Thursday, April 26, 2007

افففف تغيير الساعه اففففففف

شئ يحير و يبرجل و يشتت و يلخبط و مبحبوش خاااااالص
و هو تغيييير الساعه 00
افففف شئ ممل ؛ علي حد معلوماتي ان تغيير الساعه ده حصل
في عهد عبد الناصر و ده للتوفير في استهلاك الكهربه و تبقي فترة
النور بتاع ربنا اطول في الصيف او بمعني اصح يبقي الليل اقصر ؛
طب يا تري ايه سبب اننا لحد دلوقتي بنغير الساعه بين الصيف و الشتا؟
بحس ان الدنيا بتتكركب ؛ و مواعيد الصلاه بتتغير و الواحد يبقي مظبط نفسه
علي اوقات معينه تلاقيها اتغيرت ؛ طب احنا دلوقتي خلاص الحمدلله مش في حالة حرب ؛
و لا حالة فقر لدرجة ترشيد استهلاك الكهربه للدرجه دي ؛ طب مانبطل تغيير الساعه بقي
و نثبت علي رأي يا صيفي يا شتوي ؛ يا ابيض يا اسود ؛ و انا كنت ناويه احتجاجا علي الموضوع
ده اني اخلي ساعة العشه علي التوقيت الشتوي و ده لأني بحب الشتا اكتر كمان ؛ بس للأسف
لظروف خارجه عن ارادتي الساعه اتغيرت توموتيكي توموتيكي 00
بس انا هفضل اتسأل ايه يا تري سبب تغيير الساعه ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
سلام

5 comments:

The Groom said...


تغيير الساعة أمر لحفظ الطاقة و كلام حلو كده

أمريكا كمان بيعملوا الموضوع ده

المشكلة في مصر ان الموضوع فقد أهميته ولا عاد في ترشيد طاقة و لا رشيدة

ربنا يستر علينا

تحياتي لك من ماناساس البلد

أميرة البلطجية said...

خنأة بعيد عنك
!!
لا والكركبة لسة جاية..السنة اللي فاتت اضطروا يخلوا تغير الساعة في ميعاد مختلف عشان رمضان..النة دي ان شاء الله تغير الساعة حيبقي اول رمضان..يعني لخبطة في مواعيد السحور والفطار والتراويح..وايييييييه
هيصة
ياااه..رمضان..يا حبيبي يا رمضان..وحشني اويييييييييييييييي
معلش يا كوكي..بجملة الغلاسة بقي..اوهو..بيعملولنا جو تغير
:)
تحياتي

koukawy said...

the groom ..
ياه انا كنت فاكره ان مصر هي البلد الوحيده اللي فيها النظام العقيم ده
*****************************
البلطجيه 00 اه يا شيخه اصلها ناقصه غلاسه اصلا

خمسة فضفضة said...

السلام عليكم ورحمة الله وبركاته

حد يقول كده علي تغيير الساعه
داانا بستناه من السنة للسنة زي العيد كده

بموت في التوقيت الصيفي ياريت السنه كلها تبقي توقيت صيفي


روحي عندي انا كاتبه بوست علي التوقيت الصيفي وهاتلاقي كمان لينك لويكيبيديا بيتكلم عنه وعن بداية تطبيقه في العالم و البلاد اللي بتطبقه


شوال حبوب هدية مع تحياتي لكوكو الكميل

يا مراكبي said...

كل الدول اللي أعرف إنهم بيعملوا كده بيكون عندهم فعلا أسباب مقنعة إلا إحنا .. مالاقيتش سبب مقنع لحد دلوقت

وخصوصا إن السهر بيزيد والإستهلاك بيزيد .. لكن برة مصر الكل بينام بدري جدا .. ده عن تجربة