Friday, March 23, 2007

كوبري الموت 00

يا سلام عليك يا كوكو يا كميل لما بتحط منقارك في حاجه
بتجيب قرارها ؛ يا اصحابي الكميلين الحلوييين استكمالا
للبوستايه اللي كتبتها اول امبارح بعنوان 00 السؤال لغير الله مذله
اللي كنت اتكلمت فيها عن حادثة العربيه النقل تحت كوبري السيده عيشه
عرفت النهارده بشغل شارلوك هولمز و تأثرا بخالد الخميسي و حواديته مع سواقين التاكسي تفاصي الحادث اللي حصل من شهود عيان
و هؤلاء الشهود هم 00 سواق ميكروباص و ست من الستات بتوح الحواري
و اللي كانت راكبه جنبي في الميكروباص و دار حوار بينها و بين السواق
ما كنتش منصتاله و ماسكه الكتاب في ايدي و بقرا كالعاده لغاية ما سمعت
الست بتقوله 00
الست 00 هما شالوا العربيه بتاعة الحادثه
السواق 00 اه شالوها النهارده الصبحيه
الست 00 يا لهوي الواقعه كانت جامده اوي
انا محشوره في وسط الكلام 00 هو ايه اللي حصل بالظبط؟
الست 00 هو انتي مدرتيش يا بنتشي ؛ دي العربيه وقعت من فوق الكوبري
انا 00 يا ساتر ؛ انا كنت فاكره ان سور الكوبري هو اللي وقع
السواق 00 لأ يا ابله العربيه و قعت ؛ و دي مش اول حادثه
هو انتي سعادتك متعرفيش انهم مسميين كوبري السيده عيشه ده كوبري الموت
ده كل فتره كده تحصل حادثه جامده كده
الست 00 فاكر ياسطي الأوتوبيس بتاع المدارس اللي وقع و السواق مات برضك
انا 00 يا ساتر اللهم احفظنا ؛ انا شفت العربيه و هي علي الأرض بس ما كنتش عارفه كل ده
الست 00 ايوه ما الناس ربنا يعمر بيتهم غطوا العربيه بالبطاطين عشان المنظر
كان فظيع لأ مؤاخذه
السواق 00 انتي عارفه يا حاجه عارفه يا ابله و النعمه انا كنت معاهم و هما بيطلعوا الراجل من العربيه و كان محشور جامد و كان صعب اوي اننا نطلعه ده كان هيتفرتك في ايدينا ؛ و يوم حادثة الأوتوبيس انا كنت واقف في الموقف تحت الكوبري و شوفت الأوتوبيس و هو بيقع
انا 00 طب هي ايه المشكله ؛ ليه الحوادث دي كلها؟
السواق 00 الملف كده زي ما تقولي سعادتك تصميمه في الأصل غلط و احنا يا ما هاتينا و اشتكينا لكن محدش بيعبرنا و هيفضلوا سيبينا كده و كل شويه حادثه و حد يموت و خلاص ؛ ربنا يرحمنا
انا و كنا وصلنا السيده عيشه 00 ربنا يرحم الكل ؛ السلام عليكم
و فتحت باب الميكروباص و نزلت و عديت مكان مكانت العربيه موجوده
و دعيت للمتوفي بالرحمه
******************
بعد الحوار ده طبعا مش محتاجه اعلق مفيش كلام يتقال اكتر من الأتنين الغلابه اللي علي طبيعيتهم و سجيتهم دول قالوه ؛ و ربنا يحفظنا ؛ و اللي يسوق علي كوبري
الموت يخلي باله
سلام

19 comments:

soosa el-mafroosa said...

بحسبة بسيطة

أكيد تكلفة تصليح الكوبري أكبر بكتير من التعويضات اللي هيدفعوها لكل اللي ماتوا و اللي هيموتوا

ماهو حسب آخر إحصاء

العشرة مننا بقوا بقرش

لنا الله

Anonymous said...

زعلان قوى قوى قوى انهم شوهوا اسم ستنا عائشه بالكوبرى الملعون اللى عملوه
وفعلا تصميم الكوبرى فيه حاجه غلط المفروض يبقى فيه ميل فى الدورانات والانحناءات والحكومه عارفه ومش عايزه تعمل اى حاجه وللأسف الشديد زى ماست مفروسه قالت يظهر كده

انما انا لازم أضحكك ياكوكو علشان انتى بقالك كام بوست حزينة وموضوعاتك جايه على جروح كتير

فى مره وزير النقل راح زار وزير النقل الأنجليزى
فدخل بيته لقى البيت عامل زى القصر قاله تعالى هنا
أزاى بيتك عامل كده وانت يدوبك حتت وزير
الوزير الانجليزى فهم الوزير بتاعنا بيلمح لأيه
فخدوا ناحيه البلكونه وقالوا شايف الكوبرى اللى هناك ده؟
الوزير قاله ايوا شايفه ماله ؟!!
الوزير قاله ده كان المفروض يتكلف 10 مليون جنيه استرلينى
انا خليته يتكلف بس 8 مليون جنيه استرلينى
الوزير قاله أههههه
بقى كده
طيب
السنه اللى بعديها الوزير عزم وزير النقل الانجليزى عنده فى البيت
الوزير الانجليزى راح البيت
البيت كان أفخم من بتاعه ميت مره
فسأل وزير النقل
تعالى هنا , منين جبت كل ده؟
راح وزير النقل خده على البلكونه وقاله شايف الكوبرى اللى هناك ده ؟
الوزير الانجليزى رد وقال مش شايف كوبرى
هنا الوزير قاله اهو ده أتكلف 10 مليون جنيه مصرى

ودمتى بكل صحة وحب وتقدير
وأبقى خدى بالك من نفسك ياكوكو
:)
كاكان

-_- said...

الراجل البسيط عارف ان تصميمه غلط و المهندسين و لا هما هنا

يعقــــوب .... said...

ده وسيلة من وسائل تحديد النسل و خفض عدد السكان و مازال إنشاء الكباري مستمر

محمد عبد الغفار said...

حكاية الكوبرى ده قديمة اوى وياما اتكلموا عنه وفكروا يشيلوه

المنحنى فعلاً خطر ولم تتم مراعاه اصول هندسيه فيه ولكن ليست كل سياره تمر عليه تسقط من فوقه

فقط المتهورين

أميرة البلطجية said...

كل يوم واحنا ع الكوبرى موسوليني يقولي انه اسمه كوبرى الموت ويسيب مفاصلى الله ياسامحه
وطبعا كل يوم يقولي اسطورة جديدة عن الكوبرى..انه مثلا تصميم الملف مع ندى الصباح اللي بيخلي الكوبرى مزحلق بيتسببوا في حوادث كتيرة لو الواحد طالع بسرعة (وهو الله يسامحه بيطلع بسرعته!)..مرة تانية حكالي انهم كانوا طالبين القبض على المهندس اللي صممه وملاقوهوش (تلاقيه كان مستخبي في حته بيصمم كبرى تاني حكم العباقرة دول لازم يستخبوا عشان يعرفوا يبدعوا..اومااال)..ومرة تالتة يقولي ان الحكومة قالت ان هدم الكبرى يتطلب هدم مسجد الشيدة عائشة نفسه!!! قلتله كفاية كده يا موسو عقدتني..اهو قاعد وبجملت
بس انتي كده حتزعليه مني..لاني يوم البوست اللي فاتت قلتله مش تصدق الحادثة بتاعت الكبرى مطلعتش حادثة..دي حته من الصور وقعت على عربية
يا كوكي بليز اركبي ميكروباصات كتير ومتكتبيش معلومة الا لما يشهد عليها اتنين موظفين مرتبهم لا يزيد بأي حال من الاحوال عن متين جنيه
سلام يا كميل

koukawy said...

سوسه المفروسه 00 دي الحسبه سهله و الحسبه هايله
**************************************
حسن محمود 00 هي موضيعي لونها حزايني من الواقع و لما بلاقي قدامي حاجه فرايحي بقولها مش بخبي اعذرني يا ابو علي كيل يوم بحال
***********************************
شارم 00 شوفت بقي شكلهم كانوا سباكين مش مهندسين
**************************************
يعقوب 00 هي فكره برضو بس هو في انشاء بعد كده
********************************
محمد عبد الغقار 00 انا اول مره كنت اعرف بموضوع الكوبري ده الصراحه
**********************************
بلطجيه 00 متقوليش بقي لموسوليني و خليها في سرك عشان مايفرحش فيكي و انا اصلي متخيلتيش ابدا ان العربيه تقع من فوق

Anonymous said...

اسمعي يا كوكو يا كميل احنا بنتكلم في حادثه مات فيها اربعه خمسه عشره
يا جماعه السلام غرقت و عليها 1300 الحمد لله قدرهم كده يموتوا
بس الموصيبه الي طلع راح فين في ناس اتخطفت و الله العظيم حتي الان محدش يعرف عنهم حاجه يعني الموت ارحم
علي فكره انا اسمي سفاح الفراخ
و مش عارف افتح المدونه بتعتي علشان فيها فيرس
بس هفتحها تاني ان شاء الله
ماااااااااااشي يا كوكو يا كميل
بكره بعد صلاه العصر هعدي اشقر علي المدونه يلا سلام

safa7_karmooz said...

الكوبرى ده مشهووور جدا يا كوكو ...دانتى كده مش عايشة فى الدنيا

كان بيزامل اخوة كوبرى الجيزة ....اللى كانت اتلاتوبيسات بتقع من عليه برضه

اييييييييييييه

انا افتكر مرة زمان كنا هنقع من على كوبرى السيدة عائشة

بس ربنا ستر











والميكروباص اللى هبدنا من ورا هوا اللى وقع

انتى عاملة ايه بقى :D

islam yusuf said...

أنا مش مصدق لحد الوقتى
انك مادرتيش باللبه و اللى فيها
لا هو انتى ام دريتيش مصر بقى عددها 77 مليون
اذا كان ده الرقم الصحيح

و الحكومه مش عارفه تعمل ايه و اللا ايه ....و الله الجماعه دول بيصعبوا عليا اوى
ربنا يكون فى عونهم و يفصلولنا دستور على مقاسنا
حابس حابس ..دستور يا اسيادنا

نرجع مرجوعنا
الدوله قام قالت ايه
احنا ليه بندور على البنيه التحتيه
نبنى و نعمر نبنى و نعمر
هوا فيه ايه ؟
و الشعب ماعندوش دم آعد يزيد برضه
فيعملوا طرق ملووحه أو كبارى أساساتها بايظه
و كل ده لمصلحة المواطن بس هوا مش واخد باله ..ده فى المدى البعيد

فهما شافوا ان من الفضل التوفير فى الموارد البشريه
و دى من أنجع الحلول اللى بتتبعها الدول المتقدمه

islam yusuf said...

سعيد جدا كمان بكلامك فى البوست اللى فات
عن واحات صنع الله ابراهيم

يعقــوب أو فانتــي said...

إحنا محتاجين في كل حي زي ده كوبري و نبتدي نعمل تصفيات بأه و الكوبري اليفوز بأكب عدد قتلى نبتدي نأهله للإحتراف في الخارج

بيتنا القديم said...

انا من البلد دي

انا من البلد دي

بلد ابويا وجد جدي

بلد ابويا وولادي بعدي

انا من البلد دي !!!!!!!!

يا مراكبي said...

كل اللي درسناه في كلية الهندسة مش معمول بيه في أغلب مشروعات الدوله لأنها ببساطة بيتم إسنادها للقطاع العام وكلكم عارفينه .. وهما كمان بيسندوها لمقاولين أصغر وكله بتمنه

وفي الآخر .. سلمولي عالكباري والطرق في بلادنا

Egyptians in the UK said...

مساء الخير يا كوكو....شوفى انا بقى اوعى على الكوبرى ده من ساعة ما تعمل و بدات الحوادث تشتغل عليه ...و ناس كتير قالت زى ما حسن محمود قال ان فى التصميم حاجه غلط...ولكن الدوله مش ماشيه بالعلم ماشيه بالباذنجان
مع تحياتى

david santos said...

Hello!
Thank,s for you work and have a good weekend

3aziz 3eni said...

ببساطة زاوية الانحراف مع مطلع الكوبرى وبتاثير قوة الدفع للعربية لهم تاثير هام جدا فى تشكيل الطريق
يعنى ببساطة لما الناس اللى بتعرف تصمم طرق (ايوة فيه ناس مخصوص لتصميم الطرق) مش مجرد شركة مقاولات تفرش اسفلت وخلاص اول حاجة بيدرس الطريق معمول علشان العربيات حجمها ايه؟ يعنى نقل ملاكى اتوبيسات عجل؟ بعد كدة بيحسب متوسط سرعة السيارة ما بين اعلى سرعة فى اول مطلع الكوبرى او الطريق لاقل سرعة وهى فى اعلى نقطة من الطريق او الكوبرى وبعد كدة بشوية حسابات بسيطة على الكلكوليتر يقدر يعرف زاوية الانحدار وهى الزاوية اللى عندها الطريق يقدر يلف كام درجة وكمان طول الملف والاهم من دة كمان لازم يعمل حساب المنحدر بعد الكوبرى والسرعة القصوى اللى ممكن السيارة توصلها آخر الكوبرى او الطريق وبكدة يقدر يحدد نقطة نهاية الكوبرى وكمان الاشارة اللى بعد الكوبرى بعد كام متر ودة بيحدد اولا امكانية عمل كوبرى او نفق او طريق علوى لان ببساطة ممكن جدا الدراسة تؤكد انه المساحة لا تصلح لعمل كوبرى خشبى للمشاه.

للاسف الكوبرى كان وجودة مهم للاختناق الموجود تحت وفى نفس الوقت المساحة ضيقة جدا وزاوية الانحدار حادة جدا وكمان زاوية الملف وطوله ضيق لابعد حد علشان كدة الكوبرى دة بالزات لايجب ان يستخدمة السيارات اكبر من الملاكى او ذات حمولة اكثر من ١.٥ طن

تقدرى تقوليلى ما هو اسم عسكرى المرور اللى كان واقف فى الاشارة؟


اسف طولت لكن ببساطة عملنا الكوبرى علشان نحل ازمة الزحمة ونسينا ازمة المشرحة

samvet said...

هى البلد دى ملهاش صاحب ولا ايه؟

koukawy said...

سفاح الفراخ 00 كده كوكو من اسمك ده يخاف منك و يترعب عشان انت سفاح الكوكوهات
و يا رب تفتح المدونه بتاعتك قريب
و هستناك بكره بعد صلاة الفجر
بس هو اشمعني بعد صلاة الفجر؟؟؟؟؟؟؟
*************************************
سفاح كرموز 00 ياه ه ه ه انت فين يا عم؟
كويس ان انتوا بخير و موقعتوش تصور ان فعلا مكنتش اسمع عن مشكلة الكوبري ده خالص ؛ متغبش بق عن العشه
*************************************
سوسه 00 معاكي طبعا بس مستنيه ردك عليا
**********************************
اسلام يوسف 00 علي رأيك العدد بقي في الليمون و عايز يقل شويه مفيش نفس
و بمناسبة الواحات مبسوطه انه عجبك
*********************************
يعقوب او فانتي 00 و نسميه دوري الكباري
***********************************
سمسم 00 الله صوتك حلو و انت بتغني
***********************************
يا مراكبي 00 يا سلام انت تؤمر انا هسلملك عليهم كوبري كوبري
*********************************
egyptian in uk 00
دكتور محمد هو البتنجان بقي بكام صحيح
*********************************
david 00 thank u
*********************************
سوكومونوس 00 لأ مطولتش و لا حاجه انا استفدت من الشرح و رأي يبنوا مشرحه اضافيه عشان تستوعب
*********************************
منصوراوي 00 مش عارفه تفتكر