Wednesday, January 3, 2007

امة اقرأ لا تقرأ 00

اللي اكتب البوست ده هو الموقف اللي
حصل لصاحبتي اللي شغاله في شركة كمبيوتر
و من المفروض ان زمايلها في الشغل ناس
مستواها الفكري كويس 00 و هي من عادتها
تاخد معاها كتاب عشان في فترات الفراغ تقرا
و من يومين قاعده بتقرا 00 و سألها
زميلها 00 يا فلانه انتي بتقري ايه؟؟
ردت 00 بقرا كتاب الأسلام ماهو
للدكتور مصطفي محمود 00 و كانت الصدمه
و الفجيعه لما سألوها و كان عددهم 5 او 6
مصطفي محمود مين؟؟؟؟؟؟؟؟؟؟؟؟؟؟؟؟؟؟؟؟؟؟؟
ردت صاحبتي 00 نعم انتوا بجد مش عارفين مين
مصطفي محمود و لا بتهزروا و ده من باب الدعابه
و اللطافه؟؟ و رد عليها واحد منهم 00
يعني بيبيع ايه مصطفي محمود ده؟
و طبعا هي عند الحد ده كانت و صلت بيها الصدمه
انها مش عايزه تواصل هذا الحوار العقيم
و ردت و قالت 00 الرد الوحيد اللي اقدر ارد بيه
ان ماينفعش حد يقول هي مين الشمس 00
و اما جت تحكيلي كانت قد ايه صدمتها الفظيعه ان
الناس مش عارفه مين مصطفي محمود 00
طب ده حتي مصطفي محمود من العلامات ده انا
مقلتلهمش حد مش معروف كنت هعزرهم 00
الحقيقه يا جماعه انا شايفه ان صاحبتي معاها حق
و انا شايفه ان الجهل و قلة الثقافه ليها اسباب كتير
منها 00
ان اسلوب التعليم التلقيني اللي في مدارسنا و جامعتنا
من الأسباب الرئيسيه علي ان الألف زي كوز الدره
عند اغلب المتعلمين 00
الأهل بيهتموا ان اولادهم يجيبوا مجاميع فظيعه و تكسر الدنيا
اكتر ما يهتموا انهم يثقفوا نفسهم و ليهم حق لحد كبير
و ده لأقتناعهم الشديد بأنها بلد شهادات صحيح
ارتفاع سعر الكتب بشكل خرافي علي سبيل المثال انا رحت اشتري
الروايه الجديده بتاعت علاء الأسواني شيكاجو لقيتها ب30 جنيه
مش كتير دلوقتي عندهم القدره الماديه انهم يدفعوا المبلغ ده
في كتاب هيقولك اجيب بيه عشا احسن 00 و الحقيقه
الواحد يقول اللي ليه و اللي عليه دي احد مزايا مكتبة الأسره
ان الكتب فيها بسعر رمزي بس برضو مش كل الكتب تلاقيها00
اجي بقي للشباب الأمور اللي ماشي علي الموضه و بيشرب
سجاير و بيحشش لو انه بفلوس السجاير و الحشيش دي
اشتري كتاب كل شهر هيبقي احسن من انه يبقي بلاطه
و معندوش فكره عن البطيخ 00
ارجع و اقول في النهايه ان ابراهيم عيسي كان عند حق
و جت منه في الجون لما قال في برنامجه 00 من اول السطر
ان امة اقرأ لاااااااااااااااا تقرأ
سلام

3 comments:

kareem said...

هااااااى

انا قولت ابتدي منين
لان فعلا واضح ان نشاطك مكسف قوي ف المدونة ما شاء الله لا حسد

المهم
دة اول موضوع اقراه عندك بعد تعليق سيادتكم لدي
صحيح هو كان تعليق غريب بس ما علينا

مدونتك شكلها لذيذ
و خصوصا الكتوت اللى بقا عمال يصوص و انا مش عارف الصوت جاي منين
لحد ما وجعلى راسي بس لقيته اخيرا و قفلت العشة علية عشان الصوت
هههههههههههههه

انا معاكي ان الناس مبقتش تقرا
لاسباب كتير قوي زي ما انت زكرتي ف البوست
ربنا يتولانا برحمتة بقا

كريم

koukawy said...

اهلا بيكم يا استاذ كريم نورت العشه جداااا
هو صحيح الكومنت بتاعي كان غريب بس بجد انا افتكرت ان البلوج بتاع واحده بنت و قبل ما اكتب كومنت بصيت في البروفايل اتأكد بس كان سؤال برئ لأن الموقف بالنسبه لي كان مضحك
المهم انا مبسوطه جدا ان انت قريت موضوع قديم انا بتبسط جدا لما حد بيقرا بوستاتي القديمه
و تعالي علي طول بقي زور كوكو

بدون عنوان said...

هو ده اول بوست تكتبيه انا بجد مش مصدق بقالى اسبوع بقرا عندك انت بتجيبى الصبر ده كله منين خصوصا ان فى كام موضوع مفيهمش تعليقات