Sunday, March 4, 2007

كوكوهايه وصلت 00

الحلقه اللي فاتت 00

كاكوكاكو وقف يستني كوكوهايه علي المحطه و كوكو الكميل استخبي
الحلقه دي 00
وقف كاكوكاكو علي المحطه و كانت الساعه اتنين و بدأ الوقت يمر
و كل اوتوبيس يعدي يشب كوكو الكميل من ورا الحيطه اللي مستخبي وراها
عشان يبص كوكوهايه نزلت من الأوتوبيس و لا لأ و لما ما يشوفهاش
يشاور لكاكوكاكو انها مش موجوده 00 و زهق كاكوكاكو من الوقفه و رجليه وجعته
راح قاعد علي الرصيف عشان مكانش فيه مكان علي الكرسي بتاع المحطه
و فضل كوكو يراقب الأوتوبيسات من غير ما يزهق خالص 00
و فجأه جه اوتوبيس و حس كوكو بقلبه الكميل بيدق بسرعه و بيخرج من مكانه
لما شاف كوكوهايه نازله علي السلم بتاع الأوتوبيس ؛ و قعد كوكو
يهز كناحه الكميل في الهوا جامد عشان كاكوكاكو ياخد باله انما كاكوكاكو
من التعب كان حاطط راسه بين كناحاته و سرحان و شكله كده نام علي الرصيف
و هو قاعد و فضل كوكو يصوصو و يهز كناحاته كامد و عمل لكاكوكاكو
قرد و كاكوكاكو ولا هنا و كانت كوكوهايه في الوقت ده واقفه مستنيه عشان تعدي الشارع
و جت لكوكو فكره كميله بسرعه و قعد يدور علي الأرض حواليه و لقا زلطايه
صغننه راح ماسكها و لف كناحاته جامد في الهوا بسرعه زي الطاحونه
و راح حادف الزلطه راحت خابطه في دماغ كاكوكاكو اللي راح ناطط من مكانه و اتخض
و بص ناحيه كوكو لقاه عامل يشاور بكناحه ناحية كوكوهايه
و فهم كاكوكاكو انها وصلت بس راح باصص لكوكو الكميل و شاورله اعمل ايه؟
و رد عليه كوكو الكميل بالاشاره برضو روح وراها بسرعه 00
و مشي كاكوكاكو بسرعه عشان يكلم كوكوهايه انما لسه هيندهلها راحت معديه الشارع
و ملحقش كاكوكاكو يعدي وراها و بص لكوكو لقاه بيقوله عدّي بسرعه
و عدّي كاكوكاكو بسرعه و فضل يجري في وسط العربيات و كانت هتخبطه
و في نفس الوقت كان كوكو الكميل بيعدّي برضو الناحيه التانيه معاهم
و جري كاكوكاكو بسرعه ورا كوكوهايه و لما خلاص قرب منها اوي ادّور و بص لكوكو راح
كوكو مشاورله 00 اندهلها 00 اتشجع كاكوكاكو و خد نفس كميييييل اوي
و راح نادهلها 00 كوكوهايه 00
كاكان

7 comments:

Anonymous said...

لالالالا
لا ياكوكو لا
مش كده
زودى الحلقة شوية

أميرة البلطجية said...

انا عارفة كوكوهايه حتعمل ايه
بس مش حقول
لما نشوف انا بعرف اتنأب كويس وله لأ

koukawy said...

حسن محمود 00 مش لازم كوكو يعمل ساسبنس و يخليك تستني علي نار
lol
***********************************
بلطجيه 00 هنشوف يا بلطج

§a§a said...

اانا اتحولت وفقدت الكلام كوكوهايا كوكوهوها كيكي

كل دا حرف ال "ك"

انا حاسس انى ريشت

انا بمزح


بس جميله جدا مشاء الله

koukawy said...

ساسا 00 مدام حاسس انك ريّشت يبقي بس انت كده هتبقي من صحاب كوكو الكميل و مبسوطه جدا ان عجبتك و حاول تقري المغامرات من اولها و تابع بقي كل حلقه جديده

§a§a said...

ان شاء الله يا فندم

heba said...

لا مش هينفع كده يا كوكو .. انت كده بقيت عامل زي الفيلم اللي شغال حلو وبعدين فجأة عند الحدث اللي هو .. فاااااصل إعلاااااني
كاكان