Friday, March 16, 2007

صباحك سكر زياده اوي 000

صحيت النهارده بدري علي غير العاده ؛ و فتحت التليفزيون
برضه الصبح علي غير العاده ؛ فتحته علي قناة او تي في
و كان شغال برنامج اسمه صباحك سكر زياده ؛ و هو شبه برنامج
صحصح معانا اللي كان بيجي علي قناة النيل للمنوعات ؛ و هي نفس الغلاسه
و نفس البرامج تقريبا و نفس ستايل المذيعين بس اهو يبقي الواحد اتفرج00
المهم سأل المذيع المذيعه سؤال 00 يا تري بتحبي تعملي ايه الصبح؟
اللي هي الطريقه اللطيفه اوي زياده اللي بيستعملوها المذيعين في الرغي مع بعض 00
ردت عليه بحب افتح الشباك و اقول يا رب عدّي اليوم ده علي خير
فرد عليها المذيع 00 في ناس كتير بتحب تعمل حاجات مختلفه الصبح
تعالي نروح نشوف الناس قالت ايه 00 و انتقلوا للفقره المسجله
اللي الناس بتقول فيها هي بتعمل ايه الصبح المهم ان ناس كتير قالت كلام عادي
اللي هو زي مثلا 00 بغسل سناني ؛ بلعب رياضه ؛ بشرب نسكافي ؛ بصلي الصبح
بنت واحده قالت 00 انا لما بصحي الصبح اول حاجه بعملها اني بشكر ربنا ان انا لسه
عايشه 000 رجعوا للأستوديو تاني و كان الموقف اللي انا كاتبه عشانه البوست
ده و هو ان المذيعه بصت للمذيع و بمنتهي الأستخفاف و الغلاسه قالت 00
شوفت يا فلان 00 اللي هو المذيع و ضحكت اوي بتريقه 00 شوفت اللي قالت انها
اول حاجه بتعملها انها تشكر ربنا انها لسه عايشه هاهاهاهاهاهاهاها
طبعا انا ركزت اوي للموقف لأن ايه مشكلة انها تعمل كده علي الصبح ؟
و اللي خلاني اركز و استغرب اكتر ان انا شخصيا لما بصحا من النوم بدعي
بالدعا اللي بيقول 00الحمد لله الذي احيانا بعد ان اماتنا و اليه النشور
اعتقد بقي ان المشكله عند المذيعه نفسها و لازم تتعالج من القصور في المعلومات
اللي عندها ؛ ده لو يجوز نطلق عليها معلومات ؛ انما من رأي انها اساسيات
نهاية كده 00 من المفروض ان اللي بيشتغلوا الشغلانه دي يتنقوا علي الفرازه
مش كل من هب و دب كده يشتغلها لأن زي ما معروف ان الاعلام ده اداه
مؤثره بنسبة 1000 في الميه في اللي بيتفرج 00
ياه انا اتكلمت كتير اوي مع ان الموضوع بيتهيألي واضح
سلام بقي 00
بس هقترح اقتراح قبل ممشي ان البرنامج المفروض يعدلوا شويه في اسمه
و يسموه 00 صباحك سكر زياده اوي ي ي ي ي ي و تقيل يموع النفس
سلام

14 comments:

مجهول said...

بصي يا كوكو ياعسل
انتي احسن ليكي متفتحيش التلفزيون تاني
ممكن تموتي من الصدمه
يا عسوله يا كميله
المزيعين و المزيعات الاحياء منهم و الاموات
عباره عن شويه ناس جايباهم الواسطه يشتغلوا
فما بالك بقا ببتوع القنوات الخاصه بتاعت المنوعات
ياخرررررررررررررابي
زمانهم اساسا
ولا ليهم في ثقافه و لا تدين ولا حاجه
حتي ولا ادب
ولا حتي طرق الحوار المحترم
دول شويه تافهين علي حبة عبط وشويه جنان و تخلف
وفاكرينها روشنه
ههههههههههه
والله ميعرفوش ان البنت اللي قالت كده اكيد انضف ميت مره منهم
لانها بتصحي وبتنام وهيا فاكره ان فيه حاجه اسمها ربنا
بس برضه علشان الحق
مش كلهم كده
فيه ناس مقدمين برامج محترمين وبيحترموا اللي بيقدموه
وياريت العيال دول يتعلموا منهم
سلامي ليكي
ولكوكو الكميل
وعايزك تنوري التعليقات عندي
محتاج صوصوتك

محمد عبد الغفار said...

انت زعلانه اوى كده ليه ، حقك تزعلى من نفسك

انت فاكره دول منا ولا بيخضعوا لمقايسنا ولا اهدافهم زى اهدافنا

كلام لوجيك said...

كل حاجه يا كوكو بقت تموع النفس دلوقتى
ياريت على قد المذيعين بس
وبعدين احنا من زمان بنعانى من مشكلة المذيعين المعوقين واصحاب العاهات الفكريه والقصور الثقافى
واصبحنا فى مؤخرة الدول من الناحية الاعلاميه

تحياتى

يعقــــوب .... said...

ده حاجة متزعلش خالص إحنا كده إكتشفنا إن في قناة فاشلة تم إضافتها عشان تغسلنا مخنا....على فكرة أنا لقيت مدونتك صدفه وشكلها دماغ...بس ربنا يثبتلنا عقولنا في الزمن ده يارب

Anonymous said...

ما أقدرش أقول لكوكو الكميل يستاهل اللى جرى ليه

ياكوكو صحتك تهمنا تجيبى ليه لنفسك الضغط والسكر والتخلف

شوفى ياكوكو والله أعلم يهىء ليه الحكومه مخليه الاعلام ده سلاح للردع
أول لما يجى العدو يحتل مصر تروح مشغله ليه الاعلام يروح العدو جايلة تخلف عقلى على طول ويتجنن
وعلى مايبدو الحكومه بتجرب السلاح ده معانا
على كل حال زى ماكل الأخوه المعلقيين قالوا
دول مش مننا دول علينا
ومش المفروض يغيروا اسم البرنامج
المفروض يلغوه من اساسه

سيبك انتى ياكميل من الاعلام
كنت عايز أتناقش معاكى فى فيلم
sweet November
كنت عايز أعرف ليه بتحبيه ؟
انا شفته علشان انتى حاطاه بس
لقيت الفيلم حزين قوى
ايه بقى اللى عاجبك فيه قوى كده؟

وفى الاخر عايزك تشوفى الموقع ده
ماتخفيش بيجيب روقان مش ضغط وشغلى السماعات
:)
ecards.riversongs.com/egreetings/treeoflife.html

ودمتى بكل خير وسلام

heba said...

معلش يا كوكو .. أصل المذيعين دول ساعات مابيلاقوش حاجة يقولوها فبيخرفوا أصل وظيفتهم الكلام ومينفعش يقعدوا ساكتين .. بس برده عايزة أعرف المذيعة كان قصدها ايه لما ضحكت .. يعني مستهينة ومستخفية بالدعاء والبنت وكده .. أما مذيعة غريبة والله .. المهم سيبك انت يا كميل وخلي اليوم يعدي على خير

koukawy said...

يا مجهجه 00 بالظبط اللي انت قولته صحيح حاسه ان مستوي المزيعين الأغلب في النازل
بس تصور انا اصلا مش عادتي اني افتح التليفيزيون و لو فتحته بيبقي علي البرامج اللي شبه اللي في الاستفتاء
او لو فيلم حلو بس
*************************************
محمد غفار 00 صحيح الظاهر ان احنا اللي مش طبيعيين لأن احنا الأقليه حاليا
*************************************
ساكاماكا 00 انت عارف عدوه التخلف انتقلت من مزيعين برامج الأطفال لبرامج الكبار
**********************************
يعقوب 00 ميرسي الحمدلله انك لقيتها و يارب تلاقيها علي طول
و يارب ندعي لمخاخنا و عقولنا
********************************
حسن محمود 00 انا اللي جبت ده كله لنفسي انت ليك حق
اما بالنسبه لفيلم
sweet november
عشان فيه حاله تمثيليه 00
و لا اقولك انا هكتبلك بوست مخصوص عشان الفيلم انت تؤمر بكره تلاقيها
و انا علي فكره دخلت علي السايت
و جميله فعلا و مهدئه للأعصاب
و اول ما دخلت لقيت الساوند تراك بتاع الفيلم شغال و ده بسطني اكتر

koukawy said...

شمس 00 هي كانت مستغربه و شايفه ان الرد عجيب جدا و شبه تريقه يعني
يارب يعدي علي خير

Anonymous said...

بتحرجينى ياكوكو بزوقك وأدبك وأخلاقك العالية

الأمر لله وحده

ياكوكو مش عايز اتعبك
بس فعلا الفيلم حزين حتى نهايته زعلتنى
براحتك ياكوكو مش لازم تعملى بوست مخصوص
كان قصدى بس نناقش حاجه كويسه بدل الاعلام بتاعنا اللى أيدك منه والارض

ودمتى بكل خير
سلام

أميرة البلطجية said...

وزيرى مجهول اتكلم بالنيانة عن سموى في النقطة دي صراحة
ايوة يا كوكو
بيعي التليفزيون
أو ع الاقل متتفرجيش ع الحاجات الخفيفة اللطيفة دي
عشان دي ليهما جمهورها الوهمي اللي بيعد يقول رااائع جمييل يااااااي الولد ده كول واستايل خااالص والبنت دي روشة فزييعععههههه
ومتتفرجيش كمان ع الارزوجأية يا كميل
بصي..هو بعد توم وجيري والعلم والايمان مفيش حاجة تتشاف غير شوية برامج غسيل المخ اللي ع الام بي سي..وطبعا برنامج شريف بتاع الطبيخ عشان ماما متزعلش
بس حقولك حاجة برضه قبل مامشي
بعد التريقة وتهزيأ وفش الغل
العيال دي الحق مش عليها
عشان هم ليهم اسباب في انعدام الثقافة وكل حاجة
وانا مش بلومهم
الدنيا مليانة بلاوي
وفي مكان لكل بلوة
لكن انا بس بعيب على مشغلهم
يعني عندنا شباب في طراوة ماشي
لكن متطلعهوليش في التليفزيون ع الصبح
ولا ع المسا
وفي الاخر يقولوك ايه بتوع الاعلام
اللي مش عاجبه يقلب المحطة
ربنا يهدي
سلام يا كتكوتي

Anonymous said...

هاى كوكو
على فكره فى حاله جهل مسيطره على الاجواء العامه مش ممكن فعلا
اكيد هيا بتصحا من النوم على تليفون من تامر بيصحيها و اول ما تصحى بتدور على الكلب بتعها و تبوسه و تطمن فطر ولا لا
هيا دى حياتهم
ربنا يعفى عنا جميعا ويكون فى عون ولادها اللى يا عينى مش حيفهمو اى حاجه فى اى حاجه
و كمان ربنا يكون فى عون المجتمع اللى فى انتظار اطفال و شباب فى منتهى التفاهه و شكرااااااااا
shimoo

قاسم أفندي said...

حلو اوي البوست ده
انا مشفتش البرنامج بس متخيل الثقالة وتقل الدم
الحقيقة تلات اربع المذيعين عندنا عايزين ضرب النار
هنقول ايه اذا كانو خريجي مدرسة فريال صالح ونجوى ابراهيم
اشكرك واسف ع التاخر في الزيارة

koukawy said...

بلطجيه 00 ياه دي فقعه استني بس ده في بوست بيخمر و جي في السكه علي المزيعين النيو لوك دول
***********************************
شيمو 00 علي رأيك المجتمع مش ناقص تخلف و جهل احنا عايزين نرتقي المفروض النوعيه دي متخلفش
*************************************
قاسم افندي 00 كويس انك مشفتوش لأن كان ضغطك هيعلي و انت مهم في البلوجويين و نشاطك كويس و نخاف عليك
و كوكو خلاص مش مخاصمك بس متختفيش عن العشه لحسن تضلم
ميرسي

miro said...

انا اول مره ادخل المدونه دى بس شكلى هداوم فعلا القناه دى فيها شويه مذيعين مش لطاف خالص