Tuesday, December 16, 2008

الموضوع بقي ريحته وحشه اوي

تكمله لسلسلة التفاهات و الحماقات اللي عندنا في شركتنا المبجله
اكتب هذا البوست اللي يتسم بتميزه عن بقيت اخواته بأنه مش بس يتقري
لأ ده كمان له ريحه ...... و ريحه وحشههههههههههههههههه اوي
**********************
بدأ الموضوع من حوالي سنه، لما طلع قرار بفصل القوات عن حمامات الشركه
بمعني ان فصلوا المصريين في حمام و الأجانب في حمام تاني
ليه يا تري؟؟؟؟؟؟؟ عشان احنا مصريين معفنيين ولاد (تييييييييييييييييييت) ليهم
حق احنا شعب واطي و نتن نيجي ايه احنا جنب الأجانب و العقده اللي هتموت الناس
و طبعا كنت من اول الأصوات اللي اعترضت و فتحت حسها مطالبه بالتراجع
في الكلام اللي يحرق الدم ده، و تحدثت في جميع المحافل بمنتهي الجرأه و لا همني
و اتلم الموضوع و اتقفل و كأن مفيش حاجه اتقالت و بقيت من باب العند ادخل في حمام الأجانب
لمجرد اني متبعش اوامر واحد فاضي مش لاقي حاجه يعملها غير انه يتكلم في الحمام و الناس
تلبي نداء الطبيعه فين ..... و فضلت اتسائل جوه نفسي هل ياتري الأجانب بيلبوا نداء الطبيعه
بطريقه مختلفه و لا حاجه؟؟؟؟؟؟؟ و لا نوعية الفضالات مثلا بالسكر و القرفه؟؟؟؟؟؟
ما هو شئ غريب يعني ما هو فضلات المصري زي فضلات الأجنبي مينفعش يكون فيها عقدة فضلات الخواجه ديه كمان
المهم .... فاتت الشهور و من فتره طلع قرار عن الحمام برضو ... الله ايه يا كوكوهو انتوا شغالين في شركة
مراحيض عامه و لا ايه؟؟؟؟؟؟؟؟؟؟؟؟؟؟؟؟؟؟؟؟؟؟؟؟
و القرار الجديد هو فصل الشركه الي نصفين ، نص يخش الحمام الكبير و النص التاني يدخل الحمام التاني الصغير
و ده محاوله من المفتش كرومبو بتاع شركتناانه يكتشف
مين ابن ستين (تيييييييت) بيوسخ الحمام و يبل الأرض و يخلي الأجانب تشتكي
و بعد مباحثات اكتشفوا ان الوضوء هو اللي بيغرق الأرض مياه!!!!!!!!! يا سلام
و طبعا انا و القليلين من زملائي اللي بيتوضوا مسكتناش و ده لأن الحجه فارغه
و شرحنا و قولنا محدش بيتوضه بره البيت بيحمي نفسه و محدش هيقلع شرابه في الشغل و يحط رجله
في الحوض عشان الوضوء، في اختراع اسمه المسح علي الشراب
لأ و الموضوع كبر و علقوا ورق يرجي تنشيف الحمام بعد الوضوء و ايه بقت حفله
بس كان ما علي ان النهارده رفعت سماعة التليفون علي الأستاذ مديرالشئؤن الاداريه
و اديتله اللي فيه النصيب و سألته سؤال ..... ياتري لو ان الحمام مبلول من الوضوء
تحت الحوض ، طب يا تري تحت التواليت نفسه فيه ميه ليه علي الأرض تفتكر فيه حد بيتوضه بالشطافه؟؟؟؟؟؟؟؟؟؟؟؟؟؟؟؟
و ترجيته انه يقفل علي الموضوع كده لأن الموضوع بقي .... ريحته وحشه اوييييييييي
الي لقاء اّخر مع تفاهه و خنقه من شركتنا العزيزه
سلاااااااااااااااااااااااااااااام

12 comments:

Anonymous said...

طبعا نظرا للأزمة الأقتصادية (اللى من أول يوم دخلت فيها الشركة ماسمعتش غير الكلمة دى)
و بسبب كدة كانوا لازم يفصلوا بين
القوات لية؟؟؟؟؟؟؟؟
علشان مواسير الصرف الصحى بتاع حمام الأجانب هيصرف بسرعة علشان فضلاتهم خفيفة وحمامهم صغير
أما احنا بقى و الله يعين صاحب الشركة فضلاتنا مواسير الصرف الصحى هيهضمها بصعوبة
ole

smraa alnil said...

يا بنتي مش بياكلوا محشي كرنب

ولا بياكلوا كيلو بصل علي الصبح

دة كبيرهم باتيهايا وكرواسايا

برضه العالي عالي

بس حلو اوي منك ان يبقي ليكي كلمة في الشركة

الميكروباص said...

ولله هو أحسن انكم مش هاتدخلوا حمام واحد مع الانجاس دول
لكن الحقيقه أكيد الاجانب اشتكوا
ما انا عارف النظام عندنا في البلد
طالما الاجانب قالوا حاجه يبقى لازم امرهم يطاع

AhMeD RaDy said...

السلام عليكم

عارفة انا جى مدونتك ازاى ؟؟

عن طريق مدونة شيماء (shio online)

يا ترى لسه فاكرها ....!!!؟

مدونتك حلوة على فكرة .. واسلوبك رائع طبيعى وبتتكلمى بلتقائية حلوة

koukawy said...

احمد راضي.... طبعا فكراها و لا يمكن انساها كانت علي طول من المتبعين لمدونتي ربنا يرحمها .... و اهلا بيك نورتني بس ابقي تعالي علي طول
*********************
سمراء النيل ... عيب يا بنتي لازم يبقي ليا صوت حتي لو محدش سمعه بس مينفعش اسكت و خصوصا علي الحاجات ديه
******************
لورنس العرب .... طبعا ما هو تحس الأجانب دول بني ادم و احنا بني حاجعه تانيه استغفر الله العظيم شي يفلق
****************

غمض عينيك said...

كده مش حلو
والريحة بقت وحشه فعلا

:)

كراكيب عادل said...

في حالة وجود اجانب يجوز التيمم

مش شرط وضوء بالمياة

واهو ليكم عذركم برضوووو

كل واحد يجيب معاة حفنة

ههههههههههههههه

يا مراكبي said...

والإدارة طبعا خايفين من زعل الأجانب وبيطبطبوا عليهم

والإدارة دي ما بيتوضوش هما كمان وألا إيه؟

فيه مليون حل وحل ممكن يعملوه غير القرارات السخيفة دي

šσяšαяαα said...

هما سايبين ال.... وبيتشطروا عالبردعة!!!

حاجة غريبة ومستفزة اوى
يعنى خلاص خلصوا القرارات المصيرية فى الشركة ومش لاقيين غير دى ؟

الله يكون فى عونك بجد

هى البلد دى خربانة من شوية

koukawy said...

يا مراكبي .... لأ هما من اخوانا اللي مش بيتوضو اللي بيتوضو قليلين

خمسة فضفضة said...

السلام عليكم ورحمة الله وبركاته

ايه يا كوكو الشركه بتاعكوا دي بعد شويه يجوا يقولوا الاجانب هايقعدوا علي مكاتب والمصريين يقعدوا علي الارض

بس كويس انك مش بتنفذي التعليمات العنصريه دي للي فكرتني بالعنصريه ضد السود في امريكا لما كان ليهم اماكن خاصه بيهم وكافيهات وحمامات واماكن في المواصلات العامه وكانوا بيعاملوهم اكنه جربه

معلش يا كوكو لابد من يوم معلوم تترد فيه المظالم ابيض علي كل مظلوم واسود علي كل ظالم

سلام

vamo said...

ما هي خلاص قربت ماتبقاش بلدنا
وبعدين ايه الريح دي
ياساتر يارب
انا طالع من البوست ده كفاية كده حرام عليكي
نشوف البوست اللي بعده