Tuesday, January 30, 2007

حاجات تفّور الدم 00جزء 3

مش قولتلكوا ان للحديث بقيه 00من غير مقدمات لأني قولت المقدمات المرتين
اللي فاتوا00هدخل في حرقة الدم علي طول00
اولا00 يا تري ليه الناس بتستني بعد ما تنزل من التاكسي تبتدي تتطلع
الفلوس من جيبها 00مش اللي راكب ده عارف من اول ما ركب انه
هيدفع و لا فاكر مثلا ان السواق هيعملهاله بجميله و يعزمه علي الركوبه
شئ غريب جدا 00تلاقي التاكسي وقف في نص السكه او علي ملف شارع
و بينزل سيادة السفير اللي راكب و يقعدوا بعد كده يتاحوروا في الفلوس
مش الناس المفروض تراعي الناس اللي زيّها
ثانيا 00الموضوع ده يخص الجنس الناعم00و هو ان ليه مش كل واحد
يحترم نفسه و يخلي عينيه في وشه و بلاش يبحلق علي كل واحده رايحه و جايه؟
الموضوع ده علي فكره سواء كانت البنت عامله شئ ملفت او مش عامله
في ناس كده اول متشوف بنت تبحلق و عينيها تلزق زي مايكون شاف
كائن فضائي مافيش اخوه علي الأرض 00و الغريبه ان لو الواحده
تحرجه و تبصله بصه محرجه ولا حاجه و لا بتفرق و كأنها بتبص لحد تاني
لو كل واحد فكر في امه او اخته او مراته ؛عمره ما هيبص علي واحده
حتي لو هيا عامله حاجه ملفته لأنه خليه متأكد انه هتتردله00و كما تدين
تدان
ثالثا00سمه عامه عدم احترام المواعيد 00تدّي ميعاد لحد الساعه 7
يجي هو 7 و ربع 7 و نص مش مهم دي كلها نص ساعه مش حاجه
و لما تيجي تتفق مع حد علي ميعاد 00طب هنتقابل الساعه كام00
يعني العصريه كده00طب ما هو يا بشمهندز العصر ده من الساعه 3 لغاية
الساعه 5 و نص00نفضل بقي واقفين مستنين بعض الساعتين دول؟
مفيش قيمه للوقت
رابعا00علي نجوم اف ام00بسمع برنامج بيستفزني اوي ؛ البرنامج عباره
عن بنات و ستات بتتصل بمزيع 00بدون ذكر اسماء00و تقعد تحكيله علي
مشاكلها الشخصيه اوي 00مش دي بس المشكله ؛ انما الطريقه في عرض
المشكله فيها شئ من عدم الاحترام و الدلع علي المذيع 00و تسمع بقي
قصص ليها العجب لدرجة ان وشك يحمر00انا بس سؤالي محدد00
هما ما بيتكسفوش؟
خامسا00يا جماعه حرام عليكوا شوهتوا صورة المحجبات و المنقبات خالص
كلامي ده للبنات الحلوين اللي مرميين في الشوارع في مناظر فظيعه00
تلاقيها متشعلقه في دراع سوبر مان بتاعها و هاتك يا غرام00
تلاقيها لابسه بنطالون هيفرقع من كتر ماهي محشوره جواه00
تلاقيها في شله لطيفه من الشباب و الشابات و ماشيين في الشارع
يهزروا بايديهم و يضحكوا بصوت عالي يصحي الأموات00
تلاقيها بتشرب سجاير00
او ترفع النقاب و تدخل الشيشه من تحته00
طب حرام عليكوا الستات المحجبات و المنقبات المحترمات تخدوهم
معاكوا في الرجلين00
كفايه كده
سلام

8 comments:

أميرة البلطجية said...

تعرفي..انا اول حاجة بعملها لما احط رجلي في وسيلة مواصلات اني اطلع الاجرة..لاني لو استنيت دقيقتين حنسا وابص فجأة الاقي جموع من الركاب بتزعق ..يا جماعة في واحد ناقص مين مدفعش!!

اما عن المذيع الفظيع فنصيحة..متسمعهوش احسن يا بنتي انتي مش ناقصة حرق دم

يا مراكبي said...

إيه المدونة الجميلة دي؟ البوست ده جميل وواقعي كمان

بس إنت مخبي نفسك جامد في البروفيل ليه؟

Amr Ahmed said...

ههههههههههههههههههههه

اسامة منير

ومعانا تليفون نقول الو

وتلاقي يا خويا البت من دول يتتشحتف

وصوتها تحت الارض

يا ما نفسي يكون فيه كوممنت صوت علشان اقلده

دانا باسمعه علشان اضحك

فقر

وتقريبا هي بنت واحدة اللي بتتصل

وموطية صوتها علشان ابوها

ياعم كبر

Unknown said...

يا جماعه انا من اصدقاء كوكو الكميل في الحياه. اولا بالنسبه للاخ يامراكبي انت بس ليك المواضيع المكتوبه مش الشخصيه اللي بتكتب .
اما بالنسبه للموضوع انا هتكلم اولا عن المذيع الهلامي الفظيع المريع الههيع"معرفش طبعا يعني ايه الههيع دي بس مش مشكله" ده واحد ربنا خلقه علشان يتخنلنا في صوته ويلم البنانيت اللي من غير اهل ولا تربيه ولا اخلاق حواليه وطبعا فاكر نفسه ياما هنا ياما هناك وهو كله علي بعضه " قروي ساذج بهرته اضواء المدينه فأخذ يتناول البيبسي بشراهه"
اما موضوع التاكسي ده بيجنني وتحسوا ان كل اللي بيركب تاكسي عارف انه هيتخانق مع السواق علشان الاجره "طبعا انا معايا عربيتي " ولما بركب التاكسي لازم اتخانق لانه مزاج عندي هههههههههه

Unknown said...

كوكو يا كوكو عاوزك تكتبلنا عن الميكروباصات وسواقين الميكروباصات وسمعني سلام علي طول السلام ياااااااااا مممممممعععععععععلللللللممممممممممم

koukawy said...

هو كوكو الكميل تفوته الحاجات دي برضه يا ايهاب هتلاقي عندك بوست جاهز للميكروباصات
بالنسبه لعمرو ميرسي لزيارتك للبلوج
و برافو عليك انك عرفت مين المذيع
lol

heba said...

ياكوكو انت كميل جداً كل المواقف اللي حكيتيها حقيقية جدا جداً وتقريباً حصلي كذا موقف من دول واكتر حاجة فيهم بتحرق دمي اوي نظام البحلقة ده وحش اوي ولا المواعيد وسنين المواعيد كفاية ان الانتظار في حد ذاته ابو الملل ده غير المعاد اللي ورانا اصلاً واللي زمانه فات من زمان اما المذيعين بقى والمتصلات من البنات فحدث ولاحرج بصراحة قلة ادب وموضوع بقى السيئة تعم والحسنة تخص فده ينطبق بالحرف على المحجبات لأن اي واحدة فيهم بتعمل حاجة غلط بتتحسب على كل المحجبات سواء حجاب عادي او نقاب وربنا يكون في عونك يا كوكو لحسن شكلك دمك محروق عالآآآآآآآآآآآخر

Unknown said...

الحاجات اللي قولتيها فعلا صح, وكلها بتحصل كل يوم , وفي مننا كتير بيعمل نفسه مش أخد بالي.
مدونتك حلوه , ربنا يوفقك (: