجناح اللي اتمدله 00 بقولك ايه يا كوكو ياللي مفهمينك انك كميل
انا مستعد لو لقيتلي القلم و كلمة شرف و دي اول مره هتنازل و يكون عندي شرف
و انا متضرر ؛ كلمة شرف لو تديني القلم ده هوصلك عند الخطاف و اهو ابقي ضربت
كوكوهين بمطوه انت لقيت امك و انا لقيت زمارة رقبة الواد الدون اللي اسمه خطاف
ايه رأيك ؟؟؟؟؟؟؟
سكت كوكو الكميل شويه و قال 00 طب ممكن افكر شويه
خلاص انا هسيبك مع دماغك تفكر و تمخمخ بس عقلق في راسك تعرف خلاصك
سلام يا حلو معاك ساعه عقبال ما اشرب كاس و ارجعلك ؛ ياللا يارجاله ؛
بس بقولك ايه متفكرش تقل عقلك كده و لا كده و علي العموم كوكوبايلك
في الحفظ و الصون 00
و خرج المخربش و قفل الباب و فضل كوكو باصص علي الباب و بيسمع المفتاح
و هو بيلف تاني بالعكس و الباب بيتقفل عليه و هو بيفكر يتصرف ازاي ؟؟؟؟؟؟؟؟
ايه الورطه دي
كاكان
****************************************************************
سؤال الحلقه اللي فاتت 00
كل الناس المره اللي فاتت حلوا السؤال علي ان كوكو هيكون متهم بسرقة القلم الدهب
بس اللي كسبه هما البلطجيه و سمسم ؛ عشان قالوا ان دي هتكون العصابه مش كوليس
حقيقيين 00 مبروك يا كميلين
**************************************************************
سؤال المره دي 00
يا تري كوكو هيوافق علي طلب المخربش و لا لأ ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

23 comments:

Esmeralda said...

ممممممممممممممممم
والله ده سؤال كيواييس
ماهو لو مش سمع كلامه حيئذوا امه
و لو سمع كلامه و اده القلم ممكن يطل الشرير عيل و يرجع فى كلامه و برضه يؤذى امه و يخلص عليه و يبقى كوكو خسر كل حاجه بالاضافه انه حيحتقر نفسه

اعقدد حيديه ليه و يجازف

safa7_karmooz said...

ممممممممممممممممم

تؤ مش هيوافق طبعا

خمسة فضفضة said...

السلام عليكم ورحمة الله وبركاته

ضحكت كتيييييييييييييير اوي في الحلقه دي ، بجد فنانه الوصف بتاع الشرير وهو بيهدد كوكو تقوليش محمود المليجي


عموما ياستي لا كوكو هايعمل شجيع السيما وما يوافقش علي طلب الشرير ويحاول انه يهرب باي طريقه ، او ممكن يوهمه ان القلم وقع منه في حته وهو افتكر مكانه وعاوز يروح يوريلهم المكان و بعدين يحاول يهرب

من الآخر مش هايديله القلم
بس خلاص

تحياتي

شادي فايد said...

انا لو مكانه حوافق بس ححاول اكون حويط

The Groom said...


جايين بس نصبح

:)

لكن انا ماليش في ليلة الكوكو دي ومحاولتي الوحيدة بائت بالفشل :(

تحياتي لك من ماناساس البلد

الشيطان يعظ said...

ليه في ورطه ياكوكو
ياريت تزروني

أميرة البلطجية said...

هههههههههههييييييييييهههههه
انا كسبت انا كسبت
وسمسم كمان كسب هيييييييهههه
هيييييييه
هيييييييييييه
ميرسى اوييييييييي يا كوكي
اجابة انهاردة بقي
ايوة حيوافق يتعاون بس حيحط في دماغه امه يسلمه للكوليس برررضه
ههيييييييييييييييييههه

Té la mà Maria said...

irreverent,iconoclastic,eclectic e liberty

http://telamamaria.blogspot.com
in Catalonia - Spain

thank

Desert cat said...

مش عارفه ليه حاسه انه مش حيوافق

إنـســانة said...

ههههههههههههههههههههههههههه

ايه يابنتى الحاجات الجامدة دى فطستينى من الضحك

ممممممممم
اعتقد إنه هيوافق عشان مقدمهوش حل تانى

صاحب البوابــة said...

ضحكت مراراً لخفة دمك الواضحة وقلمك الساخر

تحياتي

واتابعك دائماً

david santos said...

I offer to my friend Esmeralda


MOTHER OF THE WORLD

Egypt , gather your children
Even the most unwelcome
And show them the facts

All of them are dear then
But for the most fearsome
It will undo their evil acts

سمسم said...

كوكو
....
سجدة شكر من شخصي لله علي توفيقه
الجماهير تصرخ في المدرجات مبررررررررروك
ياض يا سمسم
لقاء في التلفزيون:ماذا تقول بمناسبة فوزك في الحلقة اللي فاتت من مسلسل الكوكو الكميل؟!
أنا:اولاً اشكر السيد اللواء فلان علي رعايتة للحلقات والسيد الوزير علان علي الدور الخطير في المتابعة والسادة اعضاء الحكومة ومجلسي الشعب والشورة وفريق النادي الأهلي والحاجة أطاطا جدة الواد عوكل اللي تاه في تركيا
وأخيراً اشكر الحاجة كوكو
والسلام عليكم ورحمة الله وبركاته

shams said...

اااااه ده العصابة ماسكة البلد عندهم برده

ما علينا

كوكو هيديلهم القلم عشان هو عايز ينقذ أم مكاوك

ربنا معاك يا كوكو بس خلي بالك

أحمد مختار عاشور said...

مش هيوافق
طب هيعمل ايه؟
ديه شطارتك بقى يا كوكو

مجهول said...

اولا مبروك لاميرة
وانا عارف ان المسابقات بتتكوس لاميرة بصفتها مسنوده يعني
وانتي وزيرتها
ثانيا
بجد متزعليش مني انا كنت مشغول ومسافر وكان ورايا حاجات فوق بعضها وربنا وفقني في بعضها
المهم متزعليش لاني مقدرش علي زعل كوكو
واساسا مينفعش خفه دمك دي تركب علي زعل
سلامي ليكي شخصيا واتمني تكوني بخير

Blank-Socrate said...

u should tell koko that
"when you have a probleme
donot say god i have a great probleme
say probleme i have a great god "
I like that

Desert cat said...

هو انا حاسه يا كوكو انه مش حيوافق
بس ممكن يفكر فى حيلة ذكية

شادي فايد said...

أنا مررتلك تاج
:)

koukawy said...

ازمرالدا 00 شئ يبحير
***************************************
سفاح كرموز 00 ماشي
**************************************
خمسه فضفضه 00 و عليكم السلام ؛
ميرسي علي ذوقك اوي
و مبسوطه انك ضحكتي
***************************************
شادي 00 يا عم يا حويط يا جامد
********************************
the groom ..
مش لازم تيأس من اول مره خلي عندك اصرار
********************************
شيطان 00 تشرفت لما زرتك
نورتني
*******************************
البلطجيه 00 مبروك يا بلطج
**********************************
so nice to read your comment
********************************
قطة الصحراء 00 ماشي كلامي يا عم القط
نورتيني
**********************************
انسانه 00 ميرسي انك ضحكتي مبسوطه
*********************************
صاحب البوابه 00 ميرسي يا رافع معنوياتي
********************************
david .. tha`x
*****************************
سمسم 0000
مبروك
ههههههههههههههههههههه
ضحكتني اوي
******************************
شمس 00 و لا كأني سمعت عشان منروحش في الملوخيه
********************************
احمد مختار عاشور 00 و كوكو اكيد شاطر و لا تشك؟؟
*********************************
مجهول 00 ياه يا مجهجه و انا بقول العشه النهارده الاضاءه فيها احلي كل ده عشان انت جيت
و لا يهمك حمدلله علي السلامه ؛
اما بالنسبه للمسابقه انت كده بتطعن كوكو في شرف مسابقته
دي اميره مكسبتش غير مرتين
************************************
بلانك سقراط 00 هههههههههههههههه
الله ده انت متابع
********************************
شادي 00 حظك وحش انا عملته قبل كده

وينكى said...

هو مين بيعمل ايه؟؟؟؟
متهيألى ان كوكو هايواقف كده وكده بس لحد ما يوصل لمامته وبعد كده هايتصرف

david santos said...

Madeleine, a girl of 4 years was abducted in the Village of the Light, the Algarve, in Portugal, goes all to place fhoto of it in ours blogues has of finding

يعقــــوب .... said...

يااااه اخيرا قصة طويلة حبة :)
اول حاجة الموسيقى اللي انتي حطاها ده تحفة..الكمان عامل عمايل....بس ياريت المرة الجاية تدينا جرعة طويلة زي ده عشان تكفي طول الاسبوع