Monday, April 2, 2007

كوكو و ابو مكاوك

الحلقه اللي فاتت 00
كوكو جاله حلويات المولد
الحلقه دي 00
كوكو حس بريشتين كميلين بيطلعوا فجأه بعد
ما قفل مع كاكوكاكو الكلوفون و هي ريشة 00 التسامح
و ريشة 00 التضحيه
و فرح كوكو اوي ان ريشه كتر ؛ ور اح كوكو يفتح علبة الحلويات
و فجأه رن جرس الكلوفون ؛ جري كوكو الكميل علي الكلوفون و رفع السماعه
و قال 00
- الو ايوه مين؟
- انت كوكو الكميل ؟
- ايوه انا حضرتك مين ؟
- عجبتك حلويات المولد و الكوكو الحلاوه اللي جابتهولك ام مكاوك؟
- الله ايه ده انت عرفت ازاي ان طانط ام مكاوك كابتلي الحاكات دي؟
- ما هو اللي جاتلك دي ماكانتش ام مكاوك الحقيقيه انما واحده احنا
بعتنهالك و لو عايز تشوف ام مكاوك الحقيقه تاني هتلاقيها عندنا
ابقي تعالي انقذها
- طب انتوا فين اكيلكوا ازاي انتوا ليه عملتوا كده حرام عليكوا
- اسكت يا كوكو و اسمعني لو عايز تشوف ام مكاوك تاني دور عليها في الحاجات اللي عندك
و انا هتصل بيك تاني ؛ بس اسمع لو قعدت تصوصو و تحكي للناس و تكلم الكوليس
هنتف ريش ام مكاوك ريشه ريشه و بعدين نغرقها في ميه مغليه نسلقها
و نعمل نصها شاورمة كوكوهات و النص التاني بانيه 00 انت فاهم
- طب استني بس اسمعني استني 00 تيت تيت تيت تيت
ده قفل السكه يا نهاري ايه ده يا كوكو يا كميل دي حتي طانط ام مكاوك طيبه
طب ما يمكن يا كوكو حد عامل فيك كدبة ابريل ؛ يبقي لازم اروح اشوفها في شقتها بنفسي
*********************************************
طك طك طك 00 يا طانط ام مكاوك انتي هنا ؟ يا طانط 00
و خرج انكل ابو مكاوك و شكله قلقان و حزين و ريشه الأبيض العجوز
منكوش و ووشه شكله مش مغسول 00
انت جيت يا كوكو يا كميل الحقني طانطك ام مكاوك من ساعة ما خرجت الصبح عشان تشتريلك
حلويات المولد مارجعتش و انا اتصلت بكل الناس اللي نعرفهم و هي ماراحتلهمش
عارف لو رايه و سكينه كانوا لسه عايشين كنت قلقت ليكونوا هما زي ما بيجيبوا في المسلسل
الضهر و لا تفتكر يا كوكو يكون سفاح المعادي و لا سفاح كرموز و لا سفاح الفراخ الكوكوهات
انا دماغي هتفرقع و قلقان عليها اوي انا خايف لحسن تروح مني زي مكاوك الله يرحمه
يوه ه ه ه ؛ انا اسف يا كوكو نسيت اقولك ادخل 00
و دخل كوكو و قعد مع انكل ابو مكاوك اللي سابه و قام يعمله حاجه يشربها
و بص كوكو علي البراويز اللي محطوطه في الصاله و فيها صور بيتفرج علي
صور طانط ام مكاوك و في صوره لفتت نظره و قرب اوي و سمع ابو مكاوك وراه
بيقوله 00 ايوه ده انت اللي في الصوره ده بعد ما اتوفي مكاوك و سافرنا
نصيف في الريشه السخنه و اصرت ام مكاوك انك تيجي معانا ؛ شوفت نفسك
بالمايوه ؛ ده ليك صور كتير اوي يا كوكو عندنا استني اما اجيبهالك
دي ام مكاوك اصلها كانت مسمياك مكاوك التاني 00
و راح ابو مكاوك يجيب الألبوم و قعد كوكو و مسك في ايديه الماج و خد شفطه من
الشاي الأخضر في انتظار الألبوم بلهفه و شوق و انبهار 00
كاكان
******************************************************
للأسف محدش كسب في الحلقه اللي فاتت لأن اغلب الأجابات كانت بتتوقع ان
كوكوهايه هي اللي تتصل 00
علي العموم عندكوا اجازه الحلقه دي مفيش سؤال 00
ممكن تسألوني انتوا لو عايزيييييييييين
ههههههههههههههههه



8 comments:

يعقــــوب .... said...

ده ايه الحاجات الجامده ده..الموضوع احد مجرى تاني خالص..شكلك كده بتتفرجي على
mbc action
كده بأه الجد ابتدي......
.............
في فيلم اسمه :
lion for Jean Reno

بما انت ناقده كبيرة ,اشوف رأيك في الفيلم ده

The Groom said...


كوكو الكميل

اسف على الغيبة

بوست ظريف ووالله اسلوبك لطيف في القصة

حزنت جدا على أم مكاوك و خوف الكوكو عليها

مستني اعرف بشوق

شكرا لك

تحياتي من ماناساس البلد

ibn nasser- ابن ناصر said...

هو أنا بكلم كتكوت فعلا!!!؟

شادي فايد said...

انا داخل نت مخصوص والله عشان ادخل مدونتك

انا اسف قوي
انا مقصر معاكي خالص
بس انا عندي مشكلة كبيرة في جهازي
وما بدخلش نت خالص

واول ميتصلح اول حاجة ح اعملها ح ارد ع التاج بتاعك

بس انت قولتي كان في تاج تاني

فين ده؟؟؟


سلاماتي و احترامتي

أميرة البلطجية said...

انا مازلت مصرة ان كوكو بيتبعت

koukawy said...

يعقوب 00 هو ده الاخلااج الجامد انك تعمل ما لا يتوقعه اغلب اللي بيتابع
اما بالنسبه للفيلم هعملك عنه بوستايه انا بحب الفيلم جدا
***********************************
the groom ..
تحياتي لكل مناساس البلد و كان نفسي اعملهولكوا مسلسل تتفرجوا عليه الساعه سابعه و انتوا بتاخدوا الشاي انما ربنا يسهل بقي
متغيبش تاني لحسن كوكو بيزعل و ياخد علي ريشه
***********************************
ابن ناصر 00 امال ايه ده كوكو الكميل اللي مفيش منه ؛ اهلا بأول كومنت ليك
******************************
شادي فايد 00 ياه ه ه ه ربنا يخليك و يشفيلك الكومبيوتر المريض
خش علي الكاتيجوري بتاع التاج و هتلاقيه ؛ المهم مستنياك ترجع
***********************************
بلطجيه 00 مش هقولك
هيهيهيهيهيهي

يعقــوب أو فانتــي said...

ياريت..هستنى البوست ده ...عشان اضمه لمجموعة الفيلم ده أصلي عامله ركن خاص عندي في المكتبة

shams said...

أحلى حاجة فعلاً يا كوكو انك دخلت في حاجة مش متوقعة أبداً بس أنا فعلاً عايزة اسألك

ازاي كوكو معرفتش طنط ام مكاوك ؟
وليه الكماعة اللي خطفوا طنط ام مكاوك مبلغوش ابو مكاوك علشان ييجي هو ينقذها ؟ عالأقل ده جوزها واقرب الناس ليها وكوكو نظرياً ميقربلهاش حاجة !!!! يللا بقى جاوب يا كميل