Wednesday, January 31, 2007

ثقافة الحلل00

شئ عجيب موضوع ارتباط الأكل بكل و اي حدث بيحصل في الحياه
عند الشعب المصري00يعني مثلا اي عيد سواء عيد مسلمين
او اقباط تلاقي الأكل مرتبط بهذا العيد00العيد الصغير فيه كحك
و الكبير فيه لحمه00و عاشوراء فيه عاشوره و مولد النبي
فيه حلويات و شم النسيم فيه فسيخ و رنجه وبصل و الذي منه
و مايمنعش لو فيه اكله تخص عيد الشرطه؛
و عيد العمال ؛ و عيد وفاء النيل 00
ده بخصوص الاعياد00اما بخصوص الفسح و الخروجات
فتلاقي ناس الحلل ما بتفارقهاش و مرتبطين بالحله ارتباط شرطي
هي تسمع كلمة فسحه او جوزها يقولها00احنا بكره هنخرج
يا وليه تلاقيها قامت منومه مغناطيسيا ناحية الحلل و
نايمتهم جانبها في السرير عشان متنساهم بكره
و هي خارجه00حاكم الخروجه من غير حلة المحشي متحلاش
و يا ريتها حله المحشي بس لأ ده المحشي و مكملاته00
و تفرش و تاكل في اي حته و مفيش احترام للمكان اللي هما فيه
لأنهم ياكلوا و يرموا علي الأرض00و فيه اماكن مش لازم
يعني الواحد ياخد معاه اكل 00زي مثلا اي معرض يفتح في ارض المعارض
عايزاكوا تروحوا تتفرجوا00 الناس مش رايحه تستفيد او تشتري
لأ رايحه و معاها الحلل و الشفشق ما هو برضه الواحد يبلع بعد الأكل
نفس الشئ في الجناين الأسماك و الحيوانات 00الخ الخ 00هي القضيه هنا
انه لكل مقام مقال و لكل مكان اكله 00ما هو لو الخروجه هطول
و انت بتجوع بسرعه مثلا خد معاك سندويتش او
بسكوت اهي حاجه سريعه 00
و في نفس الوقت متوسخش الدنيا حواليك و تقوم و تسيبها00
ما هي اصل الدنيا مش ناقصه مهملات و زباله 00و حلل
سلام

2 comments:

أميرة البلطجية said...

فكرتيني! مكلناش عاشورة السنة دي! اظاهر ماما نسيت الحلة

ehab.ibrahim said...

بعد كده لما ادخل لازم اسلم علي اميره الاول لاني اكيد هلاقيكي يا مرمر

بالنسبه للحلل نفسي ف حلة محشي بدنجان وفلفل
والنبي يا كوكو ابقي اعزميني علي محشي

ويجعله عامر
Ehabpop_00@hotmail.com