Tuesday, June 12, 2007

الهلاهيل كسيانا

الهلاهيل كسيانا .. و العنطزه مليانا

مشهد بيلفت نظري كتير جدا و يجبرني غصب عن منخيري
اني اتأمله ؛ المشهد هو راجل يوقف الميكروباص او الأوتوبيس
او اي مواصله عشان يركب في ايده سيجاره ماسكها زي متكون هتهرب منه
و قبل ما يحط رجله علي سلمة الميكروباص عشان يركب
يسحب قد 30 نفس دفعه وحده قبل ما يرميها و لا لما يكون الحبيب
مسافر بلد عربي و بيودع حبيبته بشوق حار ؛ منظر الحقيقه
لازم يستوقفني و يخليني افكر هل فعلا السيجاره عند ناس هي الحياه؟؟؟
و ايه اللي هيحصل انه يرمي السيجاره ببساطه ؟؟
يعني مره حصل معايا موقف عصبني جدا ؛ ركبت الميكروباص و اول كرسيين اللي بره كان فاضي و علي جوه
قاعد واحد ماسك سيجاره و هاتك يا دخان معبأ الدنيا ؛ و لما قلتله من فضلك ممنوع التدخين في المواصلات
رد عليا بأسلوب حقير و زعق فيا و لا لما يكون هو اللي علي حق و قالي ببجاحه
ما انتي اللي جيتي قعدتي جنبي .. طبعا انا اكيد مسكتش و فهمته انه انا من حقي اقعد في اي حته
ده ملك عام انما انت مش من حقك تدخن لأن انا لو وقفت بيك عند اول ظابط هتدفع غرامه
و هتاخد اللي فيه القسمه .. بس طبعا كنت بنفخ في قربه مهربده مش مقطعه
و متقفلش الموضوع الا بتدخل السواق لفك الاشتباك
و انه قومه من جنبي خالص الحمدلله .. يا تري ليه السيجاره مهمه اوي عند اللي بيشربها؟؟
لدرجه ان ساعات ستات تحس ان السيجاره درتها .. شئ يضايق و محتاج مراجعة تفكير من اللي بيشربها
ده غير بقي انك تلاقي واحد هدومه مقطعه و شكله باين عليه الغلب و الفقر ماصص دمه
و ماسك في ايده سيجاره !!!!!! شئ عجيب جدا يا سيدي انت فيك صحه ده انت شكلك
اخف مرض عندك سوء التغذيه و كمان بتشرب سجاير !!!!!!!!!اكيد ده مش عقل
و النوعيه دي بتخليني علي طول افتكر المثل اللي بيقول

الهلاهيل كسيانا .. و السجاير خنقانا و قرفانا

سلااااااااااااااام


7 comments:

توتة توتة said...

انا كمان بيستوقفني المنظر دا و لما الميكروباص يوقف لواحد في ايده سجارة بعرف انه هيوقف على الباب شوية يشرب له تلاتين نفس قبل ما يرميها بس بصراحة عمري ما قولت لحد اطفي السيجارة التدخين ممنوع يمكن دي سلبية او خوف

يا مراكبي said...

حلاوة المثل بتاعك اللي إنتي إبتكرتيه إنه ممكن نستخدمه بدل مثل شعبي بنفس المعنى بالظبط بس ألفاظه ما ينفعش نقولها هنا .. ولا في أي حتة أصلا

مجهول said...

هههههههههههههههههههه
اللي بيكيدني ان مكتوب علي العلبة التدخين ضار جدا بالصحه ويسبب الوفاة
واحد صاحبي مدخن
قالي ايه تخيلي
ده يا مجهول قمة التحدي
تحدي ايه بس
ههههههههههههههه

М€ŝЋМΣŞĦ said...

ايام دعوه عمرو خالد لعدم التدخين و التوقف عن السلبيه و مكافحه التدخين

كان كل ما اركب مواصله الاقي بدل الواحد عشره بيطلبو من المدخن انه يسيب السيجاره
بس دلوقتي
مافيش .. الناس نسيت

انا بطلبها سعات
بس كله حسب مزاجي .. لو متعكر
بطلب انه يبطل تدخين .. مش عارف ليه رغم ان ده حق من حقوقي الا اني بعتبره رذاله علي الخلق
:D
لما بقي بكون مبسوط و مظأطط .. بفتح الشباك اللي جنبي و اكبر دماغي .. خصوصا لو السواق هو اللي بيدخن

يعقــــوب .... said...

استخسار...بيستخسر يرميها وبتصعب عليه,ما هو دافع فيها فلوس و قاطع من رزقه و رزق عياله عشان يشتيريها,, وكمان غلوها عليه , يعني كل نفس فيها بفلوس, وكمان لو رماها هيحس انه بيرمي فلوس في الارض او ان في حد أجبره على فعل حاجة غصب عنه, وانتي عارفه بأه المصري مبيحبش حد يتأمر عليه

ياسر حسين said...

الله يخرب بيت التدخين على بيت اللي اخترع التدخين على بيت اللي بيبع الدخان ... أما اللي بيدخن فمش محتاج ندعي له بخراب البيت
لأن بيته مخروب مخروب
صحته ضايعة
وفلوسه بيولع فيها
وأهل بيته بيدخنوا تدخين سلبي
يعنى خراب صحي بالجملة
أحييكي بشده على الموضوع ده
واعلنها مدوية أنني عدو التدخين رقم واحد

خالص تحياتي

تامر حسين said...

والله عندك حق فعلا الناس مبقاش عندها دم
انا عن نفسي بشرب سجاير بس الحمد لله اول مبركب الميكروباص عمري مفكرت اني اولع سجاير مش عشان حاجا غير اني مش عاوز حد يقولي لو سمحت اطفيها او اي موقف كان
ده حتي دلوقتي كلمه لو سمحت مبقتش تتقال اصلا
مع انها كلمه سحريه بالفعل وممكن تفتح ابواب كتيره بس تقولي ايه فعلا زمنا دلوقتي بقي
اعمي بيغني لاطرش
لا الاعمي شايف الاخرس وهو بيشاورلو انه مبيسمعش
ولا الاطرش سامع الاعمي وهو بيغني
وعجبي عليك يا زمن
تحياتي كوكو