Monday, December 22, 2008

خدوا الحكمه من افاواه............ الجعانين

و انا راكبه احد المواصلات العامه شغلت جهاز الردار كالعاده لالتقاط
اللي يعجبني من شخصيات محيطه بيا او حورات مسليه او مواضيع مسمعتش عنها قبل كده
و المره دي الموضوع اللي لقطه الرادار كان علي مزاجي جدا لأن انا ابديت رأي فيه قبل كده
في العديد من المحافل و المواقف
******************************************
راجل عجوز غلبان و باين علي وشه المعاناه و الارهاق و السن و ابتسامه خفيفه
تحس انه مصبر بيها نفسه، و قاعد جنبه راجل تاني و يدور بينهم الحوار التالي
الراجل العجوز: ما هو لو كل واحد فكر في غيره مش هيبقي ده الحال
الراجل التاني: مظبوط (و الكلمه دي اللي فضل متمسك بيها طول الحوار) اه مظبوط
الراجل العجوز: يعني انت راجل مقتدر كل سنه بتعمل عمره و حجيت بدل المره تلاته
و ربنا يزيدك موسعها عليك -ماشالله- طب يعني لو تفكر في غيرك
و تزكي من اللي اعطهولك ربنا و بدل ما تعمل عمره كل سنه اعملها سنه و السنه
اللي بعديها طلع حد يعمل عمره او شارك في جواز شاب او شابه او ساعد حد نفسه يحج
ما هو لو كل واحد طلع من اللي مكنزه محدش هيبقي فقير و ده كلام ربنا سبحانه و تعالي
************************
طبعا ده اختصار الحوار اللي كان حاصل .... بس علي طول افتكرت حماتي لما بتقول
لو كل واحد دفع زكاته عمر ما هيبقي فيه مسلم فقير- و ده استنادا للقصه الشهيره بتاعة -
عمرو ابن الخطاب و بيت المال
حقيقي يا جماعه الموضوع مهم اوي و في النهايه محدش بيخادهم معاه
و اهو راجل في الأوتوبيس بسيط حاسس بالمعاناه
و حاسس ان الناس بتفكر في نفسها و بس و اللي معاه مبقاش يدّي
اللي ممعاهوش، و لا المليان بقي يكب علي الفاضي و لا حاجه من الكلام الجميل ده
طب ليه ؟؟؟؟؟؟؟؟؟؟؟؟
و علي رأي المثل
خدوا الحكمه من افواه......... الجعانين

10 comments:

zeroon said...

معلش يعني انتي حاطه الموضوع ده في مكان غلط
ايوة مكان غلط
لانك المفروض تقولي الكلام ده للاغنياء بجد
لا مش دول انا اقصدي اللي معاهم فوق الكام مليون ومعاه عربية ايه وفيلا ايه احنا مبنحسدش
بس دول لو حسوا انه بدل مرسيدس تبقى هونداي ولا تيوتا اي كلام
وياكلوا بالفرق ده كام الف جعان كان الدنيا بجد اتصلحت زي مانتي بتقولي

Foxology said...

والله لو فعلا كل واحد فكر فى اللى حواليه قبل ما يفكر ف نفسه وبس مكنش ده بقى الحال

على الأقل هيبقى فى احساس والأحساس نعمة يعنى مش هنلاقى واحد بيرمى زبالة بيته قدام بيت حد تانى ولا حد عامل فرح وجايب دى جى شغال للصبح والناس عاوزة تنام او تذاكر علشان الأمتحانات و و و و حاجات كتير اوى

تحياتى فى اول زيارة وعلى فكرة اللى خلانى ادخل هو صورة البروفيل لفيلم (ايميلى) للمثلة الجميلة اودرى تاتو :)

esraa said...

والله يابنتي انا موافقه علي كلامك جدا

بس مين بقي اللي يعمل بيه

koukawy said...

Zeroon........
انت زعلت ليه
انا بس موضوع و بشاركه مش بطلب من حد في اللي بيقرا انه يعمل كده ، و احتمال انا اسأت اني اوصل وجهة نظري
انا اقصد التفكير في الغير مش بس بالفلوس
و علي العموم انت نورتني
*************************
Foxology......
اهلا بيك و يارب تفضل تيجي علي طول
و الفيلم انا بحبه جدا
و بحب audry tautou
و بحس ان الفيلم ده بيعبر عني و الصوره بحسها شبهي اوي
******************
اسراء .... اهو نفسنا نشوف

Blank-Socrate said...

كوكو و انا موافق
السنه الجايه بدل ما تطلعى عمره او حج
اطلع انا ااقدس فى القدس
و الدين بيقول ايه ...
:)

لورنس العرب said...

ولله شوفي
هو كلام الرجل مظبوط
لكن اللي أكثر واقعيه كلام حماتك
ان لو كل واحد دفع الزكاه فلن يوجد فقير
عارفه
فيه أصحاب مصانع وشركات مش بيدفعوا الزكان- تعرفي ايه السبب؟
لأنه معتقد انه لما بيدي مرتبات للي شغالين عنده فبكده هو دفع اللي عليه -طبعا من وجهة نظر انه بيحسن عليهم-
طبعا ده شغل ناس بتستهبل
أما عن اننا ناخد الحكمه من افواه الجعانين فده كلام سليم بردو
لأنه لا يشعر بالجعان إلا الجعان اللي زيه
ولهذا السبب لا أثق في اي برنامج حواري يديره أي مذيع عنده فيلا في مارينا ويقف أماما لناس ويتحدث عن المشاكل الصعبه والعشوائيات
وده طبعا لأن عمره ما شرب مياه مجاري!!

koukawy said...

لورنس العرب ... اشكر تحليلك و فهمك لكلامي
....................
بلانك سقراط .... هههههههههههههه
اوعدك انا اول ما اعمل عمره و ربنا يسهلي كده
ابقي اطلعك القدس
بس مش خايف علي عمرك في ظل اللبش؟؟؟؟؟

daktara said...

انت عامله زي
احيانا اتلصص الحوار واتخيل نفسي مشارك فيه
خاصة اذا كان موضوع يستاهل

اول مره ليا هنا بس المدونة شكلها لذيذ

انظر حولك
د. خالد عزب

وميض ابتسامة said...

قليل من الاغنياء هم من يشعرون بمعاناة الفقير .. وغالبا ما يقومون بواجبهم حياله .. وقد يختلف الاسلوب من شخص لاخر ولكن الغرض واحد
اما من يعيشون فى ابراجهم العالية ولا يشعرون بأحد فى الدنيا سواهم .. فهؤلاء قد خسروا انفسهم واخرتهم

ولكن الا تتفقين معى ان الخير قائم وقد نراه واضحا فى شهر رمضان المعظم

عموما نأمل ان يدوم التواصل بين الاغنياء والفقراء بما يحقق الخير للجميع

تحياتى وشكرا لزيارتك

nudy said...

يسمكن فعلا فيه ناس بتعمل كده لكن برده لسه فيه ناس برده بتساعد الناس ومش بتفكر في نفسها بس ولكن بتفكر في اللي حواليها ولسه برده المليان بيكب علي الفاضي