Wednesday, June 13, 2007

لا تغضب

كنت في منطقة مدينة حدائق الأهرام في منطقة التجنيد في الهرم .. و حصلت في وجودي
هناك جريمة قتل احمد ربنا ان انا مكنتش شاهد عيان و الا كان زماني
في المصحه النفسيه .. الحمدلله .. مش المريع ان حصلت جريمة قتل .. لأ
المريع و المفزع هو السبب اللي حصلت عشانه الجريمه دي .. الموضوع و ما فيه
و ده بعد رواية احد الشهود العيان .. المنطقه دي مدخلش فيها وصيلة مواصلات الا التوك توك
قصدي اللهم احفظنا التوك توك الملعون .. و هعملكوا انشالله سلسله مع مغامراتي مع التوك توك
المهم ان واحد من التكاتك كان ماشي في نص الطريق ووراه لودر من بتوع البنا
اللي هو بيبقي في شوكه كبيره من قدام لرفع الحاجات .. و ده للي مش عارف شكله .. ماشي
اللودر ورا التوك توك زمرله يوسع التاني ما وسعش شدوا قدام بعض شتموا بعض ؛
راح سواق اللودر شايل التوك توك من ورا بالسواق بتاعه و هاتك يا رفع و تنزيل
و مرجحه ؛ و بعدين نزله علي الأرض و نزلوا الاتنين و حصل تشابك بالأيدين
اسفرت عن ان سواق اللودر بأله حاده حديده مثلا كانت في الأرض و هاتك يا ضرب في سواق التوك توك
لحد ما رقده ميت مبيتحركش .. انا عديت قرب مكان الجريمه بعد الجريمه بعشر دقايق
و كان السواق اللي ركبه معاه الميكروباص الخاص شاهد للحادثه و قالي .. تعرفي
حضرتك الناس اللي هناك دول بيصرخوا و بيعيطوا و يلطموا ليه ؟؟
قلت .. ليه ؟؟
قالي .. عشان .. و راح حاكيلي كل اللي حاكيتهولكوا
علي طول جه في دماغي كل الجرايم اللي عملين نسمع عنها بقالنا فتره
و قد ايه زادت و ببجاحه و علي امور اتفه من التفاهه .. يعني مشاده
علي شئ هايف ادت لقتل روح .. يعني كان هيجري ايه لو وسعله السكه و عداه
او كان هيجري ايه لو معداش و خلاص .. حقيقي الغضب يؤدي للقتل .. لا تغضب
مش متخيلين انا قعدت بعديها قد ايه قلبي واجعني و مش قادره افكر كويس
و اللي زاد و غطي الاشاعات اللي بتنتشر زي القمل في الشعر
و اول اشاعه سمعتها .. ده لودر داس علي دماغ عيل موته
و لو استنينه لبكره الصبح مش بعيد نلاقي القصه تطورت و بقت حاجات تانيه
و تغيب الحقيقه و تروح .. لازلت مش عارفه .. ليه و ايه سبب
انتشار الجريمه بالشكل المفزع ده اللي يخلي الواحد يخاف يخرج من البيت
اللهم احفظنا و صبر اهل القتيل و اهالي كل اللي فقدوا اعزاء و احباء
سلام حزايني


5 comments:

مدونة كسبان said...

ضغوط الحياه

يعقــــوب .... said...

أصل الناس افسها تمسك في رقبة حد فمبتلقيش غير نفسها و تمسك فيها
بس جامدة قوي انتشار القمل في الشعر ده
:)

The Groom said...


لا حول ولا قوة الا بالله

ربنا يحميكي ويحمينا ويبعد الشر عن المسلمين اجمعين ويهدي كل الناس دي يا رب

تحياتي لك من ماناساس البلد

koukawy said...

مدونة كسبان .. تفتكر بس و لا تفشي الصفه الاجراميه عند الناس
********************************
يعقوب .. اي خدمه
********************************
the groom ..
ميرسي يا جرووم و يا رب يهدي الناس كلها مش المسلمين بس
**********************************

Diyaa' said...

جيت أسلم برضه ونطمنك إننا عايشين
والجريمة دي..بتثبت إن الناس مبقاش فيها تسامح ولا في صبر ولا في أي حاجة خالص
ربنا يهدي الجميع