Thursday, June 21, 2007

كوكو و المنشور

.. الحلقه اللي فاتت
طيبة قلب كوكو المعهوده و ديته في داهيه
الحلقه دي
وقف كوكو مش فاهم ايه اللي بيحصل بالظبط بس هو احاسيسه المرهفه الكميله
كانت بتقوله و بتوشوشه ان فيه شئ مش كميل خالص بيحصل .. و فعلا
بدأ الموضوع يبان لكوكو لقا كوكو افندي لابس بدله كده و متأيف
و بيقرب عليه و بيقوله .. انت كوكو الغريب اللي دخلت المدينه الصفرا
من ساعه كده صح ؟ رد كوكو .. اه انا دخلت من ساعه بس انا كوكو الكميل مش كوكو الغريب
رد عليه كوكو الأفندي بسرعه .. انت هتهرج معايا مش ده المهم المهم انك في ساعه
حققت نسبة مخالفات مححقهاش حد علي الاطلاق ده انت تدخل موسوعة كوكوز ريكورد
في للمخلفات يا اخي .. رد كوكو .. ليه انا عملت ايه هو انا لحقت انا لسه حتي ملقتش حد يساعدني
و فجأه كوكو الكميل لقا كوكو افندي اول ما سمع يساعدني جاتله رعشه و منقاره اتعوج واترمي في الأرض
و جاتله حاله عصبيه .. و بسرعه جه واحد من اللمه اللي واقفه الظاهر عليه انه
كوكو موظف تحت ايد كوكو افندي و فتح شنطه كبيره و طلع منها حقنه و راح مدخلها في كناح
كوكو افندي اللي تدريجيا ابتدي يهدي و اول ما فاق راح مزعق في كوكو الكميل و قاله .. اوعاك
تقول الكلمه دي في وشي تاني انت فاهم .. راح كوكو بهبله قاله كلمة ايه يساعدني
و فورا راح كوكو افندي جاتله الحاله تاني و مفاقش منها غير بالحقنه برضو .. و اول ما فاق
من غير ما يتكلم فتح شنطته و طلع منها فاتوره و طلع كوكوليتور و قعد يعمل حسابات كتير
في سره و كل شويه يطلع منه رقم كده ؛ و كوكو الكميل واقف و لا فاهم ايه اللي بيحصل
و بعد ما كوكو افند خلص بص لكوكو الكميل و قاله .. نسبه الأضرار اللي انت سببتها
ما كانتش عاليه اوي احمد ربنا و لذلك قررت دولة انا الصفراويه انها تدفعك
مبلغ 300 حبوبورو مخالفات زائد 50 حبوبورو دمغات زائد 5 حبوبورو تمن
المنشور الجمهوري لقيمة مخالفات قوانين الدوله الصفراويه دولة انا لوحدي و لا حد غيري
و فتح كوكو منقاره و مش مستوعب حاجه خالص و مش مصدق ودانه .. و فجأه
من غير ما يحس لقا نفسه متسلم و بيدفع الفلوس اللي عليه .. و علي طول طلع
كوكو افندي ورقه كبيره اوي ملفوفه و مربوطه بشريطه من شنطته ؛ و راح كوكو افندي
فاكك الشريطه راحت اللوحه الملفوفه دي مفروده قدام كوكو علي الأرض و بدأ كوكو الكميل يقرا
قيمة المخالفات .. و كل ما يقرا يذبهل اكتر و اكتر.. و كان ترتيب المخالفات من الأكتر للأقل
انقاذ حد من الموت .. 100 جلده و دفع غرامه 1000 حبوبورو
محاولة انقاذ حد من الموت بنفسك .. 50 جلده و غرامه 500 حبوبورو
محاولة حد من الموت بمساعدة حد ..غرامه 300 حبوبورو
مساعدة حد في العموم .. 400 حبوبورو و كلمتين في جنابك
محاولة مساعدة حد في العموم .. 200 حبوبورو و كلمتين في جنابك اخف شويه
لو حد طلب مساعدتك ووافقت .. 150 حبوبورو و شلوتين
لو ماوافقتش و سمعته بس .. 100 حبوبورو و تاخد شلوت يواديك اسيوط و ترجع مبسوط
لو حد ندهلك و بصيتله .. 50 حبوبورو و قلمين علي وشك علي الماشي
و يراعي في هذه المخالفات ترتيب تكرار المخافه .. يعني لو كررتها يبقي الضعف من كل حاجه
قرا كوكو المنشور و بعدين برمه تاني و ركب الشريطه و من غير ولا صوصوه واحده اداهم ضهره و مشي
و عرف انه هالك لا محاله لأنه شخصيه خدومه بطبعه .. بس قعد كوكو و هو ماشي يقنع نفسه انه لازم يعود
نفسه علي عادات البلد الصفراويه النفساويه دي لحد ما يلاقي بر الأمان .. و مشي كوكو كتير
و يحاول يعتمد علي نفسه في انه يلاقي المعبر للبلاد الخضرا .. و فجأه اسودت الدنيا في وش كوكو
كاكان
السؤال ؟؟؟؟
يا تري الدنيا اسودت ليه ؟؟؟؟؟؟؟؟؟؟؟؟؟؟
سؤال الحلقه اللي فاتت .. مبروك لكل اللي جاوب صح اللي هما
مشمش
البلطجيه
سمسم
شدوا حيلكوا بقي
كاكان









6 comments:

خمسة فضفضة said...

السلام عليكم ورحمة الله وبركاته

هههههههههههههههههههههههه
هههههههههههههههههه
مش قادره امسك نفسي من كتر الضحك
لا مش ممكن قوانين فظيعه احييك علي افكارك الهايله
بجد مش قادره
اعمل حاجه الا اني اضحك
ههههههههههههههه

М€ŝЋМΣŞĦ said...

ايه ده .. الدنيا ضلمت ليه مره واحده

يمكن حد طلب منه مساعده و جالته الحاله بتاعه الكوكو العسكري ؟

مسكين كوكو .. المؤلف عمال يحطه في مواقف عصيبه قوي ..انا بنادي بنسبه من الارباح لكوكو الكميل اهي تأمن مستقبله في المغامرات الخطيره دي

كراكيب عادل said...

انا جاي اسلم علي كوكو الكميل

shams said...

كوكو شخصية اجتماعية جداً على اعلى مستوى وصعب عليه يعيش اناني في وسط الناس دول يارب يطلع من المدينة دي على خير

أميرة البلطجية said...

اى كوكو الكميل
فرحت اوي اني كسبت..كنت عارفة
يووووووووو
وكمان سمسم ومشمش اسدكائى الكميلين
ايه السعادة دي...
لسة مقرتش القصة لاحمد اخويا..الحقيقة الولد لسه بيمتحن ..بس برضه حجيبه يقرا عشان الحلقة دي كميلة جدا
أمممم..الدنيا اسودت ليه؟...اكيد يعني عرف انه محدش حيساعده ولا يعبره طول الرحلة فكتأب..بس قوليله ميكتأبش..المساعد ربنا
الا صحيح اخبار كوكوهاية وصحاب كوكو اللي حبها ايه؟..شكلهم كده هم اللي عملوا العصابة وخطفوا ام مكاوك
مس يووووو

سمسم said...

كوكو
....
طب الحمد لله اني انا كسبت

وكمان بلطجة ومشمش بيه

بس تشريح جميل للنفس البشرية

وفضح الانوية المدمرة

انا وبعدي الطوفان

سؤال الحلقة دي ان الدنيا اسودت

طب اسودت ليه

بصراحة مش عارف ولسه هفكر

تحياتي

وربنا يباركلك

ويجعلو عاااااااااااااااامر