Wednesday, June 25, 2008

كباريه


من كام ساعه حضرت فيلم كباريه في حفلة الساعه 3 بعد الضهر
و الحقيقه اني مندمتش اني نزلت في الحر ابدا، لأن بصراحه الفيلم من رأي
فيلم حلو اوي و مؤثر، و قصه من صميم المجتمع، دراما حيه، و من رأي هكذا تكون المحاكاه
لأن الفن محاكاه للواقع، بس هما هنا فهموا المحاكاه صح، لأن رغم ان الفيلم في كباريه
انما مفيش مشهد يخدش الحياء، و طبعا الممثلين و علي رأسهم خالد الصاوي، فتحي عبد الوهاب
و ماجد الكدواني و دنيا سمير غانم ابدعوا في ادوارهم و طبعا احمد بدير
هو العيب الفني الوحيد اللي يؤخذ علي الفيلم هو مشهد الانفجار ، الخدعه كانت رديئه شويتين
بس غير كده حتي علاء مرسي اللي انا مش بحبه كان عامل دور كويس اوي
و نجح السيناريست انه يبين التناقد الرهيب في شخصيه فؤاد اللي لعبها صلاح عبد الله
صاحب الكباريه، التناقد اللي احنا بنشوفه فعلا في الحياه، هو صاحب كباريه بس بيروح يعمل عمره كل سنه
و مابيشربش خمور و لا سجاير و لا بيعرف ستات غير مراته، و ده من رأي بيحصل فعلا علي مستويات
كتيره اوي في المجتمع، و لم ينحاز السيناريست لفكره ان الجماعات الاسلاميه او اللي
بيعملوا عمليات انتحاريه بأسم الاسلام لم ينحاز لفكرة انهم وحشين في المطلق او كويسين
لأ نجح انه يبين فيهم العنصر اللي دماغه متربسه علي القتل و العنصر التاني
الللي شايف ان المناقشه ممكن تجيب حل، المهم ان في المجمل الفيلم حلو
مبروك للسبكيه و لكل فنان عمل و لو مشهد واحد في الفيلم

سلاااااااااااااااااااااااااااااااااااااااام

10 comments:

david santos said...

Excellent post, my friend, excellent!
Have a nice day

خمسة فضفضة said...

السلام عليكم رحمة الله وبركاته

كل اللي قريته عن الفيلم لحد دلوقتي بيؤكد انه فيلم كويسه

بصراحه استغربت جدا اول مره السبكي يعمل حاجه كويسه

سلام

بارانويا said...

ممكن الفيلم يبقي حلو بجد
بس عرضك ليه

غاية ف السوء

عيله مفتريه سابقا said...

اظن انتى شوقتينا اننا نشوف الفيلم
انا بحب اعمال خالد الصاوى عامة
واظن انى لازم اشوفوا
المشكلة انى مبقدرش احكم على حاجه مش
شوفتها

اكيد هشوفوا واجى اقول رأى


سلامى

koukawy said...

خمسه فضفضه.....لأ السبكي ذكي جدا
كان لازم ينوع و ياكل السوق
******************************
بارانويا...الحقيقه انا مش متخصصه
و لا ناقده فنيه، و لا صحفيه انا مجرد واحده بتفضفض و بتقول رأيها
و علي العموم احترم رأيك بشده
ميرسي للزياره
****************************
عيله مفتريه.....هستناك تتفرج و ترجع

S@G! said...

بارنوايا ده شخص معلول فكك منه
ردوده مشايه على نفس المسار ..عاوز يلفت أنظار
في رأي معالجه ف منتهى الروعه
انا ما شفتش الفيلم بس نقدك ليه مووضعي وحلو اوي
واهم حاجه بسيط ..ودي لغه العبقريه
تحياتى كتير
سلااام

يا مراكبي said...

يعني من الآخر .. الفيلم كان قصة وألا مناظر؟ ممكن ألحقه في مصر لو حصلت المعجزة ونزلت أجازة في آخر أغسطس؟

momken said...

انا لسه ما شوفتش الفيلم

لكن هعلق على حاجه الى هى دور صلاح عبدالله

انا بعتقد ان الانسان مهما سيطر ت عليه اخلاق الشر يبقى دائما بداخله بعض الخير فى باقى الجوانب

اى ان الشر لايستطيع الا السيطره على جانب واحد من حياته كالعمل مثلا
فيكون حازم وقاسى ومترى وبدون اخلاق او بدون ضمير
لكنه من جانب اخر حنون ومخلص ومتدين

وربما يكون شخص بخيل فى عمله جدا وفى بيعه وشراءه لا يسمع باى تسهيلات
لكنه مع اصدقائه واهله منتهى الكرم

دى رائى

البوست حلو وتحيليك جميل للفيلم


تحياتى

Blank-Socrate said...

كويس طمنتينى لانه كنت بافكر احضر الفيلم مع .... و كنت خايف ان يكون فيه حاجات خارجه
ايه اخبارك يا كوكو الكميل اخبار الدنيا معاكى
؟

koukawy said...

سقراط.....ايوه يا عم طب داري علي شمعتك
و بعدين روح و انات حاطط في بطنك بطيخه صيفي