Wednesday, April 4, 2007

leon .. the professional


البوست ده بناء علي طلب واحد من اهل العشه يعقوب
طلب مني رأي في الفيلم ده و انا طبعا مصدقت لأن انا من المحبين للفيلم ده
و ده لأسباب كتير اوي هكتبها كمان شويه بس الأول احب اقولكوا شوية حاجات
عن الفيلم 00
الفيلم من انتاج سنة 1994 و بطوله الممثل الجامد اللي اسمه
الأسباني الأصل و المولود في المغرب و ده اللي اداله نوعا ما jean reno
رتوش من الطابع الشرقي و اللطيف في الممثل ده انه بارع جدا في الأدوار
الكوميدي زي الدور اللي قدمه في فيلم
؛ و في نفس الوقت ادواره البوليسيه اللي بيديها طابع pink panther
متميز و بالمناسبه في ممثل شاب عدنا في مصر هنا بحس انه بيقلدوا حتي في تسريحه شعره ؛
و مش هقول مين و الحدق يفهم
و قامت بالبطوله قدامه ممثله من مواليد فلسطين سنة 1981 من اب اسرائيلي
و ام امريكيه و تم تربيتها في واشنطن و هي الحقيقه ممثله كويسه اوي
انا شوفتلها فيلم واحد تاني بس مش فاكره اسمه natalie portman
بس هي ممثله كويسه اوي و ليها اكسنت انجليزي لدرجة ان انا كنت فكراها انجليزيه
نيجي بقي اخيرا للمخرج الجامد اللي عمل الفيلم و استخدم بعض الرمزيه
للربط بين الحاجات و ضدها و هو المخرج الفرنساوي
نجح المخرج في انه يخليك تتعاطف مع البطل رغم انه قاتل اجير luc besson
انما عمله علاقه جامده اوي بزرعه مش بيتنقل من غيرها و كل يوم الصبح يسقيها
و يشمسها و علي طول حططها في قصرية زرع و ده علامه علي عدم الأمان اللي هو عايش فيه
و عدم الاستقرار و في نهاية الفيلم زرعت البطله الزرعايه في الأرض و ده لأن
خلاص بقي في استقرار لأنه هو ادفن و هي قررت تكمل تعليمها ؛
و من الحاجات اللي عجبتني برضو ان المخرج خلي الشخصيه بتاعة ليون دي تشرب
لبن و مايشربش خمور بالمره و ده عجبني لأن انا كان عندي قناعه
شخصيه ان مفيش اي علاقه بين الشرير و الخمور لأن ممكن واحد طيب يشرب خمور
يعني نجح المخرج انه يوصلك فكرة ان الشخص ده مش بيقتل عشان هو شرير او دموي
لأ هو واخدها مهنه بيكسب منها ؛ و التفصيله في الشخصيه كمان اللي عجبتني اوي
انه عمره ماكان بينام في سرير علي طول بينام علي الكرسي و المسدس علي رجله
و المره اللي نام فيها في السرير لما دخلت البنت حياته بدأ يحس بالأمان ؛
و من اكتر المشاهد اللي عجبتني اوييييي مشهد موت البطل و غير ان المخرج
استعمل فيه زاوية كاميرا و اسلوب اخراج متميز كمان المزج في الموسيقي
في المشهد كان هايل و مدي روح للمشهد حلوه اوي 00
في النهايه من رأي ان الفيلم اكتر منه بوليسي هو فيه مشاعر انسانيه جميله
و عزف ثنائي جميل ما بين اتنين ممثلين جامدين و بيحركهم كمان مخرج جامد 00
الغريب ان الممثلين ماخدوش جوايز عن ادوارهم و الجايزه اللي خدها الفيلم
كانت في مهرجان

و كانت جايزة احسن فيلم اجنبي او غريب 00 Czech Lion
في الأخر بعد ما رغيت كتير و خايفه تكونوا نمتوا اقول ان الفيلم
جميل و اهم ما فيه الانسانيات و التنويع علي الأكشن معاها
سلام




18 comments:

Anonymous said...

بالنسبة لموضوع العلاقة بين تعاطى الخمور و الشر هذكرلك الموقف ده
....
كنت بشوف فيلم و انا 6 سنين مع ابويا
الفيلم لعادل امام
بابا هو عادل امام طيب و لا شرير
طيب يا حبيبى
لقيت عادل امام بيشرب خمرة
هى ديه حلوة يا بابا
لا ديه معفنة
مش انت بتقول انه طيب؟
لا عادل امام شرير
و قام طفى التلفزيون
..........
نقدك كان هايل على فكرة و اسف للإطالة

مجهول said...

الفيلم ده بالذات فيلم بحبه جدا
وكنت بحب اغنيه
لمغني امريكي
اسمه
sting
اسمها
l'amour
كانت بتتغني مع لقطات من الفيلم
علي هيئه كليب يعني
علي ما اذكر
ذوقك جامد يا كوكي
اوي اوي يعني
وبناءا علي طلبك عملت بوست جديد
ههههههه
منتظر تعليكك
وصباحك خير

Music Gates said...

الفيلم ده من اكتر الافلام الي حبيتها من وانا صغير اولا انا شفت الفيلم ده ما لا يقل عن 80 مره و كنت ببقي حزين اوي في الحته الي بيتقتل فيها ويقول للشرطي زيزيس فروم ماتيلدا ايهئ اهيهئ دموعي تنهمر كمان الجميل من الفيلم البنت الي يمكن عملت فارق كبير اوي في الفيلم خصوصا انها في سن ال 12 وسن غريب جدا لاحداث وكمان موضوع اللبن والزرعه كان المخرج ابرزه بشكل جيد و لو نلاحظ ان الزرعه او اللبن فيهم الطيبه و يتسموا بالهدوء والصفوه وده يمكن برز الشخصيه بتاعت ليون بيها انه هادئ في عمله لا يحب الازعاج وكمان من صفوة الهيت مانز الفيلم انا ممكن احكي عليه في ميت بوست لاني بحبه اوي اوي اوي وكمان انا عندي سؤال هو انتي ولد ولا بنت انا كنت كل ده فكريك ولد متائخذنيش

يعقــــوب .... said...
This comment has been removed by the author.
يعقــــوب .... said...

ايه ده ايه ده ايه ده كولوا .انا مكنتش متوقع كمية المعلومات ده كلها ..انتي جبتي اعماق تاريخ الفيلم و الممثلين كمان..لا والله برافو عليكي,انتي تستحقي جايزة كبيرة والله..واسلوبك رائع بجد.ربطك ما بين الاشياء ممتاز و في محله.علاقات ما بين الجماد و الانسان و ما بين السلوك و المشاعر..فعلا كده شفت الفيلم بنظرة جديدة..و لا عشان تعرفي انك مش اي حد انك فاهمة و مركزة مع الأخ الباشمهندس النفسه يعيش الشخصية بتاعت التحفه رينو و ده طبعا الأخ المعجزة تيتو بطل الابطال...عموما الفيلم كله حكايو من تصوير لموسيقى لكله..و متنسيش برضه gary oldman الكان بيمثل دور الظابط الشرير...و كنت عاوز اضيف حاجة مش عارف تعرفيها لو لأ إن
jean reno
برضه مصمم مجوهرات مشهور و له أعمال و تحف بتجري وراها مشاهير نساء العالم و ذوقه حكاية.....متشكرين جدا يا افندم على تلبية طلبات الجماهير و انا اتفرجت على الفيلم ده24 أو 40 مرةكده في خلال سنة مثلا
و اخرها من يومين على ال
mbc
معرفش ليه بيكون ممتع على
tv
أكتر ما اني اشوفه على أي بلاير تاني...و شكرا

أميرة البلطجية said...

هو اللي في البوستر ده مش ال بوتشينو؟

koukawy said...

احمد مختار عاشور 00 فعلا فيه ربط ما بين الموضوعين دول جدا و ميرسي ان النقد عجبك
***********************************
مجهول 00 اه فيلم جامد فعلا و ميرسي علي ذوقك انت ؛ و قؤيت البوست
***********************************
copa ..
لأ انا مش ولد و مش بنت انا كوكو كميله
و تحليلك للفيلم انت كمان كويس ميرسي علي المساهمه
نورت العشه
*************************************
يعقوب 00 انا شوفت الفيلم انجليزي و فرنساوي ؛ و شوفته كتير و ماصدقت اول ما انت قولتلي ؛ و ميرسي علي المعلومات
**********************************
بلطجيه 00 لأ ده
jean reno
سموك مش عارفاه ده اللي كان عامل الظابط اللي اسمه هاش في
davinci code

safa7_karmooz said...

يااااااااااااااااااااااه

كل ما ادخل هنا الاقى الافلام اللى بحبها ...سبحان الله

:)

heba said...

كوكو انت تعليقك ونقدك ومعلوماتك هايلة جداً جداً وعندك فكرة جامدة ولك ذوق جميل

أكتر حاجة عجبتني في الفلم انهم مركزوش على ان القاتل بيعمل حاجة شر ولازم نهايته تبقى وحشة .. لأ .. جابو الناحية الإنسانية للشخص بغض النظر عن وظيفته وموضوع النبتة دي كانت بتدل على أصوله وجذوره اللي مفتقدها في أي مكان وعشان كده بيحتفظ بالنبتة معاه دايماً

الفلم روعة وشكراً يا كوكو

Blank-Socrate said...

كوكو انا سمعت الفيلم مرتين و نقدك و تحليلك جميل و فعلا الفيلم انسانى اكتر من انه بوليسي و طبعا من اجمل المشاهد لما دخلت عندة الشقه و كان متردد يفتح كانت جميله

koukawy said...

سفاح كرموز 00 شوفت بقي مش هتلاقي دلع اكتر من كده
*********************************
شمس 00 العفو انتي تؤمريني
*******************************
بلانك سقرلط 00 اه مشهد حلو اوي فعلا و مليان توتر 00 بس عايزه اسألك سؤال انت اسكندراني ؟؟؟؟

Esmeralda said...

انا شفت الفيلم داه

عندنا
الشرير شريرو الطيب طيب اوى و غلبان

مفيش حاجة فى النص

koukawy said...

ازمرلدا 00 ليكي حق مع ان كل الناس متنوعه بين الشر و الخير بس النسب بتختلف بين ايه اكتر و ايه اقل
نورتيني في عشتي المتواضعه

Blank-Socrate said...

اسكندرانى لاااااااااااااااااااااااااااااااااااااااااااااااااااااااااااااااااااااااااااااااااااااااااااااا
انا و بكل فخر صعيدى:)

Yasser Hussein said...

حسب معلوماتى إن البطل فرنسي ولو لاحظنا هنلاقى إن فيلم تيتو بتاع أحمد السقا ملطوش عناصره الاساسية من الفيلم ده ... من جزية تعاطفه مع الطفلة واحساسه الداخلي انه عايز يبقى كويس
لو لاحظنا أكتر هنلاقى أن بطل الفيلم كان نحيف عن اليومين دول وده يخليه أكثر شبه من السقا
الفيلم ده رائع فعلا والموسيقى التصويرية اللي فيه المعتمدة على توزيع الوتريات رائعة
خالص تحياتي

koukawy said...

بلانك سقراط 00
و هو اسكندراني دي شبهه؟
هههههههههههههههههههههههه
هقولك ليه انا قولت كده ؛ عشان انت في الكومنت الأولاني كتبت 00 انا سمعت الفيلم 00 و الأسكندرانيه بيقولوا انا سمعت الفيلم مش شوفته بس
**********************************
ياسر حسين 00
انا كنت فاكراه فرانساوي برضو بس مع بحثي الدقيق عرفت انه مش فرنساوي؛
اما بقي بالنسبه للشبه او للتقليد بما انك عرفت البطل المصي مين يبقي انا ماكنتش ظالماه؛ ده حتي تسريحة شعره

Blank-Socrate said...

برافوا علي قوة الملاحظه
فعلا الصعايدة بيقولوا بردوا سمعت الفبلم
و انا هابتدى اقلق من ذكاء كوكو الكميل
يا ريت كوكو ميزعلش انى مش متابع لكن صدقينى العشه الكميله مكان راحتى فى النت

koukawy said...

كوكو الكميل 00 ده شئ يبسطني ان العشه مكان راحتك ابقي تعالي ارتاح كتير