Monday, April 21, 2008

ممثل بكوبون

النهارده وا نا مروحه عديت علي الدقي، بالتحديد من قدام وزارة الزراعه و شوفت اعلان كبير
من كتر ما استفزني قلت يا واد يا كوكو كميل انت انا مش هرتاح و لا هيجيلي نوم الا اما اقولكوا عليه
الاعلان عباره عن .....افيش كبير للفنان ثقيل الظل، سخيف الملامح و تنح الجوارح...مصطفي و لامؤاخذه شعبان
و الاعلان عن الشيبسي اللي اسمه....لايون...كل ده مش مهم اللي استفزني هو اللي مكتوب

اللي يلاقي كوبون النجمه الذهبيه في كيس لايون هيكون سعيد الحظ
و يا خد دور في الفيلم اللي جاي

ياخد دور في الفيلم اللي جاي ي ي ي ي......ايه ه ه ه ه ه ه ه ه ه ه ه هه
هي بقت كده.....و يا تري بقي النقيب هيوافق بعد التصريحات الرهيبه اللي قالها
و يا تري الأخ سعيد الحظ ده بعد كده يشاوروا عليه ويقولوا الممثل ابو كوبون اهه
و بعد كده ممعهوش كوبون مايمضيش العقد......شئ يفور الدم .....اي حد بيعمل اي حاجه
و الناس اللي درست و طلع روحها و عينيها عشان تبقي ناس دارسه و فاهمه دول
يولعوا يا اما هما كمان بقي يسيبوا الدراسه و يجروا يشتروا كراتين شيبسي عشان يلاقوا كوبون

شئ عجيب اوي يا اخونا....العمره بكوبون....الحج بكوبون ....و التمثيل بكوبون....فاضل ايه تاني يبقي بكوبون


ربنا يستر

سلاااااااااااااااام

9 comments:

ياسر حسين said...

الله ينور
ملاحظة قوية وموضوع خطير
أحييكي عليه
لو كان التمثيل بكوبون مكنش حد غلب
:)

خالص تحياتي

على باب الله said...

هو يمكن فكر أنه غالباً مُحبي لايون من الأطفال أحباب الله .. و مسألة الطفل الممثل عندنا يعني مش مشكلة .. مشي حالك .. المهم الواد يكو نضيف و مستحمي و يستحسن يكون شعره أصفر ( ده علي أساس أن ده اللون السائد في شعور المصريين ) و عادي بقي مش مشكلة

-----

سيبك أنت .. مدونتك جميلة بجد

و مصطفي شعبان ممثل تعبان جداً

زي الأغلبية الموجودة حالياً

---

ftafeet said...

ههههههههه
على فكره انا شفت الاعلان ده
وساعتها اتريئنا انا واصحابى وقلنا بقى ياترى الدور ده هايبقى ايه الواحد يعدى من ادام الكاميرا بس ولا ممكن يخلوه يكح ادامها عشان معاه كبون يعنى راجل واصل وداخل الفيلم بكبون
بصراحه ناس تحف زى الافكار بتعتهم

ياسيدى مدقش يعنى هيا جت على الكبون

مدونه لذيذ اوى

نوناااا

محمد عبد الغفار said...

لسه العيش والأرز واللحمة والسمك والفراخ والخضار

خمسة فضفضة said...

السلام عليكم ورحمة الله وبركاته

ولسه ياما هانشوف بكره يخلوا اعضاء مجلس الشعب بكوبون واعضاء المنتخب القومي بكوبون
ويمكن يبقي رئيس الجمهورية بكوبون


تحياتي

يا مراكبي said...

هههههه .. الفكرة دي جديدة جدا

مش ممكن كمية الأفكار اللوذعية اللي في البلد دي

ده إسمه فانتازيا اللا معقول بجد

طيب ولو واحد طلع له الكوبون ومش عايز يمثل .. ممكن يبيع الكوبون ده بسعر كبير؟

سمراء said...

في التسويق كل شئ مباح
زي فكرة الفنكوش
اما عن الممثل ابو كوبون هيقول ايه
هيقول ان يوسف شاهين اكتشفة
وانه كان بيمثل لما كان عندة 5 سنين قدام المرايا او في الحمام
اما عن فاضل ايه يبقي بكوبون
اكيد هيكون كرسي في مجلس الشعب
تحياتي
سمراء

Christa said...

هم يضحك و هم يبكى

Blank-Socrate said...

الحب هيكون بكوبون
و يمكن بالفعل بدء