Saturday, March 22, 2008

Jumper


فيلم من انتاج2008 يعرض حاليا في سينما جالاكسي مكان ما انا اتفرجت عليه امبارح في حفله الساعه 7

مقدرش انكر اني استمعت الي حد كبير بالفيلم رغم عدم ميلي لأفلام الخيال العلمي، بس احتمال اللي خلاني مبقاش متضايقه ان الفشار كان حلو ده اولا و ثانيا ان الفيلم بيميل اكتر لأفلام الأكشن اكتر منه فيلم
خيال علمي

يتناول الفيلم فكره غريبه شويه، و هي الانتقال عبر المكان في بربشه عين، و دي قدره خاصه يمتلكها بعض الأشخاص القليلين جدا و طول الفيلم يطاردهم مجموعه تسمي بالبلادينيين ...بقيادة الممثل الأمريكي
و اللي اخترع الات مخصوصه لاصطياد Samuel Jackson
النطاطين بالكهرباء و هما بينتقلوا من مكان لمكان و ده من خلال
الذبذبات اللي بيعملوها خلال انتقالهم من مكان لمكان

باختصار زي ما بيقولوا كده هو فيلم و لا قصه و لا مناظر
بس في نفس الوقت رغم انه فيلم لا يقاس فيه تمثيل و لا اخراج
و لا سيناريو...فهو فيلم خدع بصريه بالدرجه الأولي
و طبعا ارتباط الخدع بالمونتاج يبقي المونتاج بتاع الفيلم كمان مظبوط جدا....نيجي بقي لتفصيص الممثلين

Hayden Christensen
ممثل كندي...احد ابطال سلسله افلام الخيال العلمي الشهيره اللي انا شخصيا مشوفتش منه و لا جزء
هو ممثل وسيم جدامن مواليد سنة 1981 من رأي ان هو ممثل جيد الي حد كبير Star Wars
بس نوعية الأفلام دي مبتظهر امكانيات الممثلين بس نجح المخرج في اختياره لأداء الدور

samuel Jackson

ممثل امريكي غني عن التعريف له رصيد من الأعمال اللي برع فيها
اكتر ما عجبني فيه في الفيلم ده هو الشكل الخارجي للشخصيه او اللوك







Jamie Bell

ممثل انجليزي .. اول مره اشوفه ...و هو الممثل الوحيد في الفيلم
اللي حظه كويس لأنه كان عنده المساحه اللي يبين بيها قدراته و امكانياته التمثيليه...هو ممثل هايل متمكن من نفسه و له حضور عالي جدا رغم عدم وسامته و رغم انه انجليزي فلا تتسم ملامحه بالبرود خالص














Rachel Bilson

ممثله امريكيه...اصابتني طول الفيلم بحاله من عدم الراحه معرفش ليه ..هل لأن وشها مش مريح
و لا لأنها فكرتني بالممثله ثقيلة الظل اللي بقيت تفتح الحنفيه تنزل منها الممثله اللي ملطوعه في كل اعمال التلفيزيون و كل المجلات و الجرايد و الأفلام و البرامج ..منه و لا مؤاخذه فضالي...معرفش بس الحقيقه كانت كل متظهر في لقطه
اقفل نفسيا جدا و كمان الحقيقه معرفش ازاي المخرج مخدش باله من ان الممثله اللي كانت بتعمل دورها في مراحلها العمريه الأولي لا تشبهها بالمره ...المهم برضو عشان الواحد ميظلمهاش مقدرتش احكم هي كويسه و لا ترحمنا و تقعد في البيت و يا ريت تاخد اختها منه معاها
**************
و اخيرا ...فات علي الموؤلف و السيناريست حاجات كتير جدا مش مبرره
و كذا موقف لم يكتمل و بقي مبتور ...و اختفت شخصية صديق البطل فجأه و بدون مبرر
و برضو معرفناش ايه سببب مطاردة البلاديين للنطاطين هل لأنهم حاقدين عليهم ؟؟؟
ام لأنهم طيبين ؟؟؟و لا فعلا للسبب اللي اتقال علي لسان
ٍاكتر من مره...و هو ان قدره التواجد في كل مكان هي قدرة الاله وحده Samuel jackson

و يظل المعني في بطن الشاعر...و تظل فلوس التذاكر في جيب صاحب السينما

سلام

8 comments:

يا مراكبي said...

مافيش الأيام دي هتافات زي زمان كده بتاعة سيمة أونطة عايزين فلوسنا وحاجات كده؟

فين بقى سينما جالاكسي دي؟ أنا آخر حاجة فاكرها سينما التحرير قريب من بيتنا القديم وسينما دريم لاند القريبة من بيتنا الجديد

koukawy said...

يا مراكبي....شوف يا سيدي بالنسبه للهتافات مش هتيجي بفايده لأنك مش هتاخد فلوسك و في نفس الوقت البرادورال غالي و الواحد زوره يوجعوا و يبقي موت و خراب ديار ....اما بقي مكان السينما في شارع عبد العزيز ال سعود في المنيل

Blank-Socrate said...

كل سنه و انت طيبه

خمسة فضفضة said...

السلام عليكم ورحمة الله وبركاته

انا ماليش اوي في تحليلات الافلام والممثلين وكده يعني

بس حبيت اسلم عليكِ واقولك كل سنة وانتِ طيبه

Diyaa' said...

teleporting

هو فعلاً خيال علمي لذيذ ليس إلا البعض بيعتبره تفكيك ذرات الكائن أو المادة مع إعادة تجميع
والبعض الأخر بيعتبره تجميع الموجات الكهرومغناطيسية حوالين الهدف ونقلها لمكان أخر بالكهربا
ومن غير ما أشوف الفيلم فأنا مقتنع بإن مفيش مساحة فيه للتمثيل لأن الحركة أكتر من المواقف والخدع بتغلب علي القصة
علي فكرة الممثلة ثقيلة الظل اللي شبه الممثلة دي تبقي أميرة فتحي
معلش ثقل الظل أنواع والنوع ده أنا متأكد منه
يلا ربنا يعوض عليكي حق التذكرة

Sampateek said...

طيب ما نضرب المؤلف بالنار و تالفي انت اية رايك؟ تحليلك متوازن جدا و ينم على قدراتك الاخراجية الجامدة قوي


يلا شدي حيلك

تحياتي

البنت الشلبية said...

انا جيت اسلم على كوكو الجميل

وشكرا لتحليلك للفيلم ولو انى مش من رواد السينما

ياسر حسين said...

انا شفت الفيلم ده وعجبني جدا وشاهدته اكُر من مرة لما يحتويه من متعة بصرية وخدع
هو فيلم مسلي ليس اكثر
وفعلا بطلة الفيلم شكلها لا يجذب المشاهد
وغير مريحة

تحياتي