Tuesday, June 17, 2008

حكومه روبوتيه

من فتره اضطرتني ظروفي اني اروح الشهر العقاري اللي في منطقة الدقي و بالتحديد في ميدان المساحه
لعمل توكيل عام لأحد المحامين.....و ده كان من شهر مثلا ....مش بعيد اوي
و بعدين رجعت ظروفي اضطرتني اني اروح نفس المكان تاني النهارده لعمل توكيل اّخر
و كانت المفاجأه السعيده اني لقيت مكاتب عاليه جديده و اجهزه كمبيوتر
فقلت لكوكو بيني و بينه....يا حلاوه يا ولاد بقينا نستعمل الحاسب الاّلي في الحكومه يا وله
و الحق يتقال ان الموضوع و فر وقت فعلا و جهد من الانتقال من مكتب لمكتب ...و من امضاء
لتوقيع لختم لخزنه....بقت كل البيانات تنتقل اتوماتيك عبر الكمبيوتر للموظف التاني
و ده فعلا سهل كتير.....اما بقي الشئ الوحيد اللي لم يتغير هو برود و سخافة و سقاعة
موظفين الحكومه اللي علي قلوبهم مراوح، وفي ايديهم اكواب الشاي و في الايد التانيه البقسماط
و اللي بتحكي عن حلم شافته امبارح، و اللي بتحكي عن قميص النوم اللي جابته، و اللا اللي عامله رجيم
حاجه تشل و تجيب الضغط....احنا المفروض مصالحنا تتحرك من 9...انا واصله 8 و نص عشان الزحمه
و الدور ....و دول بدأوا شغل الساعه 9 و ربع مثلا ..........ليه؟؟؟؟عشان اللسان اللي عايز قاطعه
المهم اتمني المره اللي جايه لما اروح .....الاقي مكان الموظفين ...روبوت...يمكن ربنا يسهل
و اهي بقي بدل ما تبقي الحكومه الاكترونيه...تبقي...ألحكومه الروبوتيه

سلاااااااااااااااااااااااااام

6 comments:

نعكشة said...

طب والله كويس ان حصل تطور

يا رب يبقي في باقي المصالح الحكومية

اما بلنسبة للموظفين
فدول انا حطيت صوابعي العشرين في الشق منهم

يعني حقيقي سبحان الله

مفروض يعملوا كشف للي هيشغلوة موظف يتعامل مع الناس
1- صبور
2- بشوش
3- متعاون
4- سريع البديهة و الحركة

و يبقي فيه رقيب عليهم كاميرات ولا حاجة
ماهو فية كعبروتر بقة

و يتابعوا حركة السير
بس حلو ان حصل تطورات

بلدنا بتتقدم يا بهية

سلامون عليكي

ياسر حسين said...

مرة واحد عربيته باظت
وداها للميكانيكي بدل المرة عشرين
في الآخر الميكانيكي قال له
يا بيه العيب عيب سواق
............
يعني الكمبيوتر يا محلاه
المشكلة في الطشت اللي قاعد وراه
:))))))))
خالص تحياتي

عيله مفتريه سابقا said...

يااااااه

تصدقى والله انا مبسوطه

اينعم لسه الموظفين زى مهما وطولت لسانهم لسه موجوده

بس على الاقل بقى فى وقت اقل فى انهم يرخموا علينا

والله حاجه حلوة يا كوكو

ناخد رخامه نص وقت

سلامى يا كميلة

شفقة هانم واحسان بك said...

الف الف مبروك على الكمبيوتر ومعاكى حق عقبال الريبوت....يا شيخة الوظايف كلها هنا تعل واحسن حاجة ان الواحد ما يخرجش من بيته احسن
تحياتى

صحفية روشة said...

هو من ناحية على قلبهم مرواح فهما فعلا على قلبهم مراوح
__________________________________
ميفوتكش البوست الجديد (الفرح اسلامى نص ونص)
__________________________________
للى عاوز يزور لوحه شرف يدخل مدونتى وهتلاقو لينك لوحة شرف فيها
لوحة شرف هى لوحه شرف لكل من دون فابدع وينشر بها افضل بوستات كتبها البلوجرية

بيتنا القديم said...

وقد تم تشكيل لجنة لفحص امنيتك
والتي بدورها انفقست عن لجنة لبحث جدوي البحث من عدمه والتي انفقست بدورها لتقييم البحث الاول وتاكيد الثاني والتي انفقست بدورها عن مجموعة حكماء ردت بالقول: نفسك في روبوت ومالو الحكومة بتمسي عليك وبتقولك يحنن
(:

حينما يشعر مواطنونا بالوعي

هيعرفوا ان احنا متأخرين اوي اوي

يجي سبع تلاف سنة عن الناس اللي

بره حدود مصر..!!